Yezu wakamba ne: “Nenumanye bulelela, ne bulelela nebunupeshe budikadidi.” (Yone 8:32) Ela meji muuvua mumvue musangu wa kumpala uuvua mupete bulelela bua mu Bible! Bivua bikuenze disanka bua kumanya ne: nansha mu buloba budi mashimi matue mpokomba ebu, tudi mua kulonga bulelela.—2 Timote 3:1.

Yehowa Nzambi mmusue tumanye bulelela. Bu mutudi petu banange bantu, tudi basue kubamanyishabu. Kadi kuenzela Nzambi mudimu kudi kulomba malu a bungi. Tudi ne bua kuenza ne muetu muonso bua kuikala ne nsombelu wa buena Kristo bualu tudi tunemeka mêyi manene a Yehowa bikole. Yezu wakaleja mushindu munene utudi mua kujadikila Nzambi ne: tudi bamunange. Wakamba ne: “Nuenu nutumikila mikenji yanyi, nenushale mu dinanga dianyi, anu bu mundi mutumikile mikenji ya Tatu ne mushale mu dinanga diende.”—Yone 15:10.

Yezu mmunange Tatuende ne muoyo umue, ne udi wenza malu onso adi Tatuende umulomba bua kuenza. Tuetu bidikije Yezu mu malu atudi tuenza, Yehowa neatunange ne netuikale ne disanka dilelela. Anu muvua Yezu muambe, “nuenu bamanye malu aa, nudi ba diakalenga binuaenza.”—Yone 13:17.

Tudi batekemene ne: mukanda eu newukuambuluishe bua kulonga mua kutumikila bulelela bua mu Bible ne kulua mulunda wa Nzambi. Dijinga dietu ndia ne: ukoleshe dinanga diudi munange nadi Nzambi ne ushale “mu dinanga dia Nzambi . . . bua muoyo wa tshiendelele”—Yuda 21.