ANJI ngambilaku, mmukanda kayi uutu mutambe kunanga bikole kupita mikuabu yonso?​— Bamue bana badi mua kusungula mukanda udi wakula bua malu a nyama. Bakuabu badi buobu mua kusungula mukanda udi ne bimfuanyi bia bungi munda muawu. Bidi mua kuikala bienza disanka bua kubala mikanda ya nanku.

Kadi mikanda mitambe buimpe idiku ng’eyi idi ituambila bulelela pa bidi bitangila Nzambi. Umue wa ku mikanda ayi udi ne mushinga wa bungi kupita mikuabu yonso idi ituambila bulelela pa bidi bitangila Nzambi. Udi mumanye ne: mmukanda kayi au anyi?​— Mukanda au m’Bible.

Bua tshinyi Bible mmukanda wa mushinga mukole?​— Bualu mmufumine kudi Nzambi. Udi utulondela malu adi atangila Nzambi ne malu mimpe atuenzelaye. Udi kabidi utuleja tshitudi ne bua kuenza bua kumusankisha. Bible udi menemene anu bu mukanda mutufundila kudi Nzambi.

Nzambi si uvua mua kufunda Bible yonso mujima ku tshianza tshiende yeye nkayende mu diulu ne pashishe kumupesha bantu. Kadi kakenza nanku to. Nansha muvua ngenyi idi mu Bible mifumine kudi Nzambi, kadi yeye muine wakangata basadidi bende ba pa buloba bua kufundabu tshitupa tshinene tshia Bible.

Nzambi wakenza bualu abu mushindu kayi?​— Bua kumvua mushindu wakenzaye muanda au, anji tangila bualu ebu. Patudi tumvua dîyi dia muntu ku tshisanji, dîyi adi didi mua kuikala dia muntu udi kule. Patudi tutangila televizion, tudi mua kumona bimfuanyi bia bantu ba mu matunga makuabu, ne tudi mua kumvua mene ne malu adibu bamba.

Bantu badi nansha mua kuenza ngendu mile kuya too ne ku ngondo mu tudiendelandela tua mulu ne kuine aku kutumina bantu mikenji panshi pa buloba apa. Utuku mumanye ne: bantu badi mua kuenza nunku eu anyi?​— Bu mudi bantu ne bukokeshi bua kuenza nunku, Nzambi udiku pende mua  kutumina bantu mikenji ifumina mu diulu anyi?​— Eyowa! Wakenza bualu ebu kale menemene kumpala kua bantu kuenzabu tshisanji ne televizion.

Mose uvua muntu wakumvua menemene Nzambi wakula. Mose kavua mua kumona Nzambi to, kadi uvua mua kumvua dîyi diende. Pakumvua Mose dîyi dia Nzambi, bantu ba bungi menemene bavua muaba au. Dituku dine adi Nzambi wakakankisha mukuna mujima, kuvua makubakuba ne mikenya yela. Bantu bakamanya ne: Nzambi uvua muakule, kadi bavua ne buôwa bua bungi. Nunku bakambila Mose ne: “[Nzambi] alekele yeye kuakula, tshianana netufue.” Pashishe, Mose wakafunda malu avua Nzambi muambe. Nenku malu akafunda Mose tudi tuasangana mu Bible.​—Ekesode 20:18-21, MMM.

 Mose wakafunda mikanda itanu ya ntuadijilu ya mu Bible. Kadi ki nganu Mose nkayende uvua mufunde malu a mu Bible to. Nzambi wakasungula bantu batue ku 40 bua kufundabu malu a mu Bible. Bantu abu bavuaku kukadi kupite bidimu bia bungi menemene, ne kuakenza bidimu bia bungi bua kujikijabu difunda dia Bible. Difunda dia Bible diakangata bidimu bitue ku 1 600! Tshidi tshikemesha ntshia se: nansha muvua bamue ba ku bantu aba kabayi bamanyangane, malu onso akafundabu adi apetangana bimpe menemene.

Bantu bakuabu bavua Nzambi musungule bua kufunda malu a mu Bible bavua bamanyike bikole. Nansha muvua Mose muikale mulami wa mikoko, wakalua mulombodi wa tshisamba tshia bena Isalele. Solomo uvua mukalenge wa meji ne bubanji kupita bantu bonso ba pa buloba. Kadi bamue ba ku bafundi ba Bible kabavua bamanyike nanku to. Amosa yeye uvua ne mudimu wa kulama mitshi ya mfigi.

Kabidi, umue wa ku bantu bakafunda Bible uvua munganga. Udi mumanye dîna diende anyi?​— Diende uvua Luka. Mufundi mukuabu wa Bible yeye uvua mufutshishi wa bitadi. Dîna diende divua Matayo. Mukuabu kabidi uvua mulumbuluidianganyi wa bilumbu, muntu munene uvua mumanye bikole mikenji ya mu tshitendelelu tshia bena Yuda. Wakafunda mikanda mivule ya mu Bible kupita bakuabu bonso. Udi mumanye dîna diende anyi?​— Dîna diende divua Paulo. Kabidi bayidi ba Yezu aba: Petelo ne Yone, bavua bikale pabu bafundi ba Bible, bavua buobu balobi ba mishipa.

Bavule ba ku bantu bakafunda Bible bakafunda malu avua Nzambi ne bua kuenza mu matuku atshilualua. Mmunyi muakamanyabu malu aa pawu kaayi manji nansha kuenzeka?​— Nzambi wakamanyisha bantu abu malu aa. Wakabambila malu avua ne bua kuenzeka.

Pavua Yezu Mulongeshi Munene mutshikale pa buloba, bakavua bamane kufunda tshitupa tshinene tshia Bible. Uvuluke ne: Mulongeshi Munene uvua mu diulu. Uvua mumanye malu avua Nzambi muenze. Uvuaku muitabe ne: Bible uvua mufumine kudi Nzambi anyi?​— Eyowa, uvua muitabe ne: Bible mmufumine kudi Nzambi.

Pavua Yezu ulondela bantu malu adi atangila midimu ya Nzambi, uvua ubala mu Bible. Imue misangu uvua ubambila mu mutu malu adi Bible  muambe. Yezu wakatutuadila kabidi malu a bungi a kudi Nzambi. Yezu wakamba ne: “Ndi ngambila bantu bindi mumvue kudiye.” (Yone 8:26) Yezu uvua mumvuile malu a bungi kudi Nzambi bualu uvua musombe nende kaba kamue. Mpenyi patudi mua kubala malu au avua Yezu muambe?​— Mmu Bible. Bakatufundila malu au onso bua tuetu kuabala.

Bushuwa, pavua Nzambi musungule bantu bua kufundabu malu au, bakaafunda bilondeshile ngakuilu wabu wa matuku onso. Nunku bavua bafunde malu a bungi a mu Bible mu tshiena-Ebelu, ndambu mu tshiena Alama ne makuabu a bungi mu tshiena-Greke. Bu mudi bantu ba bungi lelu’eu kabayi bamanye mua kubala miakulu ayi, ke bua tshinyi mbakudimune Bible mu miakulu mikuabu. Lelu’eu bantu badi mua kubala bitupa bia Bible mu miakulu mipite pa 2 260. Anji elabi meji bua bungi bua miakulu eyi! Bible mmukanda udi Nzambi mufundile bantu ba miaba yonso. Kadi nansha bafunde Bible mu miakulu bungi kayi, mukenji udimu mmufume kudi Nzambi.

 Tshidi Bible wamba tshidi ne mushinga muvule buetu tuetu. Bavua bafunde Bible kukadi mpindieu bidimu bia bungi, kadi nansha nanku udi utuambila malu adi enzeka lelu. Udi utulondela kabidi tshikala Nzambi mua kuenza mu matuku makese kumpala eku. Malu adi Bible wamba adi asankisha be! Adi atupesha ditekemena dilenga menemene.

Bible udi kabidi utuleja bikadilu bidi Nzambi musue bua tuetu kuikala nabi. Udi utuambila malu adi makane ne malu adi mabi. Meme ne wewe tudi ne bua kumanya malu aa. Udi wakula bua bantu bakenza malu mabi ne tshiakabafikila, bionso ebi anu bua tuetu kumona mua kuepuka ntatu ya buena ivua mibafikile. Udi kabidi wakula bua bantu bakenza malu makane ne masanka akapetabu. Bakafunda malu onso aa bua diakalenga dietu.

Kadi bua Bible kutuambuluishaye bikole, tudi ne bua kumanya diandamuna dia lukonko lumue. Lukonko alu nduolu elu: Nnganyi uvua mutupeshe Bible? Udi mua kuandamuna tshinyi?​— Udi mua kuandamuna ne: Eyowa, Bible mujima mmufumine kudi Nzambi. Nunku, mmunyi mutudi mua kuleja ne: tudi bantu ba meji?​— Mpatudi tuteleja Nzambi ne tuenza tshidiye wamba.

Nunku tudi ne bua kulama dîba dia kuikala tubala Bible pamue. Patutu tupeta mukanda mutufundila kudi muntu utudi banange bikole, tutu tuubalula misangu ne misangu. Tutu tuwangata ne mushinga wa bungi. Ke mushindu utudi ne bua kuenza bua Bible, bualu Bible mmukanda mutufundila kudi Eu udi mutunange bikole. Mmukanda wa kudi Nzambi wa dinanga.