UDI muvuluke bua tshinyi umue wa ku banjelu ba Nzambi wakalua Satana Diabolo anyi?​— Dijinga diende dia se: bantu bamukukuile ke diakamufikisha ku ditombokela Nzambi. Banjelu bakuabu bakalonda Satana anyi?​— Eyowa, bakamulonda. Bible udi ubabikila ne: banjelu ba Satana anyi bademon.​—Buakabuluibua 12:9.

Banjelu babi aba ta bademon batu bitaba Nzambi anyi?​— Bible udi wamba ne: ‘bademon badi bitabuja ne: Nzambi udiku.’ (Yakobo 2:19) Kadi mpindieu badi ne buôwa bua bungi. Bionso ebi anu bualu mbamanye ne: Nzambi neabanyoke bua malu mabi adibu benze. Ntshinyi tshidibu benze tshibi?​—

Bible udi wamba ne: banjelu abu bakumuka muaba wabu uvuabu basombele mu diulu e kuluabu pa buloba bua kusomba bu bantu. Bakenza nanku bualu bavua ne dijinga dia kuangata bakaji ba mpala milenga bavua pa buloba. (Genese 6:1, 2; Yuda 6) Ntshinyi tshiudi mumanye pa bualu bua diangatangana dia mukaji ne mulume?​—

Diangatangana adi didi dienzeka padi muntu mulume ne  muntu mukaji basangila pamue. Panyima pa disangila dia mulume ne mukaji adi, muana udi mua kutuadija kukola munda mua mamuende. Kadi bualu bua banjelu ba mu diulu bangatangana ne bakaji mbualu bubi. Nzambi udi witaba bua ne: anu muntu mulume ne muntu mukaji badi baselangane ke badi mua kusangila pamue mushindu eu. Nanku padi muana uledibua, mulume ne mukajende badi mua kukuata mudimu wa kumukolesha.

Pavua banjelu bavuale mibidi ya bantu apu ne kuangatanganabu ne bakaji pa buloba, bana bakalelabu bakakola e kulua bantu ba mpolondo. Bantu ba mpolondo abu bavua ne tshikisu tshia bungi ne bakengesha bantu bikole. Bua bualu ebu Nzambi wakatuma mvula mukole wa dikema bua kushipa bantu ba mpolondo abu ne bakuabu bantu babi bonso. Kadi wakambila Noa bua kuenzaye buatu bunene bua kumona mua kupandisha bantu bakese bavua benza malu makane. Mulongeshi Munene wakamba ne: tudi ne bua kuvuluka bualu bua mushinga wa bungi ebu buakenzeka dîba dia Mvula wa Kabutu.​—Genese 6:3, 4, 13, 14; Luka 17:26, 27.

Pakaloka Mvula au, udiku mumanye tshiakafikila banjelu babi abu anyi?​— Bakavula mibidi ya bantu ivuabu bavuale, e kupinganabu mu diulu. Kadi kabavua kabidi mua kushala banjelu ba Nzambi to, nanku  bakalua banjelu ba Satana anyi bademon. Kadi ntshinyi tshiakafikila bana bavuabu balele anyi bantu ba mpolondo abu?​— Bakafua mu Mvula wa Kabutu. Ne bantu bakuabu bonso bavua kabayi batumikila Nzambi bakafua pabu.

Katshia ku tshikondo tshia Mvula wa Kabutu atshi, Nzambi ki mmulekele kabidi bademon balua bu bantu to. Kadi nansha katuyi mua kubamona to, bademon badi anu bakeba bua kufikisha bantu ku dienza malu mabi menemene. Badi bakebesha ntatu ya bungi ya katshia ne katshia. Badi benza nunku bualu bakadi babipate mu diulu babakupe panshi.

Udi mumanye bua tshinyi katuena mua kumona bademon anyi?​— Bualu kabena bamueneka to. Kadi tudi bajadike ne: badiku. Bible udi wamba ne: Satana udi ‘mudingi wa bantu pa buloba buonso,’ ne bademon bende badi bamuambuluisha.​—Buakabuluibua 12:9, 12.

Diabolo ne bademon bende badi mua kutudinga petu anyi kutushima anyi?​— Eyowa, badi mua kutushima tuetu katuyi badimuke. Kadi kabiena bikengela bua tuetu kutshina to. Mulongeshi Munene wakamba ne: ‘Diabolo kena ne tshidiye mua kungenzela to.’ Tuetu balamate Nzambi, neatukube bua Diabolo ne bademon bende kabatuenzedi bibi.​—Yone 14:30.

Mbimpe tuetu kumanya malu mabi adi bademon mua kutusaka bua kuenza. Nunku ela meji bimpe ku bualu ebu. Mmalu mabi kayi avua bademon benze pavuabu balue pa buloba?​— Kumpala kua Mvula wa Kabutu, bakangatangana ne bakaji, bualu buvua kabuyi buakanyine bua banjelu kuenzabu to. Lelu’eu bademon batu basue padi bantu kabayi batumikila mikenji ya Nzambi idi itangila diangatangana dia mulume ne mukaji. Ndi musue kukuebeja nunku: Anu nganyi ke udi mua kuangatangana ne mukaji anyi mulume?​— Udi muambe bulelela, anu bantu badi baselangane.

Lelu’eu bansongalume ne bansongakaji bakuabu batu bangatangana, kadi bualu budibu benza ebu mbubi be! Bible udi wakula bua “butaka” bua muntu mulume. (Lewitiki 15:1-3, Mukanda wa Mvidi Mukulu [Mishonyi, MMV]) Kudi kabidi butaka bua muntu mukaji. Yehowa uvua muenze bitupa bia mubidi wa muntu ebi bua bualu kampanda bua pa  buabu budi anu bantu badi baselangane nkayabu mua kuenza. Bitu bisankisha bademon padi bantu benza malu adi Yehowa mukandike. Tshilejilu, bademon batu basanka bikole padi muana mulume ne muana mukaji banaya muntu ne muntu ne butaka bua mukuende. Katuena basue kusankisha bademon to, ki mmuomu anyi?​—

Kudi bualu bukuabu kabidi butu bademon basue kadi Yehowa mubukine. Udi mumanye bualu abu anyi?​— Tshikisu. (Musambu 11:5) Tshikisu mbualu budi buenzeka padi bantu ne muoyo mubi bakengesha bakuabu. Vuluka ne: ke tshivua bantu ba mpolondo anyi bana ba bademon benze.

Bademon batu kabidi basue kutshingisha bantu. Misangu mikuabu batu badingidija bua kuleja ne: m’bantu bakadi bafue. Badi nansha mua kuidikija mêyi a bantu bakadi bafue. Mushindu eu ke utu bademon bashima bantu ba bungi babelesha meji ne: bantu bakadi bafue badi ne muoyo ne kabidi badi mua kuakula ne bantu badi ne muoyo panu. Bushuwa, bademon badi bafikisha bantu ba bungi ku ditaba ne: bakishi batuku.

Nanku tudi ne bua kudimuka bua Satana ne bademon bende kabatushimi to. Bible udi utudimuija  ne: ‘Satana utu uteta kudiandamuna bua kulua bu muanjelu muimpe, ne basadidi bende pabu batu benza muomumue.’ (2 Kolinto 11:14, 15) Kadi bua kuamba bulelela, bademon mbabi. Tumonayi mushindu udibu mua kuteta bua kutuvuija babi bu mudibu.

Nkuepi kutu bantu bamanyina malu a bungi a tshikisu ne a diangatangana dia bakaji ne balume didi kadiyi diakanyine ne a nyuma mibi ne bakishi?​— Ki nku ditangila amue malu a ku televizion ne filme itubu balejaku, anyi mu dilonda manaya a ku ordinatere ne ku video, anyi kabidi ku Internet ne dibala dia mikanda idi ilonda malu a kuseka anyi? Kuenza malu a nunku kudiku kutusemeja pabuipi ne Nzambi anyi pabuipi ne Diabolo ne bademon bende? Udi wela meji kayi?​—

Udi mumone ne: nnganyi udi musue bua tuikala tuteleja ne tutangila malu mabi?​— Eyowa, n’Satana ne bademon bende. Mpindieu, ntshinyi tshitudi meme ne wewe ne bua kuenza?​— Tudi ne bua kubala, kuteleja ne kutangila malu adi mimpe buetu tuetu, malu atuambuluisha bua kuenzela Yehowa mudimu. Udiku mua kuela meji ku amue malu mimpe aa atudi mua kuenza anyi?​—

Tuetu tuenza malu adi mimpe, katuena ne tshitudi mua kutshinyina bademon to. Yezu udi ne bukole mubapite buonso ne buobu badi bamutshina. Dituku dikuabu bademon bakadidila Yezu bamba ne: ‘Udi mulue bua kutubutula anyi?’ (Mâko 1:24, MMM) Katuakuikalaku ne disanka pakumbana tshikondo tshialua Yezu kubutula Satana ne bademon bende anyi?​— Patutshidi bindile tshikondo atshi apa, mbimpe tuikala bamanye ne: Yezu neatukube bua bademon kabatuenji bualu tuetu bashale pabuipi nende ne kabidi pabuipi ne Tatuende udi mu diulu.