1, 2. Ndîba kayi divua Yezu mufike munda? Buvua bua tshinyi?

 YEZU uvua mumueneke ne tshiji tshikole; kuvua bualu buvua bumufikishe munda. Bidi mua kukukemesha, bualu uvua muntu mupole malu. (Matayi 21:5) Nansha nanku, wakashala anu mudikande, bualu tshiji tshiende tshivua tshia buakane. a Kadi ntshinyi tshivua tshifikishe munangi wa ditalala eu tshiji? Mmalu mabi matambe avuaye mumone.

² Yezu uvua munange ntempelo wa mu Yelushalema bikole. Bua buloba bujima, ntempelo ke muaba umue wa tshijila uvua mulongolola bua kutendelela Tatuende wa mu diulu. Bena Yuda ba miaba mivule bavua benza ngendu ya ntanta mile bua kuya kutendelelaku. Nansha bantu ba bisamba bia bende bavua batshina Nzambi bavua pabu balua kubuela mu lupangu lua ntempelo luvua lubalongoluela bua kutendelela. Kadi ku ntuadijilu kua mudimu wa Yezu, wakabuela mu ntempelo ne kusanganaye malu avua mamufikishe munda. Uvua musangane ntempelo mushale anu bu tshisalu menemene, kayi bu nzubu wa kutendelela to. Bangenda mushinga ne bashintudi ba makuta bavua buwulamu tente. Kadi bubi muaba au  buvua kuepi? Bantu abu bavua bangata ntempelo wa Nzambi anu bu muaba wa kuendela bantu mushinga pambidi, anyi mene kubiba. Mushindu kayi?—Yone 2:14.

3, 4. Mmunyi muvua bena lukuka bendela bantu mushinga pambidi mu nzubu wa Yehowa? Ntshinyi tshiakenza Yezu bua malu mabi au?

³ Bamfumu ba bitendelelu bavua bele mukenji ne: bantu bavua mua kufuta bitadi bia ku ntempelo anu ne makuta a bijanja a mushindu kampanda. Benyi bavua ne bua kushintula makuta abu bua kupeta a bijanja au. Bashintudi ba makuta bavua batekele mesa abu a dishintuila munda mua ntempelo, balomba muntu yonso uvua ushintula bua kubatentekela makuabu. Dipanyisha dia nyama divua padi dibuejija makuta. Benyi bavua bajinga kufila milambu bavua mua kusumba nyama pambelu mu tshimenga, kadi bantu bavua benza mudimu ku ntempelo bavua mua kuyibenga bipepele, bamba muvuayi kayiyi mikumbane. Kadi nyama ivuabu basumbisha ku ntempelo bavua mua kuyitaba anu ne lukasa. Basumbishi bavua imue misangu batua mishinga mipite bukole bualu bavua bamanye ne: bantu nebalue anu kubasumba. b Atshi katshivua anu bungenda mushinga bua lukuka patupu to, kadi tshivua mutshima wa dikema!

⁴ Yezu kavua mua kuitaba bua kumona malu mabi au to. Ntempelo uvua nzubu wa Tatuende. Wakenza mfimbu wa mionji, kuipataye bisumbu bia ngombe ne mikoko mu ntempelo. Pashishe kuyaye kudi bashintudi ba makuta,  kutonkola mesa abu. Anji fuanyikijabi muvua makuta onso a bijanja au matangalake panshi! Kusaminaye bapanyi ba nkutshi ne: “Umbushayi bintu ebi muaba eu!” (Yone 2:15, 16) Bidi bimueneka ne: muntu nansha umue kavua mupete makanda a kukandamena Yezu uvua ne dikima nunku to.

5-7. a) Mmunyi muvua nsombelu wa Yezu wa patshivuaye mu diulu mumuambuluishe bua kunanga buakane? Ntshinyi tshidi tshilejilu tshiende mua kutulongesha? b) Ntshinyi tshivua Yezu muenze bua kuluisha malu avua apendesha bumfumu bua Yehowa ne dîna diende?

⁵ Bangenda mushinga bakapingana kabidi mu ntempelo. Panyima pa bidimu bitue ku bisatu, Yezu kumbushaye kabidi malu mabi a muomumue au; pinapu wakatela mêyi avua Yehowa muakule ubipisha bavua bavuija nzubu wende “tshisokomenu tshia banyengianganyi ba bintu.” (Yelemiya 7:11; Matayi 21:13) Bushuwa, pavua Yezu mumone muvua bena lukuka badia bantu bintu ne banyanga ntempelo wa Nzambi, wakumvua anu muvua Tatuende mumvue pende. Bualu ebu kabuena butukemesha to! Bualu Yezu uvua mulonge malu a bungi kudi Tatuende wa mu diulu munkatshi mua bidimu bungi kabuyi kubala. Ke bualu kayi mmupiane ngikadilu wa Yehowa wa buakane. Nunku, tuetu basue kumanya buakane bua Yehowa bimpe, tudi ne bua kuelangana meji bua tshilejilu tshia Yezu Kristo.—Yone 14:9, 10.

⁶ Muana mulela umuepele wa Yehowa uvuaku pavua Satana mubande Yehowa Nzambi mudiye muena dishima ne mudiye ukokesha bibi. Uvua mumushiminyine bibi be! Pashishe, Muana wa Nzambi uvua kabidi mumvue pavua Satana muambe ne: muntu nansha umue kena mua kuenzela Yehowa mudimu bua dinanga to, kadi anu bua kudisankisha. Bushuwa, malu a dishima onso aa avua  manyingalaje Yezu bikole. Yezu uvua mua kuikala ne disanka dia bungi pakamanyaye ne: yeye ke uvua ne bua kutuishisha mafi a Satana aa ku ndekelu. (2 Kolinto 1:20) Mmunyi muvuaye mua kuenza bualu ebu?

⁷ Anu mutuvua babimone mu Nshapita wa 14, Yezu Kristo wakafila diandamuna dinene dia ndekelu dia bualu buvua Satana mubande nabu batendeledi ba Yehowa bua muoyo wabu mutoke. Mushindu au ke uvua Yezu muteke bishimikidi bivua mua kubingishisha bumfumu bua Yehowa kashidi ne kutumbishisha dîna diende. Bu mudi Yezu Mulombodi Munene udi Yehowa muteke, neajadike buakane bua Nzambi mu diulu ne pa buloba bujima. (Bienzedi 5:31) Pavuaye pa buloba, uvua muleje muvuaye ne buakane bua Nzambi. Yehowa wakamba bua Yezu ne: “Nenteke nyuma wanyi pambidi pende, nealeje bisamba tshidi kulumbuluisha kuakane.” (Matayi 12:18) Mmunyi muvua Yezu mukumbaje mêyi au?

8-10. a) Mmunyi muvua mikenji ya mukana ya bamfumu ba bitendelelu bena Yuda ipepejija bantu ba bisamba bia bende ne bantu bakaji? b) Mmunyi muvua mikenji ya mukana ayi mivuije mukenji wa Nsabatu wa Yehowa bujitu?

⁸ Yezu uvua munange mikenji ya Yehowa ne uvua uyitumikila. Kadi bamfumu ba bitendelelu ba mu tshikondo tshiende bavua bakonyangaja mikenji ayi ne benza nayi mudimu bibi. Yezu wakabambila ne: “Diakabi dienu nuenu bafundi ne Bafalese bena lubombo! . . . Nudi balengulule malu a mushinga mukole a mu Mikenji, mmumue ne: kulumbuluisha kuakane, luse ne lulamatu.” (Matayi 23:23) Kakuyi mpata, balongeshi ba mikenji ya Nzambi abu bavua babenga kuleja patoke “tshidi kulumbuluisha  kuakane.” Kadi bavua babuitshidija buakane bua Nzambi. Mushindu kayi? Tukonkononayi bilejilu bikese.

⁹ Yehowa uvua muambile bantu bende bua kubenga kubuelakana ne bisamba bia bampangano bivua bibanyunguluke. (1 Bakalenge 11:1, 2) Kadi bamue balombodi ba bitendelelu bavua basaka bantu bua kupetula bantu bonso bavua kabayi bena Yuda. Mu mukanda wa Mishna muvua kabidi mukenji eu: “Kabena mua kushiya ngombe miaba idi bantu ba bisamba bia bende batudila to, bualu batu bamba mutubu balala ne nyama.” Malu avuabu babanda nawu bantu ba bisamba bia bende bonso patupu aa kaavua malelela to, ne kaavua apetangana ne tshivua mikenji ya Mose isua kuamba to. (Lewitiki 19:34) Kuvua mikenji mikuabu ya bantu ivua ipepeja bantu bakaji. Tshilejilu, mikenji ya mukana patupu ivua yamba ne: mukaji kavua mua kuenda ku luseke lua bayende padibu baya mu njila to, kadi anu panyima pende. Muntu mulume kavua mua kuyukila ne muntu mukaji muaba udi bantu to, nansha yeye mukajende. Anu muvuabi bua bapika, bakaji kabavua ne bukenji bua kujadika buntemu ku tubadi to. Kuvua too ne disambila kampanda dia bantu balume bela Nzambi tuasakidila bua muvuaye kayi mubafuke bantu bakaji.

¹⁰ Bamfumu ba bitendelelu bakavua balonda anu mikenji ya bantu pamutu pa mikenji ya Nzambi. Tshilejilu, mukenji wa Nsabatu uvua ukandika anu bua kuenza mudimu dituku adi patupu, bualu uvua muditeke bu dituku dia kutendelela, dia malu a mu nyuma ne dia kuikisha. Kadi Bafalesa bakavuija mukenji au bujitu kudi bantu. Bobu nkayabu bakabanga kufila diumvuija dia tshivua mudimu uvuabu bakandike au. Bakabikila malu a mishindu mishilashilangane matue ku 39 bu mudimu au, bu mudi kunowa ne kulemba. Malu aa akajudija nkonko mipite bungi. Muntu yeye mushipe mutole wa kabuasa dituku  dia Nsabatu, mmuenze mudimu wa bulembi anyi? Yeye mubakule dianza dia ntete bua kudia padiye uya mu njila, mmunowe anyi? Yeye muondope mubedi, mmuenze mudimu anyi? Nkonko eyi bavua bayilondolola ne mikenji mikole ivua itangila kalu ne kalu konso.

11, 12. Mmunyi muvua Yezu muleje muvuaye kayi muanyishe mikenji ya bantu ivua Bafalese bele?

¹¹ Mu nsombelu wa mushindu au, mmunyi muvua Yezu mua kuambuluisha bantu bua kumvuabu tshidi buakane bumvuija? Wakenza malu ne dikima mu ndongeshilu wende ne mu nsombelu wende kayi utshina bamfumu ba bitendelelu abu. Tuanji tukonkononayi amue a ku malongesha ende. Wakabipisha mikenji mipite bungi ivuabu bobu bele, wamba ne: “Nudi nuvuija dîyi dia Nzambi tshianana ku bilele bienu binudi nushila bantu.”—Mâko 7:13.

¹² Yezu wakalongesha ne dikima dionso ne: Bafalesa bavua batupakane mu mukenji wa Nsabatu, kabavua bumvue tshivuawu umvuija to. Yezu wakamba ne: Masiya udi “Mukalenge wa Nsabatu,” nunku udi ne bukenji bua kuondopa bantu dia Nsabatu. (Matayi 12:8) Bua kujadika mêyi ende aa, wakenza bishima bia kuondopa bantu ba bungi patoke dituku dia Nsabatu. (Luka 6:7-10) Bishima ebi bivua mundidimbi wa muikalaye mua kuondopa bantu pa buoba bujima mu Bukokeshi buende bua bidimu tshinunu. Bukokeshi bua bidimu tshinunu ebu ke buikala dituku dinene dia Nsabatu dikala bena lulamatu bonso mua kuikisha ndekelu wa bionso ku ntatu ya mu bupika bua bidimu nkama ne nkama bua mpekatu ne lufu.

13. Mmukenji kayi wakedibua bua mudimu wakenza Yezu pa buloba? Mmunyi muvuawu mushilangane ne mikenji ya Mose?

¹³ Yezu uvua kabidi muleje tshidi buakane bumvuija pakelaye mukenji mupiamupia udibu babikila ne: “mukenji wa Kristo” wakatuadija mudimu wawu yeye mumane kujikija mudimu wende pa buloba. (Galatiya 6:2)  Uvua mushilangane ne mikenji ya Mose, bualu kawuvua mutambe kuimanyina pa mikenji mifunda to, kadi mpa mêyi manene. Kadi munda mua mukenji eu muvua imue mikenji mitela buludiludi. Yezu wakabikila umue wa kudiyi bu “mukenji mupiamupia.” Yezu wakalongesha bayidi bende bonso bua kunangangana anu bu muvuaye mubanange. (Yone 13:34, 35) Bushuwa, bavua bamanyina bantu bonso bavua batumikila “mukenji wa Kristo” ku dinanga dia kudifila bua bakuabu.

14, 15. Mmunyi muvua Yezu muleje muvuaye mumanye mikalu ya bukokeshi buende? Nku tshinyi kudi bualu ebu butukolesha?

¹⁴ Yezu kavua anu ulongesha dinanga patupu to, kadi uvua utumikila “mukenji wa Kristo” mu nsombelu wende mujima. Tukonkononayi mishindu isatu ivua Yezu muleje tshidi buakane bumvuija mu bikadilu biende.

¹⁵ Tshia kumpala, Yezu uvua ubenga ne muoyo mujima bua kuenza bualu nansha bumue buvua kabuyi buakane. Ukadi pamuapa mudimuene ne: malu mabi a bungi atu enzeka padi diambu dipita bantu bapange bupuangane ne padibu basambuka mikalu ya bumfumu buabu. Kadi Yezu yeye kavua nanku to. Musangu mukuabu, muntu kampanda wakalomba Yezu ne: “Mulongeshi, ambila muanetu angabanyine panyi bumpianyi.” Yezu kumuandamuna ne: “Mulumiana, uvua munteke mulumbuluishi anyi mukoshi wa bilumbu pankatshi penu nuenu babidi nnganyi?” (Luka 12:13, 14) Bualu ebu kabuenaku bukemesha anyi? Yezu uvua ne lungenyi ne busunguluji ne bukokeshi buvua Nzambi mumupeshe kupita bantu bonso ba pa buloba. Kadi wakabenga kudibueja mu malu au, bualu kavua mupeshibue bukokeshi busunguluke bua kuenza nanku to. Yezu uvua anu muena bupuekele misangu yonso, anu muvuaye nabu mu diulu bidimu bipite bungi kumpala  kua kuluaye pa buloba. (Yuda 9) Mushindu udi Yezu weyemena Yehowa ne kudipuekesha kuonso bua kumulejaye tshidi tshiakane udi uleja mudiye ne tshikadilu tshimpe tshia dikema.

16, 17. a) Mmunyi muakaleja Yezu buakane buende pavuaye uyisha lumu luimpe? b) Mmunyi muakalejaye ne: buakane buende buvua ne luse?

¹⁶ Tshibidi, Yezu wakaleja buakane buende mu mushindu uvuaye uyisha lumu luimpe lua Bukalenge bua Nzambi. Kavua ne kansungansunga to. Kadi uvua udifila ne muoyo mujima bua kuyisha bantu bonso, babanji peshi bapele. Kadi Bafalesa bobu bavua bapepeja bapele bavua bantu bapuekele, bababikila bu ba am-haarets, anyi “bantu ba mu musoko.” Yezu wakakaja malu a kansungansunga au ne dikima dionso. Pavuaye uyisha bantu lumu luimpe anyi kabidi pavuaye udia nabu, ubadisha, ubondopa ne ubajula ku lufu, uvua utumbisha buakane bua Nzambi udi musue bua lumu luimpe lufike kudi “bantu ba mishindu yonso.” c—1 Timote 2:4.

¹⁷ Tshisatu, buakane bua Yezu buvua ne luse lua bungi. Wakadienzeja bikole bua kuambuluisha bantu babi. (Matayi 9:11-13) Wakambuluisha bantu bavua kabayi ne bukole bua kudiambuluisha. Tshilejilu, Yezu kavua mutue ku tshia bamfumu ba bitendelelu bua kusakangana ku dikina bantu ba bisamba bia bende to. Nansha muvua Yezu muluile diambedi bena Yuda, wakambuluisha ne kuyisha bamue ba ku bantu ba bisamba bia bende ne luse luonso. Wakitaba bua kuondopa mfumu wa basalayi ba bena  Lomo mu tshishima, kuambaye ne: “Tshiena muanji kumona muntu ne ditabuja dinene nunku mu Isalele to.”—Matayi 8:5-13.

18, 19. a) Mmu mishindu kayi muvua Yezu mupeshe bantu bakaji lumu? b) Mmunyi mudi tshilejilu tshia Yezu tshituambuluisha bua kumona mudi dikima dipetangana ne buakane?

¹⁸ Bia muomumue, Yezu kavua wanyisha mushindu uvuabu bamona bantu bakaji tshikondo atshi to. Kadi wakenza yeye malu avua makane ne dikima dionso. Bavua bangata bakaji bena Samaleya bu bavua kabayi bakezuke anu bu bantu ba bisamba bia bende. Nansha nanku, Yezu kavua muelakane bua kuyisha mukaji muena Samaleya ku tshina tshia mâyi tshia Suka to. Mu bulelela, mukaji au ke muntu wa kumpala uvua Yezu muambile patoke muvuaye Masiya mulaya. (Yone 4:6, 25, 26) Bafalesa bavua bamba ne: kabavua ne bua kulongesha bakaji mikenji ya Nzambi to, kadi Yezu yeye wakafila dîba dia bungi ne bukole buende bua kuyisha bantu bakaji. (Luka 10:38-42) Nansha muvua bilele biabu bileja ne: bakaji kabavua mua kujadika malu avua bantu mua kuitaba, Yezu yeye wakapesha bakaji ba bungi lumu lua kumumona ba kumpala pavuaye mubike ku lufu. Wakabalomba mene bua kuyabu kumanyisha bayidi bende ba balume bualu bua dikema abu.—Matayi 28:1-10.

¹⁹ Bushuwa, Yezu uvua muleje bisamba tshidi buakane bumvuija. Misangu ya bungi, uvua uteka muoyo wende mu njiwu pavuaye wenza bualu ebu. Tshilejilu tshia Yezu tshidi tshituambuluisha bua kumanya ne: bidi bikengela kuikala ne dikima dia bungi bua kuimanyina buakane bulelela. Nunku mbikumbanyine padibu bamubikila ne: “Ntambue wa mu tshisa tshia Yuda.” (Buakabuluibua 5:5) Vuluka ne: nyama wa ntambue udi tshimfuanyi tshia buakane buleja ne dikima. Nunku, mu matuku makese emu, Yezu neabueje buakane bua bungi pa buloba, mbuena  kuamba ne: neajadike “kulumbuluisha kuakane pa buloba.”—Yeshaya 42:4.

20, 21. Mu matuku etu aa, mmunyi mudi Mukalenge Masiya usakangana ku buakane pa buloba bujima ne mu tshisumbu tshia bena Kristo?

²⁰ Katshia Yezu walua Mukalenge Masiya mu 1914, mmusake ba pa buloba ku kulumbulula kuakane. Mmushindu kayi? Udi ulombola mudimu wa dikumbaja dia mulayi wende wa buprofete udi mu Matayi 24:14. Bayidi ba Yezu badi pa buloba mbalongeshe bantu ba matunga onso bulelela bua Bukalenge bua Yehowa. Anu bu Yezu, mbayishe bantu bonso: bakulumpe ne bana, bakaji ne balume, babanji ne bapele, babapeteshe mushindu wa kumanya Yehowa Nzambi wa buakane.

²¹ Yezu udi kabidi usakangana ku buakane mu tshisumbu tshia bena Kristo tshidiye ulombola. Anu mukavua Bible mulaye, mmufile “mapa mikale bantu,” bakulu bena Kristo ba lulamatu badi balombola midimu mu tshisumbu. (Efeso 4:8-12) Padi balume aba badisha tshisumbu tshia mikoko ya Nzambi tshia mushinga mukole, badi bidikija Yezu Kristo padibu basaka bakuabu ku buakane. Batu anu bamanye ne: Yezu mmusue bua bikale benzela mikoko yende malu ne buakane, kabayi batangila tshidibu, mianzu idibu nayi, anyi bintu bidibu nabi to.

22. Yehowa udi umvua bishi bua malu mabi adi matampakane mu bulongolodi ebu? Mmusungule Muanende bua kubuenzela tshinyi?

²² Kadi mu matuku makese emu, Yezu neajadike buakane pa buloba mu mushindu utu kawuyi muanji kuenzeka to. Lelu malu mabi mmatampakane bikole pa buloba. Bana bonso badi bafua lelu bua nzala badi bafua anu bua dipangika dibi ditambe dia buakane, nangananga patudi tumona bungi bua makuta adi atuka ne dîba didibu bajimija anu  bua kuenza bingoma binene bia mvita ne bua kusankisha banangi ba masanka. Miliyo ne miliyo ya bantu badi bafua tshidimu tshionso etshi mbumue bua ku malu mabi a bungi a dipanga buakane adi asaka Yehowa ku tshiji tshia buakane. Mmusungule Muanende bua aluishe bulongolodi bubi ebu buonso mvita ya buakane yajikija malu mabi onso bua kashidi.—Buakabuluibua 16:14, 16; 19:11-15.

23. Pajika mvita ya Armagedone, Kristo neajadike kulumbulula kuakane bua kashidi mushindu kayi?

²³ Kadi kulumbulula kuakane kua Yehowa kakuena kumulomba anu bua kubutula bantu babi patupu to. Mmuteke Muanende kabidi bua kukokesha bu “Mukalenge wa Ditalala.” Pajika mvita ya Armagedone, bukokeshi bua Yezu nebujadike ditalala pa buloba bujima, ne yeye neakokeshe ne “kulumbuluisha kuakane.” (Yeshaya 9:6, 7) Pashishe, neasanke bua kumbushila bantu malu mabi onso adi mabakebele ntatu ne makenga bipite bungi pa buloba. Yezu neashale utumbisha buakane bupuangane bua Yehowa kashidi ne tshiendelele. Nanku mbimpe tuetu kudienzeja bua kuidikija buakane bua Yehowa kutuadijila anu ku mpindieu. Netumone mutudi mua kukumbaja bualu ebu.