NNGANYI udi musadidi mutambe buimpe wa Nzambi wa katshia ne katshia?​— Anu muwambi amu, n’Yezu Kristo. Udiku wela meji ne: tudi mua kuikala bu yeye anyi?​— Bible udi uleja ne: Yezu wakatushila tshilejilu tshia tuetu kulonda. Kabidi udi utulomba bua tuikale bayidi bende.

Udi mumanye tshidi kuikala muyidi wa Yezu kumvuija anyi?​— Kuikala muyidi wa Yezu kudi kulomba malu a bungi. Tshia kumpala, tudi ne bua kulongela malu kudiye. Kadi ki nkujike to. Tudi kabidi ne bua kuitaba menemene malu adiye wamba. Tuetu benze nanku, netuenze malu adiye utulomba bua kuenza.

Bantu ba bungi batu bamba ne: badi bitabuja Yezu. Udi wela meji ne: bonso abu mbayidi bende anyi?​— Tòo, ba bungi ki mbayidi bende to. Badi mua kuya mu nzambi. Kadi ba bungi kabatuku nansha ne dîba dia kulonga malu avua Yezu mulongeshe to. Bushuwa, anu aba badi balonda tshilejilu tshia Yezu ke badi bayidi bende.

Tuanjibi kuakula bua bamue ba ku bantu bavua bayidi ba Yezu pavuaye panu pa buloba. Ku bantu ba kumpala bakalua bayidi tudi mua kutela Filipo. Filipo wakaya kumonangana ne mulunda wende Natanaele (uvuabu babikila kabidi ne: Batolome), uudi mumone mu tshimfuanyi etshi musombe muinshi mua mutshi. Pakalua Natanaele kudi Yezu, Yezu wakamba ne: ‘Tangilayi Muena Isalele mulelela udi kayi ne mashimi.’ Natanaele wakakema ne kumukonkaye ne: ‘Udi mummanyine penyi?’

 Ke Yezu kumuandamunaye ne: ‘Meme mvua mukumone pauvua muinshi mua mutshi wa mfigi, diambedi Filipo kayi muanji kukubikila.’ Natanaele wakakema bikole bua muvua Yezu mumanye menemene too ne muaba uvuaye, ke Natanaele kuamba ne: ‘Wewe udi Muana wa Nzambi, udi Mukalenge wa Isalele.’​—Yone 1:49.

Bakuabu bakalua bayidi ba Yezu dituku divua didianjidile edi divua Filipo ne Natanaele balue bayidi. Tudi ne Andele ne tutuende Petelo kabidi ne Yone pamuapa ne tutuende Yakobo. (Yone 1:35-51) Kadi kunyima kua matuku, banayi aba bakapingana ku mudimu wabu wa diloba. Pashishe, dikuabu dituku pavua Yezu wendakana ku muelelu wa dijiba dia Galela, wakamona Petelo ne Andele bela bukuondo mu mâyi bua kukuata mishipa. Yezu wakababikila wamba ne: “Luayi kundi.”

Pakasemenabu katantshi, Yezu wakamona Yakobo ne Yone. Bavua ne tatuabu mu buâtu amu ne bavua benda balongolola bukuondo buabu.  Yezu wakabambila bua kumulondabu. Uvua mua kuenza tshinyi bu Yezu muikale mukubikile? Uvua mua kumulonda diakamue kuyi ujingakana anyi?​— Bantu aba bavua bamanye Yezu. Bavua bamanye ne: Nzambi ke uvua mumutume. Nunku bakalekela diakamue mudimu wabu wa diloba e kulonda Yezu.​—Matayo 4:18-22.

Pavua bantu balume aba balue bayidi ba Yezu, mbuena kuamba ne: pashishe bakatuadija kuenza anu malu makane dîba dionso anyi?​— Tòo. Ndi mumanye ne: udi muvuluke bua se: bantu balume aba bakakokangana munkatshi muabu bua kumanya ne: nnganyi wa kudibu uvua ne mushinga wa bungi kupita bakuabu bonso. Kadi bakateleja Yezu ne kuluabu kushintulula bienzedi biabu. Patudi tuitaba bua kushintulula bienzedi bietu, nanku tuetu petu tudi mua kulua bayidi ba Yezu.

Yezu wakabikila bantu ba mishindu yonso bua kuluabu bayidi bende. Dimue edi, mfumu mukuabu uvua mubanji ne utshivua nsongalume wakalua kudi Yezu e kumuebejaye bua kumanya tshivua tshikengela kuenza bua kupeta muoyo wa tshiendelele. Bu muvua mfumu mubanji eu muambe ne: uvua utumikila mêyi a Nzambi katshia ku buana buende, Yezu wakamuambila ne: “Luaku undonde.” Udi mumanye tshiakenzeka anyi?​—

Pakamona muntu au ne: kuikala muyidi wa Yezu kudi ne bua kuikala ne mushinga wa bungi kupita kuikala mubanji, wakabungama bikole. Kakalua muyidi wa Yezu to bualu uvua munange bubanji buende bikole kupita muvuaye munange Nzambi.​—Luka 18:18-25.

Kunyima kua Yezu mumane kutuadija mudimu wende wa diyisha kukavua kupita bu tshidimu tshijima ne ndambu, wakasungula bayidi 12 bua kuikalabu bapostolo. Bapostolo bavua bantu bavuaye mutume mu mudimu wa pa buawu. Udiku mumanye mêna abu anyi?​— Tuanjibi kumona ni tudi mua kuamanya. Tangila bimfuanyi biabu bidi muaba eu, ne umone ni udi mua kutela mêna abu. Pashishe utete mua kutela mêna abu mu mutu.

Kunyima, umue wa ku bapostolo 12 abu wakalua muntu mubi. Dîna diende divua Yudase Iskariote. Pashishe, bakasungula muyidi mukuabu bua kuluaye mupostolo. Udi mumanye dîna diende anyi?​— Dîna diende  divua Matiase. Pashishe, Paulo ne Bânaba bakalua pabu bapostolo, kadi kabavua ba ku bapostolo 12 abu to.​—Bienzedi 1:23-26; 14:14.

Anu bu mutuvua bamone mu nshapita wa 1 wa mu mukanda eu, Yezu uvua usankidila bana batekete. Bua tshinyi uvua wenza nanku?​— Bualu uvua mumanye ne: buobu pabu bavua mua kulua bayidi bende. Bushuwa, bana badi mua kuamba malu mu mushindu udi mua kusaka bantu bakulumpe bua kutelejabu ne kunangabu bua kulonga malu a bungi adi atangila Mulongeshi Munene.

Kudi kabidi bantu bakaji ba bungi bakalua pabu bayidi ba Yezu. Bakuabu bakenza nende luendu pakayaye mu misoko mikuabu bua kuyisha. Mariya muena Magadala, Yoana ne Susana bakaya nende.  Bavua mua kuikala kabidi bamuambuluishe bua kumulambila biakudia ne kumusukuila bilamba.​—Luka 8:1-3.

Udi musue kuikala muyidi wa Yezu anyi?​— Vuluka ne: kuamba patupu ne: tudi bayidi ba Yezu ki nkudi kuvuija muntu muyidi to. Tudi ne bua kuenza malu anu bu bayidi bende miaba yonso itudi, ki ng’anu patudi tuya mu bisangilu to. Udiku mua kuela meji bua miaba mikuabu idibi bikengela bua tuetu kuikala tuenza malu bu bayidi ba Yezu anyi?​—

Bushuwa, tudi ne bua kuikala tuenza nanku patudi kumbelu. Kadi muaba mukuabu kabidi utudi ne bua kuikala tuenza nanku mmu kalasa. Bualu butudi meme ne wewe katuyi ne bua kupua muoyo nansha kakese mbua ne: bua kuikala muyidi mulelela wa Yezu, tudi ne bua kuenza malu anu bu muvua Yezu wenza dituku dijima, matuku onso ne muaba ne muaba wonso utudi.