1-3. (a) Ndimue dia ku mapa mimpe kayi adi Yehowa mutupeshe? Mmunyi mutudi mua kudinyanga? (b) Mmunyi mutudi mua kuenza mudimu ne muakulu udi Yehowa mutupeshe?

TATU udi upesha muanende utshidi nsonga dikalu. Udi ne disanka dia kupesha muanende dipa dia pa buadi edi. Kadi neumvue bishi muanende yeye muendeshe dikalu adi bibi, mutute muntu ne muntu au mujiwuke?

² Yehowa ke Mufidi wa “dipa dionso dimpe ne dipa dionso dipuangane.” (Yakobo 1:17) Dimue dia ku mapa a mushinga mukole adiye mutupeshe mmuakulu. Dipa dia muakulu didi dituambuluisha bua kumvuija malu adi mu meji etu ne mushindu utudi tudiumvua. Tudi ne mushindu wa kuamba malu adi mua kuambuluisha bantu ne adi mua kuenza bua badiumvue bimpe. Kadi malu atudi tuamba adi kabidi mua kusama bantu bakuabu ku muoyo anyi kubanyingalaja.

³ Mêyi atudi tuakula adi ne bukole bua bungi, ne Yehowa udi utulongesha mushindu wa kuakula bimpe. Udi utuambila ne: “Dîyi dibole kadipatuki mukana muenu, kadi anu dîyi dimpe didi mua kukolesha bakuabu padibi bikengela, bua dikuatshishe badi baditeleja.” (Efeso 4:29) Tukonkononayi mushindu utudi mua kuenza mudimu  ne dipa dia muakulu dia kudi Nzambi edi mu mushindu udi umusankisha ne ukankamija bakuabu.

4, 5. Mukanda wa Nsumuinu udi utulongesha tshinyi bua bukole budi nabu mêyi?

⁴ Mêyi adi ne bukole, ke bualu kayi tudi ne bua kuikala ne budimu bua malu atudi tuamba ne mushindu utudi tuamba. Nsumuinu 15:4 udi wamba ne: “Ludimi lua bupole ludi mutshi wa muoyo, kadi ngakuilu mubi udi utekesha mu mikolo.” Anu bu mutshi mutumpuke bimpe udi ufila tshiashima ne upeshilula muntu bukole bua muoyo, mêyi mimpe adi pawu akolesha bakuabu. Kadi mêyi mashile adi atapa bakuabu ku muoyo ne enza bua badiumvue bibi.—Nsumuinu 18:21.

⁵ Nsumuinu 12:18 udi wamba ne: “Mêyi mamba kaayi melela meji adi bu kutapa kua muele wa mvita.” Mêyi mabi adi mua kunyingalaja muntu anyi kushipa malanda. Pamuapa udi uvuluka pavua muntu mukuambe mêyi mabi avua makunyingalaje bikole. Mvese umue umue eu udi wamba kabidi ne: “Ludimi lua bena meji ludi luondapu.” Mêyi melela meji adi mua kusanguluja muoyo udi usama ne kulongolola malanda avua manyanguke bua diumvua muntu bibi mu bualu kampanda. (Bala Nsumuinu 16:24.) Tuetu tuvuluka tshidi mêyi etu mua kuenzela bakuabu, netuikale ne budimu patudi tuakula.

6. Bua tshinyi mbikole bua kutabalela malu atudi tuamba?

⁶ Bualu bukuabu budi butusaka bua kuikala ne budimu patudi tuakula mbua ne: tuetu bonso tudi bapange bupuangane. “Meji a bantu mmatuma ku malu mabi,” ne mêyi etu atu misangu ya bungi aleja tshidi mu muoyo wetu. (Genese 8:21; Luka 6:45) Bidi mua kutukolela bikole menemene bua kutabalela mêyi etu. (Bala Yakobo  3:2-4.) Kadi bidi bikengela bua tutungunuke ne kudienzeja bua kuakaja mushindu wetu wa diakula ne bantu bakuabu.

7, 8. Ntshinyi tshidi mêyi etu mua kuenzela malanda etu ne Yehowa?

⁷ Tudi kabidi ne bua kuikala ne budimu mu mêyi etu bualu Yehowa neatulumbuluishe bua bitudi tuamba ne mutudi tubiamba. Yakobo 1:26 udi wamba ne: “Bikala muntu wela meji ne: mmutendeledi wa Nzambi, kadi kayi ulama ludimi luende bikole, udi udinga muoyo wende, ne ntendelelu wende udi patupu.” Muaku wa mu tshiena Greke udibu bakudimune ne: “patupu” udi mua kumvuija kabidi tshintu ‘tshidi katshiyi ne mushinga.’ (1 Kolinto 15:17) Nunku tuetu katuyi ne budimu mu diakula dietu, tudi mua kunyanga malanda etu ne Yehowa anyi nansha kuashipa.—Yakobo 3:8-10.

⁸ Bushuwa, tudi ne malu mimpe adi atusaka bua kutabalela bitudi tuakula ne mushindu utudi tubiakula. Bua kumona mua kuakula mu mushindu udi Yehowa  musue, tudi ne bua kumanya mêyi atudi ne bua kuepuka.

9, 10. (a) Nngakuilu kayi udi nende bantu matuku etu aa? (b) Bua tshinyi tudi tuepuka ngakuilu wa busenji?

⁹ Lelu eu, bantu badi ne ngakuilu wa busenji anyi mubole. Bantu ba bungi badi bela meji ne: bidi bikengela kupendelangana ku bilamba anyi kuikala ne ngakuilu wa busenji bua bantu bashishe kumvua tshidibu bamba. Bantu batu benza manaya a kusekeshangana batu misangu ya bungi ne mineku ya bundu ne ngakuilu wa busenji bua kusekesha bantu. Kadi mupostolo Paulo wakamba ne: “Nudi ne bua kulekela bintu ebi bionso: bumfiika munda, tshiji, malu mabi, bipendu, ne mêyi a busenji mukana muenu.” (Kolosayi 3:8) Wakamba kabidi ne: “mineku ya busenji” kayena ne bua ‘kutedibua nansha munkatshi’ mua bena Kristo balelela to.—Efeso 5:3, 4.

¹⁰ Ngakuilu wa busenji kena usankisha Yehowa ne bantu badi bamunange to, bualu mmukoya. Mu Bible, “malu a bukoya” adi mu “malu a mubidi.” (Galatiya 5:19-21) “Malu a bukoya” adi akongoloja mpekatu ya bungi, ne tshilele tshimue tshia bukoya tshidi mua kufikisha ku tshikuabu. Muntu yeye ne tshilele tshia kuakula malu a busenji anyi a bukoya bikole kayi musue kulekela, bualu ebu budi mua kuleja ne: kena ukumbana kabidi bua kushala mu tshisumbu to.—2 Kolinto 12:21; Efeso 4:19; tangila Dimanyisha dia ku ndekelu dia 23.

11, 12. (a) Tshijanu tshibi ntshinyi? (b) Bua tshinyi katuena ne bua kushiminyina muntu bualu?

¹¹ Bidi bikengela kabidi kuepuka bijanu bibi. Ki mbibi bua tuetu kutabalela malu a bakuabu ne kuambilangana malu adi atangila balunda betu anyi bena mu  dîku dietu to. Nansha bena Kristo ba mu bidimu lukama bia kumpala bavua basue kumanya muvua bana babu, ne tshivuabu mua kuenza bua kubambuluisha. (Efeso 6:21, 22; Kolosayi 4:8, 9) Kadi bitu bipepele bua muyuki udi utangila bantu bakuabu kuluawu tshijanu tshibi. Tuetu tuambilangana petu bijanu bitudi bumvue, tudi mua kuamba malu adi kaayi malelela anyi kupatula malu avua kaayi mua kupatuka to. Tuetu katuyi badimuke, mushindu mubi wa kuakula eu udi mua kutufikisha ku dibandangana ne malu a mafi anyi ku dishiminyinangana malu. Bafalese bakashiminyina Yezu malu pavuabu bamubanda ne malu avuaye kayi muenze. (Matayi 9:32-34; 12:22-24) Dishiminyinangana malu ditu dinyangila muntu lumu, difikisha ku matandu ne ku tunyinganyinga, ne dinyanga bulunda.—Nsumuinu 26:20.

¹² Yehowa mmusue bua mêyi etu ikale ambuluisha bakuabu ne abakankamija, kaayi avuija balunda bena lukuna to. Yehowa mmukine bantu badi ‘bajudija matandu munkatshi mua bana ba muntu.’ (Nsumuinu 6:16-19) Mushiminyinyanganyi wa malu wa kumpala uvua Satana Diabolo wakashiminyina Nzambi malu. (Buakabuluibua 12:9, 10) Matuku etu aa, bantu batu bashiminyinangana malu bikole. Kadi kabiena ne bua kuikala nunku mu tshisumbu tshia bena Kristo to. (Galatiya 5:19-21) Nunku tudi ne bua kuikala badimuke bua malu atudi tuakula ne kuikala kuela meji kumpala kua kuakula. Kumpala kua kuamba bualu budi butangila muntu mukuabu buudi mumvue, diebeja ne: ‘Bualu bundi nsua kuamba ebu mbulelela anyi? Mbimpe kubuamba anyi? Budi ne diambuluisha anyi? Muena bualu ebu yeye muaba eu, ndi mua kubuamba anyi? Ndi mua kumvua bishi muntu yeye muambe bualu buanyi meme bua nunku?’—Bala 1 Tesalonike 4:11.

13, 14. (a) Ntshinyi tshidi bipendu mua kuenzela bantu? (b) Bulaku ntshinyi? Bua tshinyi bena Kristo kabatu belangana bulaku?

¹³ Imue misangu tuetu bonso tutu tuamba malu, pashishe tubanga kudiela meji. Kadi katuena basue kuikala ne tshibidilu tshia kubipisha bakuabu, kubamba mêyi mabi anyi adi abatapa ku muoyo to. Bipendu kabiena ne muaba mu nsombelu wetu to. Paulo wakamba ne: “Nulekele dilaminangana munda dibi dia mishindu yonso, tshiji, bumfiika munda, dielelangana mbila, bipendu.” (Efeso 4:31) Bipendu bitu bipuekesha bantu milongo ne bibashiya badiumvua bantu tshianana. Bitu bipepele bua kunyingalaja nangananga bana, nanku tudi ne bua kutamba kudimuka bua kubenga kubanyingalaja ne mêyi etu.—Kolosayi 3:21.

¹⁴ Bible udi utudimuija bua mushindu mukuabu mubi wa bipendu eu: bulaku. Bulaku ntshilele tshia kupenda bakuabu ne lungenyi lua kubatapa ku muoyo. Bitu bitonda bikole padi muntu wela muena dibaka nende anyi bana bende bulaku! Mu bulelela, muntu udi kayi ulekela kuela bakuabu bulaku anyi kubapenda kena ukumbana bua kushala mu tshisumbu to. (1 Kolinto 5:11-13; 6:9, 10) Anu mutudi babimone, tuetu tuakula malu a busenji, adi kaayi malelela, anyi kaayi mimpe, tudi tunyanga malanda etu ne Yehowa ne bantu bakuabu kabidi.

15. Nngakuilu kayi utu ukoleshangana?

¹⁵ Mmunyi mutudi mua kuikala ne ngakuilu udi Yehowa wanyisha? Nansha mudi Bible kayi utuambila menemene tshitudi ne bua kuamba anyi tshitudi katuyi ne bua kuamba, udi utuambila bua kuakula “anu dîyi dimpe didi mua kukolesha bakuabu.” (Efeso 4:29) Ngakuilu udi ukolesha mmukezuke, mmuimpe, ne mmulelela. Yehowa mmusue bua mêyi etu ikale akankamija bakuabu  ne abakolesha. Kadi bidi mua kutukolela bualu kuakula mêyi mabi kaayi melela meji kutu kupepele, kadi kuakula mêyi mimpe kutu koku kulomba kudienzeja bikole. (Tito 2:8) Tukonkononayi mishindu mishilashilangane itudi mua kukolesha bakuabu ne mêyi etu.

16, 17. (a) Bua tshinyi tudi ne bua kuela bakuabu kalumbandi? (b) Mbanganyi batudi mua kuela kalumbandi?

¹⁶ Yehowa ne Yezu batu bela bantu kalumbandi bikole. Tudi basue kubidikija. (Matayi 3:17; 25:19-23; Yone 1:47) Bua kuela muntu kalumbandi kadi mua kumukankamija menemene, bidi bilomba kuikala nende mu meji ne kumutabalela. Nsumuinu 15:23 udi wamba ne: “Dîyi diamba mu tshikondo tshiakane ndimpe be!” Padi muntu utuela kalumbandi ne muoyo mujima bua mudimu mukole utudi benze anyi wanyisha bualu kampanda butudi benze, bitu bitukankamija.—Bala Matayi 7:12; tangila Dimanyisha dia ku ndekelu dia 27.

¹⁷ Wewe muikale ne tshibidilu tshia kumona malu mimpe adi bakuabu benza, nebikale bipepele bua kubela kalumbandi ne muoyo mujima. Tshilejilu, pamuapa udi mumone ne: muntu kampanda mu tshisumbu utu ulongolola miyuki yende bimpe anyi udienzeja bua kufila mandamuna mu bisangilu. Nsonga udi mua kuikala wimanyina bulelela mu tulasa bikole, anyi mukulakaje kampanda udi mua kuikala uyisha pa tshibidilu. Pamuapa anu mêyi ebe a kubanyisha nawu ke tshidibu natshi dijinga. Mbualu bua mushinga mukole kabidi bua mulume kuikalaye wambila mukajende mudiye mumunange ne umuanyisha. (Nsumuinu 31:10, 28) Anu mudi mitshi dijinga ne munya ne mâyi, bantu batu basue bikale babanyisha, nangananga bana. Keba mishindu ya kubela kalumbandi bua ngikadilu yabu mimpe ne mudibu badienzeja bua kukumbaja malu kampanda. Kubela kalumbandi kudi mua kukolesha dikima diabu  ne dishindika dia ne: badi mua kuenza malu mimpe, ne kudi mua kubasaka bua kudienzeja bikole bua kuenza tshidi tshimpe.

18, 19. Bua tshinyi tudi ne bua kuenza muetu muonso bua kukankamija bakuabu ne kubakolesha? Mmunyi mutudi mua kuenza nanku?

¹⁸ Patudi tukankamija bantu bakuabu ne tubakolesha, tudi tulonda tshilejilu tshia Yehowa. Udi utabalela “bapuekele” ne “badibu bazaza” ubatabalelamu. (Yeshaya 57:15) Yehowa mmusue bua ‘tutungunuke ne kukankamijangana’ ne “kuakula ne mêyi a busambi kudi badi babungame.” (1 Tesalonike 5:11, 14) Udi umona patudi tuditatshisha bua kuenza nunku ne utuanyisha.

 ¹⁹ Udi mua kumona ne: muntu kampanda mu tshisumbu mmutekete mu mikolo anyi mmubungame. Ntshinyi tshiudi mua kuamba tshidi mua kumuambuluisha? Pamuapa kuena mua kujikija tshilumbu tshiende to, kadi udi mua kuleja muudi umutabalela. Tshilejilu, udi mua kulongolola malu bua kupitshisha nende dîba. Udi mua kumubadila mvese kampanda udi ukankamija anyi mene kusambila nende. (Misambu 34:18; Matayi 10:29-31) Jadikila bantu ba mushindu eu ne: bana babu ba mu tshisumbu mbabanange. (1 Kolinto 12:12-26; Yakobo 5:14, 15) Akula mu mushindu udi uleja ne: udi mutuishibue ne malu audi ubambila ne udi uitabuja.—Bala Nsumuinu 12:25.

20, 21. Ntshinyi tshidi mua kuenza bua bantu bitabe mibelu bipepele?

 ²⁰ Tudi kabidi tukolesha bakuabu patudi tubapesha mibelu mimpe. Bu mutudi bantu bapange bupuangane, tuetu bonso tudi dijinga ne mibelu ku misangu ne ku misangu. Nsumuinu 19:20 udi wamba ne: “Teleja mubelu ne itaba dinyoka, bua ulue muena meji mu matuku ebe atshilualua.” Ki nganu bakulu badi mua kufila mibelu to. Baledi badi ne bua kuludika bana babu. (Efeso 6:4) Bana betu ba bakaji pabu badi mua kupeshangana mibelu mimpe. (Tito 2:3-5) Bu mutudi banange bena Kristo netu, tudi tubapesha mibelu mu mushindu wa ne: kabadiumvu bibi to. Tshidi mua kutuambuluisha ntshinyi?

²¹ Pamuapa udi uvuluka musangu kampanda uvua muntu mukupeshe mibelu mimpe mu mushindu wa wewe kuyitaba bipepele. Ntshinyi tshivua tshienze bua uyitabe bipepele? Uvua pamuapa mumone ne: muntu au uvua mukutabalele bushuwa. Anyi uvua mua kuikala muakule mu mushindu muimpe udi uleja dinanga. (Kolosayi 4:6) Mibelu ayi ivua mua kuikala mimanyine mu Bible. (2 Timote 3:16) Nansha tuetu bangatshile mibelu itudi tupeshangana mu Bible buludiludi anyi katuyi bayangatshilamu, idi ne bua kuikala mimanyine anu mu Bible. Muntu nansha umue kena ne bua kuenzeja bantu bakuabu bua bitabe lungenyi luende anyi kumvuija mvese bibi bua kuitabijija bantu lungenyi luende to. Kadi kuvuluka mushindu uvuabu bakupeshe mibelu kudi mua kukuambuluisha paudi upeshangana pebe mibelu.

22. Udi musue kuikala wakula mushindu kayi?

²² Muakulu ndipa dia kudi Nzambi. Tuetu bamunange nebitusake bua kuakula mu mushindu muimpe. Vuluka ne: mêyi adi ne bukole bua kunyingalajangana anyi kukoleshangana. Nunku tuenzayi muetu muonso bua mêyi etu ikale akoleshangana ne akankamijangana.