TSHITUPA 2
Tunyinganyinga—“Batshintshimika bikole mu mishindu”
June udi wamba ne: “Panyima pa bidimu 25 bia dibaka, dibaka dianyi ne bayanyi diakafue. Bana banyi bakalekela bulelela. Ngakapeta masama makole a bungi. Ke meme kuteketa ku muoyo. Mvua ndimona anu bu ne: buloba bujima budi pa makaya anyi ne ntshivua ne mushindu wa kutantamena tshintu nansha tshimue kabidi to. Ngakalekela kubuela mu bisangilu ne kuyisha.”
TUNYINGANYINGA tudi tukuata bantu bonso, nansha bantu ba Nzambi. Mufundi kampanda wa Musambu wakamba ne: ‘Tunyinganyinga ntumpite bukole.’ (Musambu 94:19, NWT) Yezu wakamba ne: mu matuku a ku nshikidilu “tunyinganyinga tua mu nsombelu” tuvua mua kutatshisha nangananga bua kuenzela Yehowa mudimu. (Luka 21:34) Udi pebe natu anyi? Utu udiumvua mutekete bua malu a makuta, ntatu ya mu dîku peshi bua masama anyi? Mmushindu kayi udi Yehowa mua kukuambuluisha mua kupita natu?
“Bukole budi bupite bua pa tshibidilu”
Katuena mua kuditshimuina tunyinganyinga tuetu nkayetu to. Mupostolo Paulo wakafunda ne: ‘Badi batutshintshimika bikole mu mishindu yonso; tudi tupampakana, mbatuele panshi.’ Kadi wakamba kabidi ne: “Katuena bafimpakaja bapangile mua kunyunga,” “katuena bapangile kua kupatukila,” ne “ki mbatubutule to.” Tshidi tshituambuluisha bua kutantamena ntshinyi? Ke “bukole budi bupite bua pa tshibidilu,” anyi bukole budi bufuma kudi Yehowa, Nzambi wetu wa bukole buonso.—2 Kolinto 4:7-9.
Anji ela meji bua mushindu uuvua mupete “bukole budi bupite bua pa tshibidilu” pa kale. Udiku uvuluka muyuki kampanda muenze uvua mukukankamije ne mukokeshe dianyisha diebe bua dinanga dikole dia Yehowa anyi? Ditabuja diebe mu milayi ya Yehowa divuaku diende dikole pauvua ulongesha bakuabu bua ditekemena dia Mparadizu anyi? Patudi tubuela mu bisangilu bia bena Kristo ne tulongesha bakuabu malu atudi tuitabuja, bidi bitupetesha bukole bua kutantamena nabu tunyinganyinga tua mu nsombelu ne tudi tupeta ditalala dia mu lungenyi bua tumone mua kuenzela Yehowa mudimu ne disanka.
‘Teta, ulabule, umvue ne: Yehowa mmuimpe’
Bushuwa, udi mua kudimona kumpala kua njila ya bungi musangu umue. Tshilejilu, Yehowa udi utulomba bua kukeba tshia kumpala Bukalenge ne kutungunuka anu ne tshibidilu tshietu tshia kuenza malu a mu nyuma. (Matayi 6:33; Luka 13:24) Kadi, newenze tshinyi pikala buluishi, bupela anyi ntatu ya mu dîku bikupangisha bua kukumbaja amue malu? Anyi newenze tshinyi pikala mudimu webe wa bianza ukuangata dîba ne bukole biuvua mua kuenza nabi mudimu mu tshisumbu? Bidi mua kukutatshisha bikole biwikala ne malu a bungi a kuenza, kadi muikala anu ne dîba ne bukole bikese bua kuenza malu onso aa. Imue misangu udi mua kuikala udiebeja bikala Yehowa udi ukulomba bia bungi bia kuenza.
Yehowa utu umvuilangana. Katu utulomba bua kuenza malu atudi katuyi mua kukokesha mua kuenza nansha. Yeye muine mmumanye ne: bitu bitulomba dîba dia bungi bua kupetulula bukole bua mubidi ne bua mu lungenyi.—Musambu 103:13, 14.
Tshilejilu, tukonkonone muvua Yehowa muambuluishe muprofete Eliya. Pavua Eliya mutekete mu mikolo ne mupete buôwa, wakanyemena mu tshipela. Yehowa uvuaku mumutandishe ne mumutumine dîyi bua kupinganaye ku mudimu wende anyi? Tòo. Yehowa wakatuma muanjelu misangu ibidi bua kubisha Eliya ku tulu ne dinanga dionso, kumupeshaye biakudia. Nansha nanku, panyima pa matuku 40, Eliya uvua anu ne kanyinganyinga ne buôwa. Yehowa wakenza tshinyi tshikuabu bua kumuambuluisha? Tshia kumpala, Yehowa wakaleja ne: uvua mua kumukuba. Tshibidi, Yehowa wakakolesha Eliya ne ‘dîyi dikese ditekete.’ Ndekelu wa bionso, Yehowa wakamumanyisha ne: kuvua bantu bakuabu ba bungi bavua bamutendelela ne lulamatu. Matuku makese pashishe, Eliya wakabangulula kabidi ne tshisumi tshia bungi. (1 Bakalenge 19:1-19) Tudi tupeta dilongesha kayi? Pavua tunyinganyinga tupite Eliya bukole, Yehowa wakamuenzela malu ne lutulu ne uvua uditeka pa muaba wende. Yehowa ki mushintuluke to. Udi ututabalela petu anu mu mushindu wa muomumue au.
Paudi wela meji bua tshiudi mua kupesha Yehowa, tangila tshiudi mua kukumbaja. Kufuanyikiji tshiudi mua kuenza lelu ne tshiuvua wenza kale. Tuangata tshilejilu: Munyemi kampanda wa lubilu udi mulekele didibidija munkatshi mua ngondo ya bungi anyi bidimu kena mua kupingana diakamue mu tshipidi tshivuaye atshi to. Kadi udi utuadija kudibidija kakese kakese bua kupetulula bukole ne dinanukila mu lubilu. Bena Kristo badi anu bu banyemi ba lubilu. Badi badibidija ne tshipatshila kampanda mu lungenyi. (1 Kolinto 9:24-27) Kuenaku mua kudifundila tshipatshila kampanda tshia mu nyuma tshiudi mumona ne: udi mua kukumbaja mpindieu anyi? Tshilejilu, udi mua kudifundila tshipatshila tshia kubuela mu bisangilu. Lomba Yehowa bua akuambuluishe bua kukumbaja tshipatshila tshiebe. Paudi upetulula bukole bua mu nyuma, ‘neutete, neulabule, neumvue ne: Yehowa udi muakane’ anyi muimpe. (Musambu 34:8) Uvuluke ne: bualu buonso buudi wenza bua kuleja dinanga diebe kudi Yehowa budi ne mushinga kudiye, nansha buobu bunene anyi bukese.—Luka 21:1-4.
Yehowa katu utulomba malu atudi katuyi mua kukumbaja to
“Bukole bumvua muindile”
Mmunyi muvua Yehowa muambuluishe June bua kupingana kudiye? Yeye nkayende udi utuambila ne: “Mvua anu nsambila, ndomba Yehowa bua kungambuluisha. Pashishe mukaji wa muananyi wakangambila bua mpuilu uvua ne bua kuenzeka mu tshimenga tshimvua. Meme kuangata dipangadika dia kubuelamu dituku dimue. Biakansankisha bikole bua kupingana munkatshi mua bantu ba Yehowa! Mpuilu eu uvua bukole bumvua muindile. Mpindieu nkadi kabidi ngenzela Yehowa mudimu ne disanka. Nsombelu wanyi mmulue kundengelela kabidi bikole. Ndi mumanye ne: musangu nansha umue tshiakuditola kabidi pa nkayanyi to, ne nengitabe diambuluisha dia bana betu. Ndi ne dianyisha bua mutshivuaku anu dîba dia meme kupingana kabidi.”
Mona bikuabu:
TSHIBUMBA TSHIA NSENTEDI (TSHIA KULONGA)
Tungunuka ne kusemena pabuipi ne Yehowa
Ntshinyi tshitudi mua kuenza bua kusemena pabuipi ne Yehowa kadi tulama biamu bidi bena sianse bapatule, makanda a mubidi, makuta ne diditumbisha pa muaba wabi?
