UDIKU mua kudiumvua pebe bu Linda uvua ne kanyinganyinga bua malu avuabu bamuenzele kudi muena Kristo nende anyi? Bia dibungama, ngikadilu anyi bienzedi bua bamue mbitonde bakuabu bikole, bafike too ne ku dilekela malu abu a mu nyuma. Ke mudibi buebe pebe anyi?

Bushuwa, bidi mua kutukolela bikole bua kubuikidila muena Kristo netu uvua mututape ku muoyo. Tshidibi, bena Kristo bonso badi ne bua kunangangana. (Yone 13:34, 35) Pikalabi ne: bavua batunyingalaje kudi muena Kristo netu, kanyinganyinga aka kadi mua kuikala kasama ku muoyo bikole menemene.—Musambu 55:12.

Bulelela, Bible udi uleja ne: kudi bimue bikondo bidi bena Kristo mua kupeta ‘tshilumbu ne mukuabu.’ (Kolosayi 3:13) Nansha nanku, padi malu aa atufikila, bidi mua kutukolela bua kushala ne lutulu bua kupita nabu bimpe. Kudiku tshidi mua kutuambuluisha anyi? Tukonkonone mêyi manene a mu Bible aa:

Tatu wetu wa mu diulu mmumanye malu onso. Yehowa udi umona malu onso adi apitakana, too ne adibu batuenzele ne kansungasunga ne ntatu idi ifuminaku. (Ebelu 4:13) Kabidi, Yehowa utu umvua bibi padiye utumona tukenga. (Yeshaya 63:9) Kena witaba bua ‘kanyinganyinga anyi dikengeshibua’ peshi tshintu kayi tshikuabu, nansha musadidi wende kampanda, “kutumbusha ku dinanga dia Nzambi” nansha musangu umue. (Lomo 8:35, 38, 39) Nanku, katuitabi petu bua tshintu nansha tshimue anyi muntu nansha umue kutumbusha kudi Yehowa to.

Kufuilangana luse ki nkuitaba bubi to. Patudi tubuikidila bantu badi batuenzela bibi, katuena tupepeja tshienzedi atshi, tutshibingisha anyi tutshitaba to. Uvuluka ne: Yehowa katu wanyisha mpekatu, kadi udi ubuikidilangana mpekatu pikalaku malu adi alomba bua kufua luse. (Musambu 103:12, 13; Habakuka 1:13) Padi Yehowa utulomba bua kufuila bakuabu luse, udi utulomba bua kumuidikije. Yeye mene ‘kena ushala ne tshiji tshiende kashidi.’—Musambu 103:9; Matayi 6:14.

Patudi tumbusha tshiji ku muoyo, tudi tudienzela bimpe. Mu mushindu kayi? Fuanyikijabi ne: Udi wambula dibue didi ne bujitu bukumbanyine ne tshianza, ushala mudikuate muolole diboko kumpala kuebe. Pamuapa kushala anu muambule dibue adi bua mutantshi mukese kakuakutamba anu kukutatshisha to. Kadi udi umona bishi wewe mushale anu nanku mutantshi mule? Udi mua kushala mudikuate muambulule nanku mutantshi bule kayi: ndambu wa minite anyi? Dîba dijima anyi? Peshi mutantshi mule bikole anyi? Kakuyi mpata, diboko didi mua kukutshioka bikole! Pabu bujitu bua dibue ki mbushintuluke to. Kadi paudi ushala anu mudikuate mutantshi mule, udi wenda umvua dikunemena  bujitu. Ke mudibi kabidi bua tshiji tshilamina munda. Patudi tushala anu balamine muntu tshiji munda, nansha tshiotshi tshikese, tudi tutungunuka anu nekudienzela bibi. Nunku, kabiena bitukemesha bua mudi Yehowa utulomba bua kulekela dilaminangana tshiji to. Bushuwa, kumbusha tshiji kudi kutuenzela tuetu bine bimpe.—Nsumuinu 11:17.

Ntshinyi tshivua tshiambuluishe Linda bua kubenga kulama tshiji munda bua bualu buvua muena Kristo nende mumuenzele? Ku amue a ku malu avuaye muenze, wakelangana meji bua malu adi Bible wamba bua kufuilangana luse ne muoyo mujima. (Musambu 130:3, 4) Tshivua tshisaka menemene Linda bua kufuilangana luse ndimanya dia ne: patudi tubuikidilangana ne muoyo mujima, Yehowa pende udi utubuikidile. (Efeso 4:32–5:2) Udi uleja mudi bualu ebu bumulenge ku muoyo wamba ne: “Mvua ngumvua anu bu ne: Yehowa uvua uyikila nanyi.”

Mu bungi bua matuku, Linda wakalekela bua kulaminangana tshiji munda. Yeye kufuila muanetu wa bakaji au luse ne muoyo mujima, ne lelu mbalunda pa katapula kateka. Linda wakatungunuka ne kuenzela Yehowa mudimu. Ikala mushindika ne: Yehowa mmusue kukuambuluisha bua wewe pebe kuenza bia muomumue.