TSHINKA ne: muntu kampanda mmukupeshe tshintu tshimpe tshitambe. Udi mua kuenza tshinyi?​— Neumuele anu tuasakidila patupu pashishe wewe kumupua muoyo anyi? Neumuvuluke yeye ne bualu budiye mukuenzele anyi?​—

Yehowa Nzambi mmutupeshe tshintu anyi dipa dia pa buadi. Wakatuma Muanende pa buloba bua kufuaye bua bualu buetu. Udi mumanye bua tshinyi Yezu uvua ne bua kufua bua bualu buetu anyi?​— Ebu mbualu bua mushinga mukole butudi ne bua kumanya bimpe.

Anu mutuvua balonge mu nshapita wa 23, Adama wakenza mpekatu pakashipaye mukenji mupuangane wa Nzambi. Ne tuakapiana mpekatu wa Adama, nkambua wetu bonso. Nunku, udi wela meji ne: tudi dijinga ne tshinyi?​— Bua kuamba mu ngakuilu wa mu tshimfuanyi, tudi dijinga ne tatu mupiamupia, uvua mushale mupuangane pa buloba. Udi wela meji ne: nnganyi udi mua kuikala tatu au buetu tuetu?​— N’Yezu.

Yehowa wakatuma Yezu pa buloba bua alue bu tatu wetu pa muaba wa Adama. Bible udi wamba ne: ‘Muntu wa kumpala Adama wakalua anyima udi ne muoyo. Adama wa ndekelu wakalua nyuma udi ufila muoyo.’ Nnganyi uvua Adama wa kumpala?​— Ng’eu uvua Nzambi mufuke ne lupuishi lua buloba. Nnganyi udi Adama muibidi?​— N’Yezu. Bible udi uleja bualu ebu padiye wamba ne: ‘Muntu wa kumpala [Adama] udi mufukibue ne dimfuenkenya dia buloba; muntu muibidi [Yezu] udi muntu wa mu diulu.’​—1 Kolinto 15:45, 47; Genese 2:7.

Bu muvua Nzambi muangate muoyo wa Yezu mu diulu ne muuteke munda mua Mariya, Yezu kavua mupiane mpekatu nansha umue  kudi Adama to. Ke bualu kayi Yezu uvua muntu mupuangane. (Luka 1:30-35) Ke bualu kayi kabidi muanjelu wakambila balami ba mikoko pavua Yezu muledibue ne: ‘Lelu mbanulelele Musungidi.’ (Luka 2:11) Kadi bua kuikala Musungidi wetu, ntshinyi tshivua Yezu utshivua muana wa katoto ne bua kuenza kumpala?​— Uvua ne bua kuanji kukola ne kulua muntu mukole anu bu muvua Adama. Nanku Yezu uvua mua kulua ‘Adama muibidi.’

Yezu Musungidi wetu nealue kabidi ‘Tatu wetu wa Tshiendelele.’ Ke mudibu bamubikila mu Bible. (Yeshaya 9:6, 7) Muntu mupuangane Yezu udi mua kulua tatuetu pa muaba wa Adama wakalua muntu mupange bupuangane pakenzaye mpekatu. Mu mushindu au, tudi mua kusungula ‘Adama muibidi’ bua kuikalaye tatuetu. Bushuwa, Yezu nkayende udi Muana wa Yehowa Nzambi.

Pa kulonga malu a Yezu, tudi mua kumuitaba bu Musungidi wetu. Utshidi muvuluke ne: nku malu kayi kudibu ne bua kutupandisha anyi?​— Badi ne bua kutupandisha ku mpekatu ne ku lufu bituvua bapiane kudi Adama. Muoyo mupuangane uvua Yezu mulambule pakavuaye muntu mukole bua bualu buetu badi baubikila ne: tshintu tshia kupikula natshi. Yehowa wakafila tshintu tshia kupikula natshi bantu bua kutubuikidilabu mpekatu yetu.​—Matayo 20:28; Lomo 5:8; 6:23.

Bulelela katuena basue kupua muoyo wa bualu budi Nzambi ne Muanende batuenzele to, ki mmuomu anyi?​— Yezu wakaleja bayidi bende mushindu wa pa buawu udi mua kutuambuluisha bua kuvuluka tshivuaye muenze. Tuakuilepu mpindieu.

 Tshinka ne: udi kulu ku tshisasa tshia nzubu kampanda wa mu Yelushalema. Tudi butuku. Yezu ne bapostolo bende badi ku mesa. Pa mesa padi munyinyi wa muana wa mukoko muosha, mampa a bibatubatu ne mvinyo mukunze. Badi badia biakudia bia pa buabi. Udi mumanye tshidibu babidila anyi?​—

Biakudia ebi bidi bibavuluija bualu buvua Yehowa muenze nkama ne nkama ya bidimu kumpala, pavua bantu bende bena Isalele bikale bapika mu Ejipitu. Mu tshikondo atshi Yehowa wakambila bantu bende abu ne: ‘Dîku ne dîku dishipe muana wa mukoko, ne numiamine mashi ende pa mishiku ya mbelu ya nzubu.’ Pashishe  yeye kuamba ne: ‘Buelayi mu nzubu yenu, nudie munyinyi wa muana wa mukoko.’

Ke tshiakenza bena Isalele. Nenku anu butuku abu, muanjelu wa Nzambi wakapita mu Ejipitu mujima. Mu nzubu ya bungi, muanjelu wakashipa ban’a bute. Kadi pavua muanjelu au umona mashi a muana wa mukoko pa mushiku wa mbelu, uvua upita nzubu au. Mu nzubu ayi, muana nansha umue kakafua to. Palô mukalenge wa Ejipitu wakumvua buôwa bua tshivua muanjelu wa Yehowa muenze. Ke Palô kuambila bena Isalele ne: ‘Nudi mpindieu ne budikadidi bua kuya. Patukayi mu Ejipitu!’ Anu pine apu bakambula mabuki abu pa tumelo ne nyama ya mpunda kuyabu.

Yehowa kavua musue ne: bantu bende bapue mushindu uvuaye mubapikule muoyo to. Ke bualu kayi wakamba ne: ‘Musangu umue ku tshidimu nudi ne bua kudia biakudia bia buena binudi badie butuku ebu.’ Bakabikila biakudia ebi bia pa buabi ne: Kupita kua Yehowa anyi Pasaka. Udi mumanye bua tshinyi bavua babibikila nanku anyi?​— Bualu butuku abu muanjelu wa Nzambi ‘wakapita pa mutu’ pa nzubu ivua mimiamina mashi.​—Ekesode 12:1-13, 24-27, 31.

Yezu ne bapostolo bende badi belela bualu ebu meji padibu badia biakudia bia Kupita kua Yehowa. Pashishe, Yezu udi wenza bualu bukuabu bua mushinga mukole menemene. Kadi, kumpala udi upatula Yudase, mupostolo mupange lulamatu pambelu. Nenku Yezu udi wangata dimue dia ku mampa avua mashale, udisambidila, udikosolola ne udipesha bayidi bende. Wamba ne: ‘Angatayi, diayi.’ Pashishe kubambilaye ne: ‘Diampa edi didi tshimfuanyi tshia mubidi wanyi ungafila pangafua bua bualu buenu.’

Kunyima Yezu udi wangata dikopo dia mvinyo mukunze. Panyima pa disambila dikuabu dia diela tuasakidila, udi udipesha bayidi bende, wamba ne: ‘Nuayi buonso buenu.’ Pashishe ubambila ne: ‘Mvinyo eu udi umvuija mashi anyi. Mu katupa kîpi emu nengele mashi anyi panshi bua kunupikula ku mibi yenu. Tungunukayi ne kuenza nunku bua kumvuluka.’​—Matayo 26:26-28; 1 Kolinto 11:23-26.

 Udi mumone ne: Yezu wakamba ne: bayidi bavua ne bua kutungunuka ne kuenza nunku bua kumuvuluka anyi?​— Kabatshivua ne bua kudia kabidi biakudia bia Kupita kua Yehowa to. Kadi musangu umue ku tshidimu bavua ne bua kuikala ne didia edi dia pa buadi bua kuvuluka Yezu ne lufu luende. Badi babikila didia edi ne: Didia dia dilolo dia Mukalenge. Lelu’eu tutu tudibikila ne: Tshivulukilu. Bua tshinyi?​— Bualu bidi bituvuluija tshivua Yezu ne Tatuende Yehowa Nzambi benze buetu tuetu.

Diampa didi ne bua kutuvuluija mubidi wa Yezu. Uvua muanyishe bua kufila mubidi au bu mulambu bua tupete muoyo wa kashidi. Kadi, netuambe tshinyi bua mvinyo mukunze?​— Udi utuvuluija mushinga wa mashi a Yezu. Mashi a Yezu adi ne mushinga mupite wa mashi a muana wa mukoko wa Kupita kua Yehowa mu Ejipitu. Udi mumanye ne: mbua tshinyi ende mashi mmapite a muana wa mukoko anyi?​— Bible udi wamba ne: mashi a Yezu adi mua kuenza bua batubuikidile mpekatu. Ne tshikondo tshikalabu mua kujimija mpekatu yetu yonso, katuakuikala kabidi tusama, tukulakaja ne tufua to. Tudi ne bua kuelangana meji bua bualu ebu patudi tubuela mu Tshivulukilu.

Bantu bonso badi ne bua kudia diampa ne kunua mvinyo mu Tshivulukilu anyi?​— Yezu wakambila bantu bavua ne bua kudia ne bua kunua ne: ‘Nenukokeshe mu bukalenge buanyi ne nenushikame nanyi mu nkuasa ya butumbi mu diulu.’ (Luka 22:19, 20, 30) Mêyi aa avua umvuija ne: nebaye mu diulu bua kuikala bakalenge pamue ne Yezu. Nunku anu aba badi ne ditekemena dia kukokesha ne Yezu mu diulu ke badi ne bua kudia diampa ne kunua mvinyo.

Kadi nansha aba badi kabayi badia diampa ne banua mvinyo badi ne bua kubuela mu Tshivulukilu. Udi mumanye ne: mbua tshinyi anyi?​— Bualu Yezu uvua mufile muoyo wende buetu tuetu kabidi. Patudi tuya mu Tshivulukilu, tudi tuleja ne: katuena bapue bualu ebu muoyo to. Tudi tuvuluka dipa dia pa buadi didi Nzambi mutupeshe.