1. Mmalu kayi avua menzekele bayidi ba Yezu adi enzekela Bantemu ba Yehowa lelu?

 BAKAYISHA ne tshisumi. Mioyo yabu yakabasaka bua kuitaba diambuluisha ne bulombodi bua nyuma muimpe. Dibakengesha kadiakabapuwisha to, ne Nzambi uvua ubabenesha bikole. Anu muvuabi bua bayidi ba Yezu abu, ke mudibi kabidi bua Bantemu ba Yehowa lelu.

2, 3. Ntshinyi tshidi nangananga tshikoka ntema yetu mu mukanda wa Bienzedi?

² Kakuyi mpata, malu mimpe a bungi adi mu mukanda wa Bienzedi bia Bapostolo mmakukankamije ne mmakoleshe ditabuja diebe! Mmukanda wa pa buawu, bualu wowu ke mukanda umuepele udi mufundisha ku nyuma udi ne malu a bayidi ba Yezu.

³ Mu mukanda wa Bienzedi mudi mêna a bantu 95 ba mu matunga 32, mu bimenga 54, ne mu bidiila 9. Mudi miyuki mimpe ya bantu bonso, ya bena mu bitendelelu bavua ne diambu, ya bena tshididi ba lutambishi, ne ya bantu bavua bakengeshangana. Kadi mudi nangananga malu a bana betu ba mu matuku a bapostolo bavua batuilangane ne ntatu ya mu nsombelu ne bayishe lumu luimpe ne tshisumi.

4. Bua tshinyi tudi tudiumvua pabuipi ne bantu bu mudi mupostolo Paulo, Tabita, ne bantemu bakuabu ba lulamatu ba kale?

⁴ Kukadi bidimu bitue ku 2 000 katshia Paulo ne Petelo (bavua bapostolo ba dikima), ne Luka, munganga munangibue, ne Bânaba tshipapayi, ne Stefano uvua ne dikima, ne Tabita muena malu malenga, ne Ludia muakididi wa benyi, ne bantemu bakuabu ba lulamatu ba bungi benza mudimu wabu ne tshisumi. Nansha nanku, tudi tudiumvua pabuipi nabu bualu tudi tuenza mudimu uvuabu pabu benze wa divuija bantu bayidi. (Mat. 28:19, 20) Tudi ne diakalenga dinene dia kuwenza!

5. Mmuaba kayi wakatuadijila bayidi ba Yezu kuyisha?

⁵ Ela meji a mudimu uvua Yezu mupeshe bayidi bende. Uvua muambe ne: “Nenupete bukole panupuekela nyuma muimpe, ne nenuikale bantemu banyi mu Yelushalema, mu Yudaya mujima ne mu Samalea,  too ne ku miaba ya kule menemene ya pa buloba.” (Bien. 1:8) Tshia kumpala, nyuma muimpe wakapetesha bayidi abu bukole bua kuikala bantemu “mu Yelushalema.” (Bien. 1:1–8:3) Tshibidi, nyuma wakabalombola, bobu kuyisha “mu Yudaya mujima ne mu Samalea.” (Bien. 8:4–13:3) Pashishe bakatuadija kuya ne lumu luimpe “too ne ku miaba ya kule menemene ya pa buloba.”​—Bien. 13:4–28:31.

6, 7. Bua bidi bitangila dienza mudimu wetu, ndiakalenga kayi ditudi tuetu nadi kupita bena Kristo netu ba mu matuku a bapostolo?

⁶ Bena Kristo nebe ba mu matuku a bapostolo kabavua ne Bible mujima uvuabu mua kubadila bantu mu buambi to. Too ne kumpala kua 41 P.Y., kabavua banji kufunda Evanjeliyo wa Matayi to. Paulo wakafunda mikanda yende kumpala kua kujikijabu difunda mukanda wa Bienzedi, bu mu 61 P.Y. Kadi bana betu abu kabavua ne Mifundu minsantu yonso mitentulula anyi mikanda mishilashilangane ivuabu mua kupesha bantu bavuabu bayisha to. Kumpala kua bena Kristo bena Yuda kuluabu bayidi ba Yezu, bavua bateleja muvuabu bababadila Mifundu ya tshiena Ebelu mu nsunagoga. (2 Kol. 3:14-16) Kadi bobu pabu bavua ne bua kuikala balongi ba dilambu, bualu pamuapa bivua bibalomba kukuata mêyi a mu Mifundu mu mutu.

⁷ Lelu ba bungi ba kutudi badi ne Bible ne mikanda yetu ya bungi. Tudi tuvuija bantu bayidi, tubayisha lumu luimpe mu matunga mapite pa 240 ne mu miakulu ya bungi.

8, 9. a) Bayidi ba Yezu bavua benze tshinyi ku diambuluisha dia nyuma muimpe? b) Mupika wa lulamatu udi upatula tshinyi ne diambuluisha dia nyuma muimpe?

⁸ Pavua Yezu mupeshe bayidi bende mudimu wa kuikala bantemu bende, wakabambila ne: “Nenupete bukole panupuekela nyuma muimpe.” Pavua nyuma muimpe anyi bukole buenzeji bua Nzambi bubalombola, bavua ne bua kulua kuenza mudimu bu bantemu pa buloba bujima. Petelo ne Paulo bakondopa mabedi, kuipatabu bademon, kujulabu too ne bafue ku diambuluisha dia nyuma muimpe! Kadi bukole buvua nyuma ubapetesha abu buvua ne tshipatshila tshia mushinga wa bungi, tshia kufikisha bapostolo ne bayidi bakuabu ku dipetesha bantu dimanya dijalame diabapetesha muoyo wa tshiendelele.​—Yone 17:3.

⁹ Mu dituku dia Pentekoste wa mu 33 P.Y., bayidi ba Yezu bakakula “mu miakulu mishilashilangane, anu muvua nyuma ubapesha mushindu wa kuakula.” Ke bobu kufila bumanyishi bua “malu mimpe menemene a Nzambi.” (Bien. 2:1-4, 11) Katuena tuakula mu miakulu lelu to. Kadi mupika wa lulamatu udi upatula mikanda ya malu a mu Bible mu miakulu ya bungi bualu nyuma wa Nzambi udi umuambuluisha.  Tshilejilu, tudi tupatula miliyo ne miliyo ya Tshibumba tshia Nsentedi ne Tabulukayi! pa mabeji ngondo yonso; ne mu site wetu wa jw.org, mudi mikanda idi yumvuija malu a mu Bible ne filme mu miakulu mipite pa 1 000. Bionso ebi bidi bituambuluisha bua kuambila bantu ba mu bisamba bionso ne mu bisa bionso ne mu miakulu yonso “malu mimpe menemene a Nzambi.”​—Buak. 7:9.

10. Katshia ku 1989, ntshinyi tshikadibu benze mu dikudimuna dia Bible?

¹⁰ Katshia ku 1989, mupika wa lulamatu mmudifile mu mudimu wa dipatula Bible wa Nkudimuinu wa bulongolodi bupiabupia mu miakulu ya bungi. Bakadi bamukudimune mu miakulu mipite pa 200, bamupatule pa mabeji miliyo ne miliyo, ne batshidi benda bamupatula. Anu ku bukole bua Nzambi nkayende ne bua nyuma wende ke kudi malu aa enzeka.

11. Ntshinyi tshikadi tshienzeke bua dikudimuna dia mikanda yetu?

¹¹ Bena Kristo badisuile binunu ne binunu ba miaba ne mu matunga mapite pa 150 ke badi benza mudimu wa dikudimuna au. Kabiena ne bua kutukemesha to, bualu kakuena bulongolodi bukuabu budi nyuma muimpe ulombola bua “kufila bumanyishi buonso menemene” pa buloba bujima to. Bumanyishi ebu budi butangila Yehowa Nzambi, Mukalenge wende Masiya, ne Bukalenge bukadi bujadika mu diulu!​—Bien. 28:23.

12. Mmunyi muvua Paulo ne bena Kristo bakuabu bakumbane bua kuenza mudimu wa difila bumanyishi?

¹² Pavua Paulo uyisha bena Yuda ne bantu ba bisamba bikuabu, ‘bantu bavua bakaje muoyo wabu bimpe bua kupeta muoyo wa tshiendelele bakalua bena kuitabuja.’ (Bien. 13:48) Luka mmujikije difunda mukanda wa Bienzedi ne mêyi a ne: Paulo udi ‘uyisha Bukalenge bua Nzambi wamba malu onso patoke, kakuyi tshivua tshimupangisha.’ (Bien. 28:31) Mmuaba kayi udiye uyisha? Mmu Lomo, tshimenga tshikulu tshia bukokeshi bua pa buloba bujima! Bu muvua nyuma muimpe wa Nzambi wambuluisha bayidi ba Yezu ba ku kale ne ubalombola, bakenza mudimu wonso wa diyisha, ku miyuki ivuabu benza ne mu mishindu mikuabu.

13. Bua tshinyi tudi ne bua kusambila padibu batukengesha?

¹³ Pavuabu bakengesha bayidi ba Yezu ba ku kale, bavua balomba Yehowa dikima. Tshiakenzeka ntshinyi? Bakuwujibua ne nyuma muimpe, kupetabu bukole bua kuamba dîyi dia Nzambi ne dikima. (Bien. 4:18-31) Tudi petu tulomba Yehowa meji ne bukole bua tutungunuke ne kuyisha nansha mudibu batukengesha. (Yak. 1:2-8) Bu mudi Yehowa utubenesha ne utupesha nyuma wende, tudi tutungunuka ne kuyisha.  Kakuena tshidi mua kuimanyika mudimu wa difila bumanyishi to, ni mbuluishi anyi dikengeshibua dikole. Padibu batukengesha, mbimpe tulombe Yehowa nyuma muimpe, meji ne bukole bua tuambe lumu luimpe.​—Luka 11:13.

14, 15. a) “Dikengeshibua divua dijuke bua Stefano” diakapatula bipeta kayi? b) Mmunyi muakafika bantu ba bungi ba mu Sibérie ku dimanya bulelela mu bikondo bietu ebi?

¹⁴ Stefano wakayisha ne dikima kumpala kua kumushipabu kudi bena lukuna bende. (Bien. 6:5; 7:54-60) Pakatuadijabu ‘kukengesha bayidi bikole’ tshikondo atshi, buonso buabu bakatangalaka mu Yudaya mujima ne mu Samalea, kadi bapostolo bakashala. Kadi kabiakimanyika mudimu wa diyisha to. Filipo wakaya mu Samalea bua ‘kuyisha bualu bua Kristo’ ne kuakapatuka bipeta bimpe. (Bien. 8:1-8, 14, 15, 25) Bible udi kabidi wamba ne: “Bantu bavuabu batangalaje bua dikengeshibua divua dijuke bua Stefano bakaya too ne ku Foinike, ku Kupulio, ne ku Antiokia, kadi bavua bamba dîyi anu kudi bena Yuda. Kadi bamue bantu ba munkatshi muabu ba ku Kupulio ne ku Kulene bakalua ku Antiokia ne bakatuadija kuakula ne bantu bavua bakula tshiena Greke, bamanyisha lumu luimpe lua Mukalenge Yezu.” (Bien. 11:19, 20) Dibakengesha ke diakenza bua lumu luimpe lutangalake tshikondo atshi.

¹⁵ Mu bikondo bietu ebi, bualu bua muomumue buakenzeka mu Union Soviétique wa kale. Bakakuata Bantemu ba Yehowa binunu ne binunu, kuyabu nabu mu Sibérie nangananga mu bidimu bia 1950. Bu muvuabu babatangalaje mu misoko ya bungi, lumu luimpe luakatangalaka mu ditunga dialabale adi. Kakuvua Bantemu bungi nanku bavua mua kupeta makuta makumbane bua kuenza luendu lua kilometre binunu 10 bua kuya kuambamu lumu luimpe to! Kadi mbulamatadi nkayende ke uvua mubatumamu. Muanetu mukuabu wa balume udi wamba ne: “Bualu bua dikema, banene ba mbulamatadi nkayabu ke bakambuluisha bantu ba mu Sibérie bungi tshianana bua bafike ku dimanya bulelela.”

16, 17. Mukanda wa Bienzedi udi utupetesha tshijadiki kayi tshia muvua Yehowa mubeneshe mudimu wa difila bumanyishi?

¹⁶ Kakuyi mpata, Yehowa wakabenesha bayidi ba Yezu abu. Paulo ne bakuabu bakakuna ne kumiaminabu mâyi, “kadi Nzambi uvua wenda ubikolesha.” (1 Kol. 3:5, 6) Malu adi mu mukanda wa Bienzedi adi ajadika ne: didiunda edi divua dienzeka bualu Yehowa uvua ubenesha mudimu wa diyisha. Tshilejilu, “dîyi dia Nzambi diakatungunuka ne kumuangalaka, ne bungi bua bayidi buvua anu buenda buvulangana bikole mu Yelushalema.” (Bien. 6:7) Pavua mudimu wa diyisha wenda  utangalaka, “tshisumbu tshiakabuela mu tshikondo tshia ditalala mu Yudaya mujima, mu Galela, ne mu Samalea, tshienda tshikoleshibua; ne bu muvuatshi tshienda mu ditshina dia Yehowa ne mu busambi bua nyuma muimpe, tshivua tshienda anu tshivulangana.”​—Bien. 9:31.

¹⁷ Bantemu ba dikima bakayisha bena Yuda ne bantu bavua bakula tshiena Greke mu Antiokia wa mu Sulia. Bible udi wamba ne: “Bualu bukuabu, tshianza tshia Yehowa tshivua nabu, ne bantu ba bungi bakalua bena kuitabuja, kulondabu Mukalenge.” (Bien. 11:21) Bua bidi bitangila didiunda diakalua kuenzeka mu tshimenga atshi, Bible udi wamba ne: “Dîyi dia Yehowa diakatungunuka ne kuya kumpala ne kutangalaka.” (Bien. 12:24) Bu muvua Paulo ne bantu bakuabu kabidi bayishe bantu ba bungi ba mu bisamba bikuabu, “mu mushindu uvua uleja bukole, dîyi dia Yehowa diakatungunuka ne kuya kumpala ne kuikala ne bukole bua bungi.”​—Bien. 19:20.

18, 19. a) Ntshinyi tshidi tshitujadikila ne: “tshianza tshia Yehowa” tshidi netu? b) Fila tshilejilu tshia mudi Yehowa wambuluisha bantu bende.

¹⁸ Tudi batuishibue ne: “tshianza tshia Yehowa” tshidi netu lelu. Ke bualu kayi bantu ba bungi badi benda balua bena Kristo ne babatijibua bua kuleja mudibu badilambule kudi Nzambi. Bualu bukuabu, anu bu Paulo ne bayidi bakuabu ba bikondo biende, tuetu petu lelu tudi tunanukila mu buluishi anyi mu dikengeshibua dikole ne tutungunuka ne mudimu wetu anu bualu Yehowa udi utuambuluisha ne utubenesha. (Bien. 14:19-21) Yehowa Nzambi neatungunuke ne kutuambuluisha. “Maboko ende a tshiendelele” kaakupanga kutuambuluisha mu ntatu yetu yonso to. (Dut. 33:27) Katupu muoyo ne: Yehowa kakulekela bantu bende bua bualu bua dîna diende dinene to.​—1 Sam. 12:22; Mis. 94:14.

¹⁹ Mona bualu budi bulonda ebu: bena Nazi bakela muanetu Harald Abt mu kamponyi ka dienzejangana midimu mikole ka Sachsenhausen mu mvita mibidi ya pa buloba bujima. Mu ngondo 5 wa 1942, bampulushi bakaya kua ba mukajende Elsa, kunyengabu muanabu mukese wa bakaji, ne kukuatabu Elsa. Bakamutuma mu tumponyi tushilashilangane. Elsa udi wamba ne: “Bidimu bimvua mu buloko bua dienzejangana midimu mikole abi biakandongesha bimpe ne: nyuma wa Yehowa udi mua kukupetesha bukole bua bungi paudi mu lutatu lubi menemene! Pavuabu kabayi banji kunkuata, mvua mubale mukanda uvua muanetu wa bakaji mukuabu mufunde wamba ne: padi muntu mu lutatu lubi menemene, nyuma wa Yehowa udi umuambuluisha bua ikale mutukije. Meme kudiambila ne: si udi unekesha. Kadi pakantulukila ntatu, ngakamona ne: uvua muambidilamu. Ke mudibi. Mbikole bua kuitaba biobi kabiyi bikufikile to. Kadi ke tshiakangenzekela.”

20. Ntshinyi tshivua Paulo wenza pavuaye mu buloko? Mmunyi mudi tshivuaye wenza mua kukankamija bamue bana betu?

²⁰ Mvese wa ndekelu wa mu mukanda wa Bienzedi udi wamba ne: Paulo uvua ‘uyisha Bukalenge bua Nzambi’ ne tshisumi. (Bien. 28:31) Bu muvuaye mu buloko, kavua mua kuyisha ku nzubu ne ku nzubu mu Lomo to. Nansha nanku, uvua anu uyisha bonso bavua balua kumutangila. Lelu kudi bana betu badi kabayi mua kupatuka mu nzubu, pamuapa bikadile anu pa malalu, ne mu matunga makuabu mudi badibu bateke mu nzubu ya bakulakaje bua bukulakaja anyi bua masama. Nansha nanku, batshidi anu banange Nzambi bikole ne mbasue kuyisha bikole anu bu kuonso eku. Tudi tubalombela Nzambi ne tusengelela Tatuetu wa mu diulu bua abapeshe mpunga wa kupeta bantu badi basue kumumanya yeye ne malu mimpe adiye mutulongoluele.

21. Bua tshinyi tudi ne bua kuyisha ne mitalu?

²¹ Ba bungi ba kutudi badi bayisha ku nzubu ne ku nzubu ne benza mudimu wa divuija bantu bayidi mu mishindu yawu mikuabu. Nanku yonso wa kutudi adienzejaku bikole bua kukumbaja mudimu wetu wa bamanyishi ba Bukalenge, uyisha “too ne ku miaba ya kule menemene ya pa buloba.” Tudi ne bua kuenza mudimu eu ne mitalu, bualu “tshimanyinu” tshia dikalaku dia Kristo tshikadi tshimueneke patoke. (Mat. 24:3-14) Katujimiji dîba to. Patudi tuakula apa, tudi ne “bia bungi bia kuenza mu mudimu wa Mukalenge.”​—1 Kol. 15:58.

22. Bu mututshidi bindile dituku dia Yehowa, mbimpe tudisuike bua kuenza tshinyi?

²² Bu mututshidi bindile “dilua dia dituku dinene dia Yehowa didi dikuatshisha buôwa,” tudisuikayi bua kutungunuka ne kuyisha ne dikima ne lulamatu. (Yoe. 2:31) Netupete bantu ba bungi bikala anu bu bena Beloya “bakitaba dîyi ne luzuku lukole.” (Bien. 17:10, 11) Nanku, tuyishayi too ne pikalabi anu bu ne: mbatuambile ne: “Udi muenze bimpe, mupika muimpe wa lulamatu!” (Mat. 25:23) Tuetu tuenza mudimu wa divuija bantu bayidi ne tshisumi, bikale kabidi ne lulamatu kudi Yehowa, kakuyi mpata netushale ne muoyo kashidi bualu tuvua ne diakalenga dinene dia “kufila bumanyishi buonso menemene” bua Bukalenge bua Nzambi!