DIMUE dituku muntu mukuabu wakalua kumonangana ne Yezu. Uvua mumanye ne: Yezu uvua muntu wa meji a bungi, nanku wakamuambila ne: ‘Mulongeshi, ambila muanetu ampeshe panyi bimue bia ku bintu bidiye nabi.’ Muntu au uvua wela meji ne: uvua ne bua kuangata pende bimue bia ku bintu bivua nabi muanabu abi.

Bu wewe muikale Yezu, uvua mua kuikala muambe tshinyi?​— Yezu wakamona ne: muntu au uvua ne bualu. Kadi bualu buende kabuvua ne: uvua dijinga ne bintu bivua nabi muanabu to. Muntu au kavua mumanye tshivua menemene ne mushinga mu nsombelu wa muntu to.

Tuanjayi kuelabi meji bimpe pa bualu ebu. Ntshinyi tshidi ne bua kuikala ne mushinga wa bungi menemene ku mêsu etu? Nkuikala ne bintu bia kunaya nabi bilengele anyi, bilamba bipiabipia peshi kabidi bintu bikuabu bia nunku?​— Tòo, kudi bualu bukuabu budi ne mushinga wa bungi menemene. Edi ke dilongesha divua Yezu musue kulongesha. Nanku wakalonda muyiki wa muntu mukuabu uvua mupue Nzambi muoyo. Udi musue kuuteleja anyi?​—

Muntu au uvua ne biuma bia bungi. Uvua ne madimi ne mayeba ende. Madimi ende akapatula bia pa madimi bia bungi. Kavua kabidi ne muaba mu mayeba ende uvuaye mua kulamina bia pa madimi bionso biakanowaye to. Nanku, ntshinyi tshivuaye mua kuenza? Wakadiambila ne: ‘Nengupule mayeba anyi ne nengase makuabu a manene. Pashishe nendaminemu bintu bianyi bindi nnowa ne bintu bianyi bikuabu bilengele.’

 Muntu mubanji au wakela meji ne: buvua bualu bua meji yeye muenze nanku. Wakamona ne: uvua ne lungenyi lua bungi bua kulama bintu bia bungi nanku. Wakadiambila ne: ‘Ndi ne bintu bia bungi bilama. Nebingambuluishe bua bidimu ne bidimu. Mpindieu ndi mua kusanka. Ndi ndia ngondoloka, ndi nnua nsanka nkayanyi.’ Kadi muena bubanji au uvua ne bualu bubi kampanda mu lungenyi luende. Udiku mumanye bualu abu anyi?​— Uvua wela meji anu buende yeye nkayende ne masanka ende. Uvua mupue Nzambi muoyo.

Nanku Nzambi wakakula ne muena bubanji au. Wakamba ne: ‘Mutatakane we, neufue butuku ebu. Mpindieu nnganyi wapiana bintu biudi munguije?’ Muena bubanji au uvuaku mua kusanka ne bintu abi kunyima kua lufu luende anyi?​— Tòo, muntu mukuabu ke uvua ne bua kubiangata. Yezu wakamba ne: ‘Nunku ke mudibi kudi muntu udi udiunguijila bubanji anu buende yeye nkayende kadi kayi mubanji ku mêsu kua Nzambi.’​—Luka 12:13-21, Muanda Mulenga Lelu.

Wewe kuena musue kuikala bu muena bubanji au to, ki mmuomu anyi?​— Uvua ukeba menemene anu bua kupeta biuma bia bungi. Atshi tshivua tshilema.  Uvua ukeba anu bua kupeta bia bungi. Kadi kavua ‘mubanji ku mêsu kua Nzambi’ to.

Bantu ba bungi batu anu bu mubanji au. Batu basue kupeta bintu anu bia bungi. Kadi bualu ebu budi mua kufikisha muntu kubi. Tshilejilu, wewe si utu ne bintu biebe bia kunaya nabi, ki mmuomu anyi?​— Mbimue bintu kayi bia kunaya nabi biudi nabi? Ngambila tung.​— Kadi newenze tshinyi wewe mumone mulunda webe mukuabu muikale ne ndundu wende anyi muana wa bitetela anyi wa popi peshi kabidi tshintu tshikuabu tshia kunaya natshi tshiudi wewe kuyi natshi? Nebikale bimpe wewe mukebe bua kuenzeja baledi bebe bua bakusumbile pebe tshia nanku anyi?​—

Kudi mua kuikala bikondo bidi bintu bia kunaya nabi ebi mua kumueneka ne mushinga wa bungi. Kadi ntshinyi tshitu tshienzeka pashishe?​— Bitu bilua kukulakaja. Bidi mua kunyanguka ne kutshiyi kabidi ubinanga nansha. Bua kuamba bulelela, udi ne tshintu tshidi ne mushinga mukole kupita bionso biudi nabi bia kunaya nabi. Udi mumanye tshintu atshi anyi?​—

Mmuoyo webe. Muoyo webe udi ne mushinga wa bungi bualu bu wewe kuyi nawu, kuena mua kuenza tshintu nansha tshimue to. Kadi bua kuikala ne muoyo si bidi bikengela kuikala kuenza malu adi asankisha anu Nzambi, ki  mmuomu anyi?​— Nanku katuikadi bu muntu mubanji mupange lungenyi au uvua mupue Nzambi muoyo nansha.

Ki nganu bana badi mua kuenza malu mapote bu muena bubanji au to. Bantu bakulumpe bakuabu batu pabu benza nanku. Bamue ba kudibu batu basue anu kupeta bintu bia bungi kupitshisha too ne bidibu nabi. Badi mua kuikala ne biakudia bikumbane bua dituku dimue, kuikala ne bilamba kabidi ne muaba wa kusomba. Kadi eku bakeba anu bikuabu bintu. Mbasue kupeta bilamba bia bungi. Mbasue kabidi kuikala mu nzubu minene. Bintu bia nunku bidi bilomba makuta a bungi. Nanku badi benza mudimu mukole bua kupeta makuta a bungi. Nansha padibu bapeta makuta a bungi, badi kabidi bakeba mua kupeta a bungi menemene.

Bamue bantu bakulumpe batu benza mudimu wa bungi wa dikeba makuta ne bapanga too ne dîba dia kuikala pamue ne dîku diabu. Kabidi kabayi nansha ne dîba dia kuenzela Nzambi mudimu to. Makuta abu adiku mua kubalama ne muoyo anyi?​— Tòo, kaena mua kubalama to. Badiku mua kuenza mudimu ne makuta abu pikalabu bakadi bafue anyi?​— Tòo. Bualu bantu badi bafue kabena mua kuenza bualu nansha bumue to.​—Muambi 9:5, 10.

Bidi bisua kumvuija ne: mbibi kuikala ne makuta anyi?​— Tòo. Ne makuta tudi mua kusumba biakudia ne bilamba bia kuvuala. Bible udi wamba ne: makuta adi akuba muntu. (Muambi 7:12) Kadi tuetu banange makuta, netudibuejakaje mu bilumbu patupu. Netulue anu bu muntu mubanji mupote uvua mudiunguijile bintu bia mushinga kadi kayi mubanji ku mêsu kua Nzambi.

Kuikala mubanji ku mêsu kua Nzambi kudi kumvuija tshinyi?​— Kudi kumvuija kuteka Nzambi pa muaba wa kumpala mu nsombelu wetu. Bantu bakuabu batu bamba ne: badi bitabuja Nzambi. Batu bela meji ne: kuitabuja ke tshionso tshidi tshikengela kuenza. Kadi tudi mua kuamba ne: badi menemene babanji ku mêsu kua Nzambi anyi?​— Tòo, badi anu bu muntu mubanji uvua mupue Nzambi muoyo.

Yezu kakapuaku Tatu wende wa mu diulu muoyo nansha. Kakakeba bua kupeta makuta a bungi to. Kabidi kakadiunguijila bintu bia bungi to. Yezu uvua mumanye tshivua menemene ne mushinga mu nsombelu wa muntu. Wewe udi mutshimanye anyi?​— Nkuikala mubanji ku mêsu kua Nzambi.

Ngambila tung, mmushindu kayi utudi mua kuikala babanji ku mêsu kua Nzambi?​— Tudi mua kuikala babanji ku mêsu kua Nzambi pa kuenza malu  adi amusankisha. Yezu wakamba ne: “Ntu ngenza malu adi amusankisha.” (Yone 8:29) Nzambi utu usanka patudi tuenza malu adiye musue ne: tuenze. Mpindieu ngambilaku, mmalu kayi audi mua kuenza bua kusankisha Nzambi?​— Udi mua kubala Bible, kuya mu bisangilu, kusambila Nzambi ne kuambuluisha bakuabu bua bamumanye. Au ke malu a mushinga menemene a mu nsombelu wa muntu.

Bu muvua Yezu muikale mubanji ku mêsu kua Nzambi, Yehowa wakamutabalela. Wakapesha Yezu difutu dia kushala ne muoyo tshiendelele. Tuetu bikale bu Yezu, Yehowa neatunange ne neatutabalele tuetu petu. Nenku tufuanayi Yezu ne katuikadi bu muntu mubanji uvua mupue Nzambi muoyo to.