PAVUA Shaula wenza malu mabi, nganyi uvua usanka?​— Satana Diabolo ke uvua usanka. Nansha bamfumu ba bitendelelu bavua pabu basanka. Pashishe pavua Shaula mulue muyidi wa Mulongeshi Munene ne pakavuabu bamubikila ne: Paulo, bamfumu ba bitendelelu abu bakatuadija kumukina. Nunku, udi mua kumvua mpindieu bua tshinyi mbikole bua muyidi wa Yezu kuenzaye malu mimpe anyi?​—

Muakuidi Munene Anania wakatumina bantu dîyi bua kututabu Paulo dinkomo mu mpala. Anania wakakeba kabidi bua kubuejija Paulo mu buloko. Paulo wakakenga bikole pakaluaye muyidi wa Yezu. Tshilejilu, bantu babi bakakuma Paulo ne kukebabu mua kumushipa ne mabue manene a dikema.​—Bienzedi 23:1, 2; 2 Kolinto 11:24, 25.

Bantu ba bungi nebakebe bua kutusaka ku dienza malu adi kaayi asankisha Nzambi. Nunku tshilumbu tshidi ne: udi munange menemene malu mimpe anyi? Udi muanange bikole bikufikisha too  ne ku dienza malu mimpe nansha padi bantu bakukine bua paudi uenza anyi? Bidi bikengela muoyo mukole bua kufika ku dienza nanku, ki mmuomu anyi?​—

Udi mua kudiebeja ne: ‘Bua tshinyi bantu badi batukina patudi tuenza malu mimpe? Kabena mua kusanka anyi?’ Udi mua kuela meji a nunku. Misangu ya bungi bantu bavua basue Yezu bua malu mimpe avuaye wenza. Dituku dikuabu, bantu bonso ba mu musoko kampanda bakunguila mu mushiku wa mbelu wa nzubu uvua Yezu musombele. Bavua balue bualu Yezu uvua wuondopa babedi.​—Mâko 1:33.

Kadi misangu mikuabu bantu kabavua banyisha malu avua Yezu ulongesha to. Nansha muvuaye ulongesha misangu yonso malu avua malelela, bakuabu bavua bamukine bualu uvua wamba bulelela. Ke  tshiakenzeka dituku dikuabu mu Nazaleta, tshimenga tshivua Yezu mukolele. Wakaya mu nsunagoga, muaba uvua bena Yuda badisangishila bua kutendelela Nzambi.

Muomu amu Yezu wakenza muyuki mulenga menemene muangatshila mu Mukanda wa Nzambi. Bantu bakawanyisha kumpala. Bakakema bua mêyi mimpe avua apatuka mukana muende. Bivua bibakolele bua buobu kuitaba ne: eu uvua nsongalume uvua mukolele mu musoko wabu menemene.

Kadi pashishe Yezu wakamba bualu bukuabu kabidi. Wakakula bua bikondo bivua Nzambi muleje dinanga dia wadi mushindu kudi bantu bavua kabayi bena Yuda. Pakamba Yezu mêyi aa, bavua mu nsunagoga bakumvua tshiji. Udi mumanye ne: mbua tshinyi anyi?​— Bavua bela meji ne: anu buobu nkayabu ke bavua Nzambi muanyishe. Bavua bela meji ne: bavua bapite bakuabu bantu buonso. Nunku bakakina Yezu bua tshivuaye muambe atshi. Kadi udi mumanye tshiakakebabu kumuenzela anyi?​—

Bible udi wamba ne: ‘Bakakuata Yezu ne bakamupulumuna pambelu pa musoko. Bakaya nende ku muelelu kua mukuna mukuabu ne bakasua kumukupa muinshi bua kumushipa! Kadi Yezu wakabanyema.’​—Luka 4:16-30.

Bu bualu abu bukuenzekele wewe, uvua mua kupingana kabidi kudi bantu abu bua kubambila malu a Nzambi anyi?​— Bivua mua kulomba dikima, ki mmuomu anyi?​— Kadi kunyima bu kua tshidimu tshijima pashishe, Yezu wakapingana kabidi mu Nazaleta. Bible udi wamba ne: ‘Wakabayisha mu nsunagoga wabu.’ Yezu kakalekela kuakula bua bulelela utshina bantu bavua kabayi banange Nzambi to.​—Matayo 13:54.

Dituku dikuabu dia nsabatu, Yezu uvua muaba kampanda uvua munga muntu ne tshianza tshiume anyi tshitekete. Yezu uvua ne bukole bua kudi Nzambi bua kuondopa muntu au. Kadi bamue bantu bavua muaba au bavua bakeba kujudila Yezu bilumbu. Ntshinyi tshivua Mulongeshi Munene ne bua kuenza?​— Tshia kumpala, wakakonka ne:  ‘Wewe muikale ne mukoko udi mupone mu tshina tshile dituku dia nsabatu, neuupatulemu anyi?’

Bulelela, bavua mua kuupatula nansha dituku dia nsabatu, dituku divuabu ne bua kuikisha. Nunku Yezu wakamba ne: ‘Bidi bimpe kuambuluisha muntu dituku dia nsabatu, bualu muntu udi ne mushinga mupite wa mukoko!’ Bivua biumvuike bimpe ne: Yezu uvua ne bua kuambuluisha muntu eu pa kumuondopa!

Yezu wakambila muntu au bua olole tshianza tshiende. Diakamue tshianza tshiakumvua bimpe. Ndisanka kayipu bunene divua muntu au mumvue! Kadi bantu bakuabu abu? Bakasanka anyi?​— Tòo. Bakalua kukina Yezu kabidi kupita. Bakapatuka pambelu bua kuela tshifufu bua kumushipa!​—Matayo 12:9-14.

Nsombelu udi muomumue lelu. Nansha tuetu tuenza munyi, katuena mua kusankisha bantu bonso to. Nunku tudi ne bua kusungula utudi menemene basue kusankisha. Tuetu basue kusankisha Yehowa Nzambi ne Muanende Yezu Kristo, tudi ne bua kuenza anu bidibu balongesha. Kadi tuetu benze nenku, nnganyi wikala ne bua kutukina? Nnganyi wikala mua kuenzeja bua ne: bitukolele bua kuenza malu mimpe?​—

N’Satana Diabolo. Kadi nnganyi mukuabu?​— Bantu bonso badi Diabolo mudinge badi bitaba malu a dishima. Yezu wakambila bamfumu ba bitendelelu ba mu tshikondo tshiende ne: ‘Nuenu nudi bana ba diabolo, tatu wenu, nudi basue kuenza bu mudi majinga a tatu wenu.’​—Yone 8:44.

Kudi bantu ba bungi badi Diabolo musue. Yezu udi ubabikila ne: ‘ba pa buloba.’ Udi wela meji ne: ‘ba pa buloba’ badi Yezu wamba aba mbanganyi?​— Tutangile mu mukanda wa Yone nshapita wa 15, mvese wa 19 tumone. Mu mvese eu tudi tubala mêyi a Yezu aa: ‘Bu nuenu bikale ba pa buloba, ba pa buloba bavua mua kusua bantu babu; kadi bualu bua nuenu kanuena ba pa buloba, ngakanusungula mu ba pa buloba, nunku ba pa buloba badi nenu lukuna.’

Nunku ba pa buloba badi bakine bayidi ba Yezu mbantu bonso badi kabayi bamulonda. Bua tshinyi ba pa buloba mbakine bayidi ba Yezu?​—  Anji ela meji pa bualu ebu. Nnganyi udi mukokeshi wa buloba?​— Bible udi wamba ne: “Buloba bujima budi mu bukokeshi bua Mubi.” Mubi eu n’Satana Diabolo.​—1 Yone 5:19, MML.

Mpindieu udi umona bua tshinyi mbikole bua kuenza malu mimpe anyi?​— Satana ne ba pa buloba badi bakolesha malu. Kadi kudi bualu bukuabu. Udi mubuvuluke anyi?​— Mu nshapita wa 23, tuvua balonge ne: tuetu bonso tudi baledibue ne mpekatu. Kabiakuikalaku bimpe pikala mpekatu, Diabolo ne ba pa buloba kabitshiyiku kabidi anyi?​—

Bible udi wamba ne: ‘Buloba budi bupita.’ Bualu ebu budi buleja ne: bantu bonso badi kabayi balonda Mulongeshi Munene kabakuikalaku kabidi to. Kabakubalekela bua kushalabu ne muoyo wa kashidi to. Udi mumanye bantu bikala mua kupeta muoyo wa kashidi anyi?​— Bible udi wamba kabidi ne: “Yeye udi wenza mudi disua dia Nzambi udi ushalaku tshiendelele.” (1 Yone 2:17) Eyowa, anu bantu badi benza malu mimpe, bantu badi benza “disua dia Nzambi,” ke bikala mua kupeta muoyo wa kashidi mu buloba buavuija Nzambi bupiabupia. Nunku nansha bikale bikole, tudi basue kuenza anu malu mimpe, ki mmuomu anyi?​—