1. Ntshinyi tshitudi ne bua kuenza bua kusankisha Nzambi?

 BUA kudia bulunda buimpe ne bushême ne Nzambi, tudi ne bua kutapulukangana kashidi ne tshitendelelu tshia dishima. Tudi ne bua kuikala mu tshitendelelu tshilelela. Ke tshidi bantu miliyo ya bungi pa buloba bujima benza lelu’eu.

2. Mmuaba kayi uudi mua kusangana Bantemu ba Yehowa, ne mmudimu kayi udibu benza?

² Anu muvua Bible mumanyishe, batendeledi balelela badi benza “tshisumbu tshinene” tshidi tshifumina “munkatshi mua ditunga dionso, ne munkatshi mua bisamba bionso, ne bantu bonso ne miaku yonso.” (Buakabuluibua 7:9) Mu matunga 235, Bantemu ba Yehowa miliyo mivule badi bambuluisha ne tshisumi tshionso bantu nabu bua bamanye malu adi atangila njila ya Nzambi ya dinanga ne malu adiye ulomba.

3. Bantemu batu batendelela nganyi, ne nntendelelu ya mushindu kayi idibu bepuka?

³ Bantemu ba Yehowa mbamanye ne: anu Yehowa nkayende ke wa kutendelela. Kabena bitaba bua kunemekela mpingu anyi bimfuanyi bia malu a Nzambi nansha. (1 Yone 5:21) Kabena banemekela bafue pa kutshishila pambelu mu madilu anyi benza mikuabu mikiya idi ilonda malongesha a dishima ne “mayisha a bademon.” (1 Timote 4:1) Kadi, badi basamba bena wabu udi mufue pa kubumvuija dilaya dia Nzambi dia ne: nekuikale dibishibua dia bafue mu mparadizu pa buloba.​—Yone 5:28, 29; Bienzedi 24:15.

4. Mmunyi mudi bantu ba Nzambi bangata majimbu?

⁴ Bantemu kabatu benza majimbu nansha, kabatu balowangana anyi bapakisha manga to; bualu mbamanye ne: bintu ebi mbia kudi Diabolo. Kabena beyemena majimbu bua abakube, kadi badi beyemena Yehowa ne muoyo mujima.​—Nsumuinu 18:10.

5. Mmu mushindu kayi mudi Bantemu ba Yehowa kabayi bena malu‘malu a pa buloba’?

⁵ Yezu wakamba ne: bayidi bende kabavua ne bua kuikala ‘ba pa buloba’ to. (Yone 17:16) Yezu muine kakitaba bua kubuela mu malu a tshididi a mu matuku atshivuaye pa buloba nansha. (Yone 6:15) Bia muomumue, Bantemu kabena babuela mu malu a tshididi, badifila mu dinanga dinekesha dia ditunga diabu, ne kabena bafuilakana milongo [ta mianzu] ya panuapa. Kadi, nansha nanku batu bafuta bitadi ne batumikila mikenji ya mu matunga mudibu.​—Yone 15:19; Lomo 13:1, 7.

6. Mmikenji kayi idi basadidi ba Nzambi batumikila bua bidi bitangila mabaka ne difua diawu?

⁶ Bu mudibu batumikila mikenji ya mbulamatadi, Bantemu batu bafundisha mabaka abu ku mikanda ya kua mbulamatadi. (Tito 3:1) Bu mudibu batumikila mêyi a Nzambi, badi basela anu mukaji umue. (1 Timote 3:2) Kabidi, bu mudibu batumikila mikenji ya mu Bible mu nsombelu wabu, mabaka abu atu afua anu mu mpukapuka.

7. Mmunyi mudi Bantemu balejangana dinanga?

⁷ Bantemu mbanangangane. Dinanga edi ne dinanga diabu dia Nzambi didi dibasangisha mu buobumue bu bana ba muntu, nansha mudibu bafumine mu bisamba ne matunga bishilashilangane. Padi bipupu bibakuata anyi malu makole abamuenekela, Bantemu kabatu bajingakana bua kuambuluishangana to. Badi baleja dinanga ku nsombelu wabu.​—Yone 13:35.

8. Mbienzedi kayi bibi bidi bantu ba Nzambi bepuka?

⁸ Bantu ba Yehowa badi benza muabu muonso bua kuikala bena malu malelela ne majalame mu nsombelu wabu. Badi bepuka diba, dishima, tshiendenda, dikuatshika dia maluvu ne diibila mu malu a bungenda-mushinga. Balume kabatu bakuma bakaji babu. Bangabanga ne kuluabu Bantemu, bamue bavua benza malu aa, kadi ne diambuluisha dia Yehowa bakaalekela. Ku mêsu kua Nzambi ‘mbatokeshibue.’​—1 Kolinto 6:9-11, Muanda Mulenga Lelu.

9. Mukanda mukuabu wakamba tshinyi bua bidi bitangila bitendelelu bia nyuma bia mu Afrike?

⁹ Bushuwa, bitendelelu bia bungi bidi bia  mba mudibi ne bulelela. Bidi bileja malu manene adibi bienza bua kujadikila bantu ne: bidi ne bulelela. Tshilejilu, bua bidi bitangila bitendelelu bia mu Afrike bidibu babikila ne: mbia nyuma, mukanda mukuabu udi wamba ne: “Muaba wa bena majimbu anyi bapakidianganyi ba mitshi mbawangate kudi [tusumbu tupiatupia tua bena Kristo]. . . . Badi bamba mudibu bamanyisha malu atshilualua ne benza bishima. Baprofete badimu badi bamona bikena-kumona ne bumvuija bilota. Badi benza mudimu ne mâyi mabenesha, mafuta masambidila, butu, tundeya ne misenga ya tumonya bua kuondopa ne kudikuba ku masama.”

10, 11. Bua tshinyi bidibu bangata bu bishima bidi bantu benza lelu’eu kabiena bileja ne: tshitendelelu kampanda ntshianyishibue kudi Nzambi?

¹⁰ Bena mu bitendelelu ebi badi bamba ne: bishima ebi bidi bileja ne: Nzambi udi ubabenesha. Kadi bishima bine bidibu bamba kabiena bijadika ne: Nzambi mmuanyishe tshitendelelu atshi nansha. Satana udi upesha bamue batendeledi ba dishima bukole bua kuenza ‘malu a kukema.’ (2 Tesalonike 2:9) Kabidi Bible uvua mumanyishe ne: dipa dia bishima dia kudi Nzambi, bu mudi: dia buprofete, diakula miakulu mikuabu, dimanya dia pa buadi, bivua bionso ne bua ‘kushikila.’​—1 Kolinto 13:8.

¹¹ Yezu wakatudimuija ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza mutu Tatu wanyi wa mu diulu musue. Dituku adi bantu ba bungi nebangambile ne: Mukalenge, Mukalenge, katuena bambile bantu bualu buebe mu dîna diebe anyi? Katuena bumushe ba-demon mu dîna diebe anyi? Katuena benze malu a kukema a bungi mu dîna diebe anyi? Dituku adi nembambile ne: Tshiakunumanya; umukayi kundi, nudi benji ba malu mabi.’​—Matayo 7:21-23.

12. Mbanganyi babuela mu Bukalenge bua mu diulu?

¹² Nenku, mbanganyi babuela mu Bukalenge bua mu diulu? Ngaba badi benza disua dia Yehowa.

13. Mmudimu kayi udi Nzambi mulombe bantu bende bua kuenza lelu’eu, ne mbanganyi badi bawenza?

¹³ Ntshinyi tshidi disua dia Nzambi bua bantu bende lelu? Yezu wakamba ne: ‘Nebambile bantu bonso ba pa buloba lumu luimpe elu lua Bukalenge buanyi, neluikale tshimanyishilu ku bisamba bionso.’ (Matayo 24:14) Eu ke mudimu udi Bantemu ba Yehowa benza basuminyine.

14. Bukalenge bua Nzambi ntshinyi, ne nganyi wabulombola?

¹⁴ Bantemu ba Yehowa badi bambila ‘bantu bonso ba pa buloba’ bujima ne: Bukalenge bua Nzambi ke mbulamatadi wa mu diulu wakokesha buloba bujima mu buakane. Badi balongesha ne: Yehowa mmuteke Yezu Kristo Mukalenge wa Bukalenge abu pamue ne bena diende 144 000 badibu basungule munkatshi mua bantu ba pa buloba.​—Danyele 7:14, 18; Buakabuluibua 14:1, 4.

15. Bukalenge bua Nzambi nebubutule tshinyi?

¹⁵ Bantemu badi bangata Bible bua kuleja bantu nabu ne: Bukalenge bua Nzambi nebubutule bulongolodi bua malu bua Satana buonso nkong. Tshitendelelu tshia dishima ne malongesha atshi onso adi apuekeshisha Nzambi milongo ne atumbisha Diabolo nebibutuke butubutu! (Buakabuluibua 18:8) Mbulamatadi yonso ya bantu idi yenza malu mabengangane ne disua dia Nzambi neyibutuke payi!​—Danyele 2:44.

16. Mbanganyi bakokeshabu kudi Kristo Yezu, ne nebasombele penyi?

¹⁶ Bantemu ba Yehowa badi kabidi bamanyisha ne: Kristo Yezu neenzele bantu badi bakumbaja tshidi Nzambi ubalomba malu malenga a dikema. Nebikale bantu ba mu Bukalenge buende pa buloba ebu. Bible udi ulaya ne: ‘Bualu bua neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi.’​—Musambu 72:12, 13.

17. Mbanganyi badi bayisha Bukalenge bua Nzambi nkayabu?

¹⁷ Kakuena tshikuabu tshisumbu tshia bantu badi benza disua dia Nzambi pa kuyisha lumu luimpe lua Bukalenge. Anu Bantemu ba Yehowa ke badi bayisha Bukalenge bua Nzambi pa buloba bujima.