ELA meji ne: muana wa bakaji mukuabu udi wambila mamuende ne: “Mama, nempingane kumbelu diakamue padi kalasa kapatuka.” Kadi padi kalasa kapatuka ushala unaya ne balunda bende pashishe ulua kuambila mamuende ne: “Mulongeshi uvua mungambile bua kushala kunyima kua kalasa.” Mbimpe bua kuamba bualu bua buena ebu anyi?​—

Anyi ela meji kabidi ne: muana wa balume mukuabu udi wambila tatuende ne: “Too, tshivua munayile ndundu mu nzubu to.” Kadi bidi bishi pikalabi ne: uvua bulelela munayile ndundu mu nzubu? Yeye mua kuamba ne kavua munayilemu, mbibi anyi?​—

Mulongeshi Munene wakatuleja tshintu tshimpe tshia kuenza. Wakamba ne: “Diyi dienu pikaladio dia ne: ‘Eyo’, dikale anu ‘eyo’; diodio dia ne: ‘To’, dikale anu ‘to’. Diyi dinudi nusakidila, didi difuma kudi Muena bubi.” (Matayo 5:37, MMM) Ntshinyi tshivua Yezu musue kuamba?​— Uvua musue kuamba ne: tudi ne bua kuenza malu atudi tuamba.

 Kudi muyiki mukuabu mu Bible udi uleja mushinga udi nawu kuamba kua bulelela. Muyiki eu udi utangila bantu babidi bavua badiamba ne: bavua bayidi ba Yezu. Tumonabi tshivua tshienzeke.

Ngondo ibidi kayiyi mianji kukumbana kunyima kua lufu lua Yezu, bantu ba bungi bavua bafumina kule bakalua ku Yelushalema bua difesto dinene dia bena Yuda divuabu babikila ne: Pentekoste. Mupostolo Petelo wakenza muyuki wa tshikuma; mu muyuki au wakambila bantu malu avua atangila Yezu uvua Yehowa mubishe ku bafue. Eu uvua musangu wa kumpala uvua bantu ba bungi bavua balue ku Yelushalema bumvue bakula bua Yezu. Mpindieu bavua basue kumanya bia bungi. Nanku bakenza tshinyi?

Bakashala kuine aku matuku a bungi avuabu kabayi belele nansha meji ne: bavua mua kushalaku. Kadi kunyima kua matuku makese, bamue ba kudibu kabatshivua ne makuta, nenku bavua dijinga ne diambuluisha bua kumona mua kusumba bia kudia. Bayidi ba mu Yelushalema bavua basue kuambuluisha benyi aba. Ke bualu kayi ba bungi ba kudibu bakapanyisha bintu biabu ne kutuadila bapostolo ba Yezu makuta. Pashishe bapostolo bakaapesha aba bavua nawu dijinga.

 Anania ne mukajende Sapila ba mu tshisumbu tshia bena Kristo tshia mu Yelushalema bakapanyisha budimi buabu. Kakuvua muntu uvua mubenzeje bua kubupana to. Bakabupana ku disua diabu nkayabu. Kadi pakabusumbishabu, ki mbualu bua ne: bavua banange bayidi bapiabapia ba Yezu to. Mu bulelela, Anania ne Sapila bavua basue kuleja bantu ne: buobu pabu bavua bantu bimpe, pabu kabayi bantu bimpe to. Bakasuika dîyi bua kuamba ne: bavua bafila makuta onso bua kuambuluisha bakuabu. Kadi bua kuamba bulelela, bavua bafila anu tshitupa tshia makuta kadi eku bamba ne: bavua bafila onso. Udi wela meji kayi bua bualu ebu?​—

Anania wakaya kumona bapostolo. Kubapeshaye makuta. Kadi Nzambi yeye uvua mumanye ne: kavua mufile makuta onso to. Nunku Nzambi udi umanyisha mupostolo Petelo ne: Anania kêna muntu wa malu malelela mu bualu ebu to.

Nunku Petelo kuamba ne: ‘Anania, bua tshinyi udi mulekele Satana ukusaka bua kuenza bualu ebu? Budimi buvua buebe. Kakuvua muntu uvua mukuenzeje bua kubupana to. Nansha paukavua mubupane, uvua mua kusungula nkayebe tshiuvua mua kuenza ne makuta. Kadi bua tshinyi udi wamba muudi mufile makuta onso pebe mufile anu tshitupa? Mu bualu ebu udi mutudinge, ki ng’anu tuetu to, kadi ne Nzambi kabidi.’

Mbualu bukole bua dikema! Anania uvua udinga! Kavua wenza tshivuaye muambe ne: uvua wenza to. Uvua anu wamba bia mafi patupu  muvuaye utshienza. Bible udi utuambila tshivua tshienzeke pashishe. Udi wamba ne: ‘Padiye umvua mêyi a Petelo, Anania udi ukuluka panshi ne ufua.’ Nzambi wakashipa Anania! Pashishe bakapatula tshitalu tshiende ne bakatshijika.

Kunyima kua mêba asatu, Sapila kubuelaye. Kavua mumanye bualu buvua buenzekele bayende to. Ke Petelo kumukonka ne: ‘Nuvua bapanyishe budimi ku mushinga wa makuta anudi bafile aa anyi?’

Sapila kuandamuna ne: ‘Eyowa, tuvua bapanyishe budimi ku bungi bua makuta au.’ Mafi pa mafi nkayau! Bavua balame makuta makuabu avuabu bapete ku budimi abu. Nunku Nzambi wakashipa kabidi Sapila.​—Bienzedi 5:1-11.

Bualu buvua bufikile Anania ne Sapila budi butulongesha tshinyi?​— Budi butulongesha ne: Nzambi ki mmusue bena mashimi to. Mmusue tuikale anu tuamba bulelela. Kadi bantu ba bungi batu bamba ne: ki mbibi bua kushima to. Udi wela meji ne: bantu abu badi bamba bulelela anyi?​— Udiku mumanye ne: masama onso, makenga ne lufu bidi pa buloba mbiluepu anu bua dishima anyi?​—

Vuluka ne: Diabolo wakashima Eva mukaji wa kumpala. Wakamuambila ne: yeye mubenge kutumikila Nzambi ne mudie tshimuma tshivua Nzambi mumukandike bua kudia, kavua mua kufua to. Eva wakitaba Diabolo ne wakadia tshimuma atshi. Wakasaka Adama bua kutshidia pende. Pakadiabu, bakalua bena mpekatu, ne bana bonso bavuabu mua kulela bavua ne bua kuledibua bena mpekatu. Nenku bu muvua bana bonso ba Adama bena mpekatu, bonso bakakenga ne bakafua. Mmushindu kayi uvua dikenga ne ntatu bibange?​— Biakabanga ne dishima.

Mpindieu tudi tumvua bua tshinyi Yezu uvua muambe ne: Diabolo udi ‘muena dishima ne udi tatu wa dishima’! Uvua muntu wa kumpala uvua mushime. Padi  muntu ushima, udi wenza tshivua Diabolo muenze kumpala. Tudi ne bua kuvuluka bualu ebu misangu yonso itudi tumvua muoyo utusaka bua kushima.​—Yone 8:44.

Ndîba kayi diudi mua kumvua muoyo ukusaka bua kushima?​— Ki mpaudi muenze bualu bubi anyi?​— Nansha kuyi musue, udi mua kufika ku dinyanga tshintu. Buobu bakuebeje, newambe ne: mmuanenu kampanda ke udi mutshitayishe anyi? Peshi newambe muudi kuyi mumanye muvuatshi tshitayike?​—

Tudi mua kuamba tshinyi biwikala wamba ne: udi muenze mudimu uvuabu bafile mu kalasa bua kuwenzela kumbelu pine apu wewe muwenze anu tshitupa? Newambe ne: uvua muujikije nansha wewe kuyi muujikije anyi?​— Tuvuluke Anania ne Sapila. Kabavua bambe bulelela buonso to. Nenku bua kuleja ne: bualu abu buvua bubi Nzambi wakabashipa.

Nansha tuetu benze tshinyi, nebinyange malu bikole bitambe tuetu bashime, ne katuena nansha mua kuamba tshitupa tshia bulelela to. Bible udi wamba ne: ‘Nuambe mêyi malelela.’ Udi kabidi wamba ne: ‘Kanushimianganyi.’ Yehowa utu wamba anu bulelela, ne mmutekemene bua tuetu petu tuambe bulelela.​—Efeso 4:25; Kolosai 3:9.