1, 2. Mvita kayi minene yenzeka mu matuku makese emu? Nkonko kayi idi itangila mvita eyi itudi mua kudiela? (Tangila tshimfuanyi tshia ku ntuadijilu kua nshapita.)

 KUKADI bidimu binunu ne binunu bidibu banyange buloba ebu ne makeji a mashi a bantu mu mvita, mu bantu abu mudi kabidi ba bungi bavua bafue mu mvita ibidi ya buloba bujima ivua mienzeke mu bidimu bia 1900. Kadi mvita mitambe bunene itu kayiyi mianji kuenzeka neyenzeke kumpala eku. Kayakuikala bu mvita itu bantu baluangana patupu, itu bisamba bia pa buloba biluishangana anu bua majinga abi to. Kadi mvita idi ilua eyi neyikale “mvita ya dituku dinene dia Nzambi Wa Bukole Buonso.” (Buak. 16:14) Muluishi muena lutambishi ke wakebesha mvita eyi padiye ukuata ditunga didi ne mushinga wa bungi ku mêsu kua Nzambi. Dikuata adi nedisake Mukalenge Mutambe Bunene Yehowa, bua kuleja bukole buende butambe bunene bua kubutula nabu, butu bantu kabayi banji kumona to.

² Kudi nkonko minene itudi mua kudiela: Muluishi au nnganyi? Nditunga kayi diakuataye? Ndîba kayi diakuataye ditunga edi? Bua tshinyi ne mushindu kayi? Bu mudi malu adi alua aa atutangila petu tuetu batendeledi bakezuke ba Yehowa badi pa buloba, mbimpe tupete mandamuna a nkonko eyi. Tudi mua kuapeta mu mêyi mimpe a buprofete adi mu Yehezekele nshapita wa 38 ne wa 39.

3. Leja malu manene adi mu mêyi a buprofete a Yehezekele adi atangila Goga wa ku Magoga.

 ³ Bala Yehezekele 38:1, 2, 8, 18; 39:4, 11. Mona malu manene adi mu mêyi a buprofete aa: “Mu tshikondo tshia ku ndekelu kua bidimu,” muluishi udibu babikila ne: ‘Goga wa ku Magoga’ udi ukuata ‘ditunga’ dia bantu ba Nzambi. Kadi buluishi bukole abu nebuenze bua ‘tshiji tshikole’ tshia Yehowa kutematshi ne neelamu dîyi bua kutshimuna Goga. * Padi Yehowa utshimuna, neafile muluishi wende eu ne aba bonso badi bamutua mpanda “bu tshiakudia kudi nyunyi ya mishindu yonso itu idia munyinyi ne kudi nyama ya tshisuku.” Ndekelu wa bionso, Yehowa neapeshe Goga “muaba wa kumujiikilabu.” Bua kumanya muikala mêyi a buprofete aa mua kukumbana mu matuku makese emu, mbimpe tuanji tumanye udi Goga au uleja.

4. Ntshinyi tshitudi mua kuamba bua Goga wa ku Magoga?

⁴ Goga wa ku Magoga nnganyi? Bilondeshile diumvuija didi Yehezekele ufila, tudi mua kuamba ne: Goga mmuluishi wa batendeledi bakezuke. Goga ndîna dia buprofete dia Satana muluishi mutambe bunene wa ku baluishi bonso ba ntendelelu mulelela anyi? Ke tshivua mikanda yetu yamba munkatshi mua bidimu bia bungi. Kadi patudi bakonkonone kabidi mêyi a buprofete a Yehezekele, tudi bakajilule ngumvuilu wetu. Tshibumba tshia Nsentedi tshivua tshiumvuija ne: muanzu Goga wa ku Magoga kawena uleja tshifukibua tshia mu nyuma tshidi katshiyi tshimueneka to, kadi udi uleja muluishi udi umueneka, mmumue ne: bisamba bidisange bialuisha ntendelelu mukezuke. * Kumpala kua tuetu kumona tshidi tshitufikishe ku diakajilula ngumvuilu wetu, tukonkononayi malu abidi adi mu mêyi a buprofete a Yehezekele adi aleja ne: Goga ki ntshifukibua tshia mu nyuma to.

5, 6. Mmalu kayi adi mu mêyi a buprofete a Yehezekele adi aleja ne: Goga wa ku Magoga ki ntshifukibua tshia mu nyuma to?

⁵ “Nenkufile bu tshiakudia kudi nyunyi ya mishindu yonso itu idia munyinyi.” (Yeh. 39:4) Misangu ya bungi patu Bible utela nyunyi itu idia bitalu udi wakula bua didimuija dia dilumbuluisha dia Nzambi. Nzambi wakafila madimuija a mushindu au kudi tshisamba tshia Isalele nansha kudi bisamba bikuabu. (Dut. 28:26; Yel. 7:33; Yeh. 29:3, 5) Mona ne: Nzambi kavua mufile madimuija aa kudi bifukibua bia mu nyuma to, kadi wakaafila kudi bantu ba mashi ne mâyi. Mu bulelela, nyunyi ne nyama ya tshisuku itu idia munyunyi, kadi kayitu idia nyuma to. Nunku didimuija dia Nzambi didi mu mêyi a buprofete a Yehezekele didi dileja ne: Goga ki ntshifukibua tshia mu nyuma to.

⁶ “Nempeshe Goga muaba wa kumujiikilabu mu Isalele.” (Yeh. 39:11) Bilondeshile Bible kabena mua kujiika bifukibua bia mu nyuma pa buloba to. Kadi Satana ne bademon bende nebedibue mu dijimba dile menemene bua bidimu 1 000, pashishe nebabele mu dijiba dia kapia dia mu tshimfuanyi, didi dileja kabutu ka tshiendelele. (Luka 8:31; Buak. 20:1-3, 10) Bu mudi Bible uleja ne: nebapeshe Goga “muaba wa kumujiikilabu” pa buloba, tudi mua kuamba ne: Goga ki ntshifukibua tshia mu nyuma to.

7, 8. “Mukalenge wa ku nord” neafike ku ndekelu dîba kayi? Mmunyi mudi bualu ebu bupetangana ne tshikala mua kufikila Goga wa ku Magoga?

 ⁷ Bikalabi ne: ki ntshifukibua tshia mu nyuma to, kadi Goga udi muluishi wikala mua kuela batendeledi bakezuke mvita ya ndekelu nnganyi peshi ntshinyi menemene? Tukonkononayi mêyi a buprofete abidi adi mu Bible atuambuluisha bua kumanya Goga wa ku Magoga.

⁸ “Mukalenge wa ku nord.” (Bala Danyele 11:40-45.) Danyele ukavua mudianjile kumanyisha dilondangana dia makalenge a pa buloba katshia ku tshikondo tshiende too ne lelu. Mêyi a buprofete au avua aleja kabidi bakalenge babidi badi baluishangana, mmumue ne: “mukalenge wa ku sud” ne “mukalenge wa ku nord,” buonso buabu bavua bashintuluke munkatshi mua bidimu bia bungi bu mudi bisamba bishilashilangane biluangana mvita bua kukeba muaba wa kumpala. Bilondeshile mvita ya ndekelu ya mukalenge wa ku nord mu “tshikondo tshia ku nshikidilu,” Danyele uvua muambe ne: “Yeye neapatuke ne luonji lukole bua kushipa ne kubutula bantu ba bungi.” Batendeledi ba Yehowa ke bantu ba kumpala bikala mukalenge wa ku nord ne bua kuluisha. * Kadi anu bu Goga wa ku Magoga, mukalenge wa ku nord neafike “too ne ku nshikidilu wende” yeye mumane kupangila bua kuluisha bantu ba Nzambi.

9. Ndipetangana kayi didi pankatshi pa tshidi tshifikila Goga wa ku Magoga ne “bakalenge ba pa buloba bujima budi bantu basombele”?

⁹ “Bakalenge ba pa buloba bujima budi bantu basombele.” (Bala Buakabuluibua 16:14, 16; 17:14; 19:19, 20.) Mukanda wa Buakabuluibua ukavua mudianjile kuleja mvita yenzeka pankatshi pa “bakalenge ba pa buloba” ne Yezu “Mukalenge wa bakalenge” udi mu diulu. Kadi “bakalenge ba pa buloba” kabena mua kuluisha Yezu to bualu udi mu diulu, nunku nebaluishe bantu badi pa buloba badi batua Bukalenge buende mpanda. Nebatshimune bakalenge ba pa buloba mu mvita ya Armagedone. Mona ne: nebafike too ne ku nshikidilu wabu bobu bamane kuluisha bantu ba Yehowa. Bualu ebu budi bupetangana ne tshidibu bambe bua Goga wa ku Magoga. *

10. Ntshinyi tshitudi mua kuamba bua Goga wa ku Magoga?

¹⁰ Bilondeshile malu atudi bamone aa, ntshinyi tshitudi mua kuamba bua Goga? Tshia kumpala, Goga ki ntshifukibua tshia mu nyuma to. Tshibidi, Goga udi uleja bisamba bia pa buloba bialuisha bantu ba Nzambi mu matuku makese emu. Kakuyi mpata, bisamba ebi nebidisange, mmumue ne: nebidisuike tshimuku bua kuenza tshintu tshimue. Bua tshinyi? Bu mudi bantu ba Nzambi pa buloba bujima, bisamba ebi nebidisange pamue ne tshipatshila tshia kubaluisha. (Mat. 24:9) Nansha muikala bisamba mua kutuluisha, Satana ke wikala panyima pa malu onso au. Kukadi bidimu bia bungi bidiye usaka bisamba bia pa buloba bua kuluisha ntendelelu mulelela. (1 Yone 5:19; Buak. 12:17) Kadi mêyi a buprofete a Yehezekele adi akula bua Goga wa ku Magoga adi atangila nangananga mudimu udi nawu bisamba bia pa buloba bikala mua kuluisha bantu ba Yehowa. *

11. Mmushindu kayi udibu bumvuija ‘ditunga’ dikala Goga mua kukuata mu mêyi a buprofete a Yehezekele?

¹¹ Anu mutudi bamone mu  tshikoso 3, Goga wa ku Magoga neakebeshe tshiji tshikole tshia Yehowa padiye ukuata ditunga didi  ne mushinga wa bungi ku mêsu kua Nzambi. Nditunga kayi adi? Tupinganayi mu mêyi a buprofete a Yehezekele. (Bala Yehezekele 38:8-12.) Adi amba ne: Goga ‘nealuishe ditunga diena bantu badibu bapingaje’ ne ‘basangishe tshiakabidi bafumina mu bisamba.’ Mona kabidi tshidibu bamba bua bantu badi bapingane mu ditunga edi bua kutua ntendelelu mukezuke nyama ku mikole: “mbasombe mu bukubi”; mbasombele mu “misoko idi kayiyi mikuba kudi bimanu, milonda, peshi biibi”; ne ‘mbadivudijile biuma.’ Ditunga edi ndidi batendeledi bakezuke ba Yehowa badi pa buloba bujima basombele. Mmunyi mutudi mua kudimanya?

12. Ndiakajilula kayi divua dienzeke mu ditunga dia Isalele wa kale?

¹² Bidi ne mushinga bua kukonkonona diakajilula divua dienzeke mu Isalele wa kale, ditunga divua bantu bavua Nzambi musungule basombele, benzela mudimu, ne bamutendelela munkatshi mua bidimu nkama ya bungi. Pavua bena Isalele bapange lulamatu, Yehowa wakadianjila kumanyisha ku diambuluisha dia Yehezekele ne: bavua ne bua kubutula ditunga diabu ne kudishiya munda mutupu. (Yeh. 33:27-29) Kadi Yehowa wakamanyisha kabidi ne: pashishe bashadile bavua banyingalale bavua ne bua kupingana bafumina mu bupika mu Babilona ne kujadikulula ntendelelu mukezuke mu buloba buabu. Ku diambuluisha dia Yehowa, bavua ne bua kuakajilula buloba bua Isalele bua buikale “bu budimi bua Edene.” (Yeh. 36:34-36) Dipingana adi diakenzeka mu 537 K.Y., pavua bena Yuda bavuabu bakuate baye nabu mu Babilona abu bapingane mu Yelushalema buloba buabu buvuabu banange, bua kujadikulula ntendelelu mulelela.

13, 14. a) Ditunga dia mu nyuma ntshinyi? b) Bua tshinyi ditunga edi didi ne mushinga kudi Yehowa?

¹³ Matuku etu aa, batendeledi bakezuke ba Nzambi bakenza pabu dipingana dia muomumue. Anu mutudi balonge mu nshapita wa 9  wa mukanda eu, ku ntuadijilu kua 1919, bantu ba Nzambi bavua bapatuke mu bupika mu Babilona munene muvuabu benze bidimu bia bungi. Tshidimu atshi, Yehowa wakabueja batendeledi bende badiye mulengeje mu ditunga dia mu nyuma. Ditunga adi mMparadizu wa mu nyuma, mmumue ne: muaba muimpe wa mu nyuma udi ne bukubi peshi muaba wa kuenzela mudimu utudi tutendelela Nzambi mulelela. Mu ditunga edi tudi basombe pamue mu bukubi, mu ditalala dia mu lungenyi ne dia mu muoyo. (Nsu. 1:33) Tudi tupeta biakudia bia bungi bia mu nyuma, ne tudi tuenza mudimu wa bungi wa mushinga mukole wa kumanyisha Bukalenge bua Nzambi. Bushuwa, tudi tudimuenena ne etu abidi bulelela budi mu lusumuinu elu: “Dibenesha dia Yehowa ke didi divuija muntu mubanji, ne Yeye kena utentekapu dikenga.” (Nsu. 10:22) Nansha tuetu basombele muaba kayi pa buloba, tudi mu Mparadizu wa mu nyuma anu patudi tutungunuka ne kutua ntendelelu mukezuke mpanda mu mêyi etu ne mu bienzedi bietu.

¹⁴ Mparadizu wa mu nyuma eu udi ne mushinga wa bungi ku mêsu kua Yehowa. Bua tshinyi? Ku mêsu kua Nzambi, bantu badimu ‘mbintu bia mushinga bia bisamba bionso,’ yeye nkayende ke udi mubakoke mu ntendelelu mukezuke. (Hag. 2:7; Yone 6:44) Badi badienzeja ne muabu muonso bua kuvuala bumuntu bupiabupia budi buleja ngikadilu mimpe ya Nzambi. (Ef. 4:23, 24; 5:1, 2) Bu mudibu batendeledi bakezuke, badi badifila ne muoyo mujima mu mudimu wa Nzambi, benza nanku bua kumutumbisha ne kuleja mudibu bamunange. (Lomo 12:1, 2; 1 Yone 5:3) Anji elabi meji disanka didi Yehowa umvua padiye umona batendeledi bende badienzeja bikole bua  kulengeja ditunga dia mu nyuma edi. Elabi kabidi meji bua bualu ebu: Paudi uteka ntendelelu mukezuke pa muaba wa kumpala mu nsombelu webe, kuena anu ulengeja Mparadizu wa mu nyuma eu to, kadi udi usankisha kabidi muoyo wa Yehowa bikole! (Nsu. 27:11)

15, 16. Ndîka kayi diakuata Goga wa ku Magoga ditunga dietu dia mu nyuma diasulula?

¹⁵ Bidi bitueleshisha meji bikole patudi tumanya ne: mu matuku makese emu, bisamba bidisange bia pa buloba nebikuate ditunga dietu dia mu nyuma didi ne mushinga wa bungi. Bu mukavuabu bambe ne: ditubunda edi divua ne bua kututangila tuetu batendeledi ba Yehowa, tudi basue kumanya malu a bungi adi atangila ditubunda adi. Tuandamunayi nkonko isatu itudi mua kudiela.

¹⁶ Ndîba kayi diakuata Goga wa ku Magoga ditunga dietu dia mu nyuma diasulula? Mêyi a buprofete adi andamuna ne: “mu tshikondo tshia ku ndekelu kua bidimu.” (Yeh. 38:8) Bidi bileja ne: nebienzeke mu tshikondo tshidi pabuipi ne nshikidilu wa ndongoluelu wa malu eu. Vuluka ne: dikenga dinene nedituadije ne dibutuka dia Babilona munene udi nsangilu wa bitendelelu bia dishima bia pa buloba bujima. Bobu bamane kubutula bitendelelu bia dishima, kumpala kua mvita ya Armagedone kutuadijayi, Goga neele batendeledi balelela mvita ya katshi ku dînu.

17, 18. Mmunyi mualombola Yehowa malu mu dikenga dinene?

 ¹⁷ Bua tshinyi Goga neakuate batendeledi bakezuke ba Yehowa badi mu ditunga diasulula? Mêyi a buprofete a Yehezekele adi aleja malu manene abidi. Bua kumpala, mushindu udi Yehowa ulombola malu. Buibidi, lungenyi lubi ludi lusaka Goga bua kuluisha bantu ba Nzambi.

¹⁸ Mushindu udi Yehowa ulombola malu. (Bala Yehezekele 38:4, 16.) Mona tshidi Yehowa wambila Goga: “Nengele ndobo mu mbanga yebe” ne “nenye nebe bua uluishe buloba buanyi.” Mêyi aa adi aleja ne: Yehowa neenzeje bisamba bua kuluisha batendeledi bende anyi? Nansha kakese! Kakuenza bua bantu bende bakenge to. (Yobo 34:12) Kadi Yehowa mmumanye baluishi bende bimpe, mbuena kuamba ne: nebakine batendeledi bakezuke ne kabakudikanda bua kubabutula butubutu padi mpunga umueneka to. (1 Yone 3:13) Anu bu kuela ndobo mu mbanga ya Goga ne kumukoka, Yehowa neenze bua malu enzeke bilondeshile disua diende ne mu tshikondo tshidiye mulongolole. Panyima pa dibutuka dia Babilona munene, mu mushindu kampanda Yehowa udi mua kusaka bena bisamba bua bakumbaje tshikavuabu balongolole mu mioyo yabu. Nunku Yehowa neenze bua ditubunda adi difikishe ku mvita ya Armagedone, mvita ya pa buloba ya katshia ne katshia. Pashishe neapandishe bantu bende, neatumbishe bumfumu buende, ne neabingishe dîna diende dia tshijila.​—Yeh. 38:23.

19. Ntshinyi tshiasaka Goga bua kuteta kupawula ntendelelu mukezuke?

 ¹⁹ Lungenyi lubi ludi lusaka Goga bua kuluisha bantu ba Nzambi. Bisamba ‘nebiluke mayele mabi.’ Nebikebe bua kuleja mudibi ne tshiji ne nebikine batendeledi ba Yehowa bikala mua kumueneka bu kabayi ne wabu wa kubakuila, bienze anu bu ne: ‘mbasombele mu misoko idi kayiyi mikuba kudi bimanu, milonda, peshi biibi.’ Bisamba nebikale ne dijinga dikole dia “kupawula ne kunyenga bintu bia bungi” bia aba ‘badi bavudija biuma.’ (Yeh. 38:10-12) ‘Mbiuma’ kayi abi? Batendeledi ba Yehowa badi ne biuma bia bungi bia mu nyuma; tshintu tshia mushinga mukole tshitudi natshi nntendelelu mukezuke, utudi tupesha anu Yehowa nkayende. Bisamba nebienze muabi muonso bua kuimanyika ntendelelu mukezuke utudi tutendelela Yehowa bualu mbikine ntendelelu eu ne bantu bonso badi bamutua nyama ku mikolo.

20. Mmunyi muikala Goga mua kukuata ditunga dia mu nyuma anyi Mparadizu?

²⁰ Mmunyi muikala Goga mua kukuata ditunga dia mu nyuma anyi Mparadizu? Bisamba bidi mua kuteta bua kutumpangisha bua kulonda njila wa buena Kristo ne kuimanyika ntendelelu wetu. Bua kuenza nunku, badi pamuapa mua kuimanyika difila dia biakudia bia mu nyuma, kutupangisha bua kudisangisha pamue, kupandulula buobumue buetu ne kutukandika bua kuyisha ne tshisumi mukenji wa Nzambi. Malu onso aa nga mu malu a mu Mparadizu wa mu nyuma. Satana neasake bisamba bua kubutula batendeledi balelela ne kujimija ntendelelu mukezuke pa buloba.

21. Bua tshinyi udi ne dianyisha bua mudi Yehowa mutudimuije bua malu adi matuindile kumpala eku?

²¹ Dibunda dia Goga wa ku Magoga nedikuate batendeledi balelela bonso badi mu ditunga dia mu nyuma didi Nzambi mufile. Tudi ne dianyisha dia bungi bua mudi Yehowa mutudimuije bua malu adi matuindile kumpala eku! Nunku bu mutudi bindile dikenga dinene, mbimpe tulamate ntendelelu mukezuke bikole, tumuteka pa muaba wa kumpala mu nsombelu wetu. Tuetu benze nanku, netuambuluishe bua kulengeja ditunga diasulula mpindieu. Netudimuenene ne etu abidi bualu bua dikema ebu buikala ne bua kuenzeka kumpala eku: Yehowa neasungile bantu bende ne neabingishe dîna diende dia tshijila ku mvita ya Armagedone, anu mutuabimona mu nshapita udi ulonda.