1-3. Yehowa uvua musue bua Yehezekele amone tshinyi ku ntempelo? Bua tshinyi? (Tangila ngenyi mikuabu mu mêyi a tshitupa 2.)

 MUPROFETE Yehezekele uvua muana wa muakuidi, nanku uvua mumanye Mikenji ya Mose bimpe menemene. Uvua muibidilangane ne ntempelo wa mu Yelushalema, ne ntendelelu mukezuke wa Yehowa uvua wenzekaku. (Yeh. 1:3; Mal. 2:7) Kadi malu akenzeka ku ntempelo au mu 612 K.Y., avua mua kubungamija muena Yuda wa lulamatu yonso, nansha Yehezekele pende.

² Yehowa uvua musue bua Yehezekele amone malu mabi avua enzeka ku ntempelo, pashishe aambile “bakulu ba mu Yuda” bavuabu pabu bakuate baye nabu, bavua mu nzubu muende. (Bala Yehezekele 8:1-4; 11:24, 25; 20:1-3) Yehowa udi wambula Yehezekele ku diambuluisha dia nyuma wende (mu tshikena kumona), umumbusha kuende ku Tele-abiba, pabuipi ne musulu wa Kebâ, uya nende ntanta wa kilometre ya bungi lua ku ouest kua Yelushalema. Udi umubueja mu ntempelo, ku tshiibi tshia munda tshivua tshitangile ku nord. Utuadija kuya nende mu tshikena kumona, wenda umuleja ntempelo mujima.

³ Yehezekele udi umona malu anayi adi amubungamija adi aleja mudi bena Isalele banyange malanda abu ne Nzambi. Tshidi  tshifikile ntendelelu mukezuke wa Yehowa ntshinyi? Mmunyi mudi tshikena kumona atshi tshitutangila lelu? Tulondayi Yehezekele padiye wenda unyunguluka bua kumona bidi bienzeka. Kadi tuanji kumona tshidi Yehowa musue menemene bua batendeledi bende benze.

4. Yehowa mmusue bua batendeledi bende benze tshinyi?

⁴ Bidimu bitue ku 900 kumpala kua Yehezekele kuledibua, Yehowa ukavua muambe tshivua batendeledi bende ne bua kuenza. Mu Mikenji dikumi ivuaye mupeshe bena Isalele, muibidi uvua wamba ne: * “Meme Yehowa Nzambi webe ndi Nzambi udi ulomba bua bandamate anu meme.” (Ekes. 20:5) Tshiambilu tshia ne: “bandamate anu meme,” tshidi tshileja ne: Yehowa kena mua kutuitabila bua kutendelela nzambi mikuabu nansha kakese. Anu mutuvua bamone mu nshapita muibidi wa mukanda eu, bualu bua kumpala budi ntendelelu mukezuke ulomba budi ne: anu Yehowa ke wa kutendelela. Batendeledi bende badi ne bua kumuteka pa muaba wa kumpala. (Ekes. 20:3) Mu kuamba kuimpe, Yehowa mmusue bua batendeledi bende kabasambakaji ntendelelu mulelela ne wa dishima to, bua bashale bakezuke. Mu 1513 K.Y., bena Isalele bakitaba bua kubuela mu tshipungidi tshia Mikenji. Bualu ebu buakaleja ne: bavua basue kushala balamate anu Yehowa. (Ekes. 24:3-8) Yehowa utu anu ulamata ku bipungidi biende, mmusue bua badiye udia nabu tshipungidi benze pabu nanku.​—Dut. 7:9, 10; 2 Sam. 22:26.

5, 6. Bua tshinyi bivua bikumbane bua Yehowa kulomba bena Isalele bua bamulamate anu yeye?

⁵ Bivua bikumbane bua Yehowa kulomba bena Isalele bua bamulamate anu yeye anyi? Eyowa! Udi Nzambi Wa Bukole Buonso, Mukalenge wa diulu ne buloba ne Mpokolo wa muoyo. (Mis. 36:9; Bien. 17:28) Yehowa uvua kabidi Mupandishi wabu. Pakapeshaye bantu Mikenji dikumi, wakabavuluija ne: “Meme ndi Yehowa Nzambi webe uvua mukupatule mu buloba bua Ejipitu, mu nzubu wa bupika.” (Ekes. 20:2) Bushuwa, anu Yehowa ke uvua bena Isalele ne bua kutendelela.

⁶ Yehowa katu ushintuluka to. (Mal. 3:6) Utu ulomba batendeledi bende bua bamulamate anu yeye. Elabi meji bua muvuaye mua kuikala mumvue bua malu mabi anayi avuaye usua kuleja Yehezekele mu tshikena kumona au.

7. a) Bena Yuda batontolodi bavua benza tshinyi ku tshiibi tshia ntempelo tshia ku nord? Tshivua tshisake Yehowa ku dienza tshinyi? (Tangila tshimfuanyi tshia ku ntuadijilu kua nshapita.) b) Bualu abu buvua bujule mukawu wa Yehowa mu ngumvuilu kayi? (Tangila dimanyisha.)

⁷ Bala Yehezekele 8:5, 6. Bivua mua kuikala bitonde Yehezekele bikole! Wakamona bena Yuda batontolodi batendelela tshimfuanyi tshia lupingu ku tshiibi tshia ntempelo tshia ku nord. Tshimfuanyi atshi tshivua pamuapa mutshi wa tshijila uvua uleja Ashéra, nzambi mukaji uvua bena Kanâna bamba ne: mmukaji wa Bâla.  Nansha biobi nanku anyi kabiyi nanku, bena Isalele bavua batendelela mpingu abu kabavua banemeke tshipungidi tshivuabu badie ne Yehowa to. Bu muvuabu batendelele lupingu alu pamutu pa kutendelela anu Yehowa uvua muakanyine ntendelelu wabu, bakajula Nzambi mukawu, kumufiikishabu munda. * (Dut. 32:16; Yeh. 5:13) Anji elabi meji: munkatshi mua bidimu 400, muaba munsantu wa mu ntempelo uvua uleja dikalaku dia Yehowa. (1 Bak. 8:10-13) Kadi pavua bena Isalele babuejamu mpingu, bavua benze bua Yehowa ‘asemene kule ne muaba wende munsantu.’

8. Mmunyi mudi tshikena kumona tshia Yehezekele tshia tshimfuanyi tshia mukawu etshi tshitutangila lelu?

⁸ Mmunyi mudi tshikena kumona tshia Yehezekele tshia tshimfuanyi tshia mukawu etshi tshitutangila lelu? Bena Yuda batontolodi abu badi batuvuluija mudi bitendelelu bia bukua buena Kristo. Bidi bidiamba mudibi bitendelela Nzambi, kadi bu mudi ditendelela dia mpingu dituamu mpokomba, Nzambi kena witaba ntendelelu wabi to. Yehowa katu ushintuluka to, nanku tumanye ne: bitendelelu abi bidi pabi bimufiikisha munda anu bu bena Yuda batontolodi abu. (Yak. 1:17) Bushuwa, Yehowa udi nabi kule!

9, 10. Bualu budi butangila bantu bavua batendelela mpingu mu ntempelo abu budi butulongesha tshinyi?

⁹ Bualu budi butangila bantu bavua batendelela mpingu mu ntempelo abu budi butulongesha tshinyi? Bua tuetu kuleja ne: tudi balamate anu Yehowa, tudi ne bua ‘kunyema ditendelela dia mpingu.’ (1 Kol. 10:14) Tudi mua kudiambila ne: ‘Tshiena mua kutendelela Yehowa ne bimfuanyi anyi ne mpingu to!’ Kadi muntu udi mua kutendelela mpingu mu mishindu ya bungi. Mukanda kampanda udi umvuija ne: ditendelela dia mpingu nkulekela tshintu kayi tshionso tshilua ne mushinga wa bungi kupita ntendelelu wetu wa Nzambi. Ditendelela dia mpingu didi dikongoloja didifila bikole mu malu bu mudi: bintu bia ku mubidi, makuta, diangatangana, dipitshisha dia kapepe, ne bikuabu kupita mutudi balamate Yehowa. (Mat. 6:19-21, 24; Ef. 5:5; Kolos. 3:5) Tudi ne bua kudilama ku mishindu yonso ya ditendelela dia mpingu, bualu Yehowa udi utulomba bua tumutendelele anu yeye nkayende ne muoyo mujima.​—1 Yone 5:21.

¹⁰ Bualu bua kumpala buvua Yehowa muleje Yehezekele buvua ne ‘malu mabi, mabi matambe.’ Nansha nanku, Yehowa wakamuambila ne: “Neumone malu mabi adi mene mabi bikole menemene.” Mmalu kayi avua mua kuikala mabi kupita kutendelela tshimfuanyi tshia mukawu mu ntempelo?

11. Pakabuela Yehezekele mu ntempelo wakamona bintu kayi bibi pabuipi ne tshioshelu?

¹¹ Bala Yehezekele 8:7-12. Yehezekele udi utubula disoso mu tshimanu ubuela mu ntempelo pabuipi ne tshioshelu, pashishe umona bimfuanyi bibi bizola ku bimanu bia ntempelo, bimfuanyi bia “bintu bidi bidikoka panshi ne bia nyama mibipe ne mpingu  yonso ya muendi.” * Bimfuanyi abi bivua bia nzambi ya dishima. Kadi Yehezekele udi ulua kumona bualu bukuabu bubi butambe: “Bakulu 70 ba mu nzubu wa Isalele” bimane “mu mîdima” boshila nzambi ya dishima musenga wa manananshi. Bilondeshile Mikenji ya Mose, diosha musenga wa manananshi wa mupuya muimpe divua dileja masambila a batendeledi ba Nzambi ba lulamatu. (Mis. 141:2) Kadi musenga wa manananshi uvua bakulu 70 abu boshila nzambi ya dishima au uvua ununkila Yehowa mupuya mubi mutambe. Masambila abu avua anu bu mupuya mubole kudiye. (Nsu. 15:8) Bakulu abu bavua badishima ne: “Yehowa kena utumona to.” Kadi mu bulelela Yehowa uvua ubamona, kulejaye Yehezekele malu avua enzeka mu ntempelo wende.

12. Bua tshinyi bidi bikengela tushale anu balamate Yehowa nansha patudi “mu mîdima”? Badi nangananga ne bua kuikala tshilejilu tshimpe mu dienza nanku mbanganyi?

¹² Muyuki wa Yehezekele wa bakulu 70 bavua boshila nzambi ya dishima musenga wa manananshi eu udi utulongesha tshinyi? Bua Nzambi kuteleja masambila etu, ne bua ntendelelu wetu kuikala mukezuke kudiye, tudi ne bua kushala bamulamate nansha patudi “mu mîdima.” (Nsu. 15:29) Tuikalayi bajadike ne: Yehowa udi umona malu onso atudi tuenza. Tuetu tumona ne: Yehowa udiku, katuakuenza bualu nansha patudi pa nkayetu butudi bamanye ne:  budi bumunyingalaja to. (Eb. 4:13) Bakulu mu tshisumbu ke badi nangananga ne bua kuikala tshilejilu tshimpe tshia ditumikila mêyi manene a mu Bible. (1 Pet. 5:2, 3) Bantu badi mu tshisumbu mbatekemene ne: mukulu udi wimana kumpala kuabu ne ubalombola ikala utumikila mêyi manene a mu Bible nansha “mu mîdima,” mmumue ne: padiye pa nkayende.​—Mis. 101:2, 3.

13. Yehezekele wakamona bakaji batontolodi benza tshinyi ku tshimue tshia ku biibi bia ntempelo?

¹³ Bala Yehezekele 8:13, 14. Yehowa mumane kuleja Yehezekele bualu bua kumpala ne buibidi, udi umuambila kabidi ne: “Neumone malu mabi adi mene mabi bikole menemene adibu benza.” Tshidiye umona kabidi ntshinyi? Udi umona “bakaji basombe badila nzambi Tamuza” ku “tshibuelelu tshia tshiibi tshia ku nord tshia nzubu wa Yehowa.” Tamuza uvua nzambi wa bena Mezopotamia, badi bamubikila mu mikanda ya bena Sumer ne: Dumuzi, ne bamba muvuaye bayende wa Ishtar nzambi mukaji wa bufuke. * Miadi ivua bakaji abu badila ivua umue wa ku mikiya ya ntendelelu ivuabu benza bua lufu lua Tamuza. Pavuabu badila Tamuza mu ntempelo, muaba umuepele uvuabu batendelela Yehowa tshikondo atshi, bavua babuejamu mikiya ya bampangano. Kadi Yehowa kavua mua kuanyisha ntendelelu wa dishima au anu bualu bavua bamuenzela mu ntempelo wende to. Ke bualu kayi, ku mêsu kua Yehowa, bakaji batontolodi abu bavua benza ‘malu mabi matambe’!

14. Mushindu uvua Yehowa umona tshivua bakaji batontolodi benza udi utulongesha tshinyi?

¹⁴ Mushindu uvua Yehowa umona tshivua bakaji abu benza udi utulongesha tshinyi? Bua ntendelelu wetu kuikalaye mukezuke, katuena ne bua kumusambakaja ne bilele bia bampangano nansha kakese. Nunku, katuena ne bua kusekelela difesto nansha dimue didi ne muji wadi mu ntendelelu ya bampangano to. Kumanya muji wa difesto kudi ne mushinga anyi? Eyowa! Lelu, bilele bidibu benza mu mafesto bu mudi Noele anyi Pasaka bidi mua kumueneka bu bidi kabiyi ne bualu. Kadi katupu muoyo ne: Yehowa uvua mudimuenene mafesto adi bantu basekelela lelu, muvuawu matuadijile mu ntendelelu ya bampangano to. Kena witaba bilele abi anu bualu bantu bakadi babisekelele munkatshi mua bidimu bia bungi anyi babibueje mu ntendelelu mukezuke to.​—2 Kol. 6:17; Buak. 18:2, 4.

15, 16. Bantu balume 25 bavua benza tshinyi mu lubanza lua munda mua ntempelo? Bua tshinyi tshienzedi tshiabu atshi tshivua tshinyingalaje Yehowa bikole?

¹⁵ Bala Yehezekele 8:15-18. Bua Yehowa kuleja Yehezekele bualu buinayi ne bua ndekelu, udi wambulula mêyi akavuaye mumane kuamba a ne: “Neumone malu mabi adi mene mabi bikole menemene kupita aa.” Yehezekele uvua mua kuikala mudiebeje ne: ‘Mbualu kayi budi mua kuikala bubi menemene kupita ankadi mumone?’ Yehezekele ukadi mpindieu mu lubanza lua munda mua  ntempelo. Muine amu, udi umona bantu balume 25 benda binamina “dîba [divua] ku est” bua kuditendelela. Bantu abu bavua bapenda Yehowa mu mushindu mubi mutambe. Mushindu kayi au?

¹⁶ Anji mona bualu ebu mu lungenyi: tshibueledi tshia ntempelo wa Nzambi tshivua tshitangile ku est. Bantu bavua babuelamu batangile ku ouest, bele nyima ku est. Kadi bantu 25 ba mu tshikena kumona abu bavua “bele nyima ku ntempelo” batangile ku est bua kutendelela dîba. Bu muvua ntempelo muikale “nzubu wa Yehowa,” dimuela nyima divua dileja ne: Yehowa ke uvuabu bele nyima. (1 Bak. 8:10-13) Bantu 25 abu bavua batontolodi. Bavua babenge Yehowa, babenge ne bua kutumikila mukenji udi mu Dutelonome 4:15-19. Bavua bushuwa banyingalaje Nzambi uvuabu ne bua kutendelela nkayende!

17, 18. a) Muyuki wa batendeledi ba dîba abu udi utulongesha tshinyi? b) Bena Isalele batontolodi abu bavua banyange malanda abu ne nganyi? Mushindu kayi?

¹⁷ Muyuki wa batendeledi ba dîba abu udi utulongesha tshinyi? Bua tuetu kulama ntendelelu wetu mukezuke, anu tuetu balombe Yehowa busunguluji ne meji. Tuvuluke ne: “Yehowa Nzambi udi dîba,” kabidi Dîyi diende didi “muendu” bua makasa etu. (Mis. 84:11; 119:105) Yehowa udi utupesha meji ku diambuluisha dia Dîyi diende, ne dia mikanda ya bulongolodi buende. Nunku tudi mua kuangata mapangadika mimpe bua kuikala ne nsombelu wa disanka mpindieu ne kupeta muoyo wa tshiendelele mu matuku atshilualua. Kadi tuetu bakebe busunguluji ne meji bia mu nsombelu kudi bena panu, tudi tuela Yehowa nyima. Kuenza nanku nekunyingalaje Yehowa bikole, bimufiikisha ne munda. Ki mbimpe tuetu kuenzela Nzambi wetu bualu bua nanku to! Tshikena kumona etshi tshidi kabidi tshitudimuija bua kuepuka bantu badi bela bulelela nyima, mmumue ne: batontolodi.​—Nsu. 11:9.

¹⁸ Anu mutudi bamone, Yehezekele uvua mudimuene malu mabi anayi a ntendelelu wa mpingu ne wa dishima avua aleja muvua malanda a Nzambi ne bena Yuda batontolodi abu manyanguke bibi menemene. Bu muvua bena Isalele balue bakoya mu nyuma, bavua banyange malanda abu ne Nzambi. Bukoya bua mu nyuma ne dinyanguka mu malu a bikadilu bitu anu bienda pamue. Kabiena bitukemesha bua muvua bena Isalele batontolodi abu benze malu mabi a mishindu yonso avua manyange malanda abu ne Nzambi, manyange kabidi malanda abu ne bantu bakuabu to. Tumonayi mudi muprofete Yehezekele uleja ku bukole bua nyuma muvua malu a bikadilu a bena Yuda batontolodi abu manyanguke.

19. Ntshinyi tshidi Yehezekele wamba bua muvua bantu bavua Yehowa mudie nabu tshipungidi banyanguke mu bikadilu?

¹⁹ Bala Yehezekele 22:3-12. Bena Isalele bonso bavua banyanguke, too ne balombodi babu. “Bamfumu” anyi balombodi babu bavua bashipa bantu bavua kabayi ne bualu. Bantu mu tshibungi  bakaditua mu dibenga kutumikila mikenji ya Nzambi anu bu balombodi babu. Bena mu mêku bavua baditue mu dienza malu a bibindi, bana benzela baledi babu “malu ne kapeja.” Bena Isalele batomboke abu bavua biba benyi, ne benzela bana bavua bafuishe batatuabu ne bakaji bakamba malu mu mushindu mubi. Bena Isalele bavua balala ne bakaji ba bende. Bantu bavua ne lukuka lua bungi, bakosangana mishiku, banyengangana bintu, ne balomba tshia kasombela tshipite bungi. Pavua Yehowa mumone bena Isalele bavuaye mudie nabu tshipungidi abu babenga kutumikila mikenji yende ku bukole, biakamunyingalaja bikole. Kabavua bajingulule ne: Yehowa uvua mubelelayi bualu uvua mubanange to. Dinyanguka dia bikadilu biabu diakamunyingalaja be! Wakambila Yehezekele bua kubambila ne: ‘Nudi bampue muoyo menemene.’

20. Mêyi a Yehezekele adi atangila bena Yuda bavua banyanguke mu bikadilu adi atutangila mushindu kayi?

²⁰ Mêyi a Yehezekele adi atangila bena Yuda bavua banyanguke mu bikadilu adi atutangila mushindu kayi? Dinyanguka dia bena Yuda abu didi dituvuluija bantu badi banyanguke mu malu a bikadilu badi batunyunguluke lelu. Bamfumu ba bididi badi bakengesha bantu ne bukokeshi budibu nabu. Balombodi ba bitendelelu, nangananga bamfumu ba bitendelelu bia bukua buena Kristo, mbabeneshe mvita pankatshi pa bisamba idi mishipeshe bantu bungi tshianana. Mbapepeje mikenji ya mu Bible idi itangila dienda dia masandi. Ke bualu kayi, malu a bikadilu bia bantu badi batunyunguluke  mmanyanguke bikole menemene. Bushuwa, Yehowa udi mua kuambila bitendelelu bia bukua buena Kristo tshivuaye muambile bena Yuda batontolodi tshia ne: ‘Nudi bampue muoyo menemene.’

21. Bualu bua dinyanguka dia malu a bikadilu a bena Yuda ba kale budi butulongesha tshinyi?

²¹ Bualu bua dinyanguka dia malu a bikadilu a bena Yuda ba kale abu budi butulongesha tshinyi tuetu batendeledi ba Yehowa? Bua Yehowa kuanyisha ntendelelu wetu, tudi ne bua kuikala ne bikadilu bimpe mu nsombelu wetu mujima. Ki mbipepele bua kuenza nanku mu ndongoluelu wa malu mubi eu to. (2 Tim. 3:1-5) Kadi tudi bamanye mudi Yehowa umvua padiye umona bantu benza malu mabi a mishindu yonso. (1 Kol. 6:9, 10) Tudi tutumikila mikenji miakane ya Yehowa bualu tudi bamunange yeye ne mikenji yende ayi. (Mis. 119:97; 1 Yone 5:3) Tuetu banyanguke mu malu a bikadilu, nebileje ne: katuena banange Nzambi wetu munsantu udi mukezuke to. Katuena basue bua Yehowa atuambile petu ne: ‘Nudi bampue muoyo menemene’ nansha.

22. a) Patudi bakonkonone malu a bena Yuda ba kale adi Yehowa mufundishe, wewe udi muangate dipangadika kayi? b) Netumone tshinyi mu nshapita udi ulonda?

²² Kukonkonona malu adi Yehowa mufundishe adi aleja dinyanguka dia malanda a bena Yuda ba kale ne Nzambi ne dia malu a bikadilu biabu nkutupeteshe malongesha mimpe a bungi. Nkukoleshe kabidi dipangadika dietu dia kutendelela anu Yehowa ne kumulamata anu yeye nkayende. Nunku, tudi ne bua kudilama ku mishindu yonso ya ditendelela dia mpingu ne kushala bakezuke mu bikadilu. Kadi tshivua Yehowa muenze ne batendeledi bende bavua bapange lulamatu abu ntshinyi? Pakajikija Yehezekele kunyunguluka mu ntempelo, Yehowa wakamuambila ne: “Nengenze malu ne tshiji tshikole.” (Yeh. 8:17, 18) Tudi basue kumanya tshivua Yehowa muenzele bena Yuda bavua kabayi bamulamate abu, bualu ke tshienzelaye kabidi bantu babi badi batunyunguluke lelu. Nshapita udi ulonda neatuleje muvua Yehowa munyoke bena Yuda abu.