Nzambi utu ulomba bantu ba mishindu yonso bua kusambila bua kumonabu mua kusemena pabuipi nende. (Musambu 65:2) Kadi katu uteleja anyi wanyisha masambila onso to. Tshilejilu, katu uteleja masambila a mulume udi ukengesha mukajende to. (1 Petelo 3:7) Pavua bena Isalele batungunuka ne kuenza malu mabi, kavua uteleja masambila abu to. Mu bulelela, kusambila Nzambi ndiakalenga dinene. Nansha nanku, muntu udi muenze mpekatu munene yeye munyingalale, Nzambi neateleje masambila ende.​—Bala Yeshaya 1:15; 55:7.

Tangila filme wa Nzambi utu uteleja masambila a bantu bonso anyi?

Disambila mmushindu umue wa kutendelela Nzambi, ke bualu kayi tudi ne bua kusambila anu Mufuki wetu Yehowa. (Matayi 4:10; 6:9) Kabidi, bu mutudi bena mibi, tudi ne bua kusambila mu dîna dia Yezu, bualu uvua mufue bua mibi yetu. (Yone 14:6) Yehowa ki mmusue bua tuikale tuambulula masambila makuata ku muoyo, anyi mafunda muaba kampanda to. Kadi mmusue bua masambila etu ikale afumina mu muoyo wetu.​—Bala Matayi 6:7; Filipoyi 4:6, 7.

Mufuki wetu udi mua kuteleja masambila nansha wowu a munda munda. (1 Samuele 1:12, 13) Udi utulomba bua tuikale tumusambila misangu yonso, tshilejilu, patudi tujuka ku tulu, kumpala kua kulala, kumpala kua kudia, nansha patudi ne ntatu.​—Bala Misambu 55:22; Matayi 15:36.

Kusemena pabuipi ne Nzambi ki mbualu bupepele to. Bualu tudi munkatshi mua bantu badi kabayi bitabuja Nzambi ne badi bapetula mulayi wende wa kufila ditalala pa buloba. (2 Timote 3:1, 4; 2 Petelo 3:3, 13) Ke bualu kayi,  tutu dijinga ne kupetangana ne bena Kristo netu, bobu pabu batu netu dijinga bua kukankamijangana.​—Bala Ebelu 10:24, 25.

Kudisangisha ne bena Kristo balelela kudi kutuambuluisha bua kusemena pabuipi ne Nzambi. Kubuela mu bisangilu bia Bantemu ba Yehowa ke mushindu mutambe buimpe udi ditabuja dia bakuabu mua kukukolesha.​—Bala Lomo 1:11, 12.

Udi mua kusemena pabuipi ne Yehowa paudi welangana meji bua malu audi mulonge mu Dîyi diende. Udi kabidi mua kuela meji bua bintu bidiye mufuke, bua mikenji yende ne bua malu adiye mulaye. Disambila ne dielangana meji bidi bituambuluisha bua kumona ne: Nzambi udi ne dinanga ne meji.​—Bala Yoshua 1:8; Musambu 1:1-3.

Bua kuikala pabuipi ne Nzambi, udi ne bua kumueyemena ne kumuitabuja. Kadi ditabuja didi anu bu tshintu tshidi dijinga ne biakudia bua kuikalatshi ne muoyo. Bua kudiisha ditabuja matuku onso, ikala welangana meji bua tshivua tshikusake bua kuitabuja malongesha kampanda a mu Bible.​—Bala Matayi 4:4; Ebelu 11:1, 6.

Yehowa utu ulama bantu bonso badi bamunange. Udi mua kubalama ku tshintu kayi tshionso tshidi mua kunyanga malanda abu nende ne kubapangisha bua kupeta muoyo wa tshiendelele. (Misambu 91:1, 2, 7-10) Udi utupesha mibelu bua kuepuka nsombelu mibi idi mua kutunyangila makanda etu a mubidi anyi kutujimijila disanka. Yehowa udi utuleja tshia kuenza menemene.​—Bala Misambu 73:27, 28; Yakobo 4:4, 8.