LUKONKO 3
Mmunyi mundi mua kuyukila ne baledi banyi?
NTSHINYI TSHIUDI MUA KUENZA?
Fuanyikija bualu ebu: Tudi mu Disatu butuku. Geoff udi ne bidimu 17 ukadi mujikije midimu idibu bamupeshe ne udi ujinga bua kujikija lutetuku. Udi utemesha televizion ne udiolola mu nkuasa wende utuye munange.
Diakamue, Papa wende udi ubuela mubungame.
“Geoffrey! Bua tshinyi udi ujimija dîba ku televizion pamutu pa kuambuluisha muakunyebe ne midimu yende ya mu kalasa? Kutu wenza tshitubu bakuambila to!”
Geoff udi unungana dîyi diumvuika wamba ne: “Biatuadiji, bidi anu nunku.”
Papa wende udi usemena, umuebeja ne: “Udi wamba tshinyi?”
Geoff usodia, unyanga ku mêsu, wamba ne: “Papa, ki ntshintu to.”
Papa wende udi ufika munda bikole. Udi umukanyina umuambila ne: “Tshiena musue wakule nanyi ne dîyi dia mushindu au to!”
Bu wewe muikale Geoff, tshiuvua mua kuenza ntshinyi bua kubenga kukokangana?
ANJI ELA MEJI!
Kuyukila ne baledi bebe kudi bu kuendesha mashinyi. Wewe mupete bakanga njila, udi ukeba njila mukuabu.
TSHILEJILU:
Leah udi wamba ne: “Bitu binkolele bua kuyukila ne tatuanyi. Imue misangu, ntu ntuadija kumulondela bualu, kadi pashishe ulua kungambila ne: ‘Mfuila luse, uvua undondela meme anyi?’”
LEAH UDI NE NGENYI ISATU YA KUSUNGULA.
-
Kuela papa wende mbila.
Leah udi wela dîyi wamba ne: “Papa! Nteleja! Bualu ebu budi ne mushinga!”
-
Kubenga kuyukila ne papa wende.
Leah udi ubenga kuambila papa wende bualu budiye nabu.
-
Kuindila tshikondo tshimpe bua kubuyukila kabidi.
Leah udi uyukila ne papa wende pashishe, anyi umufundila bualu buende mu mukanda.
Wewe udi mua kuambila Leah bua kusungula tshinyi?
MANYA NE: Tatuende wa Leah udi mu ditanaji ne ki mmumanye ne: tshidiye muenze ntshitonde muanende to. Leah yeye musungule Lungenyi lua A, tatuende kakumvua tshidiye umuelela mbila. Kuenza nunku kudi mua kuenza bua tatuende abenge kumuteleja, ne kudi kuleja mudiye kayi umunemeka anyi umupesha bujitu. (Efeso 6:2) Bulelela, lungenyi elu kaluena mua kubambuluisha to.
Anu muudi kuyi musue bua njila udibu bakange akupangishe bua kuya kuudi uya, keba mushindu wa kumvuangana ne baledi bebe
Kusungula Lungenyi lua B kudi mua kuikala kupepele, kadi ki njila wa meji to. Bua tshinyi? Bualu, bua Leah kujikija ntatu idiye nayi, udi ne bua kuyukila ne tatuende, ne bua tatuende kumuambuluisha, udi ne bua kumanya malu adi Leah nawu. Kupuwa kakuena kujikija tshilumbu to.
Leah yeye musungule Lungenyi lua C, kakulekela bua tshidi tatuende muenze tshimupangishe bua kuyukilabu to. Kadi udi udienzeja bua kuyukila nende dîba dikuabu. Leah yeye musungule bua kufundila tatuende, udi mua kupeta disulakana pa lukasa.
Kufunda mukanda kudi kabidi mua kumuambuluisha bua kumvuija bimpe tshidiye musue kuamba. Padi tatu ubala mukanda, neamanye tshivua muanende ujinga kumuambila, ebi nebimuambuluishe bua kumvua bimpe lutatu luende. Nunku, kusungula lungenyi lua C kudi kuambuluisha Leah ne tatuende. Nansha bobu bayukile anyi mumufundile mukanda, lungenyi elu ludi lupetangana ne mubelu wa mu Bible wa ne: “Tuipatshilayi malu adi afila ditalala.”—Lomo 14:19.
Nngenyi kayi mikuabu idi Leah mua kusungula?
Tangila ni udi mua kupeta lungenyi lukuabu, lufunda muaba udibu bakulongoluele. Pashishe funda tshipeta tshialu.
AKULA MU MUSHINDU UDIBU MUA KUKUMVUA BIMPE
Manya ne: baledi bebe kabatu misangu yonso bumvua biudi wamba anu muuvua mubiambe amu to.
TSHILEJILU:
Baledi bebe badi bakuebeja bua kumanya bua tshinyi udi mubungame. Udi wandamuna ne: “Tshiena mumvue bua kuakula to.”
Kadi bobu badi bumvua bu udi wamba ne: “Tshiena nnueyemena to. Nembuambile balunda banyi, tshiena nnuambila nuenu to.”
Ela meji ne: udi utuilangana ne lutatu lukole, ne baledi bebe mbasue kukuambuluisha. Kadi udi wamba ne: “Kanuditatshishi to. Nendijikijile bualu ebu.”
-
Kadi bobu badi mua kumvua ne:
-
Diandamuna diebe dimpe didi ne bua kuikala ne:
Mona bikuabu:
TSHIDI BENA MULONGO NEBE BAMBA
Mmunyi mundi mua kuyukila ne baledi banyi?
Pamuapa kudi mabenesha a bungi audi kuyi mumanye.
