Muanetu musuibue,

Anu bu muudi mumanye, Bible mmukanda udi wakula bikole bua bantu. Ba bungi bavua balume ne bakaji ba lulamatu bavua batuilangane ne ntatu anu bu mutudi nayi lelu eu. Bavua ‘bantu bu tuetu,’ badiumvua anu bu mutudi tudiumvua petu. (Yakobo 5:17) Bamue bavua batshibuila panshi kudi ntatu ne makenga. Bakuabu pabu bavua babanyingalaje bikole kudi bena mu dîku diabu anyi kudi bena kuitabuja nabu. Ne ba bungi bavua banyingalala bikole bua bilema biabu.

Bantu aba bavuaku balekele Yehowa kashidi anyi? Tòo. Ba bungi bavua anu bu muimbi wa misambu wakasambila wamba ne: ‘Ngakupambuka bu mukoko mujimine; ukebe muena mudimu webe, bualu bua tshiena mpua mikenji yebe muoyo.’ (Musambu wa 119:176) Udiku udiumvua pebe mushindu au anyi?

Yehowa katu upua bantu bende badi bapambuke mu tshikumbi muoyo to. Kadi utu ubakeba, wenza nunku nangananga ku diambuluisha dia bena kuitabuja nabu. Tshilejilu, tukonkonone muvua Yehowa muambuluishe musadidi wende Yobo uvua mutuilangane ne ntatu ya bungi, bu mudi eyi: ditshioma, difuisha ne masama makole. Yobo wakatantamena kabidi mêyi mabi avuabu bamuamba kudi bantu bavua baye kudiye bua kumusamba. Kadi kavua muele Yehowa nyima musangu nansha umue to, nansha muvuaye musesuke mu meji imue misangu. (Yobo 1:22; 2:10) Mmushindu kayi uvua Yehowa muambuluishe Yobo bua kuakajaye meji ende?

Yehowa wakambuluisha Yobo ku butuangaji bua Elihu, uvua muena kuitabuja nende. Pavua Yobo muleje Elihu tunyinganyinga tuende, uvua muanji kumuteleja pashishe kumusakabi bua kuakula. Tshivuaye mua kuamba ntshinyi? Uvuaku mubipishe Yobo anyi mumuambe mêyi a kumupisha nawu peshi a bundu bua kuakajija meji ende anyi? Elihu uvuaku udimona mupite Yobo anyi? Nansha kakese! Ku diambuluisha dia nyuma muimpe, Elihu wakamba ne: ‘Ndi ku mêsu kua Nzambi bu muudi wewe; ndi mufuanyikija ku diima muomumue nebe.’ Pashishe wakajadikila Yobo ne: ‘Buôwa bua bualu buanyi kabuena mua kukutshinyisha nansha; kukuenzeja kuanyi kakuena kukunemeshila bujitu.’ (Yobo 33:6, 7) Pamutu pa Elihu kusakidila ntatu pa mikuabu ikavua nayi Yobo, wakamubela ne dinanga dionso ne kumukankamija muvuabi bikengela.

Umanye ne: tudi balongolole broshire eu ne lungenyi lua muomumue elu. Tshia kumpala, tuvua bateleje ne bakonkonone bimpe nsombelu ne miaku ya bantu ba bungi bavua basesuke. (Nsumuinu 18:13) Pashishe tuetu kubuela mu Bible, kukonkonona ne muoyo mujima miyiki ya muvua Yehowa muambuluishe bantu bende mu bikondo bia kale pavuabu batuilangane ne nsombelu ya muomumue ne iudi pebe nayi. Ku ndekelu, tuetu kusangisha miyuki ya mu Bible eyi pamue ne malu mamona a matuku etu aa bua kupatula broshire eu. Tudi tukulomba ne muoyo mujima bua kumubala. Umanye ne: tudi bakunange bikole.

Kasumbu Kaludiki ka Bantemu ba Yehowa