1, 2. a) Nkonko kayi iuvua wewe mua kuela Nzambi? b) Ndukonko kayi luvua Mose muele Nzambi?

 FUANYIKIJA ne: udi uyukila ne Nzambi. Si bidi bikemesha bua kumona Mfumu Mutambe Bunene wa diulu ne buloba uyukila nebe, ki mmuomu anyi? Kumpala, udi mua kuanji kuelakana bua kuakula, kadi pashishe wewe kutuadija kuyukila nende. Udi ukuteleja, ukuandamuna, ukushila ne mpunga wa kumuela lukonko luonso luudi musue. Mpindieu ndukonko kayi luudi wewe mua kumuela?

² Ku kale menemene kuvua muntu uvua bualu ebu buenzekele. Diende divua Mose. Kadi lukonko luvuaye musungule bua kuela Nzambi ludi mua kukukemesha. Kakakonka malu avua amutangila yeye anyi a ntatu ya bukua bantu nansha. Kadi wakebeja Nzambi dîna diende. Bidi pamuapa mua kukukemesha, bualu Mose ukavua mumane kumanya dîna dia Nzambi. Nanku, lukonko luende alu luvua ne bua kuikala ne diumvuija kampanda dinene. Bushuwa, elu ke lukonko lua mushinga luvua Mose mua kuela. Diandamuna dialu didi ditutangila tuetu bonso. Didi mua kukuambuluisha bua kumanya tshia kuenza bua kusemena pabuipi ne Nzambi. Tuanjayibi kukonkonona muvua muyuki wa dikema au mupitakane.

3, 4. Mmalu kayi akafikisha Mose ku diyikila ne Nzambi? Muyiki au uvua muimanyine pa bualu kayi bunene?

³ Mose uvua ne bidimu 80. Ukavua muenze bidimu 40 kule ne bana babu bena Isalele bavua mu bupika mu Ejipitu. Dituku dikuabu pavuaye udiisha bimuna bia muku wende, wakamona bualu bua dikema. Wakamona  kamutshi ka mêba mu tshisuku kalakuka kapia, kadi kakayi koshika to. Kavua anu katema kapia ku mukuna, ke Mose kusemenaye pabuipi bua kumona. Uvua ne bua kuikala mupapuke pakumvuaye dîyi difumina mu kapia dimubikila. Nzambi wakayukila nende mutantshi mule ku butuangaji bua muanjelu. Anu muudi mua kuikala mumanye, nansha muvua Mose ne buôwa, Nzambi wakamuambila bua kumbuka muaba wa ditalala uvuaye, kupingana mu Ejipitu bua kupatula bena Isalele mu bupika.—Ekesode 3:1-12.

⁴ Dîba adi, Mose uvua mua kuela Nzambi lukonko luonso luvuaye musue. Kadi mona lukonko luvuaye mumuele: “Fuanyikija ne: ndi nya kudi bena Isalele ne mbambila ne: ‘Nzambi wa bankambua benu mmuntume kunudi,’ bobu bangebeje ne: ‘Dîna diende nnganyi?’ Nembambile tshinyi?”—Ekesode 3:13.

5, 6. a) Ndilongesha kayi dipepele didi lukonko lua Mose lutulongesha? b) Mbualu kayi bubi budi bantu benze ne dîna dia Nzambi? c) Bu mudi Nzambi mutuleje dîna diende, mmusue tshinyi?

⁵ Tshia kumpala, lukonko alu ludi lutulongesha ne: Nzambi utu ne dîna. Nansha mudi dilongesha edi dikale dipepele ne ba bungi badilengulula, tuetu katuena ne bua kudimona bu bualu bua patupu to. Mbumbushe dîna dia Nzambi mu nkudimuinu ya Bible ya bungi, bapingajamu mianzu bu mudi “Mukalenge” ne “Nzambi.” Ebu mbumue bua ku malu mabi matambe adi bitendelelu bienze. Tshilejilu, wewe musue kumanya muntu bimpe, si udi umuebeja dîna diende, ki mmomu? Ke mudibi kabidi patudi tujinga kumanya Nzambi. Nzambi ki mmupangile dîna to. Kena kule ne bantu to. Ki mbikole bua kumumanya to. Nansha mudiye kayi umueneka, mmuntu mulelela udi ne dîna. Diende n’Yehowa.

⁶ Bualu bukuabu, bu mudi Nzambi mutumanyishe dîna  diende mmusue bua tumumanye ne tusemene pabuipi nende. Kumumanya ne kusemena pabuipi nende ke bualu butambe buimpe butudi mua kuenza. Kadi Yehowa ki mmutuambile anu dîna diende nkayadi to. Mmutulongeshe kabidi tshidi bumuntu buende.

7. a) Dîna dia Nzambi didi diumvuija tshinyi? b) Ntshinyi menemene tshivua Mose musue kumanya pavuaye mukonke Nzambi dîna diende?

⁷ Yehowa wakadisunguila dîna didi ditulongesha malu a bungi adi amutangila. Dîna “Yehowa” didi diumvuija ne: “Yeye udi uvuija.” Kakuena muntu bu yeye mu diulu nansha pa buloba to, bualu wakafuka bintu bionso. Udi kabidi wenza bua disua diende dikumbane, ne udi mua kuenza bua batendeledi bende badi bapange bupuangane balue tshionso tshidiye musue bua balue. Bualu ebu budi butusaka bua kumunemeka bikole. Kadi dîna dia Nzambi didi mua kutulongesha malu makuabu a bungi. Bidi bimueneka ne: Mose uvua musue kumanya malu makuabu a bungi. Bualu ukavua mumanye ne: Yehowa ke mufuki ne uvua mumanye kabidi dîna dia Nzambi. Dîna adi kadivua bualu bupiabupia kudiye to. Kukavua bidimu nkama ne nkama bivua bantu bamanye dîna dia Nzambi. Bushuwa, pavua Mose mukonke Nzambi dîna, uvua ujinga kumanya tshivua muena dîna adi. Mmuenze anu bu uvua wamba ne: ‘Mmalu kayi adi akutangila angambila bantu bebe bena Isalele, abafikisha ku dikuitabuja adi mua kubajadikila ne: neubapandishe bulelela?’

8, 9. a) Mmushindu kayi uvua Yehowa muandamune lukonko lua Mose? Mmunyi mudibu bakudimune diandamuna diende adi mu Bible mikuabu? Bua tshinyi nkudimuinu au ki mmuimpe to? b) Tshiambilu tshia “Nendue tshindi nsungula bua kulua” tshidi tshiumvuija tshinyi?

⁸ Yehowa wakandamuna lukonko alu, kumuambilaye  bualu kampanda budi busankisha bua bumuntu buende: bualu abu budi bupetangana ne diumvuija dia dîna diende. Wakambila Mose ne: “Nendue tshindi nsungula bua kulua.” (Ekesode 3:14) Mu Bible ya bungi, mbakudimune tshiambilu etshi ne: “Ndi mundi.” Kadi nkudimuinu idibu bakudimune mêyi aa ne meji onso idi ileja ne: Nzambi kavua anu ushindika bualu bua dikalaku diende patupu to. Yehowa uvua ulongesha Mose (nansha tuetu kabidi) ne: Uvua mua ‘kusungula bua kulua’ tshionso tshivua tshikengedibua bua kukumbaja malu avuaye mulaye. Bible wa Joseph Rotherham udi ukudimuna mêyi aa ne: ‘Nendue tshingikala musue.’ Mumanyi mukuabu wa tshiena Ebelu tshia mu Bible udi umvuija mvese eu ne: “Nansha bualu anyi dijinga dikalaku dia mushindu kayi . . . , Nzambi ‘nealue’ mukumbaji wa dijinga adi.”

⁹ Bualu abu buvua bumvuija tshinyi kudi bena Isalele? Nansha bu tshipumbishi tshia mushindu kayi mua kubatulukila anyi lutatu lua mushindu kayi mua kubakuata, Yehowa uvua anu mua kulua tshionso tshivua tshikengedibua bua kubapatula mu bupika ne kubafikisha mu Buloba bulaya. Bushuwa, dîna diende divua dibasaka bua kumueyemena. Ke tshididi mua kutuenzela petu lelu. (Misambu 9:10) Mbua tshinyi?

10, 11. Mmunyi mudi dîna dia Yehowa ditufikisha ku dimona ne: mmumanye mua kuya ne malu bilondeshile nsombelu, ne udi Tatu muimpe wa dikema? Fila tshilejilu.

¹⁰ Tshilejilu, baledi mbamanye mutubi bikengela kuya ne malu bilondeshile mudi nsombelu mu dikolesha dia bana babu. Mu bule bua dituku dimue, bidi mua kulomba muledi bua kuenza malu bu mudi kuondopa bana, kubalambila, kubalongesha, kubanyoka, kukosa nsambu yabu, ne kuenza malu makuabu. Baledi ba bungi batu bumvua bibatonda padibu bamona midimu bungi nunku  mibindile bua kuenza. Badi bamona mudi muanabu ubeyemena ne muoyo mujima mushindike ne: papa anyi mama udi mua kungondopa mputa, kunkosela bilumbu, kundongoluela bintu bianyi bia manaya ne kuandamuna lukonko kayi luonso ludi mua kunduila. Bamue baledi kabatu badiumvua bakumbane bua kubeyemenabu mushindu eu to, ne misangu mikuabu batu bumvua bibatonda padibu bapanga tshia kuenza. Kabatu badimona bakumbane bua kukumbaja mivule ya ku midimu eyi to.

¹¹ Yehowa pende mmuledi wa dinanga. Kadi mmushilangane ne baledi bualu yeye utu anu ulua tshionso tshidi tshikengela bua kukumbajila bana bende badi pa buloba majinga abu bimpe bitambe. Nunku, dîna diende dia Yehowa didi dituambuluisha bua kumumona bu Tatu muimpe wa dikema. (Yakobo 1:17) Mose ne bena Isalele bakuabu bonso bavua balamate Yehowa bakadimuenena muvuaye mukumbanyine dîna diende. Bavua badimuenene mu mushindu wa dikema muvuaye mudivuije Mfumu wa basalayi, Mukokeshi wa bionso bidi mu diulu ne pa buloba, Muedi wa mikenji udi kayi kuambangana nende, Mulumbuluishi, Mufuki muena meji, Mufidi wa biakudia ne mâyi, Mulami wa bilamba ne bisabata kabiyi bisunsuka, ne Muenji wa malu makuabu kabidi.

12. Ndishilangana kayi divua pankatshi pa mushindu uvua Palô ne Mose bangata Yehowa?

¹² Nunku, Nzambi mmutumanyishe dîna diende, mutubuluile malu adi asankisha a bumuntu buende yeye muena dîna edi, muenze too ne malu adi aleja ne: bidiye udiamba yeye muine mbilelela. Kakuyi mpata, Nzambi mmusue bua tumumanye. Ntshinyi tshitudi petu mua kuenza? Mose uvua musue kumanya Nzambi. Dijinga diende dikole adi diakakudimuna nsombelu wende, kumufikishadi ku disemena pabuipi menemene ne  Tatuende wa mu diulu. (Nomba 12:6-8; Ebelu 11:27) Kadi bantu ba bungi ba tshikondo tshia Mose kabavua ne dijinga dia buena diende to. Pavua Mose mutele dîna dia Yehowa kumpala kua Palô, mukalenge wa Ejipitu muena diambu au wakamuandamuna ne: “Yehowa nnganyi?” (Ekesode 5:2) Palô kavua musue bua bamuambile malu a Yehowa to. Uvua upepeja Nzambi wa Isalele umuangata bu uvua kayi ne mushinga. Lungenyi alu ke ludi nalu bantu ba bungi lelu eu. Ludi lubapangisha bua kumanya dilongesha didi dipite malongesha onso dia ne: Yehowa udi Mukalenge Mutambe Bunene.

13, 14. a) Bua tshinyi Yehowa udi ne mianzu ya bungi mu Bible? Tela imue ya kudiyi. (Bala  kazubu kadi mu dibeji dia 16.) b) Bua tshinyi Yehowa nkayende ke udi mukumbane bua kubikidibua bu “Mukalenge Mutambe Bunene”?

¹³ Yehowa mmumanye mua kuya ne malu bimpe menemene bilondeshile nsombelu, ke bualu kayi udi ne mianzu ya bungi mu Bible idi mimukumbanyine. Mianzu eyi ki mmipite dîna diende to, kadi idi itulongesha malu a bungi a tshidi dîna diende diumvuija. Tshilejilu, badi bamubikila ne: “Mukalenge Mutambe Bunene Yehowa.” (2 Samuele 7:22) Muanzu munene udi mu Bible misangu ya bungi au udi utuleja bunene bua Yehowa. Yeye nkayende ke udi ne bukenji bua kuikala Mukokeshi wa diulu ne buloba. Mona bua tshinyi tudi tuamba nanku.

¹⁴ Yehowa nkayende ke Mufuki. Buakabuluibua 4:11 udi wamba ne: “Wewe, Yehowa Nzambi wetu, udi mukumbane bua kuangata butumbi ne bunême ne bukole, bualu wakafuka bintu bionso, ne bua disua diebe biakikalaku ne biakafukibua.” Kakuena muntu nansha umue udi mukumbanyine makumbu a nunku to. Bintu bionso bidi mu diulu ne pa buloba mbifike ku dikalaku anu bua Yehowa.  Kakuyi mpata, Yehowa mmukumbanyine bunême, bukole ne butumbi bidi biakanyine Mukalenge Mutambe Bunene udi Mufuki wa bintu bionso.

15. Bua tshinyi Yehowa udi ubikidibua ne: “Mukalenge wa tshiendelele”?

¹⁵ Muanzu mukuabu udi muakanyine anu Yehowa nkayende ngua “Mukalenge wa tshiendelele.” (1 Timote 1:17; Buakabuluibua 15:3) Muanzu eu udi umvuija tshinyi? Mbikole bua tuetu kubiumvua bualu lungenyi luetu ndushadile; kadi Yehowa ngua kashidi bualu utu anuku ne neashalaku kashidi. Misambu 90:2 udi wamba ne: “Katshia ku bikondo bia tshiendelele too ne ku bikondo bia tshiendelele, wewe udi Nzambi.” Nunku, Yehowa katu muanji kuikala ne tshibangidilu to; utu anu kuoku kuonso eku. Mmukumbane kubikidibua ne: “Wa Kale wa Matuku a Bungi” bualu uvuaku kashidi ne kashidi kumpala kua muntu anyi tshintu kayi tshionso tshia mu diulu anyi pa buloba kufukibua. (Danyele 7:9, 13, 22) Nunku Yehowa udi ne bukenji bua kukokesha bantu bonso ne bintu bionso.

16, 17. a) Bua tshinyi katuena mua kumona Yehowa? Bualu ebu kabuena mua kutukemesha bua tshinyi? b) Nku tshinyi kudi Yehowa muntu mulelela menemene kupita tshintu kayi tshionso tshitudi mua kumona anyi kulenga?

¹⁶ Kadi anu bu Palô, bantu bakuabu badi bela bukenji buende abu mpata. Lutatu lunene ludiku ndua ne: bantu bapange bupuangane batu batamba kueyemena anu bintu bidibu bamona ne mêsu. Katuena mua kumona Mukalenge Mutambe Bunene to; bualu udi nyuma, bantu kabena mua kumumona nansha. (Yone 4:24) Bualu bukuabu: muntu wa mashi ne mâyi yeye mudidinge anu muimane kumpala kua Yehowa Nzambi, udi ufua. Yehowa nkayende wakambila Mose ne: “Kuena mua kumona mpala wanyi to, bualu kakuena muntu udi mua kumona  mpala wanyi ne kushalaye ne muoyo to.”​—Ekesode 33:20; Yone 1:18.

¹⁷ Bualu ebu kabuena mua kutukemesha to. Bidi bimueneka ne: Mose wakamona anu ndambu wa butumbi bua Yehowa ku butuangaji bua muanjelu uvua uleja mpala wa Nzambi. Tshiakenzeka ntshinyi? Mpala wa Mose wakashala ‘utua nsese’ mutantshi. Bena Isalele bakatshina nansha bua kutangilangana ne Mose mpala ne mpala. (Ekesode 33:21-23; 34:5-7, 29, 30) Bushuwa, muntu nansha umue kena mua kutangila Mukalenge Mutambe Bunene mu butumbi buende buonso to. Bidiku biumvuija ne: nansha mutudi katuyi mua kumumona anyi kumulenga bu bintu bikuabu bionso, ki mmuntu mulelela anyi? Mmuntu mulelela. Tshilejilu, tutu tuitaba bipepele dikalaku dia bintu bivule bitutu katuyi tumona, bu mudi lupepele, nzembu ne meji atutu tuela. Kabidi Yehowa utu anuku, katu ushintuluka mu kupita kua bidimu nansha biobi miliyare ne miliyare to. Mushindu au ke udi Yehowa muntu mulelela menemene kupita tshintu kayi tshionso tshitudi mua kumona anyi kulenga, bualu bintu bitudi tulenga bitu bikulakaja bibola. (Matayi 6:19) Kadi tudiku ne bua kumumona bu bukole kampanda budi kabuyi bumueneka anyi bu udi kule netu kayi ututabalela anyi? Tumonayi.

18. Ntshikena kumona kayi tshivua Yehezekele mumone? Mpala inayi ya ‘bifukibua bidi ne muoyo’ bidi pabuipi ne Yehowa idi ileja tshinyi?

¹⁸ Nansha mutudi katuyi mua kumona Nzambi, kudi mvese ya mu Bible idi ne malu mimpe ne itumanyisha amue malu a mu diulu. Nshapita wa kumpala wa Yehezekele udi ujadika bualu ebu. Mu tshikena kumona, Yehezekele wakamona tshitupa tshia mu diulu tshia bulongolodi  bua Yehowa tshienze bu ditempu dinene. Mushindu udiye umvuija bifukibua bia bukole bia mu nyuma bidi binyunguluke Yehowa ke udi utamba kukemesha. (Yehezekele 1:4-10) ‘Bifukibua bidi ne muoyo’ abi bidi pabuipi menemene ne Yehowa, ne tshimuenekelu tshiabi tshidi tshitulongesha bualu kampanda bua mushinga budi butangila Nzambi udibi bikuatshila mudimu. Tshionso tshia kudibi tshidi ne mpala inayi: wa ngombe, wa ntambue, wa nyunyi wa mukanku ne wa muntu. Mpala ayi idi ileja ngikadilu minene inayi idi yenza bumuntu bua Yehowa.​—Buakabuluibua 4:6-8, 10.

19. Nngikadilu kayi udi a) mpala wa ngombe uleja? b) mpala wa ntambue uleja? c) mpala wa nyunyi wa mukanku uleja? d) mpala wa muntu uleja?

¹⁹ Ngombe nnyama utu ne bukole bua bungi. Ke bualu kayi Bible utu umutela misangu ya bungi patuyi wakula bua bukole. Kadi ntambue yeye utu misangu ya bungi tshimfuanyi tshia buakane, bualu buakane bua bushuwa butu bulomba dikima. Ntambue mmumanyike bua dikima diende. Nyunyi ya mikanku itu mimanyike bua lumonu luayi lutue, imona too ne tuntu tukese ntanta wa kilometre ne kilometre. Nanku, mpala wa mukanku udi mua kuikala tshimfuanyi tshia meji matue a Nzambi a dimuenena malu kule. Kadi mpala wa muntu udi umvuija tshinyi? Bushuwa, bu mudi muntu mufukibue mu tshimfuanyi tshia Nzambi, anu yeye ke udi ne mushindu wa kuleja dinanga didi ngikadilu munene wa Nzambi. (Genese 1:26) Mu Bible, mbakule bikole bua ngikadilu ya Yehowa eyi: bukole, buakane, meji ne dinanga; ke bualu kayi idi mua kubikidibua ne: nngikadilu mitambe bunene ya Nzambi.

20. Tudiku mua kutshina ne: Yehowa udi mua kuikala mushintuluke anyi? Bua tshinyi udi wamba nanku?

²⁰ Katshia Bible umvuija mutu Nzambi, tudiku mua  kutshina ne: mukadi bidimu binunu ne binunu bipite udi mua kuikala mushintuluke anyi? Tòo, ngikadilu ya Nzambi kayitu ishintuluka to. Udi wamba ne: “Meme ndi Yehowa; tshiena nshintuluka to.” (Malaki 3:6) Pamutu pa Yehowa kushintuluka tshianana tshianana, mmudileje mudiye Tatu muimpe mu mushindu udiye wenza malu mu nsombelu kayi yonso. Ngikadilu yende mitambe buimpe eyi itu imuenekela mu malu adiye wenza. Dinanga ke ngikadilu mutambe bunene ku ngikadilu ya Nzambi yonso. Didi dimuenekela mu malu onso adiye wenza. Udi wenza malu ne bukole ne buakane ne meji mu dinanga dionso. Bulelela, Bible udi uleja bualu bua dikema budi butangila Nzambi ne ngikadilu wende eu. Udi wamba ne: “Nzambi udi dinanga.” (1 Yone 4:8) Bible kena wamba ne: Nzambi udi ne dinanga anyi ne: mmuena dinanga to. Kadi udi wamba ne: Nzambi udi dinanga. Dinanga ke didi dienza bumuntu buende buine. Diodi ke didi dimusaka bua kuenza bionso bidiye wenza.

21. Patudi tuenda tumanya ngikadilu ya Yehowa bimpe menemene, netumvue bishi?

²¹ Ukadiku mumone muana mutekete ufunkuina balunda bende tatuende ne disanka ne kudisua kuonso wamba ne: “Papa wanyi nyeye eu” anyi? Batendeledi ba Yehowa badi ne malu makumbane adi abasaka bua kudiumvua pabu mushindu eu bua bualu buende. Bible ukavua mumanyishe tshikondo tshikala bantu bena lulamatu mua kuamba ne disanka ne: “Tangilayi! Eu udi Nzambi wetu!” (Yeshaya 25:8, 9) Paudi wenda upeta dimanya ditue dia ngikadilu ya Yehowa, neubange kumvua bimpe menemene ne: udi mupete Tatu muimpe wa dikema.

22, 23. Mmunyi mudi Bible umvuija Tatu wetu wa mu diulu? Mmunyi mutudi bamanye ne: mmusue bua tuikale nende pabuipi?

²² Mbiumvuike bimpe ne: Yehowa Tatu wetu mmutunange ne udi ututabalela. Mmusue tudia nende bulunda ne kena kule netu bu mutu bantu bakuabu bamba to. Bivua mua kutukolela bua kusemena pabuipi ne Nzambi udi kayi ne musangelu; kadi Bible kena umvuija Tatu wetu wa mu diulu nanku to. Udi umubikila ne: “Nzambi wa disanka.” (1 Timote 1:11) Utu umvua bimpe anyi bibi. Utu umvua ‘kanyinganyinga mu muoyo’ padi bifukibua biende bidi ne meji bibenga kutumikila mikenji idiye mubielele bua diakalenga diabi. (Genese 6:6; Misambu 78:41) Kadi patudi tutumikila Dîyi diende ne meji onso, tudi ‘tusankisha muoyo’ wende.—Nsumuinu 27:11.

²³ Tatu wetu mmusue bua tuikale pabuipi nende. Dîyi diende didi ditukankamija bua ‘kumukeba tuenda tububuta ne kumupeta bushuwa, nansha mudiye, mu bulelela, kayi kule ne yonso wa kutudi.’ (Bienzedi 17:27) Kadi mmunyi mudibi mua kuikala bipepele bua bantu betu aba kusemena pabuipi ne Mukalenge Mutambe Bunene wa diulu ne buloba?