TSHITUPA TSHIA 9
Tshitendelelu tshilelela netshikuambuluishe bua kashidi!
1. Ntshinyi tshiatufikila tuetu ‘basemene pabuipi ne Nzambi’?
YEHOWA mmunange bantu badi bamukuatshila mudimu. Wewe muikale utendelela Yehowa, neakubeneshe mpindieu ne mu matuku atshilualua. Bible udi wamba ne: ‘Semenayi pabuipi ne Nzambi ne yeye neasemene pabuipi nenu.’—Yakobo 4:8.
2. Mmunyi mutudi mua kusemena pabuipi ne Nzambi, ne bidi mua kuenzela masambila etu tshinyi?
2 Bua kusemena pabuipi ne Nzambi, udi ne bua kulonga ne kutumikila Dîyi diende. Paudi usambila biumvuangane ne disua diende, Yehowa neateleje masambila ebe ne neaandamune. Mupostolo Yone wakafunda ne: “Tudi tutekemena muetu muonso kudi [Nzambi], bualu tudi bajadike ne: [Nzambi] neatuteleje, patuikala bamulombe tshintu tshidi tshiumvuangana ne disua diende. Nanku bu mutudi bamanye ne: udi ututeleja patudi tumulomba, tudi bamanye kabidi ne: neatupeshe bitudi tumulomba.”—1 Yone 5:14, 15, MMV.
3-7. Mmunyi mutudi mua kupeta meji adi afuma kudi Nzambi, ne mmunyi mudiwu mua kutuambuluisha?
3 Kabidi, paudi usemena pabuipi ne Nzambi, neakupeshe meji adi mua kukukuatshisha mu malu a dituku dionso. Bible udi wamba ne: ‘Kadi biapanga mukuabu wenu meji, aalombe kudi Nzambi.’—Yakobo 1:5.
4 Mmunyi mudi meji a kudi Nzambi mua kukuambuluisha? Adi mua kukuambuluisha bua kumanya malu adi kaayi asankisha Yehowa. Udi kabidi mua kumanya bua tshinyi malu aa mmabi ne tshiudi mua kuenza bua kuepuka malu aa. Dimanya dia nunku didi mua kukukuba ku ntatu ya bungi idi ikuata bantu bonso. Tshilejilu, ditumikila mubelu wa Nzambi wa kuikala ne bikadilu bilenga didi dikuba bantu ba Nzambi ku dimita mafu a panshi, kupia masama a mu bilamba, kubepula ku mabaka a bilumbu anyi difua diawu mene.
5 Ntshinyi tshikuabu tshidi meji a kudi Nzambi mua kukuenzela? Adi mua kukuambuluisha bua kumona bilengele mu nsombelu webe. Adi mua kukuambuluisha bua kuangata mapangadika a meji mu malu kampanda masunguluke, bu mudi mushindu muimpe wa kutula makuta ebe. Neumanye mua kudifundila bipatshila biakanyine ne kulekela bidi kabiyi ne mushinga menemene.
6 Meji adi afuma kudi Nzambi adi kabidi mua kukuambuluisha mu malanda ebe ne bakuabu. Nsombelu webe wa mu dîku neikale wa muimpe. Udi mua kudia ne bakuebe bulunda bua menemene budi mua kushala tshikondo tshile, kabidi badi mua kutuadija kukunemeka nansha kudi bantu badi kabayi batendelela Nzambi.
7 Bualu bukuabu, kuikala ne meji adi afumina kudi Nzambi nekulengeje mmuenenu webe wa malu. Nekukuambuluishe bua kumanya mua kupita ne ntatu ne malu adi atekeshangana mu mikolo. Newikale kabidi ne mmuenenu wa meji muimpe pa bidi bitangila malu atshilualua. Mmuenenu mulenga wa malu pende, neakuambuluishe bua kuikala bimpe mu lungenyi ne kuikala ne makanda a mubidi makane.—Nsumuinu 14:30; Yeshaya 48:17.
8. Wewe muikale usadila Nzambi, ntshinyi tshiudi kuyi mua kutshina?
8 Wewe muikale wenzela Nzambi mulelela mudimu, kuakuikala kabidi ne buôwa budi butatshisha bantu badi kabayi bamusadila to. Bu muudi mumanye ne: bafue kabena ne muoyo mu nkita, kuakubatshina to. Ne bu muudi mueyemene dilaya dia Nzambi dia kubisha bafue, kuakutshina bua kufua nansha. Bu muudi mumanye kabidi se: Nzambi udi wa bukole buonso, kuakutshina bena mupongo ne bampaka-manga to.—Yone 8:32.
Bantu bakane nebapiane buloba
9-11. Mbanganyi bikala mu Mparadizu, ne mbanganyi bapangila kuikalamu?
9 Wewe mudie malanda mimpe ne Nzambi, kuakutshina malu atshilualua nansha. Anu bu mutukadi bamone, Bible ukavua mumanyishe ntatu ya bungi itudi tumona pa buloba lelu’eu. Yehowa udi utuambila ne: malu aa adi anu bua tshikondo tshîpi; matuku makese kumpala eku, Bukalenge bua Nzambi nebuvuije buloba ebu mparadizu.—Luka 21:10, 11, 31; 23:43.
10 Anu aba badi bashemeja malanda ne Yehowa ne bamuenzela mudimu ke bikala ne muoyo mu Mparadizu. Bible udi wamba ne: ‘Tshitupa tshîpi katshiyi tshianji kulepa, muntu mubi kêna wikalaku kabidi; e, neukebe kumona muaba wende ne disuminyina, kêna wikalaku. Kadi badi ne mitshima mipuekele nebapiane buloba, mioyo yabu neyisanke mu ditalala dikumbane.’—Musambu 37:10, 11.
11 Bantu badi benza mutu mukole, babenga bua kutumikila mikenji miakane ya Nzambi nebajimije mioyo yabu bua kashidi. (2 Tesalonike 1:8, 9) Kabakuikalaku kabidi to. Nebalonde Satana ne ba-demon bende mu lufu lua tshiendelele. (Buakabuluibua 20:10, 14) Kadi bantu badi balonga mua kumanya Yehowa ne bamukuatshila mudimu nebapete masanka a dikema mu Mparadizu pa buloba.
Malu malengele mu matuku atshilualua
12. Bible udi wamba tshinganyi bua bidi bitangila matuku atshilualua?
12 Yehowa mmulongoluele bantu badi bamunange bintu bilenga! Anji monabi tshidi Dîyi diende diamba bua bidi bitangila muoyo mu Mparadizu pa buloba:
-
Biakudia bia bungi: ‘Blé [biakudia] neikale mivule pa buloba, too ne pa mitu pa mikuna.’—Musambu 72:16.
-
Nzubu mimpe: ‘Nebase nzubu, nebashikamemu.’—Yeshaya 65:21.
-
Mudimu udi usankisha: ‘Bantu bangakasungula nebasanke musangu mule mu mudimu wa bianza biabu. Kabena bakuata mudimu wabu patupu.’—Yeshaya 65:22, 23.
-
Masama kaakuikalaku: ‘Muena musoko kêna wamba ne: ndi ne disama.’—Yeshaya 33:24.
-
Bulema kabuakuikalaku: ‘Mu dituku adi mêsu a mufofo neatabale, matshi a badi ne mapapa neajikuke. Mu dîba adi muntu mulema neatupike bu ngulungu, ludimi lua kamama neluimbe misambu.’—Yeshaya 35:5, 6.
-
Kakuakuikala bisama, kanyinganyinga, ne lufu: ‘[Nzambi] neakupule tshinsonji tshionso ku mêsu kuabu, ne lufu kaluena luikalaku kabidi, madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’—Buakabuluibua 21:4.
-
Mvita kayakuikalaku: ‘[Nzambi] udi ulekesha mvita bua ijike too ne ku mfudilu kua buloba.’—Musambu 46:9.
-
Muoyo wa tshiendelele: ‘Bantu bakane nebapiane buloba, nebashikamemu tshiendelele.’—Musambu 37:29.
13. Nnganyi udi yeye nkayende ne bukokeshi bua kuvuija buloba ebu mparadizu, ne mbua tshinyi?
13 Bantu kabena mua kukokesha bua kuenza malu onso aa to, kadi Yehowa yeye udi ne bukokeshi bua kuenza tshionso tshidiye umanyisha bua kuenza. Kakuena tshidi mua kumupangisha bua kuenza tshionso tshidiye musue kuenza to. Bible udi wamba ne: “Kakuena tshidi mua kukolela [Nzambi].”—Luka 1:37, MMV.
14. Mmunyi muudi mua kubuela mu njila udi ufikisha ku muoyo wa tshiendelele?
14 Ku diambuluisha dia Bantemu bende, Yehowa udi upetesha bantu bonso miaba yonso idibu mushindu wa ‘kubuela ku mushiku wa mbelu mubumbakane’ ne kuendela mu njila udi ufikisha ku muoyo wa tshiendelele. Tudi tukulomba bua wikale mu bantu badi bitaba lubila elu ne disanka ku muoyo. Bua tshinyi kubenga kulonda ntendelelu mulelela ne kupeta mabenesha a Yehowa bua kashidi tshiendelele?—Matayo 7:13, 14.