YEZU wakadila muadi pavua mulunda wende Lazalo mufue. Udi wela meji ne: Yehowa uvua mumvue bibi pavua Yezu ukenga ne mufue anyi?​— Bible udi wamba ne: Malu adi enzeka adi mua ‘kunyingalaja’ Nzambi anyi ‘kutatshisha’ mutshima wende.​—Musambu 78:40, 41; Yone 11:35.

Elabi meji bua dibungama divua nadi Yehowa pavuaye umona muvua Muanende munanga ufua.​— Yezu uvua mujadike ne: Nzambi kavua mua kumupua muoyo to. Ke bualu kayi mêyi ende a ndekelu kumpala kua kufuaye avua ne: “Tatu, ndi nteka muoyo wanyi mu bianza biebe.”​— Luka 23:46.

Yezu uvua mujadike ne: bavua ne bua kumubisha ku lufu, ne se: kabavua mua kumulekela mu “muaba wa bafue” peshi mu lukita to. Kunyima kua bamane kubisha Yezu ku lufu, mupostolo Petelo wakambulula mêyi avuabu bafunde mu Bible pa bidi bitangila Yezu wamba ne: ‘Kabakamushiya mu muaba wa bafue, mubidi  wende kawakabola.’ (Bienzedi 2:31; Musambu 16:10) Tòo, mubidi wa Yezu kawakabola ne kununka mu lukita to.

Patshivua Yezu pa buloba, wakambila nansha bayidi bende ne: kavua ne bua kushala mufue matuku a bungi to. Wakabumvuija ne: uvua ne bua ‘kushipibua, ne kubishibua pavua matuku asatu apita.’ (Luka 9:22) Nunku bua kuamba bulelela, kabivua ne bua kukemesha bayidi bende pavua Yezu ne bua kubika ku lufu to. Kadi bivuaku bibakemeshe anyi?​— Tuanji kumona.

Tudi bu pa dîba isatu jajaja mu Ditanu dilolo padi Mulongeshi Munene ufua pa mutshi wa tshinyongopelu. Yozefe mmuntu mubanji wa ku Kabadi ka Sanedren udi kabidi witabuja Yezu kadi ubienza mu musokoko. Padiye umvua ne: Yezu mmufue, udi uya kudi Pilato, ngovena wa bena Lomo. Udi umulomba ni udi mua kutulula tshitalu tshia Yezu ku mutshi bua kutshijiika. Pashishe, Yozefe udi uya ne tshitalu tshia Yezu mu budimi bukuabu mudi lukita, mbuena kuamba ne: muaba utubu bajika bitalu.

Padibu bateka tshitalu mu lukita alu, badi bajikaku ne dibue dinene. Tuamba ne: badi bakanga lukita alu. Mpindieu tukadi dituku disatu, mu Dia lumingu. Dîba ki ndianji kubanda to, nunku kuulu kutshidi kufiike. Bantu mbalame lukita. Bakuidi banene ke badi babatume bua kululama. Udi mumanye ne: mbua tshinyi mbabatume anyi?​—

Bakuidi bavua bumvue pabu ne: Yezu wakamba ne: neikale mua kubika ku lufu. Nunku bua kupangisha bayidi ba Yezu bua kabalu kuiba tshitalu ne pashishe kuamba ne: Yezu uvua mubike ku lufu, bakuidi badi bateka bansentedi ku lukita. Katantshi aka, badi bumvua buloba bubangisha kukanka. Mu mîdima amu, badi bamona dinkenke dia kapia. Mmuanjelu wa Yehowa! Basalayi kumvuabu buôwa kabayi nansha ne mushindu wa kunyunga to. Muanjelu udi uya ku lukita ne umbusha dibue. Lukita ludi mpindieu munda mutupu!

Bushuwa, bidi anu bu muakalua mupostolo Petelo kuamba ne: ‘Yezu eu, Nzambi wakamubisha ku lufu.’ (Bienzedi 2:32) Nzambi wakabisha Yezu ku lufu ne mubidi wa buena uvuaye nawu kumpala kua kuluaye pa  buloba. Bakamubisha ku lufu ne mubidi wa mu nyuma, wa buena wa banjelu. (1 Petelo 3:18) Nunku bua bantu kumonabu Yezu, udi ne bua kuangata mubidi wa misunyi. Ke mudiye wenza anyi?​— Tumonabi.

Mpindieu, dîba dikadi dibanda. Basalayi bakadi banyeme. Mariya wa ku Magadala ne bakuabu bakaji badi bikale bayidi ba Yezu badi baya batangile ku lukita. Badi benda badiebeja mu njila ne: ‘Watubungulujila dibue didi ku lukita nnganyi?’ (Mâko 16:3) Kadi padibu bafika ku lukita, dibue dikadi dimana kumusha. Ne tangila, lukita ludi munda mutupu! Tshitalu tshia Yezu katshienamu kabidi to! Diakamue, Mariya wa ku Magadala udi uya lubilu bua kumonangana ne bamue bapostolo ba Yezu.

Bakaji bakuabu badi bashala pabuipi ne lukita. Badi badiebeja ne: ‘Mubidi wa Yezu udi mua kuikala kuepi?’ Anu pine apu bantu balume babidi bavuale bilamba bikenka bikole badi babamuenekela. Mbanjelu! Badi bambila bakaji abu ne: ‘Bua tshinyi nudi nukeba Yezu apa? Ukadi mubishibue. Ndayi lubilu numanyishe bayidi bende.’ Fuanyikijabi mudi bakaji aba baya mbilu! Mu njila, badi basambakena ne muntu mukuabu. Udi mumanye ne: muntu au uvua nganyi anyi?​—

Muntu au n’Yezu, udi ne mubidi wa buntu! Yeye pende udi wambila bakaji abu ne: ‘Ndayi nuambile bayidi banyi.’ Bakaji badi bapapuka. Badi bapeta bayidi ne babambila ne: ‘Yezu udi ne muoyo! Tudi bamumone!’ Mariya ukadi muambile Petelo ne Yone ne: lukita ludi munda mutupu. Mpindieu badi balua kulutangila, anu muudi ubimona mu tshimfuanyi etshi. Badi batangila bilamba bia lin bivuabu bajingile Yezu, kadi ki mbajadike tshidibu mua kuitaba to. Mbasue kuitaba ne: Yezu udi ne muoyo tshiakabidi, ne bidi bimueneka menemene ne: bidi nanku.

Anu Dia lumingu adi, Yezu udi umuenekela kabidi bayidi bende babidi badi mu njila batangile ku musoko wa Emau. Yezu udi uya nabu pamue ne uyukila nabu, kadi ki mbamumanye nansha, bualu kêna ne mubidi wa muomumue ne uvuaye nawu kumpala to. Badi balua kumumanya anu padibu badia nende pamue ne padiye wenza disambila. Bayidi badi bapapuka ne bapingana lubilu mu Yelushalema, pabi Yelushalema  mmushale mutantshi wa kilometre ya bungi! Imue misangu kunyima kua katantshi kakese Yezu udi uya kumuenekela Petelo bua kumuleja ne: udi ne muoyo.

Pashishe anu mu diodi Dia lumingu adi ku dilolo, bayidi ba bungi badi badisangisha mu nzubu mukuabu. Biibi mbikanga. Badi bamona anu diakamue Yezu eu munkatshi muabu mu nzubu amu! Kumanyabu mpindieu ne: Mulongeshi Munene udi bulelela ne muoyo tshiakabidi. Anji elabi meji bua disanka didibu nadi!​—Matayo 28:1-15; Luka 24:1-49; Yone 19:38–20:21.

Munkatshi mua matuku 40 Yezu udi umueneka mu mibidi ya buntu anyi ya munyinyi ne mashi mishilashilangane bua kuleja bayidi bende  ne: bulelela udi ne muoyo. Ndekelu wa bionso udi ushiya buloba ne upingana kudi Tatuende mu diulu. (Bienzedi 1:9-11) Pashishe bayidi badi batuadija kuambila bantu bakuabu ne: Nzambi mmubishe Yezu ku lufu. Nansha padi bakuidi babakuma ne bashipesha bakuabu, badi anu batungunuka ne kuyisha. Bayidi aba mbamanye bimpe ne: bu buobu mua kufua, Nzambi neabavuluke anu bu muvuaye muvuluke Muanende.

Bayidi ba kumpala ba Yezu aba bavua bashilangane ne bantu ba bungi lelu’eu, ki mmuomu anyi? Mu amue matunga, bantu badi bela meji anu ku tululu ne mayi a mekala a Pasaka wa lelu mu tshikondo tshia tshidimu tshivuabu babishe Yezu ku lufu. Kadi Bible kêna wamba bualu nansha bumue bua tululu ne mayi bia Pasaka to. Udi wakula bua kuenzela Nzambi mudimu.

Tudi mua kuikala bu bayidi ba Yezu pa kuambila bantu ne: Nzambi wakenza bualu bua dikema pakabishaye Muanende ku lufu. Katuena ne bua kutshina to, nansha bantu batufunyina bua kutushipa. Tuetu mua kufua, Yehowa neatuvuluke ne neatubishe ku lufu anu muakabishaye Yezu.

Katuenaku ne disanka bua kumanya ne: Nzambi udi uvuluka bantu badi bamuenzela mudimu ne neikale ne bua kubajula ku bafue anyi?​— Dimanya malu aa didi ne bua kutusaka bua kujinga kumanya mushindu utudi mua kusankisha Nzambi. Udiku mumanye ne: tudi mua kusankisha Nzambi bulelela anyi?​— Tumone bualu ebu mu nshapita udi ulonda eu.