KAZUBU KA 14A
Tshidi tshikena kumona tshia Yehezekele tshia ntempelo tshitulongesha
Nzambi mmubandishe ntendelelu mukezuke ne mmumukube
Nzambi mmubandishe ntempelo wa mu tshikena kumona pa “mukuna mule” (1). Tudiku petu babandishe ntendelelu mukezuke, mmumue ne: bamuteke pa muaba wa kumpala mu nsombelu wetu anyi?
Tshimanu tshia lupangu lua ntempelo (2), tshivua tshinyunguluke nzubu ya ntempelo ne tshiyele munkatshi menemene mua lupangu lunene alu (3), tshidi tshituvuluija ne: katuena ne bua kulekele tshintu nansha tshimue tshinyanga ditendelela dietu dia Yehowa to. Bu mudibi ne: katuena ne bua kubueja “malu a tshianana” bu mudi dienda mushinga mu ntendelelu mukezuke, netuambe tshinyi bua malu a bukoya ne a masandi? Mutendeledi yonso wa Yehowa udi ne bua kuepuka bibidilu bia nanku mu nsombelu wende!—Yeh. 42:20.
Mabenesha a tshiendelele
Musulu udi upueka umbukila ku muaba munsantu wa ntempelo, ufila muoyo ne bufuke mu buloba (4). Netuakule bua mabenesha aa mu nshapita wa 19 wa mukanda eu.
Mikenji ya bantu bonso kutumikila
Biibi bile bia pambelu (5) ne bia munda (9) bidi bituvuluija ne: Yehowa udi welela bonso badi basue kubuela mu ntendelelu mukezuke mikenji miakane ya bikadilu. Mona ne: biibi bia pambelu ne bia munda bidi ne bunene ne bule bumue mu nseke yabi yonso. Bidi bileja ne: mikenji miakane ya Yehowa idi itangila batendeledi bende bonso, nansha bobu ne midimu kayi mu bulongolodi buende.
Kudia biakudia ne Yehowa ku mêsa
Bibambalu bia kudiila (8) bidi bituvuluija ne: ku kale, bantu bavua badia pamue milambu ivuabu balua kufila ku ntempelo, bienze anu bu ne: bavua badia ne Yehowa ku mêsa amue. Kadi kabitu bienzeka nanku mu ntempelo wa mu nyuma mudi bena Kristo batendelela lelu to, bualu Yezu ukadi mubafidile “mulambu umue.” (Eb. 10:12) Nansha nanku, tudi tutungunuka ne kufila mulambu wa kutumbisha nawu Nzambi.—Eb. 13:15.
Tshijadiki tshia kudi Nzambi
Bungi bua malu adibu bafunde bua bule bua bintu bionso bia mu tshikena kumona budi mua kukutshiokesha. Kadi budi butulongesha ne: dijadikulula dia ntendelelu mukezuke mbualu bulelela buenza Yehowa, kabuena mua kushintuluka anu mudi bujalame bua bunene ne bule bua bintu bia ku ntempelo au kabuyi mua kushintuluka. Nansha mudi Yehezekele kayi uleja ne: uvua mumone muntu mu tshikena kumona atshi, mmufunde mibelu mikole ivua Yehowa mupeshe bakuidi, bamfumu ba Isalele, ne bantu bende. Bantu ba Nzambi bonso badi ne bua kutua mikenji miakane ya Yehowa nyama ku mikolo.
