BALUNDA mbantu batudi banange kuyukila nabu ne kusomba nabu. Kadi bidi ne mushinga bua kuikala ne balunda bimpe. Udi wela meji ne: nnganyi udi mulunda mutambe buimpe utudi ne bua kuikala nende?​— Yehowa Nzambi.

Mbia bulelela bua se: tudi mua kulua balunda ba Nzambi anyi?​— Bible udi wamba ne: Abalahama muntu uvuaku kale, uvua “mulunda wa Nzambi.” (Yakobo 2:23) Udi mumanye bua tshinyi uvua mulunda wa Nzambi anyi?​— Bible udi wandamuna ne: Abalahama uvua utumikila Nzambi. Uvua umutumikila nansha pavua bualu buvuaye umulomba bua kuenza buikale bumukolele. Nunku bua kuikala mulunda wa Yehowa, tudi ne bua kuenza malu adi amusankisha, anu bu muvua Abalahama muenze, ne mutu Mulongeshi Munene wenza misangu yonso.​—Genese 22:1-14; Yone 8:28, 29; Ebelu 11:8, 17-19.

 Yezu wakambila bapostolo bende ne: ‘Nenuikale balunda banyi, binuenza bu mundi nnuambila.’ (Yone 15:14) Bu muvua malu onso avua Yezu wambila bantu afumina kudi Yehowa, Yezu uvua musue kuamba ne: balunda bende mbantu bavua benza tshivua Nzambi wamba. Bulelela, balunda bende bonso bavua banange Nzambi.

Bamue balunda ba pa muoyo ba Mulongeshi Munene bavua bapostolo bende, banudi mua kumona mu bimfuanyi bidi mu dibeji dia 75 dia mukanda eu. Bakenza nende ngendu ne bakamuambuluisha mu mudimu wa buambi. Yezu wakapitshisha mêba ende a bungi pamue ne bantu aba. Bavua badia pamue. Bavua bakula malu a Nzambi pamue. Ne bavua benze malu makuabu pamue. Kadi Yezu uvua ne balunda bakuabu ba bungi. Uvua usomba nabu, ne bavua bapitshisha tshikondo tshilenga pamue.

Bena dîku dimue bavua Yezu musue kusomba nabu bavua basombele mu musoko mukese wa Betania, pambelu pa tshimenga tshinene tshia Yelushalema. Udi mubavuluke anyi?​— Bavua Mariya, Mâta ne muanabu wa balume Lazalo. Yezu uvua ubikila Lazalo ne: mulunda  wende. (Yone 11:1, 5, 11) Yezu uvua munange dîku edi ne uvua usanka bua kusomba ne benadi bualu bavua banange Yehowa ne bavua bamuenzela mudimu.

Kabiena biumvuija ne: Yezu kavua usomba bimpe ne bantu bavua kabayi benzela Nzambi mudimu to. Uvua usomba nabu bimpe. Uvua nansha uya kumabu ne udia nabu. Bualu ebu buakafikisha bantu bakuabu ku diamba ne: Yezu uvua “mulunda wa balambuishi ba bitadi ne benji ba bibi.” (Matayo 11:19, MMM) Bualu budi ne: Yezu kavua uya kumbelu kua bantu aba bualu uvua wanyisha nsombelu wabu to. Uvua ubakumbula bua kuyukila nabu bualu bua Yehowa. Uvua ukeba mua kubambuluisha bua kushintululabu bikadilu biabu bibi ne kuenzela Nzambi mudimu.

Ke tshiakenzeka dinga dituku mu tshimenga tshia Yeleko. Yezu uvua upitshilamu mutangile ku Yelushalema. Kuvua bantu tshisumbu, ne munkatshi mua bantu abu muvua muntu mukuabu dîna diende divua Zakayo. Uvua musue kumona Yezu. Kadi Zakayo uvua muntu wa tshitupa, ne kavua mua kumona bualu kuvua bantu ba bungi bamujika kumpala. Nanku wakanyema ulonda njila, e kubandaye ku mutshi bua kumonaye Yezu bimpe pavuaye ne bua kupita.

Pakafika Yezu pa mutshi au, wakatangila kuulu kuawu ne wakamba ne: ‘Tuluka lukasa, bualu lelu nendue ku  nzubu kuebe.’ Kadi Zakayo uvua muntu mubanji uvua muenze malu mabi a bungi. Bua tshinyi Yezu uvua musue kuya kumbelu kua muntu wa nunku?​—

Yezu kavua musue kuya kumbelu kua muntu au bualu uvua munange nsombelu wende to. Wakaya kunzubu kua Zakayo bua kumumanyisha malu adi atangila Nzambi. Uvua mumone muvua muntu au mudienzeje bua kumumona. Nunku uvua mumanye ne: Zakayo neikale ne bua kumuteleja. Atshi tshivua tshikondo tshimpe tshia kumuleja ngikadilu udi Nzambi ulomba bantu.

Nunku, ntshinyi tshitudi tumona tshienzeka mpindieu?​— Zakayo udi wanyisha malongesha a Yezu. Udi unyingalala bua muvuaye mudinge bantu, ne udi ulaya bua kufuta mfranga ivuaye kayi ne bukenji bua kuangata. Pashishe udi ulua muyidi wa Yezu. Anu padiye wenza nanku ke padiye ulua mulunda wa Yezu.​—Luka 19:1-10.

Tuetu tulongela malu kudi Mulongeshi Munene, netuikale tuya kukumbula bantu badi kabayi balunda betu anyi?​— Eyowa. Kadi katuakuya kumbelu kuabu bualu tudi tuanyisha nsombelu wabu to. Ne katuakuenza nabu malu mabi to. Netuye kubatangila bua kuyukila nabu malu a Nzambi.

 Kadi balunda betu ba pa muoyo ngaba batudi basue kusomba nabu bikole. Bua kuikalabu balunda bimpe, badi ne bua kuikala balunda badi Nzambi wanyisha. Bakuabu badi mua kuikala kabayi nansha bamanye Yehowa to. Kadi buobu basue kumanya malu ende, tudi mua kubambuluisha. Ne padi tshikondo tshifika tshidibu bananga pabu Yehowa mutudi bamunange, tudi mua kulua balunda badi balamatangane bikole.

Kudi mushindu mukuabu utudi mua kumanya bikala muntu mua kuikala mulunda muimpe. Tangila malu adiye wenza. Utu wenzela bantu bakuabu malu mabi ne pashishe utuadija kubaseka anyi? Abi kabiena bimpe to, ki mmuomu anyi?​— Utu udikebela bilumbu misangu yonso anyi? Katuakusua kudibuejakaja mu bilumbu nende to, ki mmuomu anyi?​— Peshi utu wenzelamu malu mabi ku bukole ne pashishe wela meji ne: mmudimuke bualu ki mbamukuate anyi? Nansha kabayi bakuate muntu au, Nzambi uvua mumone tshivuaye muenze, ki mmuomu anyi?​— Udi wela meji ne: bantu badi benza malu a mushindu eu badi mua kuikala balunda bimpe batudi mua kuikala nabu anyi?​—

Angataku Bible webe. Tumone mudiye wamba ne: balunda betu badi mua kunyanga nsombelu wetu. Bulula mu 1 Kolinto nshapita wa 15, mvese wa 33. Wapetshi anyi?​— Tudi tubala ne: “Kanudingibu; malunda mabi adi anyanga malu makane a bantu.” Bidi biumvuija ne: tuetu tusomba ne bantu babi, tudi mua kulua bantu babi. Ne bidi kabidi bilelela bua se: balunda bimpe badi batuambuluisha bua kupeta bikadilu bimpe.

Katupu muoyo nansha kakese ne: muntu udi ne mushinga mutambe mu nsombelu wetu mujima n’Yehowa. Katuena basue kunyanga bulunda buetu nende to, ki mmuomu anyi?​— Nunku tudimukayi bua kuikala anu ne balunda badi banange Nzambi.