DIDIPISHA bua bubi mbujitu bunene budi mua kuzengeja muntu. Mukalenge Davidi wakafunda ne: ‘Malu mabi anyi akuwula, akupita pa mutu panyi. Bu bujitu bunene, adi atamba kunnemena bujitu.’ (Musambu 38:4) Bamue bena Kristo mbatshiokesha kudi dibungama dikole, ne dikala bashindika ne: Yehowa kakubafuile luse nansha kakese. (2 Kolinto 2:7) Bidi nanku menemene anyi? Nansha bikale ne: uvua muenze mpekatu munene bikole, nanku udi kule menemene ne Yehowa bienze bu ne: kena mua kukufuila luse anyi? Tòo, kabiena nanku to.

Yehowa katu ulekela bantu badi banyingalala ne balekela mibi yabu to. Mu bulelela, udi wenda ubakeba! Mu lusumuinu lua muana mujimine, Yezu wakafuanyikija Yehowa ne tatu muimpe uvua ne muana uvua mumbuke mu dîku diabu bua kuya kuenza buenzavi. Mu bungi bua matuku, muana au wakangata dipangadika dia kupingana kuabu. “Patshivuaye kule, tatuende wakamumona, kumumvuila luse, kuyaye lubilu kudiye, kumupukila ne disanka, kumutua mishiku.” (Luka 15:11-20) Udiku musue kusemena pabuipi ne Yehowa kadi udiumvua ne: ‘utshidi anu kule’ nende anyi? Anu bu tatu wa mu tshilejilu tshia Yezu, Yehowa udi pende ne luse ne ukumvuila. Mmuindile ne muoyo kuulu kuulu bua kukuakidila.

Kadi netuambe bishi, wewe wela meji ne: mpekatu yebe mmibi mitambe anyi ne: bua bungi buayi, Yehowa kena mua kukufuila luse? Suaku utangile tshidi Yehowa ukulomba tshidi mu Yeshaya 1:18 udi uleja ne: ‘Yehowa udi wamba ne: Luayi bienu, tupunge dîyi bua bualu ebu: nansha bikala mibi yenu mikunze kunzuu, neyikale ne butoke bua neige.’ Eyowa, nansha mibi idi kayiyi mua kukupuka bu tshilabu tshikunze kunzuu pa tshilamba tshitoke, kayena ikolela Yehowa bua kuyijimija to.

Yehowa ki mmusue bua ne: utungunuke ne kukenga ne kondo ka muoyo kadi kapile to. Kadi mmushindu kayi uudi mua kupeta disulakana didi difumina ku dikala ne kondo ka muoyo kimpe padi Nzambi ukufuila luse? Konkonona malu abidi avua mukalenge Davidi muenze. Bua kumpala, wakamba ne: “Nentonde matomboka [mibi] anyi kudi Yehowa.” (Musambu 32:5) Uvuluke ne: Yehowa ukadi mumane kukubikila bua wewe kusemena kudiye mu disambila ne bua ‘kupunga nende dîyi.’ Itaba dibikila edi. Tonda mibi yebe kudi Yehowa, umuleje muudi udiumvua. Bu muvua Davidi mumanye bualu ebu, wakasambila ne dishindika dionso wamba ne: ‘Untokeshe ku bubi buanyi. Wewe Nzambi, kuena upetula mutshima wa majiya ne udi unyingalala bua bubi buawu.’—Musambu 51:2, 17.

Buibidi, Davidi wakapeta diambuluisha kudi muprofete Natana uvua muleji mpala wa Nzambi. (2 Samuele  12:13) Lelu, Yehowa muteke bakulu mu tshisumbu, ne mbabalongeshe bua kuambuluisha benji ba mibi badi banyingalala bua kupetululabu bulunda buabu ne Yehowa. Paudi uya kudi bakulu bua kuyikila nabu, nebenze mudimu ne Bible ne masambila menza ne muoyo mujima bua kukolesha muoyo webe, kukepesha anyi kumusha meji mabi audi nawu ne kukuambuluisha bua wewe kupetulula makanda a mu nyuma.—Yakobo 5:14-16.

Bushuwa, udi mua kudiumvua ne: kutondela Yehowa Nzambi mibi yebe ne kuyikila ne bakulu mbualu bukole buudi kuyi mua kuenza to. Bidi bimueneka ne: Davidi uvua pende ne meji a buena aa. Wakashala ‘mupuwe’ mutantshi kayi wakula bua mibi yende. (Musambu 32:3) Nansha nanku, wakalua kumona bipeta bimpe bia ditonda mibi yende ne bia diakaja nsombelu wende.

Bualu bunene buvua Davidi mupetulule ndisanka diende. Yeye muine wakafunda ne: ‘Wa diakalenga ngudibu bafuile luse bua mpekatu wende, udibu babuikidile bubi buende.’ (Musambu 32:1, NWT) Wakasambila kabidi ne: ‘Mukalenge, ubulule mishiku yanyi, ne mukana muanyi nemumanyishe bantu butumbi buebe.’ (Musambu 51:15) Pakajika dipila dia Davidi, ne bua dianyisha divuaye nadi bua muvua Nzambi mumubuikidile, Davidi wakumvua muoyo umusaka bua kuambila bakuabu malu a Yehowa.

Yehowa mmusue bua wewe pebe kumvua buimpe bua kuikala ne kondo ka muoyo katoke. Mmusue kabidi bua wewe kuambila bakuabu malu adi amutangila ne disua diende kuyi udiumvua mupile to, kadi ne muoyo mutoke ne disanka dia bungi. (Musambu 65:1-4) Vuluka ne: udi ukubikila ‘bua mibi yebe ijimijibue, bua bikondo bia dikoleshibua bifume kumpala kua Yehowa nkayende.’—Bienzedi 3:19.

Ke tshivua tshifikile Martha. Udi wamba ne: “Muananyi wa balume uvua ne tshibidilu tshia kuntumina bibejibeji bia Réveillez-vous ! ne bia Tshibumba tshia Nsentedi. Ku kakese ku kakese, meme kuibidilangana kabidi ne Yehowa. Bualu buvua bunkolele bikole bua meme kupingana nkulomba luse bua mibi yonso imvua muenze. Kadi ndekelu wa bionso, meme kusemena kudi Nzambi mu disambila ne kumulomba bua amfuile luse. Mbikole bua kuitaba ne: kuvua kupite bidimu 40 kumpala kua meme kupingana kudi Yehowa. Lelu ndi ne tshijadiki tshia ne: nansha panyima pa bidimu bia bungi, badi mua kupetesha kabidi muntu mushindu wa kuenzela Nzambi mudimu ne kuikala mu dinanga diende.”