UDI mumone ne: mbipepele bua kuenzela Yehowa mudimu anyi?​— Mulongeshi Munene kavua muambe ne: nebikale bipepele bua kuenzela Yehowa mudimu to. Butuku bua kumpala kua kushipabu Yezu, wakambila bapostolo bende ne: “Pikala bena panu banukina, numanye ne: bavua badianjile kunkina meme kumpala kuenu.”​—Yone 15:18, MMM.

Petelo wakaditambisha ne: yeye kavua mua kuvila Yezu to. Kadi Yezu wakamba ne: anu butuku abu Petelo uvua ne bua kuvila misangu isatu mijima ne: kavua mumumanye to. Ne ke tshiakenza Petelo menemene! (Matayo 26:31-35, 69-75) Mmunyi muvua bualu bua mushindu au mua kuenzeka?​— Buakenzeka bualu Petelo wakumvua buôwa anu muakumvua bapostolo bakuabu pabu.

Udi mumanye tshivua bapostolo bumvuile buôwa anyi?​— Bivua bualu bavua bapange mua kuenza bualu bukuabu bua mushinga mukole. Kumanya bualu abu kudi mua kutuambuluisha bua kuenzela Yehowa mudimu nansha muntu mutuambe anyi mutuenze tshinyi. Kadi bua kutuadija, bidi bikengela tuetu kuanji kumona tshivua tshienzeke butuku bua ndekelu buvua Yezu mupitshishe ne bapostolo bende.

Kumpala bavua banji kuenza pamue tshibilu tshia Kupita kua Yehowa anyi Pasaka. Tshibilu etshi tshivua didia dia pa buadi divuabu benza tshidimu tshionso bua kuvuluija bantu ba Nzambi mushindu uvuabu babapikule ku bupika mu Ejipitu. Pashishe, Yezu wakadia nabu didia dikuabu dia pa buadi bua musangu wa kumpala. Netuakule bualu buadi mu nshapita mukuabu kumpala eku, ne netumvuije mushindu udi didia adi dituambuluisha bua kuvuluka Yezu. Kunyima kua didia adi ne miaku ya kukolesha nayi bapostolo bende ku muoyo, Yezu wakaya nabu  mu budimi bua Getesemane. Eu uvua muaba wabu munene uvuabu misangu ya bungi batamba kulua.

Yezu wakaya pa nkayende mutantshi mu budimi amu bua kusambila. Wakambila kabidi Petelo, ne Yakobo ne Yone bua basambile pabu. Kadi buobu e kulala tulu. Yezu wakabashiya misangu isatu bua kuya kusambila nkayende, ne kualukilaye kabidi misangu isatu, usangana Petelo ne bakuabu balale tulu! (Matayo 26:36-47) Udi mumanye bua tshinyi bavua ne bua kushala batabale bua kusambila anyi?​— Tuanji kuakula buine bualu ebu mpindieu.

Ku ntuadijilu kua tshibilu atshi tshia Kupita kua Yehowa, Yudasa Isakaliote uvuamu ne Yezu ne bapostolo bakuabu butuku abu. Anu muudi mua kuikala muvuluke, Yudasa wakalua muivi. Mpindieu uvua mutungidianganyi. Uvua mumanye muaba wa mu budimi bua Getesemane au uvua Yezu upetangana misangu ya bungi ne bapostolo bende. Nunku Yudasa wakaluamu ne basalayi bua kukuata Yezu. Pakafikabu, Yezu wakabakonka ne: “Nudi nukeba nganyi?”

Basalayi bakamuandamuna ne: ‘Yezu.’ Yezu kakatshina to, wakabambila ne: “Mmeme” eu. Basalayi kukemabu bikole bua dikima dia Yezu, e kupinganabu tshianyima kudishinda panshi. Pashishe Yezu kubambilaye ne: ‘Binuikala nunkeba meme, lekelayi bapostolo banyi baye.’​—Yone 18:1-9.

Padi basalayi bakuata Yezu bamusuika mionji, bapostolo benda badi batshina ne banyema baya. Kadi Petelo ne Yone bavua basue kumanya tshivua mua kuenzeka, ke buobu kulonda bendela pa bule. Ndekelu wa bionso badi baya ne Yezu kumbelu kua muakuidi munene Kayifa. Bu muvuabu bamanye Yone kudi muakuidi munene au, mulami wa ku tshibi udi ubabueja yeye ne Petelo mu lupangu.

Bakuidi bakavua bamane kufika bonso kumbelu kua Kayifa bua kulumbuluisha tshilumbu atshi. Bavua basue bua bashipe Yezu. Ke bualu kayi bavua bitabe bua kubueja bantemu bavua balue kushiminyina Yezu malu. Bantu bakatuta Yezu mankomu ne kumutapa mapi. Pavua malu onso aa enzeka, Petelo uvua pabuipi apu.

 Muena mudimu mukaji, mulami wa ku tshibi uvua mubueje Petelo ne Yone kutangilaye Petelo bimpe, pashishe kumuambilaye ne: ‘Wewe kabidi uvua ne Yezu!’ Kadi Petelo kuvila uleja ne: kavua mumanye Yezu to. Mutantshi kaunengi nsongakaji mukuabu udi uvuluka kabidi mpala wa Petelo ne wambila bavua bimane muaba au ne: ‘Muntu eu uvua ne Yezu.’ Petelo udi uvila kabidi ne: ki mmumumanye to. Dîba dikuabu pashishe bakamona Petelo kudi tshisumbu tshia bantu bakuabu e kumuambilabu ne: “Bulelela, wewe udi [wa kudibo].” Bua musangu muisatu, Petelo udi uvila wamba ne: “Tshiena mumanye muntu eu!” Petelo udi uditshipa ne kuditshipa bua kuleja ne: udi wamba bulelela, ke dîba adi Yezu kukudimuka e kumutangila.​—Matayo 26:57-75; Luka 22:54-62; Yone 18:15-27.

Udi mumanye tshivua Petelo mushimine anyi?​— Mbualu uvua mumvue buôwa. Kadi bua tshinyi uvua ne buôwa? Ntshinyi tshivuaye mupange kuenza bua kupeta dikima? Anji ela meji tung. Ntshinyi tshivua Yezu muenze bua kupeta dikima?​— Wakasambila Nzambi ne Nzambi wakamuambuluisha bua kupeta dikima. Vuluka kabidi ne: Yezu wakambila Petelo misangu isatu mijima bua kusambila ne bua kushala mutabale. Kadi ntshinyi tshiakenzeka?​—

 Misangu yonso isatu ayi Petelo uvua anu ulala. Kakasambila ne kushala mutabale to. Nunku wakapapukila diakamue bakadi balue kukuata Yezu. Pashishe ku tshilumbuluidi, pavuabu batute Yezu ne balongolole bua kumushipa, Petelo wakatshina. Kadi, mêba anu makese patupu kumpala, ntshinyi tshivua Yezu muambile bapostolo bende bua kutekemenabu?​— Yezu wakabambila ne: anu muvua ba pa buloba bamukine yeye ke muvuabu ne bua kubakina pabu.

Mpindieu tuanji kutuma meji ku bualu kampanda bua muomumue ne buvua bufikile Petelo budi mua kutufikila tuetu kabidi. Fuanyikijabi ne: wewe udi mu kalasa padi bakuabu batuadija kupetula bantu batu kabayi bakosela dibendele mpala anyi batu kabayi benza  difesto dia Nowele. Nenku newenze tshinyi bikala umue ukudimuka kuudi ukuebeja ne: “Mbulelela bua ne: wewe kutu ukosela dibendele mpala anyi?” Peshi bakuabu bamba ne: “Tudi bumvue ne: kutu nansha usekelela Nowele to!” Neutshine bua kubambila bulelela anyi?​— Neutete mua kudinga bu muakenza Petelo anyi?​—

Ku ndekelu Petelo wakanyingalala bikole bua muvuaye muvile Yezu. Pakamonaye tshivuaye muenze, wakaya pambelu ne kudila muadi. Eyowa, wakapingana kudi Yezu. (Luka 22:32) Mpindieu elaku meji pa bualu ebu. Ntshinyi tshidi mua kutuambuluisha bua katufiki ku dipeta buôwa budi mua kutusaka bua kuamba bualu bua dishima bu muvua Petelo muenze?​— Vuluka ne: Petelo wakapanga kusambila ne kushala mutabale. Nenku, udi umona munyi? Ntshinyi tshitudi ne bua kuenza bua tuetu kuikala bayidi ba Mulongeshi Munene?​—

Bidi bikengela tusambile Yehowa bua atuambuluishe. Pavua Yezu musambile, udi mumanye tshivua Nzambi mumuenzele anyi?​— Wakatuma muanjelu bua kumukolesha ku muoyo. (Luka 22:43) Banjelu ba Nzambi badi mua kutuambuluisha anyi?​— Bible udi wamba ne: ‘Muanjelu wa Yehowa udi wasa tshitudilu tshiende tshinyunguluke badi bamutshina, udi ubasungila.’ (Musambu 34:7) Kadi bua Nzambi kutuambuluishaye, tudi ne bua kusambila ne kabidi kuenza bualu bukuabu. Udi mumanye bualu ebu anyi?​— Yezu wakambila bayidi bende bua kushalabu batabale. Ntshinyi tshiudi wela meji ne: tshidi mua kutuambuluisha bua kushala batabale?​—

Tudi ne bua kuteleja ne ntema yonso bidibu bamba mu bisangilu bietu bia bena Kristo ne kuteleja kabidi bitudi tubala mu Bible. Kadi, tudi kabidi ne bua kuikala ne tshibidilu tshia kusambila Yehowa ne kumulomba bua atuambuluishe bua tumuenzele mudimu. Tuetu benze nunku, bulelela nebituambuluishe bua kutshimuna buôwa buetu. Apu netusanke tshikondo tshionso tshituapeta mushindu wa kuambila bakuabu malu adi atangila Mulongeshi Munene ne Tatuende.