Fuanyikija bualu ebu: Karen utshidi ufikilaku mu difesto ne ki mmuanji kuenza minite mitue ku dikumi to. Udi umvua dîyi dia muntu udiye mumanye dimubikila.

Karen udi ukudimuka, umona mulunda wende Jessica mukuate milangi ibidi ya maluvu mikangula. Idi imueneka ya maluvu makole. Jessica udi woluela Karen mulangi umue, umuambila ne: “Ndi mumanye ne: kuena muana bua kubenga masanka to.”

Karen mmusue kubenga, kadi Jessica mmulunda wende. Karen ki mmusue bua mulunda wende amumone bu udi kayi musue masanka to. Kabidi, Jessica utu muana muimpe. Yeye unua maluvu, ki mbibi to. Karen udi udiambila ne: ‘Si mmaluvu patupu, ki ndiamba to!’

Bu wewe muikale Karen, ntshinyi tshiuvua mua kuenza?

Bua kuangata dipangadika dia meji mu nsombelu wa nunku, udi ne bua kumanya bumuntu buebe. Bumuntu ntshiudi munda muebe tshidi tshikuambila tshiudi, ne bujitu buebe. Dimanya edi didi dikupetesha bukole bua kulombola nsombelu webe pamutu pa kulekela bakuabu bamulombola pa muaba webe.—1 Kolinto 9:26, 27.

Mmunyi muudi mua kupeta bukole bua mushindu eu? Bua kutuadija, andamuna nkonko idi ilonda eyi.

Kumanya malu audi mupepeje ne ngikadilu yebe mimpe nekukoleshe dishindika diudi nadi.

TSHILEJILU TSHIA MU BIBLE: Mupostolo Paulo wakafunda ne: “Nansha meme tshiyi mumanye kuakula bimpe, bulelela tshiena mupangile dimanya to.” (2 Kolinto 11:6) Bu muvua Paulo mumanye Mifundu minsantu, wakashala mushindame nansha pavuabu bamutatshisha. Kavua mulekele mêyi mabi avuabu bamuamba atekesha dishindika diende to.—2 Kolinto 10:10; 11:5.

DIKONKONONE: Funda tshipedi kampanda tshiudi natshi kuinshi eku.

Mpindieu, leja ngikadilu muimpe uudi nende. (Tshilejilu: Utu utabalelangana anyi? Upeshangana bintu anyi? Muntu wa kueyemena anyi? Unemeka dîba anyi?)

Anu mutu muonji mukole ukosekela pa manungu awu, bumuntu buebe budi mua kunyanguka lukasa wewe mulekele matekete ebe alombola nsombelu webe.

TSHILEJILU TSHIA MU BIBLE: Paulo uvua mumanye matekete ende. Wakafunda ne: “Ndi nsanka bua mikenji ya Nzambi bilondeshile tshindi munda muanyi, kadi ndi mmona mu mubidi wanyi mukenji mukuabu uluangana ne mukenji wa mu meji anyi, uya nanyi ku bupika bua mukenji wa bubi.”—Lomo 7:22, 23.

DIKONKONONE: Mbutekete kayi buudi musue kutshimuna?

Udiku mua kubuela mu mashinyi ne kuambila muendeshi bua nunyunguluke muaba umue too ne padi kasolonyi kajika anyi? Kuenza nunku nkupanga lungenyi ne kudi kutudisha makuta a bungi.

Ndilongesha kayi diudi upeta? Bipatshila bidi bilombola nsombelu webe ne bienza bua kunyunguluki mu tshijengu to. Udi ne muaba uudi uya ne mushindu wa kufika muaba au.

TSHILEJILU TSHIA MU BIBLE: Paulo wakafunda ne: “Tshiena nyema tshiyi ne tshipatshila to.” (1 Kolinto 9:26) Pamutu pa Paulo kulekela malu avua amufikila alombola nsombelu wende, uvua mudifundile bipatshila ne muenze bua kubikumbaja.—Filipoyi 3:12-14.

DIKONKONONE: Funda bipatshila bisatu biudi musue kukumbaja tshidimu tshialua.

Wewe kuyi ne malu audi muitabuje, newikale muntu udi kayi wangata mapangadika. Anu bu lungonyonyi, neushintuluke bua kulonda bansonga nebe. Kuenza nunku kudi kuleja ne: kuena ne buebe bumuntu to.

Kadi, wewe wenza malu mimanyine pa malu audi muitabuje, udi ulama bumuntu buebe nansha bakuabu bobu benza tshinyi.

TSHILEJILU TSHIA MU BIBLE: Patshivua muprofete Danyele tshitende, ‘wakapangadija bualu mu mutshima wende’ bua kutumikila mikenji ya Nzambi nansha muvuaye kule ne dîku diabu. (Danyele 1:8) Pakenzaye nunku, wakashala mulamate ku dipangadika diende. Danyele wakenza malu mu diumvuangana ne malu avuaye muitabuje.

DIKONKONONE: Mmalu kayi audi muitabuje? Tshilejilu: Utu witaba ne: Nzambi udiku anyi? Bua tshinyi? Ntshinyi tshidi tshikujadikila wewe ne: Nzambi udiku?

Utu witaba ne: Nzambi mmuele mikenji idi itangila bikadilu bimpe bua diakalenga diebe anyi? Bua tshinyi?

Ndekelu wa bionso, udiku musue kuikala bu dibeji dia mutshi diume didibu bapepula kudi lupepele lukese luonso anyi? Peshi bu mutshi udibu kabayi mua kujomona kudi tshipepele tshikole? Wewe mukoleshe bumuntu buebe, newikale bu mutshi eu. Ebi nebikuambuluishe bua kuandamuna lukonko elu: Ndi nganyi?