NSHAPITA WA 12
Yezu udi utulongesha mua kusambila
UTUKU uyikila ne Yehowa Nzambi anyi?— Mmusue bua uyikile nende. Paudi uyikila ne Nzambi, udi wenza tshidibu babikila ne: disambila. Yezu uvua misangu mivule uyikila ne Tatuende mu diulu. Imue misangu uvua musue kuikala nkayende pavuaye uyikila ne Nzambi. Muaba mukuabu mu Bible badi bamba ne: ‘Wakabanda ku mukuna bua kusambila pa nkayende. Uvua amu nkayende muaba au too ne ku butuku.’—Matayo 14:23, MMM.
Mmuaba kayi uudi mua kuya bua kusambila Yehowa nkayebe?— Pamuapa udi mua kuikala nkayebe butuku kumpala kua kulala bua kuyikila ne Yehowa. Yezu wakamba ne: “Paudi usambila, buela mu tshibambalu tshiebe, winjile kumbelu, utendelele Tatuebe.” (Matayo 6:6) Utuku usambila Yehowa butuku buonso kumpala kua kulala anyi?— Udi ne bua kuenza nanku.
Yezu wakasambila pavuaye nkayende ne pavuaye ne bakuabu
Yezu uvua kabidi usambila pavuaye ne bantu bakuabu. Pavua mulunda wende Lazalo mufue, Yezu wakasambila ne bantu bakuabu muaba uvuabu bajike Lazalo. (Yone 11:41, 42) Yezu uvua kabidi usambila pavuaye mu bisangilu ne bayidi bende. Utu uya mu bisangilu mutubu benza disambila anyi?— Pa tshibidilu muntu mukulumpe ke udi wenza disambila mu bisangilu amu. Teleja bimpe malu adiye wamba bualu udi ukuakuila kudi Nzambi. Nanku newikale mua kuamba ne: “Amen” ku ndekelu kua disambila adi. Udi mumanye tshidibi biumvuija padi muntu wamba “Amen” ku ndekelu kua disambila anyi?— Bidi biumvuija ne: udi muanyishe disambila adi. Bidi biumvuija kabidi ne: udi muditabe ne udi musue bua dikale disambila diebe wewe pebe.
Bua tshinyi udi ne bua kuteleja ne ntema masambila atubu benza mu bisangilu?
Yezu uvua kabidi usambila dîba dia kudia biakudia. Uvua wela Yehowa tuasakidila bua biakudia. Utu ne tshibidilu tshia kusambila kumpala kua kudia anyi?— Mbimpe tuikala tuela Yehowa tuasakidila bua biakudia kumpala kua kutuadija kubidia. Muntu mukuabu udi mua kuenza disambila panudi nukeba kudia pamue. Kadi newenze tshinyi paudi ukeba kudia nkayebe? Peshi kabidi udi mua kuenza tshinyi panudi nudia ne bantu badi kabayi bela Yehowa tuasakidila?— Dîba dia nanku bidi bikengela wenze disambila diebe pa nkayebe.
Bidi bikengela anu kusambila ne dîyi dikole misangu yonso anyi? Peshi Yehowa udi mua kukuteleja wewe muenze disambila diebe munda munda anyi?— Bualu buakafikila Yelemiya budi mua kutupetesha diandamuna. Uvua muntu uvua utendelela Yehowa uvua wenza mudimu mu nzubu wa Atashasete Mukalenge wa bena Pelasa. Dimue dituku Nehemiya uvua mubungame bikole bualu uvua mumvue ne: mbupule lumbu lua Yelushalema, tshimenga tshinene tshia tshisamba tshiabu.
Ndîba kayi diudi mua kuenza disambila dia munda munda, anu bu muakenza Nehemiya?
Pakebejabu Nehemiya kudi mukalenge tshivuaye mubungamine nanku, Nehemiya wakanji kuenza disambila munda munda. Pashishe Nehemiya kuambilaye mukalenge tshivuaye mubungamine ne kumulombaye ni uvua mua kuya ku Yelushalema bua kuasulula lumbu lua tshimenga alu. Ntshinyi tshiakenzeka?—
Eyowa, Nzambi wakandamuna disambila dia Nehemiya. Mukalenge wakamuambila ne: uvua mua kuya! Mukalenge wakapesha Nehemiya mabaya bua kuya kuenza nau mudimu wa diasulula lumbu. Nunku bulelela Nzambi udi mua kuandamuna masambila etu, nansha tuetu baenze munda munda.—Nehemiya 1:2, 3; 2:4-8.
Mpindieu elabi meji pa bualu ebu. Udi anu ne bua kuinyika mutu webe panshi paudi usambila anyi? Udi anu ne bua kutua binu anyi? Udi wela meji kayi?— Imue misangu Yezu uvua utua binu pavuaye usambila. Misangu mikuabu uvua wimana kulu. Ne minga misangu kabidi uvua ujula mutu mutangije mu diulu pavuaye usambila, bu muakenzaye pavuaye usambila bua Lazalo.
Nunku, bidi bileja tshinyi?— Eyowa, bidi bileja ne: mushindu uudi dîba diudi usambila ki mbualu bua mushinga menemene to. Imue misangu mbiakanyine kuinamija mutu ne kubuita ku mêsu. Misangu mikuabu udi nansha mua kutua binu bu muakenza Yezu. Kadi uvuluke ne: tudi mua kusambila Nzambi dîba dionso mu munya anyi butuku, ne neatuteleje. Bualu bua mushinga budi butangila disambila butudi tuitaba menemene mbua ne: Yehowa utu uteleja. Udi witaba ne: Yehowa utu uteleja masambila ebe anyi?—
Mmalu kayi audi mua kuambila Nzambi mu disambila?
Mmalu kayi atudi mua kuambila Yehowa mu masambila etu?— Ngambila tumone: Pautu usambila, mmalu kayi autu wambila Nzambi?— Yehowa udi utupesha bintu bilenga bia bungi be, nenku mbiakanyine bua tumuele tuasakidila bua bintu abi, ki mmuomu anyi?— Tudi mua kumuela tuasakidila bua biakudia bitudi tudia. Kadi ukadiku mumuele tuasakidila bua diulu didi ne mubidi wa bulé, bua mitshi idi ne mubidi wa mâyi a matamba ne bua bilongo bilengele anyi?— Yeye ke udi muenze kabidi bintu ebi.
Bayidi ba Yezu bakamulomba umue musangu bua kubalongeshaye mua kusambila. Mulongeshi Munene wakabalongesha mua kusambila, wakabaleja malu avua a mushinga mukole a kuamba mu disambila. Udiku mumanye malu au anyi?— Angata Bible webe, bulula mu Matayo nshapita 6. Kubangila ku mvese wa 9 too ne ku wa 13, tudi ne disambila ditu bantu ba bungi babikila ne: Disambila dia Tatu Wetu anyi Disambila dia Mukalenge. Tudibale pamue.
Muaba eu tudi tumona ne: Yezu uvua mutuambile bua kusambila bua dîna dia Nzambi. Uvua muambe bua kusambila ne: dîna dia Nzambi ditumbe, peshi badiangate bu dinsantu. Dîna dia Nzambi nganyi?— N’Yehowa, ne tudi ne bua kunanga dîna adi.
Bualu buibidi, Yezu mmutulongeshe bua kusambila bua Bukalenge bua Nzambi bulue. Bukalenge ebu budi ne mushinga bualu nebubueje ditalala pa buloba ne kuvuija buloba mparadizu.
Bualu buisatu, Mulongeshi Munene uvua muambe bua kusambila bua disua dia Nzambi dienzeke pa buloba anu bu mudidi dienzeka mu diulu. Tuetu tusambila bua bualu ebu, nanku tudi ne bua kuenza malu adi Nzambi musue ne: tuenze.
Pashishe, Yezu uvua mutulongeshe bua kusambila bua biakudia bitudi nabi dijinga dituku dionso. Wakamba kabidi ne: tudi ne bua kulomba Nzambi luse patudi benze malu mabi. Nenku tudi ne bua kulomba Nzambi bua atufuile luse. Kadi kumpala kua yeye kutufuilaye luse, tuetu petu tudi ne bua kufuila bakuabu luse bikalabu batuenzele bualu bubi. Bitu bikupepelele bua kufuilangana luse anyi?—
Ku ndekelu, Yezu wakamba ne: netulombe bua Yehowa Nzambi atukube kudi Satana Diabolo, muntu mubi. Nunku onso aa mmalu mimpe a kulomba Nzambi mu disambila.
Tudi ne bua kuitaba ne: Yehowa udi uteleja masambila etu. Pa kumbusha dimulomba bua atuambuluishe, tudi ne bua kutungunuka ne kumuela tuasakidila. Udi umvua disanka patudi tuleja ne muoyo umue malu atudi tulomba mu disambila ne patudi tumulomba malu makane. Yeye neatupeshe bintu abi. Udi witaba bualu ebu anyi?—
Mibelu mitambe buimpe idi itangila disambila idi mu Lomo 12:12; mu 1 Petelo 3:12 ne mu 1 Yone 5:14.
