BAMUE bantu batu bamba ne: badi bitaba anu bintu bidibu mua kumona ne mêsu. Kadi kuamba nunku ndipanga dia lungenyi. Kudi bintu bia bungi menemene bitudi katuyi banji kumona ne mêsu etu nansha. Udiku mua kutela tshimue patupu anyi?​—

Tudi mua kuamba tshinyi bua kapepe katudi tueyela? Tudi mua kukumvua anyi?​— Ambulula tshianza tshiebe ne elaku mupuya. Udi mumvueku tshintu anyi?​— Eyowa udi mumvue, kadi kuena mua kumona lupepele to, ki mmuomu anyi?​—

Tukadi bamane kuakula bua bantu ba mu nyuma batudi katuyi mua kumona. Tukadi bamone ne: bamue mbimpe kadi bakuabu mbabi. Telabi bamue bantu ba mu nyuma badi bimpe batudi katuyi mua kumona.​— Eyowa, tudi ne Yehowa Nzambi ne Yezu, tudi kabidi ne banjelu bimpe. Kudiku kabidi banjelu babi anyi?​— Bible udi wamba ne: banjelu babi badiku. Ngambilaku malu audi mumanye adi mabatangile.​—

Bualu butudi bamanye mbua se: banjelu bonso ni mbimpe ni mbabi, badi ne bukole bupite buetu. Mulongeshi Munene uvua mumanye malu a bungi adi atangila banjelu. Uvua mumanye nanku bualu yeye muine uvua muanjelu kumpala kua kumulelabu panu pa buloba. Uvua musombe ne banjelu bakuabu mu diulu. Uvua mumanye banjelu miliyo mivule. Banjelu bonso aba badi ne mêna anyi?​—

Tuvua bamone ne: Nzambi uvua muinyike mitoto yonso ya muulu mêna. Nunku tudi mua kuamba ne: banjelu bonso badi pabu ne mêna abu. Tudi bamanye ne: badi mua kuyikidilangana malu munkatshi muabu bualu Bible udi wakula bualu bua ‘miakulu ya banjelu.’ (1 Kolinto 13:1) Udi wela meji ne: banjelu batu bayikila malu kayi? Batu bayikila malu etu tuetu bantu ba pa buloba anyi?​—

 Tudi bamanye ne: bademon, banjelu ba Satana badi bakeba bua kutufikisha ku dibenga kutumikila Yehowa. Nunku badi bayikila pa mishindu idibu mua kufikisha bantu ku dibenga kutumikila Nzambi. Mbasue bua tuikale bu buobu bua Yehowa katunangi kabidi nansha. Kadi tuambe tshinyi bua banjelu ba lulamatu ba Nzambi? Udi wela meji ne: batu pabu bayikila bualu buetu anyi?​— Eyowa, batu bayikila. Mbasue kutuambuluisha. Teleja nkulondele mushindu uvua banjelu bakuabu ba Nzambi bambuluishe bantu bavua banange Yehowa ne bavua bamuenzela mudimu.

Tshilejilu, kuvua muntu mukuabu uvua musombele ku Babulona, dîna diende Danyele. Bantu ba bungi ba ku babulona aku kabavua banange Yehowa to. Bantu ba kuntu aku bakela too ne mukenji mukuabu bua kunyoka muntu yonso uvua usambila Yehowa Nzambi. Kadi Danyele kakalekela kusambila Yehowa nansha. Udi mumanye tshiakenzelabu Danyele anyi?​—

Bantu ba muoyo mubi bakeleshisha Danyele mu buina bua ntambue. Muine amu Danyele uvua nkayende munyungulula kudi nyama ya ntambue ivua ne nzala  mikole. Udiku mumanye tshiakenzeka pashishe anyi?​— Danyele wakamba ne: ‘Nzambi mmutume muanjelu wende, mmusuike mbanga ya ntambue.’ Kabavua bamuenzele bibi nansha kakese! Banjelu badi mua kuenzela bantu badi benzela Yehowa mudimu malu a dikema.​—Danyele 6:18-22.

Kuvua kabidi tshikondo tshivuabu bele Petelo mu buloko. Vuluka ne: Petelo uvua mulunda wa Yezu Kristo Mulongeshi Munene. Bantu bakuabu kabavua basue kumvua Petelo ubambila ne: Yezu uvua Muana wa Nzambi to. Nunku bakela Petelo mu buloko. Basalayi bavua balama Petelo bua kanyemi to. Kuvuaku muntu uvua mua kumuambuluisha anyi?​—

Petelo uvua ulala munkatshi mua basalayi babidi bavua bamulame, ne bavua kabidi bamusuike nkanu ku bianza. Kadi Bible udi wamba ne: ‘Tangila!  Muanjelu wa Yehowa wakalua, dinkenka diakatema mu nzubu wa buloko. Wakalenga Petelo pa mbaale e kumubisha ku tulu wamba ne: “Juka lukasa!”’

Dîba adi, nkanu ivuabu basuike Petelo ku bianza kusulukayi kumatayi! Ke muanjelu kumuambila ne: ‘Vuala bilamba biebe, ela bisabata ne undonde.’ Balami kabavua mua kumukuata to bualu muanjelu uvua wambuluisha Petelo. Pashishe bakafika ku tshibi tshia tshiamu, bualu bua tshishima buakenzeka. Tshibi tshiakadiunzulukila! Muanjelu au wakapatula Petelo mu buloko bua Petelo amone mua kutungunuka ne mudimu wa diyisha.​— Bienzedi 12:3-11.

Banjelu ba Nzambi badi mua kutuambuluisha petu anyi?​— Eyowa, badi mua kutuambuluisha. Mbuena kuamba ne: kabena mua kulekela bualu nansha bumue bututatshisha anyi?​— Tòo, banjelu kabena batuepula ku ntatu idi mua kutufikila tuetu benze malu a bupote to. Kadi nansha katuyi benze malu a bupote, tudi anu mua kupeta lutatu kampanda. Ki mbambile banjelu bua bapangishe malu aa bua kaenzeki to. Kadi, Nzambi mmubapeshe mudimu wa mushinga muvule wa buobu kuenza.

Bible udi wakula bua muanjelu udi wambila bantu ba miaba yonso bua kutendelelabu Nzambi. (Buakabuluibua 14:6, 7) Muanjelu au udi ubambila bualu ebu mushindu kayi? Udi welela lubila lumbukila mu diulu bua muntu yonso kulumvuaye anyi?​— Tòo, bayidi ba Yezu badi pa buloba badi bambila bantu nabu malu adi atangila Nzambi ne banjelu ke badi babalombola mu mudimu wabu. Banjelu badi benza muabu muonso bua bantu badi basue menemene kumanya malu adi atangila Nzambi bapete mushindu wa kuateleja. Tudi mua kudifila mu mudimu wa diyisha au, ne banjelu nebatuambuluishe.

Kadi malu neikale munyi bikala bantu badi kabayi banange Nzambi batutatshisha? Kadi buobu mua kutuela mu buloko? Banjelu nebatupatule mu buloko anyi?​— Eyowa, badi mua kutupatulamu. Kadi kabakuenza nanku misangu yonso to.

Dimue dituku, Paulo muyidi wa Yezu uvua mu buloko. Uvua wenza luendu mu mazuwa a mâyi mu tshipepele tshikole tshia dikema. Kadi banjelu kabakalua kumuambuluisha diakamue to. Bivua nanku bualu kuvua  bantu bakuabu bavua ne dijinga dia kuteleja malu a Nzambi. Muanjelu wakamuambila ne: ‘Paulo, kutshinyi to; buudi nabu mbua kuimana kumpala kua Kaisa.’ Bushuwa, bavua ne bua kufila Paulo kudi Kaisa bua Paulo amone mua kumuyisha. Misangu yonso, banjelu bavua bamanye muaba uvua Paulo usanganyibua ne bavua bamuambuluisha. Tuetu tuenzela Nzambi mudimu, banjelu nebatuambuluishe tuetu petu.​—Bienzedi 27:23-25.

Kudi mudimu mukuabu munene wikala banjelu ne bua kuenza, ne nebawenze mu katupa kîpi emu. Tshikondo tshikala Nzambi ne bua kubutula bantu babi tshikadi tshisemena pabuipi menemene. Bonso badi kabayi batendelela Nzambi mulelela nebabutudibue. Bamue bantu batu bamba ne: kabena bitaba ne: banjelu badiku, bionso abi anu bualu kabena babamona to, kadi nebamone mudibu badishima.​—2 Tesalonike 1:6-8.

Bidi bisua kumvuija tshinyi buetu tuetu?​— Tuetu bikale ku luseke lumue ne banjelu ba Nzambi, nebatuambuluishe. Kadi tudiku ku luseke lua banjelu anyi?​— Bushuwa tudi ku luseke luabu bituikala tuenzela Yehowa mudimu. Ne tuetu bikale tuenzela Yehowa mudimu, netuambile bakuabu bantu bua bamuenzele pabu mudimu.