NTSHINYI tshiutu mutambe kusua: kuenza mudimu anyi kunaya?​— Bulelela, kunaya ki nkubi to. Bible udi wamba bua muvua Yelushalema muwule ‘tente ne bana ba balume ne bana ba bakaji banaya mu misesu yende.’​—Zekâya 8:5.

Mulongeshi Munene uvua musue kutangila bana pavuabu banaya. Kumpala kua kuluaye pa buloba, wakamba ne: ‘Meme kulua ku luseke lua Nzambi bu muenji wa mudimu wa dilambu, muikale nsanka kumpala kuende dîba dionso.’ Umanye ne: Yezu uvua wenza mudimu pamue ne Yehowa mu diulu. Ne pavuaye mu diulu amu, wakamba ne: ‘Bintu bimvua munange bivua ne bana ba bantu.’ Ee, anu bu mutuvua bamone, Mulongeshi Munene uvua munange bantu bonso, too ne bana batekete.​—Nsumuinu 8:30, 31, NW.

 Udi wela meji ne: Yezu uvua unaya pavuaye muana anyi?​— Imue misangu uvua unaya. Kadi bu muvuaye “muenji wa mudimu wa dilambu” mu diulu, uvuaku muenze kabidi mudimu pa buloba anyi?​— Bavua babikila Yezu ne: ‘muana wa muena mabaya.’ Kadi bavua bamubikila kabidi ne: ‘muena mabaya.’ Bualu ebu budi buleja tshinyi?​— Yozefe uvua mukoleshe Yezu bu muanende, kabidi uvua mua kuikala mumulongeshe mudimu eu. Nunku Yezu wakalua pende muena mabaya.​—Matayo 13:55; Mâko 6:3.

Yezu uvua muena mabaya wa mushindu kayi?​— Bu muvuaye muenji wa mudimu wa dilambu mu diulu, kuenaku wela meji ne: wakalua muena mabaya wa dilambu pa buloba anyi?​— Ela meji muvua mudimu wa mabaya muikale mudimu mukole mu tshikondo atshi. Yezu  uvua imue misangu uya kukosa mitshi, kuyikosolola bua kuenza mabaya, kuambula mabaya too ne pambelu ne kukosa mabaya bua kuenza mêsa, bibasa ne bintu bikuabu.

Udi wela meji ne: mudimu au uvuaku usankisha Yezu anyi?​— Uvuaku mua kuikala ne disanka bu wewe mua kuenzela bantu mêsa mimpe, nkuasa ne bintu bikuabu anyi?​— Bible udi wamba ne: mbimpe bua muntu yonso ‘asanke mu midimu yende.’ Mudimu utu ufila disanka dikuabu diudi kuyi mua kupeta mu dinaya to.​—Muambi 3:22.

Bulelela, mudimu mmuimpe bua lungenyi ne mibidi yetu. Bana ba bungi batu anu basomba ne batangila televizion anyi banaya manaya makuabu. Badi badiundakana bikole ne balua bafube, ne kabena ne disanka menemene to. Kabena nansha basankisha bantu bakuabu to. Tudi ne bua kuenza tshinyi bua kuikala ne disanka?​—

Tuvua balonge mu nshapita wa 17 wa mukanda eu ne: kupa ne kuenza malu bua kuambuluisha bakuabu bidi bifila disanka. (Bienzedi 20:35) Bible udi ubikila Yehowa ne: “Nzambi wa disanka.” (1 Timote 1:11, NW) Ne anu bu mutudi tubala mu Nsumuinu, Yezu uvua ‘usanka kumpala kuende dîba dionso.’ Bua tshinyi Yezu uvua ne disanka?​— Wakandamuna pakambaye ne: ‘Tatu wanyi udi ukuata mudimu too ne [mpindieu], ne meme kabidi ndi ngukuata.’​—Yone 5:17.

Pavua Yezu pa buloba, kakenza mudimu wa mabaya matuku ende onso a muoyo to. Yehowa Nzambi uvua mumupeshe mudimu wa pa buawu wa yeye kuenza pa buloba. Udi mumanye ne: mmudimu kayi au anyi?​— Yezu wakamba ne: ‘Bundi nabu mbua kuambila misoko mikuabu lumu luimpe lua bukalenge bua Nzambi; buakantuminabu mbualu ebu.’ (Luka 4:43) Misangu mikuabu pavua Yezu uyisha bantu, bavua bamuitabuja ne bambila bakuabu malu avuaye muambe, anu bu muvua mukaji muena Samalea unudi bamone muaba eu muenze.​—Yone 4:7-15, 27-30.

Mmeji kayi avua nawu Yezu bua mudimu eu? Udi wela meji ne: uvua musue kuwenza anyi?​— Yezu wakamba ne: ‘Biakudia bianyi bidi kuenza disua dia wakuntuma ne kujikija mudimu wende.’ (Yone 4:34)  Mmushindu kayi uutu musue kudia biakudia biutu munange bikole?​— Ebi bidi bikupesha lungenyi pa mushindu uvua Yezu musue mudimu uvua Nzambi mumupeshe bua kuenza.

Nzambi uvua mutuenze mu mushindu wa se: dilonga mudimu dituambuluishe bua kuikala ne disanka. Udi wamba ne: dîpa Diende diakapeshaye muntu didi dia se: ‘asanke mu midimu yende.’ Nunku wewe mulonge mua kuenza mudimu pautshidi muana, newikale ne disanka mu matuku ebe onso a muoyo.​—Muambi 5:19.

Kabiena biumvuija ne: muana mutekete udi ne bua kuenza mudimu wa muntu mukole to, kadi tuetu bonso tudi mua kuenza imue midimu. Baledi bebe badi mua kuikala benza mudimu ku dituku ku dituku bua kupeta makuta bua kudisha dîku dienu ne kupeta nzubu wa kusombela. Ne muudi mumanye, kudi midimu ya bungi idi ikengela kuenza bua kulama nzubu ne makenda.

Mmudimu kayi uudi mua kuenza udi mua kusankisha dîku dijima?​— Udi mua kuambuluisha bua kuteka biakudia ku mêsa, kusukula malongo, kuya kuimansha bintu bia bukoya, kulongolola muaba uutu ulala ne bintu biebe bia kunaya nabi. Pamuapa utu ukadi wenza amue a ku malu aa. Mudimu au udi bulelela usankisha bena mu dîku.

Tumonabi mushindu udi mudimu eu ufila disanka. Udi ne bua kuteka bintu biebe bia kunaya nabi muaba muimpe paudi ujikija kunaya. Bua tshinyi bidi ne mushinga bua kubiteka muaba muimpe nanku?​— Bidi biambuluisha bua kulama nzubu ne mankenda ne bidi mua kuepula njiwu. Wewe kuyi uteka bintu biebe bia kunaya nabi muaba muimpe, dituku dikuabu mamuebe udi mua kulua muambule bujitu ne kudiata pa tshimue. Udi mua kutonkoka, kudishinda ne kujiwuka. Bidi nansha mua kuenzeka bua baye nende too ne ku lupitadi. Kabiakuikala bibi anyi?​— Nunku paudi uteka bintu biebe bia kunaya nabi muaba muimpe paudi ujikija kunaya mbualu bua disanka bua bantu bonso.

Kudi midimu mikuabu idi bana mua kuenza kabidi. Tshilejilu, midimu ya mu kalasa. Mu kalasa udi ulonga mua kubala. Bana bakuabu  batu bamona dibala dibasankisha, kadi bakuabu badi bamba ne: ndikole. Nansha diodi dimueneka dikole kumpala, newikale ne disanka wewe mulonge mua kubala bimpe. Paudi umanya kubala, kudi malu a bungi mimpe audi mua kulonga. Udi nansha mua kudibadila Bible. Nunku paudi wenza mudimu wa mu kalasa bimpe mbualu bua disanka, ki mmuomu anyi?​—

Kudi bantu bakuabu batu bakeba mua kuepuka mudimu. Imue misangu udi mumanye muntu utu ukeba kuwepuka nunku. Kadi bu mudi Nzambi mutuenze bua kuikala kuenza mudimu, bidi bikengela kulonga bua kuusankidila. Mmushindu kayi uvua Mulongeshi Munene musankidile mudimu wende?​— Bivua anu bu kudia biakudia biende bia pa muoyo. Ne mmudimu kayi uvuaye wamba?​— Kuambila bakuabu malu adi atangila Yehowa ne mushindu udibu mua kupeta muoyo wa kashidi.

Nunku tangila bualu budi mua kutuambuluisha bua kusankidila mudimu. Udiebeje ne: ‘Bua tshinyi bidi bikengela kuenza mudimu eu? Wewe mumanye mushinga wa bualu kampanda, mbipepele bua kubuenza. Nenku nansha mudimu muikale munene anyi mukese, uwenze ne muoyo umue. Wewe muenze mudimu muimpe, udi mua kusanka bua mudimu uudi muenze, anu bu muvua Mulongeshi wetu Munene musanke.