UTU usanka padi muntu kampanda ukuenzela bualu buimpe anyi?​— Bushuwa, bantu batu basanka padi muntu ubenzela bualu kampanda buimpe. Tuetu bonso tutu tusanka padi muntu utuenzela bualu buimpe. Mulongeshi Munene uvua mumanye bualu abu, ke bualu kayi uvua misangu yonso wenzela bantu malu mimpe. Wakamba ne: ‘Tshiena mulue bua bantu bankuatshile mudimu to, ndi mulue bua kubakuatshila mudimu.’​—Matayo 20:28.

Nanku tuetu basue kuikala bu Mulongeshi Munene, bidi bikengela kuenza tshinyi?​— Tudi ne bua kukuatshila bakuabu mudimu. Tudi ne bua kubenzela malu mimpe. Bushuwa bantu ba bungi kabatu benzelangana malu mimpe to. Bantu ba bungi batu buobu basue misangu yonso bua bakuabu bikale babenzela mudimu. Musangu mukuabu too ne bayidi ba Yezu bakapeta lungenyi elu. Muntu yonso uvua musue kuikala muntu munene anyi muntu wa mushinga wa bungi kupita bakuabu.

Dituku dikuabu Yezu uvua wenza luendu ne bayidi bende. Pakafikabu mu musoko wa Kapernaume, pabuipi ne Dijiba dia Galela, bakabuela bonso mu nzubu kampanda. Mu nzubu amu Yezu wakabakonka ne: “Mu njila nuvua nuelangana mpata pa tshinyi?” Bakashala bapuwe vii bualu mu njila bavua belangana mpata pa bualu bua uvua muikale muntu munene munkatshi muabu.​—Mâko 9:33, 34, MMM.

 Yezu uvua mumanye ne: kabivua bimpe bua muyidi wende nansha umue ele meji ne: uvua muntu munene mutambe bakuabu to. Nunku, anu bu mutuvua bamone mu nshapita wa kumpala wa mukanda eu, wakimanyika muana mutekete munkatshi muabu e kuambilaye bayidi bende ne: bavua ne bua kudipuekesha anu bu muana mutekete au. Kadi nansha nanku kabavua bumvue tshivuaye usua kubalongesha to. Nunku matuku makese kumpala kua lufu luende, Yezu wakabalongesha bualu buvuabu kabayi mua kupua muoyo kashidi. Wakenza tshinyi?​—

Pavuabu basombe bonso pamue bua kudia biakudia, Yezu wakajuka ku mesa e kuvulaye tshilamba tshiende tshia pa mutu. Wakangata tshilamba tshia kudikupula natshi mâyi e kudijingilayi natshi mu tshimono tshiende. Pashishe wakangata dilonga dia kuowela mâyi e kuelamu mâyi. Bayidi bende bavua ne bua kuikala badiebeje dîba adi tshivuaye musue kuenza. Eku bashale batangile talalaa, Yezu wakaya kudi yonso wa kudibu, kuinama e kutuadija kubowesha mâyi ku makasa. Pashishe ubakupula makasa abu ne tshilamba tshia kudikupula natshi. Anji elabi meji bua bualu abu! Uvua mua kuenza tshinyi bu wewe muikalepu? Uvua mua kudiumvua munyi?​—

Bayidi bende kabavua bamona ne: bivua biakanyine bua Mulongeshi Munene abenzele mudimu mushindu au to. Biakabenza bundu. Nunku Petelo kavua mua kuitaba bua Yezu amuenzele mudimu wa didipuekesha nawu milongo wa nanku to. Kadi Yezu kumuambilaye ne: bivua ne mushinga wa bungi bua enze mudimu au.

Lelu’eu katutu pa tshibidilu tuoweshangana mâyi ku makasa to. Kadi bualu bua nunku buvua buenzeka pavua Yezu muikale panu pa buloba. Udi mumanye ne: mbua tshinyi?​— Mu ditunga divua Yezu ne bayidi bende basombele, bantu bavua bavuala sandala ku makasa. Nunku pavuabu benda mu njila ya malaba, makasa abu avua akuata mpuishi. Pavua muntu wowesha muntu udi mulue kumuendela buenyi mâyi ku makasa, uvua uleja muoyo muimpe.

Kadi apa muyidi wa Yezu nansha umue kavua mujuke bua kuowesha bakuabu mâyi ku makasa to. Nunku Yezu wakenza mudimu au yeye nkayende. Pakenzaye nanku, Yezu wakalongesha bayidi bende bualu bua mushinga mukole. Bivua bikengela bua balonge bualu abu. Kabidi bualu ebu mbualu butudi petu ne bua kulonga lelu’eu.

 Udi mumanye bualu buine abu anyi?​— Pakavua Yezu muvuale tshilamba tshiende tshivuaye muvule ne mupingane pa muaba wende uvuaye musombe ku mesa, wakabebeja ne: “Nudi bumvue tshindi munuenzele etshi anyi? Nudi numbikila Mulongeshi, kabidi Mukalenge; nudi nuamba anu biakane, ke mundi. Pangikala meme Mukalenge, kabidi Mulongeshi, munuoweshe mayi ku makasa, nuenu penu nuikale nuoweshangana mayi ku makasa.”​—Yone 13:2-14, MMM.

Muaba eu Mulongeshi Munene uvua muleje ne: uvua musue bua bayidi bende bikale benzelangana mudimu. Kavua musue bua bikale bena buiminyi kuikala anu bela meji bua malu abu nkayabu to. Kavua musue bua bikale bela meji ne: buobu mbantu banene ne bakuabu bantu ke badi ne bua kuikala babakuatshila buobu mudimu to. Uvua musue bua bikale bakuatshila bakuabu mudimu.

Adi kadivuaku dilongesha dimpe anyi?​— Newikaleku pebe bu Mulongeshi Munene ukuatshila bantu bakuabu mudimu anyi?​— Tuetu bonso tudi mua kuenzela bantu bakuabu malu mimpe. Nebibasankishe bikole. Kadi watambabi kusankisha n’Yezu ne Tatuende.

Ki mbualu bukole bua kuenzela bakuabu mudimu to. Wewe muele meji bimpe, neumone malu a bungi audi mua kubenzela. Elaku meji mpindieu: Kudiku bualu buudi mua kuenza bua kuambuluisha mamuebe anyi? Udi  mumanye ne: mamuebe utu unuenzela malu a bungi, wewe ne bena mu dîku dienu bakuabu bonso. Udiku mua kumuambuluisha anyi?​— Bua tshinyi kubenga kumuebeja?

Pamuapa udi mua kulongolola mesa anyi kulua ne mâyi a bianza kumpala kua kutekabu biakudia bua bantu bonso kudiabu. Anyi udi mua kumbusha malonga padi bantu bajikije kudia. Bana bakuabu batu bumbusha dituku dionso bintu bia bukoya bidi mu nzubu baya kubimansha ku diyala. Nansha wewe muenze mudimu kayi, nebileje ne: bulelela udi wenzela bakuebe mudimu anu bu muvua Yezu muenze.

Udi ne bakunyi bebe baudi mua kukuatshila mudimu anyi? Vuluka ne: Yezu Mulongeshi Munene wakakuatshila bayidi bende mudimu. Paudi ukuatshila bakunyi bebe mudimu, tshiudi wenza atshi udi widikija Yezu. Kadi ntshinyi tshiudi mua kubenzela?​— Pamuapa udi mua kubalongesha bua bikale bapingaja bintu biabu bidibu banaya nabi muaba wabi padibu bajikija kunaya. Peshi udi mua kubambuluisha mua kuvuala  bilamba. Peshi kabidi udi mua kubalongesha mua kuadija bulalu buabu. Udiku mua kuela meji bua bualu bukuabu buudi mua kubenzela anyi?​— Nebakunange bualu udi ubenzela malu aa, anu bu muvua bayidi ba Yezu bamunange.

Nansha mu kalasa muenu kabidi udi mua kuenzela bantu bakuabu mudimu. Bantu abu badi mua kuikala balongi nebe ta mulongeshi wenu. Padi muntu umatshisha mikanda yende, nebikale bualu buimpe wewe mumuambuluishe bua kuyangula. Udi mua kulomba bua kukupula ku tshibasa anyi kuenzela mulongeshi wenu bualu bukuabu buimpe. Nansha kunzuluila muntu tshibi bua kupitaye mbualu buimpe kabidi.

Imue misangu, neumone ne: bantu ba bungi kabena bela tuasakidila paudi ubenzela mudimu to. Udi umona ne: bualu ebu budi mua kutupangisha bua kuenzelangana malu mimpe anyi?​— Tòo! Bantu ba bungi kabakela Yezu tuasakidila bua midimu yende mimpe yakenzaye to. Kadi kabiakamupumbisha bua kuenzelangana malu mimpe nansha.

Nunku katulekedi bua kuenzela bantu bakuabu mudimu to. Tuvuluke Yezu, Mulongeshi Munene ne misangu yonso tukebe mua kulonda tshilejilu tshiende.