1, 2. Bua tshinyi utu munange Yehowa Nzambi?

UTU munange Nzambi anyi? Udi mua kuikala mumunange bikole bikusaka too ne bua kudilambula kudiye. Udi mua kuikala umumona bu mulunda webe wa pa muoyo. Kadi kumpala kua wewe muine kunanga Yehowa, yeye ukavua mukunange. Bible udi wamba ne: “Tudi tunanga, bualu yeye uvua mudianjile kutunanga.”—1 Yone 4:19.

² Ela meji bua mishindu yonso idi Yehowa muleje mudiye mutunange. Mmutupeshe buloba bua buikale muaba muimpe wa tuetu kusomba ne tshintu tshionso tshitudi natshi dijinga bua kuikala ne muoyo. (Matayi 5:43-48; Buakabuluibua 4:11) Mmusue bua tuikale nende mu malanda mimpe, ne mmuenze bua tuikale ne mushindu wa kulonga bua kumumanya. Patudi tubala Bible, tudi tuteleja Yehowa. Patudi tusambila, yeye udi ututeleja. (Misambu 65:2) Udi utulombola ne utukolesha ku diambuluisha dia nyuma wende muimpe udi ne bukole bua bungi. (Luka 11:13) Wakatuma too ne Muanende udiye munange bikole pa buloba bua kutupikula ku mpekatu ne ku lufu.—Bala Yone 3:16; Lomo 5:8.

3. Mmunyi mutudi mua kulama bulunda buetu ne Yehowa?

 ³ Teta kuela meji bua mulunda webe kampanda wa pa muoyo unudi nudia nende bibishi ne biosha misangu yonso. Bidi bilomba kudienzeja bikole bua kulama bulunda bukole bua nunku. Ke mudibi kabidi bua bulunda buetu ne Yehowa udi mulunda muimpe wa pa muoyo utudi mua kuikala nende. Bulunda buetu nende budi mua kushala kashidi. Ke bualu kayi Bible udi utuambila ne: “Nudilame mu dinanga dia Nzambi.” (Yuda 21) Mmunyi mutudi mua kuenza bualu ebu? Bible udi wandamuna ne: “Mona tshidi dinanga dia Nzambi diumvuija: bua tutumikile mikenji yende; pabi mikenji yende kayena ne bujitu.”—1 Yone 5:3.

4, 5. (a) “Dinanga dia Nzambi” didibu bakuila ndinanga kayi? (b) Mmunyi muvua dinanga diuvua munange nadi Yehowa dituadije kukola?

⁴ Padi Bible wakula bua “dinanga dia Nzambi,” udi usua kuamba tshinyi? Kena wakula bua dinanga didi Nzambi mutunange nadi to, kadi udi wakula bua dinanga ditudi tuetu bamunange nadi. Utshidi muvuluke dîba diuvua mutuadije kunanga Yehowa anyi?

⁵ Vuluka muuvua mumvue pauvua mulonge musangu wa kumpala ne: Yehowa mmusue bua wewe kusomba mu bulongolodi bupiabupia bua kashidi. Wakalonga malu onso adiye mulongolole bua bualu abu buenzeke, wewe kujingulula dipa dia mushinga mukole divua Yehowa mutupeshe pavuaye mutume Muanende pa buloba. (Matayi 20:28; Yone 8:29; Lomo 5:12, 18) Pauvua mumanye anu mushindu udi Yehowa mukunange, bivua bikulenge ku muoyo, wewe kutuadija kumunanga pebe.—Bala 1 Yone 4:9, 10.

6. Kunanga muntu kudi kulomba tshinyi? Dinanga diudi munange nadi Nzambi divua dikusake bua kuenza tshinyi?

 ⁶ Kadi mushindu uuvua udiumvua wewe munange Nzambi au uvua anu ntuadijilu. Tshilejilu, tuetu banange muntu katutu anu tuamba tshianana mêyi a ne: “Ndi mukunange” to. Dinanga ditu ditusaka bua kuenza malu adi amusankisha. Bia muomumue, dinanga diudi munange nadi Yehowa divua dikusake bua kuikala ne nsombelu udi umusankisha. Pavua dinanga adi dienda dikola uvua pamuapa mudilambule kudiye ne bobu kukubatiza. Pauvua muenze nanku, uvua mumulaye bua kumuenzela mudimu bua kashidi. (Bala Lomo 14:7, 8.) Mmushindu kayi uudi mua kukumbaja bualu abu?

7. Tuetu banange Yehowa netuenze tshinyi? Tela imue ya ku mikenji yende.

⁷ Bu mutudi banange Yehowa, tudi ‘tutumikila mikenji yende.’ Tudi mua kuenza nanku bishi? Mpatudi tuenza malu adiye utulomba. Mu Bible tudi tulonga malu adi Yehowa musue bua tuenze anyi kayi musue tuenze. Tshilejilu, Yehowa udi utuambila ne: mbibi bua kukuatshika, kuiba anyi kushima, kulala ne muntu udi kayi muena dibaka nebe, anyi kutendelela muntu mukuabu anyi tshintu tshikuabu pa kumumbusha yeye.—1 Kolinto 5:11; 6:18; 10:14; Efeso 4:28; Kolosayi 3:9.

8, 9. Mmunyi mutudi mua kumanya tshidi Yehowa musue bua tuenze muaba udi kawuyi mukenji musunguluke wa mu Bible? Fila tshilejilu.

⁸ Kadi bua kusankisha Yehowa, kudi malu makuabu a kuenza pa kumbusha ditumikila mikenji yende. Ki mmutupeshe mulongolongo wa mikenji idi yakula bua malu onso a mu nsombelu to. Nanku nekuikale imue nsombelu ikalaku kakuyi mikenji misunguluke ya mu Bible idi mua kutuambila tshia kuenza. Netuangate mapangadika mimpe mushindu kayi? (Efeso 5:17) Mu Bible mudi mêyi manene adi mikale bulelela bua nshindamenu budi butulongesha mushindu udi Yehowa umona malu. Patudi  tubala Bible, tudi tufika ku dimanya tshidi Yehowa. Tudi tumanya mudiye wela meji, tumanya kabidi tshidiye munange ne tshidiye mukine.—Bala Misambu 97:10; Nsumuinu 6:16-19; tangila Dimanyisha dia ku ndekelu dia 1.

⁹ Tshilejilu, mmunyi mutudi mua kumanya malu a kutangila ku TV anyi ku Enternete? Yehowa ki mmutuambile menemene tshitudi ne bua kuenza to. Kadi mêyi manene adiye mutupeshe adi atuambuluisha bua kuangata mapangadika mimpe. Mishindu ya bungi ya dijikija nayi lutetuku idiku lelu mmiuwule tente ne malu a tshikisu ne a masandi. Yehowa udi utuambila mu Bible ne: “Udi ukina muntu yonso udi munange tshikisu,” utuambila kabidi ne: “Nealumbuluishe bena masandi.” (Misambu 11:5; Ebelu 13:4) Mmushindu kayi udi mêyi manene aa mua kutuambuluisha bua kuangata mapangadika mimpe? Patudi anu tumanya ne: Yehowa udi ukina bualu kampanda anyi ubumona bua busenji, tudi ne bua kubuepuka.

10, 11. Tudi tutumikila Yehowa bua tshinyi?

¹⁰ Tudi tutumikila Yehowa bua tshinyi? Ki nganu bua kuepuka dinyoka anyi ntatu idi ifumina ku mapangadika mabi to. (Galatiya 6:7) Kadi tudi tutumikila Yehowa bualu tudi bamunange. Anu mutu bana basue kusankisha tatuabu, ke mutudi petu basue kusankisha Tatuetu wa mu diulu. Kakuena tshintu tshidi tshimpe kupita kumanya ne: tudi tusankisha Yehowa to!—Misambu 5:12; Nsumuinu 12:2; tangila Dimanyisha dia ku ndekelu 2.

¹¹ Katuena tutumikila Yehowa anu padibi bipepele anyi patudi katuyi ne tshikuabu tshia kuenza to. Katuena nansha tusungula mikenji ne mêyi a bikadilu bilenga bitudi mua kulonda ne bitudi katuyi mua kulonda to. (Dutelonome 12:32) Kadi tudi tumutumikila mu malu onso anu muvua mufundi wa misambu muambe  ne: “Ndi musue mêyi ebe bikole, eyowa, ndi muanange.” (Misambu 119:47; Lomo 6:17) Tudi basue kufuana Noa uvua muleje muvuaye munange Yehowa pavuaye muenze malu onso avua Yehowa mumutumine dîyi bua kuenza. Bible udi wamba ne: Noa “wakenza amu nanku.” (Genese 6:22) Udi musue pebe bua Yehowa ambe nanku buebe wewe anyi?

12. Leja mutudi mua kusankisha Yehowa.

¹² Mmunyi mutu Yehowa umvua patudi tumutumikila? Tudi ‘tusankisha muoyo’ wende. (Nsumuinu 11:20; 27:11) Anji elabi meji bua bualu abu! Tudi tusankisha Mufuki wa diulu ne buloba patudi tumutumikila. Kadi katu utuenzeja bua kuenza nanku to, bualu mmutupeshe budikadidi bua kudisunguila malu. Bidi biumvuija ne: tudi ne budikadidi bua kusungula bua kuenza tshidi tshimpe anyi tshidi tshibi. Yehowa mmusue bua dinanga ditudi bamunange nadi ditusake bua kuangata mapangadika mimpe bua tuikale ne nsombelu muimpe menemene.—Dutelonome 30:15, 16, 19, 20; tangila Dimanyisha dia ku ndekelu 3.

13, 14. Bua tshinyi tudi tuamba ne: mikenji ya Nzambi ki mmikole menemene bua kuyitumikila? Fila tshilejilu.

¹³ Netuenze bishi tuetu tuela meji ne: mikenji ya Yehowa mmipite bukole bua kuyitumikila anyi ne: neyitupangishe bua kuenza tshionso tshitudi basue? Bible udi wamba patoke ne: “Mikenji yende kayena ne bujitu.” (1 Yone 5:3) Muaku wa mu tshiena Greke udibu bakudimune ne: “bujitu” udi umvuija “kunêma.” Mu mvese mikuabu mbakuate mudimu ne muaku eu bua kuleja mikenji mikole anyi bantu badi bajinga kulombola bakuabu ne kubakengesha. (Matayi 23:4; Bienzedi 20:29, 30) Mu Mukanda wa Mvidi Mukulu (Katolike) mbafunde  ne: “Meyi ende kaena matupite dikanda.” Mikenji ya Yehowa ki “mminême,” mmumue ne: ki mmipite bukole bua tuetu kuyitumikila to. Utu ne nkatshinkatshi mu malu adiye utuambila bua kuenza.

¹⁴ Tshilejilu, fuanyikijabi ne: udi wambuluisha mulunda webe bua kubuela ku nzubu wende mupiamupia. Ukadi musuike bintu biende bionso. Kudi bidi kabiyi ne bujitu, bipepele bua kuambula, kadi bikuabu bidi ne bujitu bua bungi bilomba bantu babidi bua kubiambula. Mulunda webe udiku mua kukulomba bua kuambula tshintu tshidi ne bujitu wewe nkayebe anyi? Kena mua kuenza nanku to! Bua tshinyi? Bualu ki mmusue bua udisamishe to. Anu bu mulunda au, Yehowa kena mua kutulomba bua kuenza bualu budi butukolele menemene to. (Dutelonome 30:11-14) Yehowa mmumanye tshitudi. “Mmumanye . . . mutudi benjibue, uvuluka ne: tudi lupuishi.”—Misambu 103:14.

15. Bua tshinyi tudi batuishibue ne: mikenji ya Yehowa idi bua diakalenga dietu?

¹⁵ Mose wakambila tshisamba tshia Isalele ne: mikenji ya Yehowa ivua bua ‘diakalenga diabu dia kashidi,’ kabidi diyitumikila divua mua kubambuluisha bua ‘bashale ne muoyo.’ (Dutelonome 5:28-33; 6:24) Ke mudibi kabidi lelu. Bualu buonso budi Yehowa utulomba bua kuenza nebulengeje nsombelu wetu. (Bala Yeshaya 48:17.) Yehowa Tatu wetu utu anu mumanye tshidi tshimpe buetu tuetu. (Lomo 11:33) Bible udi utuambila ne: “Nzambi udi dinanga.” (1 Yone 4:8) Bualu ebu budi bumvuija ne: bualu buonso budi Yehowa wamba anyi wenza udi ubuamba anyi ubuenza bua dinanga.

16. Ntshinyi tshidi tshitujadikila ne: tudi mua kutumikila Nzambi nansha mutudi bapange bupuangane ne bikale mu bulongolodi bubi?

¹⁶ Kabitu anu bipepele bua tuetu kutumikila  Nzambi to. Tudi mu bulongolodi bubi budi Diabolo ulombola. Udi usaka bantu bua kuenza malu mabi. (1 Yone 5:19) Tudi kabidi ne bua kuluangana ne meji etu a bantu bapange bupuangane ne mushindu utudi tudiumvua, bualu bidi mua kutufikisha ku dibenga kutumikila Nzambi. (Lomo 7:21-25) Kadi dinanga ditudi banange nadi Yehowa didi ditupesha bukole bua kuenza malu mimpe. Yehowa udi umona mutudi tudienzeja bua kumutumikila, ne udi utuambuluisha padiye utupesha nyuma wende muimpe udi ne bukole bua bungi. (1 Samuele 15:22, 23; Bienzedi 5:32) Nyuma muimpe udi utuambuluisha bua kuikala ne ngikadilu idi itufikisha ku ditumikila Nzambi bipepele.—Galatiya 5:22, 23.

17, 18. (a) Mmalu kayi atualonga mu mukanda eu? (b) Netumone tshinyi mu nshapita udi ulonda?

¹⁷ Mu mukanda eu netulonge mutudi mua kuikala ne nsombelu udi usankisha Yehowa. Netulonge mutudi mua kutumikila mêyi ende manene ne mikenji ya bikadilu bilenga mu nsombelu wetu. Vuluka ne: Yehowa katu utuenzeja bua kumutumikila to. Patudi tusungula bua kumutumikila, nsombelu wetu udi ulengela ne matuku etu atshilualua neikale mimpe. Bualu bua mushinga menemene mbua ne: ditumikila dietu nedileje Nzambi mutudi bamunange bikole.—Tangila Dimanyisha dia ku ndekelu 4.

¹⁸ Yehowa mmupeshe yonso wa kutudi kondo ka muoyo bua kutuambuluisha bua kumanya tshidi tshimpe ne tshidi tshibi. Tuetu balongeshe kondo ketu ka muoyo, kadi mua kutuambuluisha bua “kutumikila mikenji yende.” Kadi kondo ketu ka muoyo ntshinyi? Mmunyi mutudi mua kukalongesha? Tuandamunayi nkonko eyi.