Bana betu badi banange Yehowa:

Mu 1971, bantu bakabuela mu mpungilu wa distrike wa “Dîna dia Nzambi” bakasanka bikole pavuabu bapete mikanda mipiamipia ya bungi. “Muntu nansha umue kavua muele meji” ne: nebapatule mikanda bungi nanku to. Muanetu mukuabu wakamba bua umue wa kudiyi ne: “Aka nkadiosha katambe buimpe ka malu adi matuindile kumpala atuvua katuyi banji kupeta to.” Uvua wakula bua mukanda kayi? Uvua wakula bua mukanda wa “Bisamba nebifike ku dimanya ne: meme ndi Yehowa”: Mushindu kayi? (mu Mfualansa) Kadi bua tshinyi mukanda au uvua musankishe bantu bikole? Bualu uvua ne ngumvuilu mupiamupia wa mêyi a buprofete adi mu mukanda wa Yehezekele adi akula bua nsombelu wa matuku atshilualua.

Mu bidimu biakalonda dipatuka dia mukanda wa ‘Kumanya Yehowa,’ bantu ba Nzambi bakavula ne lukasa, bavua muliyo mujima ne tshitupa kufikabu ku miliyo mipite pa 8. (Yesh. 60:22) Batendeledi ba Yehowa aba mu tshibungi tshiabu badi bakula miakulu mishilangane mipite pa 900. (Zek. 8:23) Ba bungi kabavua banji kupeta mushindu wa kulonga mukanda udi umvuija mêyi a buprofete avua muprofete Yehezekele mufunde to.

Bualu bukuabu, bidimu bia bungi katshia ku 1971, tuvua bakaje bikole ngumvuilu wetu wa malu malelela a bungi a mu Bible anu mudi butoke buenda butoka anu kutoka. (Nsu. 4:18) Mu 1985 tuakatuadija kumona patoke muvua “mikoko mikuabu” mibadibue miakane bu balunda ba Nzambi. (Yone 10:16; Lomo 5:18; Yak. 2:23) Pashishe mu 1995 tuakamanya bua musangu wa kumpala ne: dilumbuluisha dia ndekelu dia “mikoko” ne “mbuji” nedienzeke mu “dikenga dinene” didi dilua. (Mat. 24:21; 25:31, 32) Malu onso aa avua matuambuluishe bua kumvua mukanda wa Yehezekele.

Mu bidimu bishale ebi, butoke butshivua buenda butoka anu kutoka. Tuakulayi bua malongesha atuvua bapetele mu bilejilu bia Yezu. Kutokesha ngumvuilu wetu nkuenze bua tumvue bimpe malongesha au. Bia bungi bia ku bilejilu abi bidi bileja malu enzeka mu katupa kîpi emu mu dikenga dinene didi dienda disemena ne lukasa. Bia muomumue, tudi batokeshe ngumvuilu wetu wa amue mêyi a buprofete adi mu mukanda wa Yehezekele. Mu mêyi au, mudi adi atangila Goga wa ku Magoga (nshapita wa 38 ne wa 39), mudimu wa muntu udi ne kalondo ka mâyi a mukanda ka mufundi (nshapita wa 9), tshibandabanda tshia mifuba miume ne dilamakaja dia mitshi ibidi dia mu tshimfuanyi (nshapita wa 37). Malu onso adibu bakajilule aa mmatokeshe kabidi bimpe malu akavuabu bafunde mu mukanda wa ‘Kumanya Yehowa.’

Kakuyi mpata, bantu ba Yehowa ba bungi bavua badiebeja ne: “Netupetaku mukanda udi ne ngumvuilu mupiamupia wa mêyi a buprofete a Yehezekele anyi?” Ntendelelu mukezuke wa Yehowa mmujadikulula ke mukanda au. Paudi wenda ubala nshapita yonso 22 idimu, welangana kabidi meji a bilejilu bimpe bidimu neukeme bikole bua malu onso avuabu bakebulule ne ntema bua kufunda mukanda eu. Tuvua bele meji bikole ne basambile ne muoyo mujima bua kumanya bua tshinyi Yehowa uvua mufundishe mukanda muimpe wa Yehe-zekele eu. Tuvua batabalele kabidi ne muoyo mujima imue nkonko bu mudi: Mmalongesha kayi adi mu mukanda wa Yehezekele avua atangila bantu ba mu tshikondo tshiende, adi atutangila petu lelu? Mmêyi kayi a buprofete adi atangila malu enzeka kumpala eku? Mbimpe tukebe mundidimbi ne bualu buonso buena dîna mu mêyi a buprofete a Yehezekele anyi? Mandamuna a nkonko eyi adi  ambuluisha bua kumvua bimpe mukanda wa mu Bible eu utudi tuetu bonso tuanyisha bikole bua kubala.

Paudi wenda ubala mukanda wa Yehezekele kubangila ku ntuadijilu too ne ku ndekelu, newanyishe tshitupa tshia bulongolodi bua Yehowa tshia mu diulu. Kakuyi mpata, newanyishe kabidi bikole mikenji mitumbuke idi Yehowa muelele bifukibua biende bidi mu diulu ne pa buloba bidi bisue kumutendelela mu mushindu udiye wanyisha. Mukanda wa Ntendelelu mukezuke newukuambuluishe bua kuvudija dianyisha diebe bua malu akadi Yehowa muenzele bantu bende too ne aluaye kubenzela mu katupa kîpi emu. Neumone ne: mukanda eu udi wakula njila ne njila bua malu manene abidi. Bua kumpala, bua kusankisha Yehowa tudi ne bua kumanya ne kuitaba ne: yeye ke Mukalenge mutambe bunene wa diulu ne buloba. Buibidi, tudi ne bua kutendelela Yehowa mu mushindu udiye wanyisha, kutumikila mikenji yende mitumbuke mu nsombelu wetu mujima.

Tudi batekemene ne muoyo mujima ne: mukanda eu newukoleshe dipangadika dienu dia kutendelela Yehowa mu mushindu udi utumbishisha dîna diende dinene dia tshijila. Enzayi kabidi bua mukanda eu unuambuluishe bua kushala bindile tshikondo tshikala bisamba bionso ne bua kufika ku dimanya ne: yeye udi Yehowa.​—Yeh. 36:23; 38:23.

Yehowa Tatu wetu udi mutunange abeneshaku bionso binudi nuenza bua kumvua mukanda uvuaye musake muprofete Yehezekele ku bukole bua nyuma bua kufunda.