1, 2. Ndumba wa mushindu kayi udi mua kukufikisha ku diumvua muengu?

 BITU bitonda bua kumona mukaji kampanda mulue ndumba. Tudi mua kudiebeja tshidi tshienze bua ikale ne nsombelu mubi au. Bavuaku mua kuikala bamuenzela malu mabi kuabu anyi bamukengesha ne tshikisu, bimusaka bua kushala ndumba anyi? Anyi mbua bupele? Peshi mmunyeme bayende uvua umuenzela malu ne tshikisu? Malu aa atu atamba kuenzeka lelu bikole. Kabiena bitukemesha bua muvua Yezu Kristo muenzele bamue bandumba malu ne bulenga. Wakamba ne: bantu bavua banyingalala ne balekela nsombelu wabu mubi bavua mua kutekemena nsombelu wa nsongo.​—Mat. 21:28-32; Luka 7:36-50.

² Kadi tuakule bua ndumba wa mushindu mukuabu. Fuanyikijabi mukaji kampanda udi usungula bua kushala ndumba ku budisuile. Kena umona bundumba bu nsombelu wa manyanu to, kadi bu nsombelu udi umupetesha bukokeshi bua kuenza malu kampanda. Mmusue kushala ndumba bua apete bubanji ne ikale usaka bantu ku dienza tshidiye ubambila. Nansha mudiye ne mulume muimpe udi ne lulamatu kudiye, udi umuela mâyi ku makasa anu bua kushala ndumba. Pawikala umumona newikale anu umvua muengu  bua nsombelu udiye musungule au. Mushindu mubi utudi tumvua au udi uleja bua tshinyi Yehowa mmutele nsombelu wa ndumba misangu ya bungi bua kutuleja mudiye umvua bua ntendelelu wa dishima.

3. Netuakule bua miyuki kayi ibidi mu nshapita eu?

³ Mukanda wa Yehezekele udi ne miyuki ibidi idi yamba mudi bundumba bua bantu ba Nzambi ba mu Isalele ne mu Yuda buleja dipanga diabu dibi dia lulamatu. (Yeh., nshap. wa 16 ne wa 23) Kadi kumpala kua kuakula bua miyuki ayi, mbimpe tuanji kuakula bua ndumba mukuabu wa mu tshimfuanyi. Ukavua ndumba kumpala kua Yehezekele kuledibua, kumpala mene kua bena Isalele kuikalaku, ne utshidi anu ndumba too ne patudi tuakula apa. Buakabuluibua, mukanda wa ndekelu wa mu Bible, udi wakula bua ndumba au.

4, 5. “Babilona munene” nnganyi? Bua tshinyi tudi tuamba nanku? (Tangila tshimfuanyi tshia ku ntuadijilu kua nshapita.)

⁴ Mu tshikena kumona tshivua Yezu muleje mupostolo Yone tshidi mu mukanda wa Buakabuluibua, Yone wakamona mukaji kampanda uvua ukemesha. Badi bamubikila ne: “ndumba munene,” bamubikila kabidi ne: “Babilona Munene, mamuende wa bandumba.” (Buak. 17:1, 5) Munkatshi mua bidimu nkama ya bungi, balombodi ba bitendelelu ne bamanyi ba malu a mu Bible kabavua bamanye bimpe tshidiye to. Bavua bamba malu mashilangane, bamba ne: ndumba au udi uleja Babilona, anyi Lomo, anyi tshitendelelu tshia Katolike. Kadi kukadi bidimu bia bungi bidi Bantemu ba Yehowa bajingulule menemene tshidi “ndumba munene” eu. Ndumba eu nnsangilu wa bitendelelu bia dishima bia pa buloba bujima. Bua tshinyi tudi tuamba nanku?

⁵ Ndumba eu mmupile bualu mmuende masandi ne “bakalenge ba pa buloba,” anyi makokeshi a tshididi a bukole. Nanku bidi bimueneka patoke ne: yeye ndumba eu ki mbukokeshi bua tshididi to. Mukanda wa Buakabuluibua udi uleja kabidi ne: “bangenda mushinga ba pa buloba,” anyi ndongoluelu wa malu a bungenda mushinga wa lelu, badi babungama bua lufu lua Babilona munene. Nunku Babilona munene kena uleja ndongoluelu wa malu a bungenda mushinga to. Kadi ndumba eu nnganyi menemene? Mmupile bua “bienzedi bia mîdima,” ditendelela dia mpingu, ne dishima. Kakuyi mpata, malu asatu aa mmatue mpokomba mu bitendelelu bionso binyanguke bia lelu. Mona kabidi ne: mbaleje ndumba eu musombe pa makokeshi a tshididi a pa buloba ualombola anyi uasaka bua kuenza tshidiye musue. Udi kabidi ukengesha bantu ba lulamatu ba Yehowa Nzambi. (Buak. 17:2, 3; 18:11, 23, 24) Kuenaku pebe mumone ne: ke malu adi bitendelelu bia dishima bienza too ne lelu anyi?

6. Mmu ngumvuilu kayi mudi Babilona munene “mamuende wa bandumba”?

⁶ Kadi bua tshinyi kabena anu babikila Babilona munene ne: “ndumba munene” patupu, kadi badi bamubikila kabidi ne: “mamuende wa bandumba”? Mu ntendelelu wa dishima mudi  bitendelelu ne bisumbusumbu bungi tshianana. Katshia dîba divua Nzambi mukondakaje miakulu mu tshimenga tshia kale tshia Babele tshiakaluabu kubikila ne: Babilona, bantu bakatangalaka pa buloba bujima ne malongesha manene a ntendelelu wa dishima. Ke muvua bitendelelu bipiabipia bia bungi biledibua nanku. Mbikumbane bua mudi dîna dia “Babilona munene” difumine ku dia tshimenga tshia Babilona wa kale, muaba uvua bitendelelu bia dishima bia bungi bituadijile. (Gen. 11:1-9) Nunku bitendelelu bionso ebi bidi anu bu “bana” ba ndumba munene au. Ku diambuluisha dia bitendelelu ebi, Satana utu usaka bantu bua kuenza malu a mîdima, kutendelela mpingu, ne kuikala ne bilele ne malongesha adi apendesha Nzambi. Ke bualu kayi, Nzambi udi udimuija bantu bende bua bitendelelu bia dishima bidi bimuangalake pa buloba bujima wamba ne: “Bantu banyi, patukayi munkatshi muende binuikala kanuyi basue kubuelakana nende mu mpekatu yende.”​—Bala Buakabuluibua 18:4, 5.

7. Bua tshinyi mbimpe tuetu kutumikila didimuija dia ‘kupatuka’ mu Babilona munene?

⁷ Ukadi mutumikile didimuija adi anyi? Vuluka ne: Yehowa nkayende ke udi mufuke bantu ne ‘dijinga dia malu a mu nyuma.’ (Mat. 5:3) Anu ntendelelu mukezuke wa Yehowa ke udi mua kudijikija bimpe. Batendeledi ba Yehowa batu badienzeja bua kuepuka ntendelelu wa dishima. Kadi Satana ki mmusue padibu benza nanku to. Mmusue kubakoka mu ntendelelu wa dishima. Mmufike ku dikokamu bamue batendeledi ba Nzambi. Mu matuku a Yehezekele, bantu ba Nzambi bakavua bamane kuditua mu ntendelelu wa dishima ntanta mule. Mbimpe tukonkonone malu avuabu benze, bualu adi mua kutulongesha bia bungi bua mikenji ya Yehowa, buakane buende, ne mutuye ufuilangana luse.

8-10. a) Mmukenji kayi munene udi Yehowa muele bua ntendelelu mukezuke? b) Mmunyi mutu Yehowa umvua padi bantu bende babuelakana mu ntendelelu wa dishima? Fila tshilejilu.

⁸ Mu mukanda wa Yehezekele, Yehowa mmufile tshilejilu tshia ndumba bua kuleja muvuabi bimutonde bikole pavua bantu bende bapange lulamatu kudiye. Nyuma muimpe wakasaka Yehezekele bua kufunda miyuki minene ibidi ivua ileja muvua Yehowa munyingalale ne mudiumvue muedibue mâyi ku makasa bua dipanga lulamatu dia bantu bende ne bua bienzedi biabu bibi. Uvua mubafuanyikije ne bandumba bua tshinyi?

⁹ Bua kupeta diandamuna, tuanji tuakule kakese bua mukenji munene udi utangila ntendelelu mukezuke utuvua bakuile mu nshapita muitanu wa mukanda eu. Yehowa uvua muambe mu mikenji ya Mose ne: “Kuena ne bua kuikala ne nzambi mikuabu pa kumbusha meme to [anyi, “bua kuntemba nayi,” dim.]. . . . Meme Yehowa Nzambi webe ndi Nzambi udi ulomba bua bandamate anu meme.” (Ekes. 20:3, 5) Wakalua kabidi kuamba bualu bumue bumue abu mu mushindu mukuabu ne: “Kuena ne bua kuinamina nzambi mukuabu to, bualu Yehowa mmumanyike bua mudiye ulomba bua bamulamate anu yeye. Bushuwa, yeye udi Nzambi udi ulomba  bua bamulamate anu yeye.” (Ekes. 34:14) Kabivua anu ne mushinga bua Yehowa kuamba kalu ne kalu konso ka kuenza ne mu katoba to. Bua Yehowa kuanyishaye ntendelelu wetu, tudi ne bua kumutendelela anu yeye nkayende.

¹⁰ Bua kumvua bualu ebu bimpe, tuangate tshilejilu tshia mulume ne mukajende. Bubidi buabu badi ne bukenji bua kutekemena bua yonso wa kudibu ikale ne lulamatu kudi mukuabu. Umue wa kudibu yeye mutuadije kuenzela muntu wa tshianana malu a mananga, muena dibaka mukuabu au udi ne bukenji bua kuikala ne mukawu ne kudiumvua muedibue mâyi ku makasa. (Bala Ebelu 13:4.) Bia muomumue, Yehowa udi pende ne bukenji bua kudiumvua muedibue mâyi ku makasa padi bantu bende badi badilambule kudiye batuadija kutendelela nzambi ya dishima. Udi uleja bualu ebu mu Yehezekele nshapita wa 16.

11. Ntshinyi tshivua Yehowa muambe bua tshimenga tshia Yelushalema ne bua muvuatshi tshituadije?

¹¹ Bua mukanda mujima wa Yehezekele, anu mu nshapita wa 16 ke mudi Yehowa muakule mutantshi mule, ne mêyi adiye muambamu ngamue a ku mêyi ende a buprofete matambe bule adi mu Mifundu yonso ya mu tshiena Ebelu. Yehowa udi utamba kuakula bua Yelushalema uvua uleja bena Yuda bavua kabayi ne lulamatu. Udi wakula bua muvua tshimenga atshi tshituadije mu lutatu ne muvuatshi tshimuele mâyi ku makasa. Tshivua tshituadije anu bu muana mulekelela. Baledi bende bavua bampangano bena Kanâna bavua mu buloba abu. Mu bulelela, Yelushalema uvua anu ku bukokeshi bua bena Yebuse ba mu tshisamba tshia Kanâna too ne pakatshimuna Davidi tshimenga atshi. Yehowa wakumvuila muana mulekelela au luse, kumulongololaye, ne kutuadijaye kumupesha bivuaye ukengela. Ndekelu wa bionso, wakalua bu mukajende. Mu bulelela, bena Isalele bakalua kusomba mu Yelushalema bavua badie tshipungidi ne Yehowa, batshidie ku budisuile katshia mu matuku a Mose. (Ekes. 24:7, 8) Pakalua Yelushalema tshimenga tshikulu, Yehowa wakatshibenesha, kutshipeshaye bubanji, ne kutshilengejaye, anu mudi mulume udi ne bubanji ne bukole mua kulengeja mukajende udiye munange ne bilenga bia mushinga mukole.​—Yeh. 16:1-14.

12. Mmunyi muvua ntendelelu wa dishima mubuele mu Yelushalema?

¹² Kadi mona tshiakalua kuenzeka. Yehowa wakamba ne: “Wakatuadija kueyemena bulengele buebe, ne wewe kulua ndumba bua lumu luebe. Wakitshikijila muntu yonso uvua upita ne njila bienzedi biebe bia bundumba, ne bulengele buebe buakalua buende.” (Yeh. 16:15) Mu matuku a Solomo, Yehowa wakabenesha bantu bende ne kubapeshaye bubanji, ke Yelushalema kulua tshimenga tshipite bimenga bionso bivuaku tshikondo atshi ku bulenga. (1 Bak. 10:23, 27) Kadi ntendelelu wa dishima wakatuadija kubuela mu Yelushalema ku kakese ku kakese. Bu muvua Solomo ujinga kusankisha bakaji bende ba ku babende, wakatuadija kunyanga Yelushalema ne ntendelelu ya nzambi ya bampangano. (1 Bak. 11:1-8) Kabidi, bamue bakalenge bakamupingana mu nkuasa bakenza bobu malu  mabi matambe, kunyangabu Yelushalema mujima ne ntendelelu wa dishima. Mmunyi muvua Yehowa mumvue bua muvuabu bamuele mâyi ku makasa ne bienzedi biabu bia masandi? Wakamba ne: “Malu a nunku kaavua mua kuenzeka anyi kaavua mua kufika nansha.” (Yeh. 16:16) Nansha nanku, bantu bende ba mutu mukole abu bakaditua bikole mu dienza malu mabi.

13. Bantu ba Nzambi ba mu Yelushalema bavua bapile bua malu kayi mabi avuabu benza?

¹³ Elabi meji kanyinganyinga kavua naku Yehowa pavuaye muele malu mabi a bantu bende patoke. Wakamba ne: “Wewe wakangata bana bebe ba balume ne bana bebe ba bakaji bauvua mundelele, wewe kubalambula mpingu eyi bua ibadie, bienzedi biebe bia bundumba ki mbipite ne pa mukenji anyi? Wakashipa bana banyi, wewe kubafila bu milambu pauvua mubapitshishe mu kapia.” (Yeh. 16:20, 21) Malu mabi avua bantu ba mu Yelushalema benze adi aleja mudi Satana muntu mubi. Mmusue kusaka bantu ba Yehowa bua bamutombokele! Kadi Yehowa udi umona malu onso. Nzambi neajikije malu a tshinyangu adi Satana muenzeje bu mudi dishipa bana bua kubalambula nzambi ya dishima, ne neabishe bana abu ku lufu bua kubapesha mpunga wa kupeta muoyo wa tshiendelele.​—Bala Yobo 34:24.

14. Mu tshilejilu tshivua Yehowa mufile, Yelushalema uvua ne bana babu kayi babidi ba bakaji? Ku busatu buabu, nnganyi uvua mubi kupita bakuabu?

¹⁴ Yelushalema kakanyingalala bua malu ende mabi to. Kadi wakatungunuka ne bundumba buende. Yehowa wakamba ne: uvua mupange bundu kupita ne bandumba bakuabu bualu yeye uvua ufuta bantu bakuabu bua bende nende masandi! (Yeh. 16:34) Nzambi wakamba ne: Yelushalema uvua anu bu ‘mamuende,’ tuambe ne: bisamba bia bampangano bivua bimukokeshe. (Yeh. 16:44, 45) Nzambi wakamba kabidi ne: tshimenga tshia Samalea tshivua yayende wa Yelushalema. Tshiotshi tshikavua tshidianjidile Yelushalema mu bundumba, mmumue ne: mu ntendelelu wa dishima. Nzambi mmutele kabidi muanabu muibidi wa bakaji, Sodoma. Bualu abu buvua buvuluija muntu yonso tshimenga tshia Sodoma tshivuabu babutule bua diambu ne bikadilu biatshi binyanguke. Yehowa uvua musue kuleja ne: Yelushalema uvua mubi kupita Samalea too ne Sodoma bana babu ba bakaji babidi ku malu mabi avuaye muenze. (Yeh. 16:46-50) Bantu ba Nzambi kabakateleja mibelu yende to, bakatungunuka ne kumutombokela.

15. Tshivua tshisake Yehowa bua kunyoka Yelushalema ntshinyi?

¹⁵ Ntshinyi tshiakenza Yehowa? Wakalaya Yelushalema ne: “Ndi nsangisha bananga bonso bauvua musankishe kaba kamue” ne “nenkufile mu tshianza tshiabu.” Bisamba bia bampangano bivua bidie nende bulunda bivua ne bua kumubutula, binyanga buimpe buende ne bipawula bubanji buende buonso. Wakamba ne: “Nebakuase mabue ne nebakushipe ne miele yabu ya mvita.” Tshivua tshisake Yehowa bua kunyoka Yelushalema ntshinyi? Kabivua bua kubutula bantu bende to, kadi Nzambi wakamba ne: “Nentuishe bundumba buebe ku ndekelu.” Kuambaye kabidi ne: “Nenkujikijile tshiji tshianyi tshikole, ne tshiji tshimvua mukukuatshile  netshiumbuke kuudi; ne meme nentukije, tshiakufiika kabidi munda nansha.” Anu mutuvua bamone mu nshapita wa 9 wa mukanda eu, dijinga dinene divua nadi Yehowa divua dia kumbusha bantu bende ku babende ne kubapingaja kuabu. Nzambi uvua mene muambe ne: “Meme nemvuluke tshipungidi tshimvua mudie nebe mu matuku a ku buana buebe.” (Yeh. 16:37-42, 60) Yehowa uvua mushilangane ne bantu bende bualu yeye uvua ne bua kubaleja lulamatu!​—Bala Buakabuluibua 15:4.

16, 17. a) Bua tshinyi katutshiena tuamba ne: Ohola ne Oholiba badi baleja bitendelelu bia bukua buena Kristo? (Tangila kazubu ka “Bana ba bakaji babidi bandumba.”) b) Yehezekele nshapita wa 16 ne wa 23 idi itulongesha malu kayi manene?

¹⁶ Yehowa udi utulongesha malu a bungi bua mikenji yende, bua buakane buende, ne bua luse luende ku diambuluisha dia mêyi ende a bujitu adi mu Yehezekele nshapita wa 16 ne wa 23. Lelu bena Kristo balelela mbamanye bimpe tshidi Yehowa muambe patoke bua bundumba bua bantu bende. Ki mbimpe tuetu kunyingalaja Yehowa bu muvua bena Isalele bamunyingalaje to! Tudi ne bua kuepuka mishindu yonso ya ditendelela dia mpingu, bu mudi lukuka ne dijinga dia kuikala ne tente mu nzubu tente pambelu! (Mat. 6:24; Kolos. 3:5) Mbimpe tuikale ne dianyisha kudi Yehowa bualu, anu bua luse luende, mmujadikulule ntendelelu mukezuke mu matuku a ku nshikidilu aa ne kakulekela bamunyanga kabidi nansha kakese! Mmudie “tshipungidi tshia kashidi” ne tshisamba tshia Isalele wa mu nyuma, ne tshipungidi atshi katshiakunyanguka to bualu bena mu tshisamba atshi kabakupanga lulamatu kudiye anyi kuenda bundumba bua mu nyuma to. (Yeh. 16:60) Nunku, tunangayi diakalenga ditudi nadi lelu dia kuenza mudimu pamue ne bantu bakezuke ba Yehowa.

¹⁷ Mpindieu tumonayi tshidi mêyi avua Yehowa muambe bua bandumba adi mu Yehezekele atulongesha bua “ndumba munene” anyi Babilona munene.

18, 19. Umvuija mudi dilumbuluisha dia bandumba didi mu mukanda wa Yehezekele dipetangana mu malu a bungi ne tshiafikila “ndumba munene” wa mu mukanda wa Buakabuluibua.

¹⁸ Yehowa ki mmushintuluke to. (Yak. 1:17) Mushindu uvuaye umvua bua ntendelelu wa dishima katshia anu Babilona munene watuadija ki mmushintuluke to. Ke bualu kayi kabiena bitukemesha patudi tumona muvua dilumbuluisha dia bandumba didi mu mukanda wa Yehezekele dipetangana mu malu a bungi ne tshiafikila “ndumba munene” wa mu mukanda wa Buakabuluibua.

¹⁹ Tshilejilu, mona ne: bantu ba Nzambi bavua kabayi ne lulamatu kudiye badi mêyi a buprofete a Yehezekele abikila ne: bandumba bavua ne bua kubanyoka bualu bavua benda masandi a mu nyuma ne bisamba bikuabu. Kadi dinyoka adi kadivua difume buludiludi kudi Yehowa to, kadi anu kudi bisamba abi. Bia muomumue, nsangilu wa bitendelelu bionso bia dishima bia pa buloba bujima udi pende ne bua kupeta dinyoka bua mudiye muende masandi ne “bakalenge ba pa buloba.” Kadi dinyoka diende nedifumine kudi nganyi? Tudi tubala ne: bakalenge ba malu a tshididi  ‘nebakine ndumba eu, nebamupawule, nebamushiye butaka, nebadie mubidi wende ne nebamubutule butubutu ne kapia.’ Bua tshinyi mbulamatadi ya pa buloba neyenze bualu bua dikema ebu? Bualu Nzambi ‘neateke bualu ebu mu mioyo yabu bua bakumbaje lungenyi luende.’​—Buak. 17:1-3, 15-17.

20. Ntshinyi tshidi tshileja ne: kabutu kakuata Babilona nekikale ka ndekelu?

²⁰ Nunku, Yehowa neasake bisamba bia pa buloba bua kubutula bitendelelu bionso bia dishima, too ne bia bukua buena Kristo. Kabutu aku nekikale ka ndekelu; Nzambi kakufuila ntendelelu wa dishima luse anyi kumushila mpunga wa kushintulula bienzedi biende to. Mukanda wa Buakabuluibua udi uleja ne: Babilona “kakuikalaku kabidi nansha.” (Buak. 18:21) Banjelu ba Nzambi nebasanke bua kabutu kende, bamba ne: “Tumbishayi Yah! Muishi wende udi utungunuka ne kubanda kashidi ne tshiendelele.” (Buak. 19:3) Kabutu aku nekashale kashidi. Nzambi kakuitaba kabidi bua ntendelelu wa dishima aledibue bua kunyanga ntendelelu mukezuke to. Pabutulabu Babilona ne kapia, mu ngumvuilu wa mu tshimfuanyi, muishi wende newutungunuke ne kubanda kashidi ne tshiendelele.

21. Kabutu ka bitendelelu bia dishima nekikale ntuadijilu wa tshinyi? Dikenga dinene nedijike ne bualu kayi?

 ²¹ Pakudimukilabu Babilona munene kudi bakalenge ba pa buloba, nebakumbaje dilumbuluisha dia Nzambi, bualu bunene bua mu malu adi Yehowa mulongolole. Bualu ebu nebuikale ntuadijilu wa dikenga dinene, tshikondo tshia mabika ne mala tshitu katshia katshiyi tshianji kulua. (Mat. 24:21) Dikenga dinene adi nedijike ne Armagedone anyi mvita yela Yehowa ndongoluelu wa malu mubi eu. (Buak. 16:14, 16) Anu mutuabimona mu nshapita udi ulonda, mukanda wa Yehezekele udi utuambila malu a bungi a muikala dikenga dinene. Kadi kumpala kua tuetu kuamanya, tuanjayi kumona malongesha a mushinga adi mu Yehezekele nshapita wa 16 ne wa 23 atudi ne bua kutumikila.

22, 23. Malu a bandumba badibu bakuile mu mukanda wa Yehezekele ne wa Buakabuluibua adi ne bua kutusaka bua kuangata dipangadika kayi?

²² Satana mmusue kunyanga bantu badi benza ntendelelu mukezuke. Kakuena tshintu tshidi tshimusankisha kupita kutumbusha ku ntendelelu mukezuke ne kutufikisha ku dikala ne nsombelu wa buena wa bandumba badibu bakuile mu mukanda wa Yehezekele. Mbimpe tuvuluke ne: mu malu a ntendelelu, Yehowa katu musue bua tutendelele nzambi mukuabu ne katu wanyisha dipanga lulamatu to! (Nom. 25:11) Mbimpe tuikale badimuke bua kudilama ku ntendelelu wa dishima, ne kubenga ‘kulenga tshintu nansha tshimue’ tshidi Nzambi umona ne: ntshikoya. (Yesh. 52:11) Ke bualu kayi, tudi ne bua kushala ne lulamatu, tubenga kubuelakana mu malu a tshididi anyi kuikala ne lukuna bidi bitapulula bantu lelu. (Yone 15:19) Tudi tumona buena ditunga anu bu ntendelelu wa dishima udi Satana wenda umuangalaja, ne tudi ne bua kubuepuka.

²³ Bualu budi ne mushinga budi ne: tutungunukayi anu ne kuvuluka diakalenga dinene ditudi nadi dia kutendelela Yehowa mu ntempelo wende mukezuke wa mu nyuma. Bu mutudi munkatshi mua bantu badi batendelela Nzambi mu mushindu udiye wanyisha, tuangatayi dipangadika dia kubenga kubuelakana mu ntendelelu wa dishima ne mu bundumba buende!