1-3. (a) Bantu ba bungi batu bumvua bishi bua midimu yabu? (b) Nkonko kayi ituandamuna mu nshapita eu?

PA BULOBA bujima bantu batu benza midimu mikole bua kudiambuluisha bobu ne mêku abu. Bantu ba bungi ki mbanange midimu idibu benza to, ne bakuabu bobu batu bumvua bibatonda dituku dionso edi bua kuya ku mudimu. Wewe umvua mushindu eu, ntshinyi tshiudi mua kuenza bua kunanga mudimu webe bikole? Ntshinyi tshiudi mua kuenza bua kupeta disanka dia kuenza mudimu?

² Yehowa udi utuambila ne: “Muntu yonso adie, anue ne apetele disanka mu mudimu wende wonso mukole. Ndipa dia kudi Nzambi.” (Muambi 3:13) Yehowa mmutufuke bua tumone ne: bikengela tuenze mudimu ne mmutufuke ne muoyo wa kuwenza. Mmusue bua tuikale ne disanka bua bitudi tuenza.—Bala Muambi 2:24; 5:18.

³ Mpindieu, ntshinyi tshidi mua kutuambuluisha bua kunanga mudimu wetu? Mmidimu ya mushindu kayi idi bena Kristo kabayi mua kuenza? Mmunyi mutudi mua kuenza midimu yetu ya bianza eku tuenzela Yehowa mudimu bimpe? Bua kujikija, mmudimu kayi mutambe bunene utudi mua kuenza?

4, 5. Mmunyi mutu Yehowa umona mudimu?

⁴ Yehowa muine utu munange mudimu. Genese 1:1  udi wamba ne: “Ku tshibangidilu Nzambi wakafuka diulu ne buloba.” Nzambi mumane kujikija kufuka buloba ne bintu bionso bidipu, wakamba ne: bintu bionso bivuaye mufuke bivua “bimpe be!” (Genese 1:31) Mufuki wetu uvua musanke bua bionso bivuaye muenze.—1 Timote 1:11.

⁵ Yehowa katu muanji kulekala kuenza mudimu to. Yezu wakamba ne: “Tatu wanyi mmutungunuke ne kuenza mudimu too ne mpindieu.” (Yone 5:17) Nansha mutudi katuyi bamanye malu mimpe onso adi Yehowa wenza, tudi bamanye amue a kudiwu. Utshidi wenda usungula bantu bakokesha ne muanende Yezu Kristo mu Bukalenge buende. (2 Kolinto 5:17) Yehowa mmuditue kabidi mu dilombola bantu ne mu dibatabalela. Mudimu wa diyisha pa buloba bujima udi wenza bua bantu bapite bungi bafike ku dimanya Yehowa ne bapete ditekemena dia muoyo wa tshiendelele mu mparadizu pa buloba.—Yone 6:44; Lomo 6:23.

6, 7. Yezu uvua muenji wa mudimu wa mushindu kayi?

⁶ Yezu mmunange mudimu anu bu Tatuende. Kumpala kua kuluaye pa buloba, uvua “muena mudimu mupiluke” wa Nzambi, umuambuluisha bua kufuka bintu bionso bidi mu diulu ne bidi pa buloba. (Nsumuinu 8:22-31; Kolosayi 1:15-17) Pavua Yezu pa buloba, wakatungunuka ne kuenza mudimu bikole. Ku bunsonga buende wakalonga bua kuikala muena mabaya mupiluke, pamuapa wenza bia mu nzubu, wibaka ne nzubu. Yezu wakapiluka mu mudimu wende bikole kufikaye too ne ku dimanyika bu “muena mabaya.”—Mâko 6:3.

⁷ Nansha nanku, mudimu mutambe bunene wa Yezu pa buloba uvua wa kuyisha lumu luimpe ne kulongesha bantu malu a Yehowa. Uvua ne bidimu bisatu ne tshitupa bua kujikija mudimu wende eu, ne uvua wenza mudimu bikole kubangila anu ku dinda too ne butuku.  (Luka 21:37, 38; Yone 3:2) Yezu uvua wenza ngendu mile mu njila ya mpuishi, wenda wambila bantu bavuaye upeta lumu luimpe.—Luka 8:1.

8, 9. Bua tshinyi Yezu uvua munange mudimu wende?

⁸ Bua Yezu, kuenza mudimu uvua Nzambi mumupeshe kuvua anu bu biakudia. Mudimu eu uvua umupesha bukole ne makanda. Kuvua matuku avua Yezu wenza mudimu bikole upanga too ne dîba dia kudia. (Yone 4:31-38) Uvua ubabidila mpunga yonso uvua umueneka bua kulongesha bantu malu a Tatuende. Ke bualu kayi wakambila Yehowa ne: “Ndi mukutumbishe pa buloba, mujikije mudimu uuvua mumpeshe bua kuenza.”—Yone 17:4.

⁹ Bidi bimueneka patoke ne: Yehowa ne Yezu batu benza mudimu bikole ne bumvua disanka bua mudimu udibu benza. Tudi basue ‘kulua bidikiji ba Nzambi,’ ne “kulonda mu makasa [a Yezu] bimpe menemene.” (Efeso 5:1; 1 Petelo 2:21) Ke bualu kayi tudi tuditatshisha bua kuenza mudimu bikole ne kudifila ne muoyo mujima mu bionso bitudi tuenza.

10, 11. Ntshinyi tshidi mua kutuambuluisha bua kuikala ne lungenyi luimpe bua mudimu wetu?

¹⁰ Tuetu batendeledi ba Yehowa tutu tuenza mudimu bikole bua kudiambuluisha tuetu ne mêku etu. Tudi basue kuikala ne disanka bua mudimu wetu, kadi ki mbipepele to. Nunku, ntshinyi tshitudi mua kuenza tuetu katuyi banange mudimu wetu?

¹¹ Ikala ne lungenyi luimpe. Pamuapa katuena ne mushindu wa kushintulula muaba utudi tuenzela mudimu anyi bungi bua mêba atudi tuwenza to, kadi tudi mua kushintulula lungenyi luetu. Tuetu bumvue tshidi Yehowa utulomba, bidi mua kutuambuluisha. Tshilejilu, Yehowa udi ulomba mfumu wa dîku bua kuenza muende muonso  bua kukumbaja majinga a bena mu dîku diende. Mu bulelela, Bible udi wamba ne: muntu udi kayi ukumbaja majinga a bena mu dîku diende “mmubi kupita muntu udi kayi ne ditabuja.” (1 Timote 5:8) Wewe muikale mfumu wa dîku, udi wenza mudimu bikole bua kukumbaja majinga a bena mu dîku diebe. Nansha wewe munange mudimu uudi wenza anyi kuyi muwunange, udi mumanye ne: paudi ukumbaja majinga a bena mu dîku diebe udi usankisha kabidi Yehowa.

12. Mmunyi mudi kuenza mudimu ne tshisumi ne kuikala bena bululame kutuambuluisha?

¹² Ikala muenji wa mudimu ne muena bululame. Ngikadilu eyi idi mua kukuambuluisha bua kunanga mudimu webe. (Nsumuinu 12:24; 22:29) Bualu bua mushinga, mfumuebe wa mudimu neikale ukueyemena. Bamfumu ba midimu batu banange bena mudimu badi ne bululame bualu kabakuiba makuta, bintu bia ku mudimu, anyi kudia dîba dia mudimu to. (Efeso 4:28) Kadi bualu budi bupite ebu mbua ne: Yehowa mmumanye paudi wenza mudimu ne tshisumi ne paudi muena bululame. Newikale ne “kondo ka muoyo kalulame” bualu udi mumanye ne: udi usankisha Nzambi uudi munange.—Ebelu 13:18; Kolosayi 3:22-24.

13. Mbualu kayi bukuabu budi mua kuenzeka tuetu ne bululame ku mudimu?

¹³ Manya ne: malu audi wenza ku mudimu adi mua kutumbishisha Yehowa. Bualu ebu budi buenza bua tusanke ne mudimu wetu. (Tito 2:9, 10) Bidi nansha mua kuenzeka bua umue wa ku bena mudimu benu ajinge kulonga Bible anu bua tshilejilu tshiebe tshimpe.—Bala Nsumuinu 27:11; 1 Petelo 2:12.

14-16. Mmalu kayi atudi ne bua kutangila patudi tusungula mudimu?

¹⁴ Bible kena wakula bua midimu yonso idi muena  Kristo mua kuenza anyi kayi mua kuenza to. Kadi udi ne mêyi manene adi mua kutuambuluisha bua kuangata mapangadika mimpe bua mudimu. (Nsumuinu 2:6) Ku diambuluisha dia mêyi manene a mu Bible, tudi mua kudiela nkonko idi ilonda eyi

¹⁵ Mudimu eu neundombe bua kuenza bualu budi Yehowa umona ne: mbubi anyi? Tukadi balonge malu adi Yehowa mukine, bu mudi kuiba ne kushima. (Ekesode 20:4; Bienzedi 15:29; Efeso 4:28; Buakabuluibua 21:8) Ke bualu kayi tuikale ne budimu bua kubenga mudimu  wonso udi ubengangana ne mikenji ya Nzambi.—Bala 1 Yone 5:3.

¹⁶ Mudimu eu udi utua bualu budi Yehowa ubenga nyama ku mikolo peshi ubutungunuja anyi? Tshilejilu, fuanyikijabi ne: udi mupete mudimu wa kuikala wakidila bantu ku lupitadi lua ditudishangana mafu. Ki mbibi bua kuenza mudimu wa kuakidila bantu to. Kadi udi mumanye mutu Yehowa umvua bua ditula mafu ku bukole. Nanku nansha muudi wewe kuyi utudishangana mafu, kuena umona ne: ku mêsu kua Yehowa udi pebe ne tshilumbu anyi?—Ekesode 21:22-24.

17. Tudi mua kuenza tshinyi bua kuangata mapangadika adi asankisha Nzambi?

¹⁷ Tuetu tukonkonona mêyi manene a Nzambi, netuikale bu bantu badibu bakuile mu Ebelu 5:14 “badi ne bieledi biabu bia meji bia kujingulula nabi malu bibidija, padibu bakuata nabi mudimu, bua kutapulula tshidi tshimpe ne tshidi tshibi.” Diebeja ne: ‘Meme muenze mudimu eu, bantu bakuabu nebalenduke anyi? Mudimu eu neundombe bua kushiya muena dibaka nanyi ne bana banyi bua kuya mu ditunga dikuabu anyi? Diumbuka dianyi nedibenzele tshinyi?’

18. Bua tshinyi bidi mua kutukolela bua kuteka ntendelelu wetu pa muaba wa kumpala?

¹⁸ Bidi mua kutukolela bua kuteka ntendelelu wa Yehowa pa muaba wa kumpala mu “bikondo bia malu makole bidi bikole mua kupita nabi” ebi. (2 Timote 3:1) Mbikole bua kupeta mudimu ne kuwulama. Bidi bikengela tukumbaje majinga a bena mu dîku dietu, kadi tudi bamanye ne: ntendelelu wetu ke udi pa muaba wa kumpala. Katuena mua kulekela bintu bia ku mubidi bilua ne mushinga wa bungi mu nsombelu wetu to. (1 Timote 6:9, 10) Nunku  mmunyi mutudi mua “kumanya malu adi ne mushinga wa bungi,” eku tukumbajila bena mu mêku etu majinga abu?—Filipoyi 1:10.

19. Mmunyi mudi kueyemena Yehowa kutuambuluisha bua kuikala ne nkatshinkatshi bua mudimu?

¹⁹ Eyemena Yehowa mu malu onso. (Bala Nsumuinu 3:5, 6.) Tudi bamanye ne: Nzambi mumanye tshionso tshitudi natshi dijinga ne udi ututabalela bikole menemene. (Misambu 37:25; 1 Petelo 5:7) Dîyi diende didi dituambila ne: “Nsombelu wenu kikadi wa dinanga dia makuta, kadi nusanke ne bintu binudi nabi. Bualu [Nzambi] mmuambe ne: ‘Tshiakukushiya nansha kakese, tshiakukulekela nansha kakese.’” (Ebelu 13:5) Yehowa ki mmusue bua tuikale anu tusamisha mutu bua mushindu wa kukumbajila bena mu dîku dietu majinga abu to. Ukadi muleje misangu ne misangu ne: udi mua kukumbajila batendeledi bende majinga abu. (Matayi 6:25-32) Nansha tuetu ne mudimu wa mushindu kayi, tuikale anu ne tshibidilu tshia kulonga Dîyi dia Nzambi, kuyisha lumu luimpe, ne kubuela mu bisangilu.—Matayi 24:14; Ebelu 10:24, 25.

20. Tudi mua kuenza tshinyi bua kuikala ne nsombelu mupepele?

²⁰ Dîsu diebe dimone bimpe. (Bala Matayi 6:22, 23.) Bualu ebu budi bumvuija kuikala ne nsombelu mupepele bua kuteka mudimu wa Yehowa pa muaba wa kumpala. Tudi bamanye ne: netuikale bapote tuetu balekele makuta, nsombelu wa kantu ku bianza, tuamu tutshidi tupatukilaku bilua ne mushinga wa bungi kutudi kupita malanda etu ne Nzambi. Nunku ntshinyi tshiatuambuluisha bua kuteka bualu ne bualu pa muaba wabu? Tudi ne bua kuenza ne muetu muonso bua kubenga kubuela mabanza. Bituikala tukadi babuele mabanza, tukebe tshidi tshikengela kuenza bua kuakepesha anyi kuafuta. Tuetu katuyi badimuke, bintu bia ku mubidi bidi mua kutudia dîba ne makanda etu, tupangila dîba dia kusambila, dia kulonga, anyi dia  kuyisha. Pamutu pa tuetu kulekela bintu bia ku mubidi bikutakaja nsombelu wetu, tudi basue kulonga mua kusanka ne bintu bidi ne bualu bu mudi “biakudia ne bilamba.” (1 Timote 6:8) Nansha nsombelu wetu muikale mushindu kayi, mbimpe tuikale tumukonkonona ku musangu ne ku musangu bua kumona mutudi mua kuvudija mudimu utudi tuenzela Yehowa.

21. Bua tshinyi tudi ne bua kusungula malu adi ne bua kuikala pa muaba wa kumpala mu nsombelu wetu?

²¹ Ikala mumanye malu adi ne mushinga. Bidi bikengela tuikale ne meji bua malu atudi tuenza ne dîba dietu,  makanda etu, ne bintu bitudi nabi. Tuetu katuyi badimuke, malu adi ne mushinga mushadile bu mudi tulasa anyi makuta nebitudie dîba ditudi katuyi mua kunaya nadi to. Yezu wakamba ne: “Tungunukayi ne kukeba tshia kumpala Bukalenge.” (Matayi 6:33) Malu atudi tusungula bua kuenza, bibidilu bietu, malu atudi tuenza dituku dionso, ne malu atudi tuipatshila bidi bileja buonso buabi malu adi ne muaba wa kumpala mu mioyo yetu.

22, 23. (a) Mmudimu kayi mutambe bunene utudi nawu tuetu bena Kristo? (b) Ntshinyi tshiatuambuluisha bua kunanga mudimu wetu?

²² Bualu butambe bunene butudi mua kuenza nkuenzela Yehowa mudimu. Umue wa ku mishindu minene itudi tuenza nunku nkuyisha bantu bakuabu lumu luimpe. (Matayi 24:14; 28:19, 20) Anu bu Yezu, tudi basue kuenza tshionso tshitudi mua kuenza mu mudimu eu. Bantu bakuabu mbaye miaba idibu dijinga ne bamanyishi ba bungi. Bakuabu bobu mbalonge miakulu mikuabu bua kuyisha bantu batu bakula muakulu au. Yukila ne bantu bakadi benze malu aa, ne ubele nkonko. Nebakuambile muvua nsombelu wabu mulue wa disanka ne wa nsongo kupita kumpala.—Bala Nsumuinu 10:22.

²³ Lelu bantu ba bungi ba kutudi badi badimona benzejibue bua kuenza mudimu mêba a bungi anyi kuenza midimu ya bungi anu bua kukumbajila bena mu dîku diabu majinga abu manene. Yehowa mumanye bualu ebu, ne udi wanyisha malu onso atudi tuenza bua kutabalela dîku dietu. Nunku tutungunukayi ne kuidikija Yehowa ne Yezu pa kuenza mudimu bikole nansha wowu wa mushindu kayi. Tuvulukayi kabidi ne: mudimu wetu mutambe bunene nkuenzela Yehowa mudimu ne kuyisha lumu luimpe lua Bukalenge bua Nzambi. Kuenza nunku nekutupeteshe disanka dilelela.