Mikenji ya Nzambi mmiangatshila mu mêyi ende manene. Mêyi manene aa mmalu malelela a nshindamenu adi mu Bible. Adi atuambuluisha bua kumanya mudi Nzambi wela meji ne umvua bua amue malu. Mêyi manene adi atuambuluisha bua kuangata mapangadika mimpe ne kuenza tshidi tshimpe. Adi atuambuluisha nangananga mu nsombelu idiku kakuyi mikenji ya Nzambi misunguluke.

▸ Nshapita wa 1, tshikoso tshia 8

Kutumikila Yehowa kudi kumvuija kuenza tshidiye utuambila bua kuenza ku budisuile. Yehowa mmusue bua tumutumikile bualu tudi bamunange. (1 Yone 5:3) Tuetu banange Nzambi ne tumueyemena, netutumikile mibelu yende mu malu onso. Netumutumikile nansha padibi bitukolela bua kuenza nanku. Mbimpe tutumikile Yehowa bualu udi utulongesha mua kuikala ne nsombelu muimpe mpindieu ne utulaya malu mimpe a bungi mu matuku atshilualua.—Yeshaya 48:17.

▸ Nshapita wa 1, tshikoso tshia 10

Yehowa mmupeshe muntu yonso budikadidi bua kudisunguila malu anyi kudiangatshila mapangadika. Kavua mutufuke bua kuikala bu biamu bidi bua kuenzabi mudimu anu babitue mbote to. (Dutelonome 30:19; Yoshua 24:15) Mbimpe tuangate mapangadika mimpe ne budikadidi buetu. Kadi tuetu katuyi badimuke, tudi mua kuangata mapangadika mabi. Kuikala ne budikadidi bua kudisunguila malu kudi kumvuija ne: yonso wa kutudi udi ne bua kupangadija yeye nkayende ni mmusue kuikala ne lulamatu kudi Yehowa ne kuleja ne: mmumunange bushuwa.

▸ Nshapita wa 1, tshikoso tshia 12

Yehowa mmuele mikenji ya bikadilu bilenga anyi mêyi a kulonda bua bikadilu ne bienzedi bietu. Bible ke udi mua kutuambuluisha bua kumanya mikenji eyi ne kumanya mudiyi mua kutuambuluisha bua kuikala ne  nsombelu muimpe. (Nsumuinu 6:16-19; 1 Kolinto 6:9-11) Mêyi a kulonda aa adi atuambuluisha bua kumanya tshidi Nzambi umona ne: ntshimpe anyi ntshibi. Adi atuambuluisha kabidi bua kumanya mua kulejangana dinanga, kuangata mapangadika mimpe, ne kuenzela bantu bakuabu malu mimpe. Nansha mudi mikenji ya bikadilu ya bena panu yenda anu inyanguka, ya Yehowa yoyi kayitu ishintuluka to. (Dutelonome 32:4-6; Malaki 3:6) Kuyilonda kudi kutuepula ku njiwu ya bungi ya ku mubidi ne ku tunyinganyinga.

▸ Nshapita wa 1, tshikoso tshia 17

Kondo ketu ka muoyo mbukole budi munda muetu budi butuambila tshidi tshimpe ne tshidi tshibi. Yehowa mmupeshe yonso wa kutudi kondo ka muoyo. (Lomo 2:14, 15) Bua kondo ketu ka muoyo kuenzaku mudimu bimpe, tudi ne bua kukalongesha ne mikenji ya Yehowa ya bikadilu bilenga. Dîba adi nekatuambuluishe bua kuangata mapangadika adi asankisha Nzambi. (1 Petelo 3:16) Kondo ketu ka muoyo kadi mua kutudimuija patudi tukeba kuangata mapangadika mabi, anyi kadi mua kuenza bua tumvue kanyinganyinga kakole panyima pa tuetu bamane kuenza bualu bubi. Kondo ketu ka muoyo kadi mua kuteketa, kadi ku diambuluisha dia Yehowa tudi mua kukakolesha kabidi. Kondo ka muoyo kimpe kadi katupesha ditalala dia mu lungenyi ne kenza bua tuikale tudiangata ne mushinga.

▸ Nshapita wa 2, tshikoso 3

Kutshina Nzambi kudi kumvuija ne: tudi bamunange ne tudi tumunemeka bikole, bitusaka bua kubenga kuenza bualu nansha bumue budi mua kumunyingalaja. Ditshina dia Nzambi didi dituambuluisha bua kuenza tshidi tshimpe ne kuepuka tshidi tshibi. (Misambu 111:10) Didi ditusaka bua kuteleja malu onso adi Yehowa wamba ne ntema yonso. Didi kabidi dituambuluisha bua kukumbaja malu atudi tumulaya bualu tudi tumunemeka bikole. Ditshina dia Nzambi didi mua kushintulula mushindu utudi tuela meji, utudi tuenzela bakuabu malu, ne mapangadika atudi tuangata dituku dionso edi..

▸ Nshapita wa 2, tshikoso tshia 9

Dinyingalala didi dikongoloja dibungama dikole didi muntu umvua bualu mmuenze bualu bubi. Bantu badi banange Nzambi batu bumvua bibi patubu bajingulula ne: mbenze bualu budi bushipe mikenji yende. Tuetu benze bualu bubi, tudi ne bua kulomba Yehowa luse ku diambuluisha dia mulambu wa Yezu wa kupikulangana nawu. (Matayi 26:28; 1 Yone 2:1, 2) Patudi tunyingalala ne muoyo mujima ne tulekela kuenza malu mabi, tuikale ne dishindika dia ne: Yehowa neatufuile luse. Katuena kabidi ne bua kushala tudipisha bua tshituvua benze kale to. (Misambu 103:10-14; 1 Yone 1:9; 3:19-22) Tudi ne bua kudienzeja bua bilema bietu bitulongeshe, kumbusha lungenyi luonso lubi, ne kuenza malu mu diumvuangana ne mikenji ya Yehowa.

▸ Nshapita wa 2, tshikoso tshia 18

Padi muntu udi muenze mpekatu munene kayi unyingalala ne ubenga bua kulonda mikenji ya Yehowa, kena mua kushala mu tshisumbu to. Bidi bikengela kumuipata. Padibu bipata muntu, tudi ne bua kukosa nende malanda ne katuena ne bua kuyukila nende kabidi to. (1 Kolinto 5:11; 2 Yone 9-11) Dipata muntu mu tshisumbu didi dikuba dîna dia Yehowa ne tshisumbu. (1 Kolinto 5:6) Dipatshibua mu tshisumbu didi kabidi dinyoka didi mua kuambuluisha muntu bua kunyingalala bua amone mua kupingana kudi Yehowa.—Luka 15:17.

▸ Nshapita wa 3, tshikoso tshia 19

Yehowa mmutunange ne mmusue kutuambuluisha. Ke bualu kayi udi utupesha buludiki, bulombodi, ne mibelu ku diambuluisha dia Bible ne ku butuangaji bua bantu badi bamunange. Bu mutudi bantu bapange bupuangane, tudi tukengela diambuluisha edi ne muoyo mujima. (Yelemiya 17:9) Tuetu tuteleja bantu badi Yehowa muteke bua kutulombola ne kanemu kuonso, tudi tuleja ne: tudi tumunemeka ne tudi basue kumutumikila.—Ebelu 13:7.

▸ Nshapita wa 4, tshikoso 2

Bu mutudi bantu bapange bupuangane, mbipepele bua tuetu kuikala badinangi ne bena lutambishi. Kadi Yehowa udi utulomba bua tuikale ne budipuekeshi. Misangu ya bungi, tudi tutuadija kulonga mua kuikala ne budipuekeshi patudi tudifuanyikija ne Yehowa ne tumona mutudi bashadile bikole. (Yobo 38:1-4) Tshibadi tshikuabu tshinene tshia budipuekeshi nkulonga bua kutamba kuela meji bua bakuabu ne tshidi tshimpe buabu kupita mutudi tuela meji buetu tuetu. Lutambishi lutu misangu ya bungi lufikisha muntu ku diela meji ne: udi ne mushinga wa bungi kupita bantu bakuabu. Muena budipuekeshi udi uditangila bimpe meneme ne umona ngikadilu yende ne bilema biende, malu adiye mua kuenza ne adi mamukolele. Kena utshina bua kuitaba bilema biende, kulomba luse, ne kuitaba mibelu ne ngenyi bia kudi bantu bakuabu to. Muntu muena budipuekeshi udi weyemena Yehowa ne ulonda bulombodi buende.—1 Petelo 5:5.

▸ Nshapita wa 4, tshikoso 4

Bukokeshi mbukenji bua kutuma nabu dîyi ne kuangata mapangadika. Bua mu diulu ne pa buloba, Yehowa ke udi ne bukokeshi butumbuke. Bu mudiye Mufuki wa bintu bionso, yeye ke udi ne bukole bua bungi menemene mu diulu ne pa buloba. Utu anu wambuluisha bantu ne bukokeshi buende ebu. Yehowa mmupeshe bamue bantu mudimu wa kutulama. Tshilejilu, baledi, bakulu mu tshisumbu, ne mbulamatadi badi ne bukokeshi kampanda, ne Yehowa mmusue bua tueleshangana nabu diboko. (Lomo 13:1-5; 1 Timote 5:17) Kadi padi mikenji ya bantu ibengangana ne ya Nzambi, tudi tutumikila Nzambi pamutu pa bantu. (Bienzedi 5:29) Patudi tuitaba bukokeshi bua bantu badi Yehowa musungule, tudi tuleja Yehowa ne: tudi tunemeka mapangadika ende.

▸ Nshapita wa 4, tshikoso tshia 7

Yehowa mmuteke bakulu, mmumue ne: bana betu ba balume badi ne dimonamona dia malu, bua kutabalela tshisumbu. (Dutelonome 1:13; Bienzedi 20:28) Bana betu ba balume aba badi batuambuluisha bua kutungunuka ne kulama malanda etu ne Yehowa makole ne bua kumutendelela mu ditalala ne mu bulongame. (1 Kolinto 14:33, 40) Kumpala  kua nyuma muimpe kuteka muntu mukulu, muntu au udi ne bua kuanji kukumbaja malu malomba masunguluke adi mu Bible. (1 Timote 3:1-7; Tito 1:5-9; 1 Petelo 5:2, 3) Tudi tueyemena bulongolodi bua Nzambi ne tubutua mpanda, ke bualu kayi tudi tueleshangana diboko ne bakulu ne disanka dionso.—Misambu 138:6; Ebelu 13:17.

▸ Nshapita wa 4, tshikoso tshia 8

Yehowa mmupeshe baledi mudimu wa kulama bana babu anyi ba mu nzubu muabu. Kadi Bible udi uleja ne: mfumu wa dîku mmulume. Tatu yeye kayiku, mamu ke udi ulua mfumu wa dîku. Mu midimu ya mfumu wa dîku mudi kudisha bena mu dîku diende, kubavuadika, ne kubakebela muaba wa kulala. Bidi ne mushinga wa bungi bua mfumu wa dîku ikale ntunga mulongo mu dilongesha dîku diende bua kutendelela Yehowa. Tshilejilu, udi udienzeja bua dîku diende dikale ne tshibidilu tshia kubuela mu bisangilu, kuyisha, ne kulonga Bible kaba kamue. Mfumu wa dîku udi kabidi ne dîyi dia ndekelu mu mapangadika adi dîku diangata. Udi udienzeja misangu yonso bua kuidikija Yezu pa kuikala muena malu mimpe ne kuikala ne nkatshinkatshi, kayi ne tshikisu anyi ne malu makole to. Bualu ebu budi buambuluisha bua mu dîku muikale nsombelu muimpe bua bantu bonso badiumvue bimpe ne bakoleshe malanda abu ne Yehowa.

▸ Nshapita wa 4, tshikoso tshia 12

Kasumbu Kaludiki nkenza ne kasumbu ka bantu balume badi ne ditekemena dia kuya mu diulu badi Nzambi ukuata nabu mudimu bua kulombola mudimu wa bantu bende. Mu bidimu lukama bia kumpala, Yehowa wakenza mudimu ne kasumbu kaludiki bua kulombola tshisumbu tshia bena Kristo tshia kumpala mu ntendelelu wabu ne mu mudimu wabu wa diyisha. (Bienzedi 15:2) Lelu, kasumbu ka bana betu ba balume badi benza Kasumbu Kaludiki kadi kalombola bantu ba Nzambi, kabaludika, ne kabakuba. Padi bana betu aba bangata mapangadika, badi balonda buludiki bua mu Dîyi dia Nzambi ne bua kudi nyuma wende muimpe. Yezu wakabikila kasumbu ka bantu balume bela manyi aba ne: “mupika wa lulamatu udi mudimuke.”—Matayi 24:45-47.

▸ Nshapita wa 4, tshikoso tshia 15

Kudi mua kulua bikondo bidibu mua kulomba muanetu wa bakaji bua kuenza mudimu kampanda mu tshisumbu utubu benza anu kudi bana betu ba balume. Padiye uwenza, udi ubuikila ku mutu bua kuleja mudiye unemeka mushindu udi Yehowa mulongolole malu. Kadi bidi bikengela abuikile ku mutu anu mu nsombelu kampanda. Tshilejilu, muanetu wa bakaji udi ne bayende anyi ne muanetu wa balume udi mutambule udi mua kubuikila ku mutu padiye ulongesha muntu Bible.—1 Kolinto 11:11-15.

▸ Nshapita wa 4, tshikoso tshia 17

Bu mutudi katuyi tubuelakana mu malu a pa buloba, tudi tubenga kubuelakana mu malu a tshididi. (Yone 17:16) Bantu ba Yehowa badi batua Bukalenge buende mpanda. Anu bu Yezu, katuena tubuelakana mu malu a pa buloba to.

Yehowa mmututumine dîyi bua ‘kutumikila mbulamatadi ne bakokeshi.’ (Tito 3:1, 2; Lomo 13:1-7) Kadi mikenji ya Nzambi idi yamba kabidi ne: katuena ne bua kushipangana to. Ke bualu kayi kondo ka muoyo ka muena Kristo kakena mua kumuanyishila bua kuya ku mvita to. Bobu bambile muena Kristo ne: badi bamupesha mudimu wa tshianana bu mudiye mubenge wa busalayi, udi ne bua kutangila bikala kondo kende ka muoyo kamuanyishila bua kuwenza.

Tudi tutendelela anu Yehowa, bualu yeye ke Mufuki wetu. Nansha mutudi tunemeka bimanyinu bia ditunga, katuena tunemekela dibendele anyi tuimba musambu wa ditunga to. (Yeshaya 43:11; Danyele 3:1-30; 1 Kolinto 10:14) Bualu bukuabu, mutendeledi wa Yehowa yonso utu udiangatshila dipangadika dia kubenga kusungula tshisumbu tshia tshididi anyi kuelelangana tukanda. Tudi tuenza nunku bualu tukadi bamane kulamata mbulamatadi wa Nzambi.—Matayi 22:21; Yone 15:19; 18:36.

▸ Nshapita 5, tshikoso 2

Bena pa buloba badi batungunuja ngelelu wa meji wa Satana. Ngelelu wa meji eu mmutangalake bikole mu bantu badi kabayi banange Yehowa,  badi kabayi bamuidikija, ne badi babenga kutumikila mikenji yende. (1 Yone 5:19) Badi babikila ngelelu wa meji eu ne malu adiye ufikisha bantu ku dienza ne: nyuma wa pa buloba. (Efeso 2:2) Bantu ba Yehowa badi benza bua nyuma eu kabakokeshi to. (Efeso 6:10-18) Kadi tuetu tudi banange njila ya Yehowa ne tudi tuditatshisha bikole bua kulonda ngelelu wende wa meji.

▸ Nshapita 5, tshikoso tshia 7

Butontolodi ndiluisha bulelela bua mu Bible. Batontolodi badi batombokela Yehowa ne Yezu, Mukalenge musungula wa Bukalenge bua Nzambi, ne badi bateta kukoka bakuabu kudibu. (Lomo 1:25) Mbasue kujula dielakana mu meji a bantu badi batendelela Yehowa. Mu tshisumbu tshia bena Kristo tshia kumpala, kuvua bantu bavua balue batontolodi, nansha lelu kabidi badiku. (2 Tesalonike 2:3) Bantu badi balamate Yehowa kabena babuelakana ne batontolodi to. Katuena mua kulekela dijinga dia kumanya malu abu ditusaka bua kuabala anyi kuateleja, peshi kulekela bantu batusaka bua kuenza nanku nansha kakese. Tudi balamate Yehowa ne tudi tumutendelela anu yeye.

▸ Nshapita 5, tshikoso tshia 9

Mu mikenji ya Mose, bena Isalele bavua balomba Yehowa bua ababuikidile mpekatu yabu. Bavua baya ku ntempelo ne milambu ya kubuikila nayi mpekatu ya ntete, ya mafuta, ne ya nyama. Bualu ebu buvua buvuluija bena Isalele ne: Yehowa uvua mudiakaje bua kubabuikidila mpekatu ya tshisamba tshijima ne ya muntu ne muntu. Pashishe, pakafila Yezu muoyo wende bua kubuikila mpekatu yetu, milambu ya dibuikila nayi mpekatu eyi kayivua kabidi ne mushinga to. Yezu wakafila mulambu mupuangane “musangu umue bua kashidi.”—Ebelu 10:1, 4, 10.

▸ Nshapita wa 7, tshikoso 6

Mikenji ya Mose ivua mitabile bantu bua kudia nyama. Ivua ibalomba kabidi bua kulambula nyama. (Lewitiki 1:5, 6) Kadi Yehowa kavua muanyishile bantu bende bua kukengesha nyama nansha kakese.  (Nsumuinu 12:10) Mu bulelela, mikenji ivua ne malu avua akuba nyama bua kabayenzedi malu ne tshikisu. Mikenji ivua ilomba bena Isalele bua kutabalela nyama yabu bimpe.—Dutelonome 22:6, 7.

▸ Nshapita wa 7, tshikoso 6

 

Tutupa tukese tua mu mashi. Mashi mmenza ne bitupa binene binayi ebi: globile mikunze, globile mitoke, plakete, ne plasma. Badi mua kutapulula bitupa binene binayi bidi bienza mashi ebi mu tutupa tukese, tudibu babikila ne: tutupa tukese tua mu mashi. *

Bena Kristo batu babenga diedibua dia mashi wonso majima anyi dia tshimue tshia ku bitupa biawu binene binayi. Kadi badi mua kuitaba tutupa tukese tua mu mashi anyi? Bible ki mmuakule bua kalu ne kalu konso mu tshilumbu etshi to. Nunku muena Kristo yonso udi ne bua kudiangatshila dipangadika bilondeshile kondo kende ka muoyo kalongesha kudi Bible.

Bamue bena Kristo batu babenga tutupa tukese tua mu mashi tuonso. Badi mua kudiambila ne: mikenji ivua Nzambi mupeshe bena Isalele ivua ibalomba bua kumbusha mashi a nyama, “kuapongolola panshi.”—Dutelonome 12:22-24.

Bakuabu bobu badi bamona malu mushindu mukuabu. Kabu kondo ka muoyo kadi kabanyishila bua kuitaba tumue tutupa tukese tua mu mashi. Badi mua kudiambila ne: tutupa tukese tua mu mashi katuena tuleja kabidi muoyo wa tshifukibua tshiena mashi adibu bangate au to.

Paudi ujinga kuangata mapangadika bua tutupa tukese tua mu mashi, diebeja ne:

• Ndiku mumanye ne: pandi mbenga tutupa tukese tuonso tua mu mashi, bidi biumvuija ne: nembenge kabidi amue manga adi aluisha masama peshi adi mua kuambuluisha bua kukosesha mashi padiwu apatuka anyi?

•   Mmunyi mundi mua kumvuija munganga tshindi mbengela katupa kakese ka mu mashi kamue anyi tua bungi peshi tshindi ntuitabila?

Ngondapilu. Tuetu bena Kristo katutu tufila mashi anyi tulamisha mashi etu mbingu ya bungi kumpala kua kutupandabu to. Kadi kudi ngondapilu mikuabu idibu benza mudimu ne mashi a mubedi nkayende. Muena Kristo yonso udi ne bua kudiangatshila dipangadika dia tshienzabu ne mashi ende padibu benda bamupanda, bamuenza mateta, anyi bamuondopa ne ngondapilu idiku lelu. Padibu benda bondopa mubedi ne ngondapilu ya nunku, badi mua kumbusha mashi ende mu mubidi, kualama pa bule bua mutantshi bule kampanda.—Bua kumanya malu makuabu, bala Tshibumba tshia Nsentedi tshia 15/10/2000, dibeji dia 30-31.

Tshilejilu, kudi ngondapilu udibu babikila ne: hémodilution. Diakamue kumpala kua kupanda muntu, badi bumbusha ndambu wa mashi ende, bapingaja bintu bia mâyi mâyi pa muaba wawu. Pashishe badi balua kupingaja mashi au mu mubidi wa mubedi patshidibu benda bamupanda anyi mutantshi mukese padibu bajikija kumupanda..

 Kudi ngondapilu mukuabu udibu bakoka mashi a mubedi adi apatuka padibu bamupanda, baatata, pashishe baapingaja mu mubidi wa mubedi patshidibu benda bamupanda anyi mutantshi mukese bobu bamane kujikija kumupanda.

Munganga yonso udi mua kulonda ngondapilu eyi bishilangane kakese. Nanku kumpala kua muena Kristo kuitaba bua bamupande, bamuenze mateta, anyi bamuondope ne ngondapilu idiku lelu, bidi bikengela amanye menemene tshienzabu ne mashi ende.

Paudi ujinga kuangata mapangadika bua ngondapilu idibu benza mudimu ne mashi ebe wewe muine, diebeja ne:

• Bikalabu ne bua kukoka ndambu wa mashi anyi bua apitshile mu tshintu kampanda ne pamuapa banji kuimanyika luendu luawu bua katupa kîpi, kondo kanyi ka muoyo nekitabe bua kumona mashi aa bu atshidi a mu mubidi wanyi, kabiyi bilomba bua “kuapongolola panshi” anyi?—Dutelonome 12:23, 24.

• Kondo kanyi ka muoyo kalongesha kudi Bible nekashale mu ditalala bu buobu mua kukoka ndambu wa mashi anyi, kuashintulula, ne pashishe kuapingaja tshiakabidi mu mubidi wanyi padibu benda bangondapa anyi?

• Ndiku mumanye ne: pandi mbenga ngondapilu yonso idibu benza mudimu ne mashi anyi meme muine, bidi biumvuija ne: nembenge kabidi mateta a mashi, ngondapilu wa hémodialyse, anyi bua bangase ku tshiamu tshidi tshienza mudimu pa muaba wa muoyo ne bisulusulu anyi?

 Kumpala kua kuangata mapangadika bua tutupa tukese tua mu mashi ne bua ngondapilu idibu benza mudimu ne mashi etu tuetu bine, tudi ne bua kusambila bua Yehowa atulombole, pashishe kuenza makebulula. (Yakobo 1:5, 6) Pashishe kondo ketu ka muoyo kalongesha kudi Bible katulombole bua kuangata dipangadika. Ki mbimpe kuebeja bantu bakuabu tshivuabu mua kuenza bu bobu bikale pa muaba wetu, anyi bantu bakuabu kabena ne bua kutusaka bua kuangata dipangadika kampanda anyi kansanga to.—Lomo 14:12; Galatiya 6:5.

▸ Nshapita wa 7, tshikoso tshia 11

Kuikala bakezuke mu bikadilu kudi kumvuija ne: bikadilu bietu ne malu atudi tuenza mbikezuke kumpala kua Nzambi. Kudi kukongoloja malu atudi tuelela meji, tuamba, ne tuenza. Yehowa mmutuambile ne: tudi ne bua kuepuka bukoya buonso bua malu a masandi anyi masandi mine. (Nsumuinu 1:10; 3:1) Tudi ne bua kuangata dipangadika dia kulonda mikenji mikezuke ya Yehowa nansha kumpala kua tuetu kudimona mu nsombelu udi mua kutusaka bua kuenza bualu bubi. Bidi bikengela tuikale ne tshibidilu tshia kusambila Nzambi bua atuambuluishe bua tulame meji etu makezuke, ne tudi ne bua kudisuika bua kukandamena mateta a masandi.—1 Kolinto 6:9, 10, 18; Efeso 5:5.

▸ Nshapita wa 8, tshikoso tshia 11

Tshikadilu tshia dikamakama tshidi mua kumuenekela mu diakula dia muntu anyi mu mushindu udiye wenza malu, bileja mudiye ushipa mikenji ya Nzambi bibi menemene ne bileja mudiye kayi ne bundu. Muntu wa nunku udi uleja mudiye kayi unemeka mikenji ya Nzambi to. Badi mua kulumbuluisha muntu udi ne tshikadilu tshia dikamakama. Malu a bukoya adi akongoloja mishindu mishilashilangane ya malu mabi. Bilondeshile bunene bua bualu, badi mua kulumbuluisha muntu mu tshisumbu bua amue malu adi atangila malu a bukoya.—Galatiya 5:19-21; Efeso 4:19; bua kumanya malu makuabu, bala “Nkonko ya babadi” mu Tshibumba tshia Nsentedi tshia dia 15/7/2006.

▸ Nshapita wa 9, tshikoso tshia 7; Nshapita wa 12, tshikoso tshia 10

Yehowa mmuenze bua disangila dikale mushindu muimpe udi mulume ne mukajende balejangana mudibu banangangane. Kadi padi muntu udijikijila dijinga edi anyi wenza mudimu bibi ne bitupa biende bia lulelu bua kujikija dijinga dia kusangila, udi wenza mudimu ne bitupa biende bia lulelu mu mushindu mubi. Tshilele etshi tshidi mua kunyanga malanda a muntu ne Yehowa. Tshidi mua kujula majinga mabi ne kufikisha muntu ku dimona disangila mu mushindu mubi. (Kolosayi 3:5) Muntu udi ne tshilele etshi ne umona bimukolele bua kutshilekela kena ne bua kutshioka to. (Misambu 86:5; 1 Yone 3:20) Wewe muikale ne lutatu elu, lomba Yehowa ne muoyo mujima bua akuambuluishe. Epuka malu adi mua kukufikisha ku dikala ne ngenyi mikoya, bu mudi ditangila malu a busenji, diabala anyi diateleja. Kuatshila muledi webe udi muena Kristo anyi mulunda mushindame udi unemeka mikenji ya Yehowa lutatu luebe elu. (Nsumuinu 1:8, 9; 1 Tesalonike 5:14; Tito 2:3-5) Manya ne: Yehowa udi umona muudi uditatshisha bua kushala mukezuke mu bikadilu ne udi wanyisha bualu ebu.—Misambu 51:17; Yeshaya 1:18.

▸ Nshapita wa 9, tshikoso tshia 9

Yehowa uvua muenze bua dibaka dikale pankatshi pa mulume umue ne mukaji umue. Mu Isalele wa kale Nzambi uvua muanyishile bantu balume bua kusela bakaji ba bungi, kadi ki mmuvuaye mulongolole malu ku ntuadijilu to. Lelu Yehowa kena wanyishila bantu bende bua kuikala ne bakaji ba bungi anyi balume ba bungi to. Mulume udi ne bua kuikala anu ne mukaji umue, ne mukaji pende udi ne bua kuikala anu ne mulume umue.—Matayi 19:9; 1 Timote 3:2.

▸ Nshapita wa 10, tshikoso tshia 12

Yehowa uvua musue bua mulume ne mukajende bashale pamue matuku abu onso a muoyo. (Genese 2:24; Malaki 2:15, 16; Matayi 19:3-6; 1 Kolinto 7:39) Udi wanyisha bua bantu bashipe dibaka diabu anu padi  umue wa kudibu muende masandi. Biobi bienzeke nunku, Yehowa udi upesha muena dibaka udi kayi ne bualu bukenji bua kusungula bikalaye musue kushipa dibaka.—Matayi 19:9.

Kudi misangu idi bena Kristo bakuabu bangate dipangadika dia kuabulukangana ne muena dibaka nabu nansha kayi muende masandi. (1 Kolinto 7:11) Muena Kristo udi mua kuabulukana ne muena dibaka nende mu nsombelu idi ilonda eyi:

• Dibenga kukumbaja majinga a bena mu dîku ku bukole: Mulume udi ubenga kukumbajila bena mu dîku majinga abu a bintu bia ku mubidi, bafika too ne ku didimona kabatshiyi ne makuta anyi biakudia.—1 Timote 5:8.

• Tshikisu tshikole: Muntu ukuma muena dibaka nende bifikisha udibu bakuma ku didimona mu njiwu.—Galatiya 5:19-21.

• Muntu uteka malanda a muena dibaka nende ne Yehowa mu njiwu mikole: Mulume anyi mukaji upangisha muena dibaka nende bua kutendelela Yehowa.—Bienzedi 5:29.

▸ Nshapita 11, tshikoso tshia 19

Tuetu bonso tutu tujinga bua batuele kalumbandi ne batukankamije. (Nsumuinu 12:25; 16:24) Tudi mua kukoleshangana ne kusambangana ne mêyi mimpe adi aleja mutudi banangangane. Mêyi a nunku adi mua kuambuluisha bena Kristo netu bua kunanukila ne kutungunuka ne kuenzela Yehowa mudimu nansha mu ntatu mikole. (Nsumuinu 12:18; Filipoyi 2:1-4) Muntu yeye mudiumvue mutekeshibue mu mikolo bikole, tudi ne bua kumuteleja ne kanemu konso ne kuteta bua kumvua mudiye umvua. Bualu ebu budi mua kutuambuluisha bua kumanya tshitudi mua kuamba anyi kuenza bua kumuambuluisha. (Yakobo 1:19) Difundila tshipatshila tshia kumanya bena Kristo nebe bimpe bua ufike ku dimanya bimpe tshidibu natshi dijinga. Dîba adi udi mua kubambuluisha bua kuyabu kudi Nzambi udi mpokolo wa busambi buonso ne dikankamija, kudibu mua kupetuluila bukole budibu nabu dijinga menemene.—2 Kolinto 1:3, 4; 1 Tesalonike 5:11.

▸ Nshapita wa 12, tshikoso tshia 16

Bible kena ne mikenji misunguluke bua mafesto a mabaka to. Bilele bia mudibu benza mabaka ne malu adi mikenji ya mbulamatadi ilomba bua kuenza mbishilangane bilondeshile muaba ne muaba. (Genese 24:67; Matayi 1:24; 25:10; Luka 14:8) Tshitupa tshinene tshia dituku dia dibaka mmutshipu udi bena dibaka benza kumpala kua Yehowa. Bantu ba bungi badi baselangana batu basue bua bena mu dîku diabu ne balunda babu bikalapu padibu benza mitshipu yabu ne batu basue bua mukulu abenzele muyuki wa dibaka muangatshila mu Bible. Bantu badi baselangana ke badi ne dîyi dia kuamba bua mushindu wikala difesto diabu dienzeka panyima pa muyuki, pikalabi ne: bavua balongolole bua kuenza difesto. (Luka 14:28; Yone 2:1-11) Nansha badi baselangana bobu balongolole difesto dia dibaka diabu mushindu kayi, badi ne bua kuenza bua dibaka diabu ditumbishishe Yehowa. (Genese 2:18-24; Matayi 19:5, 6) Mêyi manene a mu Bible adi mua kubambuluisha bua kuangata mapangadika mimpe. (1 Yone 2:16, 17) Badi baselangana bobu balongolole bua kupesha bantu maluvu mu difesto diabu, badi ne bua kuenza bua dilombodibue bimpe. (Nsumuinu 20:1; Efeso 5:18) Bobu balongolole mijiki anyi manaya kampanda, badi ne bua kuenza bua malu aa atumbishishe Yehowa. Bena Kristo badi baselangana badi ne bua kuimanyina pa malanda abu ne Nzambi ne abu bobu bine pamutu pa kutuma meji anu ku dituku dia dibaka.—Nsumuinu 18:22; bua kumanya malu makuabu a bungi, bala Tshibumba tshia Nsentedi tshia dia 15/10 2006, dibeji dia 18-31

▸ Nshapita wa 13, tshikoso tshia 18

Tudi basue kuangata mapangadika mimpe adi mimanyine mu mêyi manene adi mu Dîyi dia Nzambi. Tshilejilu, badi mua kubikila muena Kristo kudi muena dibaka nende udi kayi Ntemu wa Yehowa bua kudia pamue ne balela bende mu difesto dia bena pa buloba ebu. Wewe muikale mu nsombelu eu, newenze tshinyi? Kondo kebe ka muoyo koku kakuitabile bua kuya, udi mua kumvuija muena dibaka nebe ne: koku kuikale bilele bia bampangano tshikondo tshikalabu badia atshi, kuakubienza to. Udi kabidi ne bua kutangila ni bidi mua kulenduisha bantu bakuabu wewe muye bua kudia biakudia abi.—1 Kolinto 8:9; 10:23, 24.

Anyi mfumuebe wa mudimu udi mua kukupesha makuta a pa mutu anyi bintu tshikondo tshia Nowele ne Bunane. Neubenge anyi? Kuena anu mua kubenga musangu umue to. Dipangadika dia kuitaba anyi kubenga didi dilondeshila mudi mfumuebe wa mudimu umona bintu abi. Udi ubimona bu bia kusekelela nabi mafesto anyi? Peshi udi ukupeshabi anu bua kukuleja dianyisha? Kuelangana meji pa malu aa ne pa malu makuabu nekukuambuluishe bua kumona ni udi mua kuitaba anyi kubenga bidiye ukupesha.

Bidi mua kuenzeka nansha ne: muntu akupeshe tshintu mu tshikondo tshia Nowele ne Bunane ukuambila ne: “Ndi mumanye ne: kutu usekelela difesto edi to, kadi ndi musue kukupesha tshintu etshi.” Pamuapa muntu au mmusue anu kuleja mudiye muena malu mimpe. Ku lukuabu luseke, kudiku bualu budi mua kukufikisha ku diela meji ne: udi uteta ditabuja diebe anyi usua kukubueja mu disekelela dia mafesto au anyi? Wewe mumane kukonkonona bualu ebu, udi mua kudiangatshila dipangadika dia kuitaba dipa adi anyi kudibenga. Mu mapangadika onso atudi tuangata, tudi basue kuikala ne kondo ka muoyo kimpe ne kushala ne lulamatu kudi Yehowa.—Bienzedi 23:1.

▸ Nshapita wa 13, tshikoso tshia 22

Misangu ya bungi, padi bantu bajikija dikokangana lukasa mu ditalala, kadiena ne bualu bua kulua tshilumbu tshinene to. (Matayi 5:23-26) Bua bena Kristo bonso, bualu budi ne mushinga wa bungi mbua kuanji kutumbishisha Yehowa ne kulama buobumue bua tshisumbu.—Yone 13:34, 35; 1 Kolinto 13:4, 5.

Bena Kristo bobu bakokangana mu malu a midimu, badi ne bua kuajikija kabayi bakafundangana ku tubadi to. Mu 1 Kolinto 6:1-8 mudi mibelu ya mupostolo Paulo idi yakula bua bena Kristo badi ne bilumbu pankatshi pabu, kadi baya nabi ku tubadi. Kufunda muena Kristo netu ku tubadi kudi mua kuangatshisha Yehowa bibi ne tshisumbu kabidi. Mu Matayi 18:15-17 mbaleje malu asatu adi bena Kristo ne bua kulonda bua kujikija bilumbu binene bia dibandangana bu mudi dishiminyinangana dia malu anyi diibila. 1) Badi ne bua kuanji kuteta bua kujikija tshilumbu pankatshi pabu bobu nkayabu. 2) Biobi kabiyi biende, badi mua kulomba muena Kristo umue anyi babidi badi bakole mu nyuma bua  kubambuluisha. 3) Pashishe, biobi bikengedibua, badi mua kuya ne tshilumbu kudi bakulu. Malu wowu mafike mu tshipidi etshi, bakulu nebambuluishe bantu bonso badi mu tshilumbu atshi ne mêyi manene a mu Bible bua bafike ku dipetangana mu ditalala. Mu tshilumbu atshi muomu bantu badi kabayi basue kulonda mikenji ya mu Bible, bakulu badi mua kumona ne: mbikumbane bua kubalumbuluisha.

Kudi imue nsombelu idi mua kulomba bena Kristo bua kuya ne bilumbu ku tubadi. Tshilejilu, kudi mua kuikala tshilumbu tshidi tshitangila dishipa dia dibaka, bukenji bua kulama bana, makuta adi muntu mua kuikala upesha muena dibaka nende padi dibaka difua, dilomba makuta kudi kumpanyi kampanda utu walujilangana makuta padi njiwu yenzeka, dikuluka dia kumpanyi udi ne mabanza ebe, anyi padiku dikokangana bua mukanda wa bintu bidi mufue mushiye. Padi muena Kristo uya ku tubadi bua kujikija bilumbu bia nunku mu ditalala, kena wenza malu adi abengangana ne mibelu ya Paulo to.

Padiku tshilumbu tshinene bu mudi: kulala ne muntu ku bukole, kunyanga muana, kuela muntu mvita, kuiba muntu tshintu tshinene anyi bintu bia bungi, peshi kushipangana, dîba adi muena Kristo udi uya ne tshilumbu etshi kua mbulamatadi kena wenza malu adi abengangana ne mibelu ya Paulo to.

▸ Nshapita wa 14, tshikoso tshia 14

Katshia anu mu budimi bua Edene, Satana utu anu uteta kushima bantu. (Genese 3:1-6; Buakabuluibua 12:9) Mmumanye ne: yeye munyange lungenyi luetu, udi mua kutusaka ku dienza malu mabi. (2 Kolinto 4:4; Yakobo 1:14, 15) Udi wenza mudimu ne malu a tshididi, bitendelelu, bungenda, dipitshisha kapepe, tulasa, ne bintu bikuabu bia bungi bua kutungunuja ngelelu wende wa meji ne wenza bua amueneke bu muimpe.—Yone 14:30; 1 Yone 5:19.

Satana mmumanye ne: katshiena ne matuku a bungi bua kushima bantu to. Ke bualu kayi udi wenza muende muonso bua kupambuisha bantu ba bungi menemene. Mmusue nangananga kupambuisha aba badi benzela Yehowa mudimu. (Buakabuluibua 12:12) Tuetu katuyi badimuke, Diabolo udi mua kunyanga lungenyi luetu ku kakese ku kakese. (1 Kolinto 10:12) Tshilejilu, Yehowa mmusue bua dibaka dishale bua kashidi. (Matayi 19:5, 6, 9) Kadi bantu ba bungi lelu badi bamona dibaka  bu diumvuangana dia mu lupitapita didi mua kufua bipepele. Filme ya bungi ne ndongamu ya ku televizion bidi bitungunuja pabi lungenyi elu. Tudi ne bua kuenza bua mushindu udi bena panu bamona dibaka kawutunyangi to.

Mushindu mukuabu udi Satana uteta kutushima nkutungunuja lungenyi lua kudienzela malu. (2 Timote 3:4) Tuetu katuyi badimuke, tudi mua kupangila kanemu kudi bantu badi Yehowa muteke badi ne bukokeshi. Tshilejilu, muanetu wa balume udi mua kutuadija kubenga bulombodi bua bakulu mu tshisumbu. (Ebelu 12:5) Anyi muanetu wa bakaji udi mua kutuadija kuelesha mushindu udi Yehowa mulongolole malu bua bumfumu mu dîku mpata.—1 Kolinto 11:3.

Tudi ne bua kudisuika bua katulekedi Diabolo unyanga lungenyi luetu to. Kadi tudi basue kuidikija mushindu udi Yehowa wela meji ne kushala ‘bateke meji etu ku malu a muulu.’—Kolosayi 3:2; 2 Kolinto 2:11.

▸ Nshapita wa 16, tshikoso tshia 9

Tuetu bonso tutu basue kuikala ne makanda a mubidi ne kudiondopesha bimpe patudi tusama. (Yeshaya 38:21; Mâko 5:25, 26; Luka 10:34) Lelu eu, kudi mishindu ya bungi ya diondopangana ya kudi baminganga ne bantu bakuabu. Patudi tuangata dipangadika dia ngondapilu utudi mua kuitaba, mbimpe tulonde mêyi manene a mu Bible. Tudi tuvuluka ne: anu Bukalenge bua Nzambi ke buondopa bantu bua kashidi. Katuena basue kushala bimanyine pa makanda etu a mubidi bitufikisha ku dilengulula ntendelelu wa Yehowa nansha.—Yeshaya 33:24; 1 Timote 4:16.

Tudi ne bua kuikala ne budimu bua bungi bua kuepuka ngondapilu udi umueneka ne malu a bademon. (Dutelonome 18:10-12; Yeshaya 1:13) Nunku kumpala kua tuetu kuitaba ngondapilu kayi yonso, tudi ne bua kuenza makebulula bua kumanya malu adi masokome panyima pende ne lungenyi ludi ngondapilu au utungunuja. (Nsumuinu 14:15) Katupu muoyo ne: Satana mmusue kututeya bua kutubuejakaja mu malu a bademon. Nansha tuetu tuelakana tumona bu ne: ngondapilu kampanda udi mua kuikala mu diumvuangana ne malu a bademon, mbimpe tumuepuke.—1 Petelo 5:8.

▸ Nshapita wa 16, tshikoso tshia 18