DILONGESHA DIA 15
Yezu nnganyi?
Yezu ngumue wa ku bantu badi bamanyike bikole mu mianda ya bantu. Ba bungi mbamanye dîna dia Yezu, kadi ki mbamanye malu ende mavule to. Ba bungi badi bamba malu mashilangane bua kumvuija tshidiye menemene. Ntshinyi tshidi Bible wamba bua bualu buende?
1. Yezu nnganyi?
Yezu nnyuma wa bukole udi musombele mu diulu. Yehowa Nzambi ke wakamufuka kumpala kua kufukaye bintu bikuabu bionso. Ke bualu kayi, badi bamubikila ne: “muanabute wa bifukibua bionso.” (Kolosayi 1:15) Bible udi ubikila Yezu ne: ‘Muana mulela umuepele’ wa Nzambi, bualu anu yeye ke uvua Yehowa mudifukile nkayende. (Yone 3:16) Yezu wakenza mudimu pamue ne Tatuende Yehowa, umuambuluisha bua kufuka bintu bikuabu bionso. (Balayi Nsumuinu 8:30.) Yezu udi anu mu malanda makole ne Yehowa. Yezu ‘nDîyi’ bualu mmuleji mpala wa lulamatu wa Nzambi udi umanyisha mêyi a Nzambi ne mikenji idiye ututumina.—Yone 1:14.
2. Yezu wakalua pa buloba bua tshinyi?
Kukadi bidimu bu 2 000, Yezu uvua mu diulu. Kadi Yehowa wakela muoyo wende mu tshishima munda mua Mariya nsongakaji utshivua kamama. Ke bualu kayi, Yezu wakaledibua muntu wa mashi ne mâyi. (Balayi Luka 1:34, 35.) Yezu wakalua pa buloba bua kupandisha bantu, ne bua kuikala Masiya mulaya, anyi Kristo. a Milayi yonso ya mu Bible ivua itangila Masiya yakakumbanyina Yezu, kuambuluishabi bantu bua kumanya ne: yeye ke uvua “Kristo, Muana wa Nzambi udi ne muoyo.”—Matayi 16:16.
3. Yezu udi penyi lelu?
Pakashipabu Yezu pa buloba, Nzambi wakamubisha ku lufu ne mubidi wa nyuma, kupinganaye mu diulu. Muomu amu “Nzambi wakamupesha muaba mubandile.” (Filipoyi 2:9) Lelu eu, Yezu udi ne bukokeshi bua bungi. Anu Yehowa ke udi ku mutu kuende.
BUELA MU BUONDOKE
Mona malu makuabu adi atangila Yezu ne bua tshinyi kualonga kudi ne mushinga wa bungi.
4. Yezu ki nNzambi Wa Bukole Buonso to
Bible udi wamba ne: nansha mudi Yezu nyuma wa bukole bua bungi mu diulu, udi kuinshi kua Yehowa Tatu wende ne Nzambi wende. Tudi tuamba nanku bua tshinyi? Tangilayi FILME bua kumona tshidi Bible wamba bua mudi muaba udi nawu Yezu mushilangane ne wa Nzambi wa bukole buonso.
Mvese idi ilonda eyi idi ituambuluisha bua kumanya malanda adi pankatshi pa Yehowa ne Yezu. Balayi mvese yonso, pashishe nuandamune nkonko idi ilonda.
Balayi Luka 1:30-32.
-
Bilondeshile muanjelu, mmalanda kayi adi pankatshi pa Yezu ne Yehowa Nzambi “Mutambe Bunene”?
Balayi Matayi 3:16, 17.
-
Dîba dia batismo wa Yezu, dîyi diakafuma mu diulu diamba tshinyi?
-
Buebe wewe, dîyi adi divua dia nganyi?
Balayi Yone 14:28.
-
Ku tatu ne muana, udi mukulumpe ne muikale ne bukokeshi bua bungi nganyi?
-
Pavua Yezu mubikile Yehowa ne: Tatuende uvua usua kuamba tshinyi?
Balayi Yone 12:49.
-
Yezu udiku wela meji ne: yeye ne Tatuende badi muntu umue anyi? Wewe udi wela meji kayi?
5. Malu avua aleja ne: Yezu uvua Masiya
Bible udi ne milayi ya buprofete ya bungi idi yambuluisha bantu bua kumanya Masiya, muntu udi Nzambi musungule bua kupandisha bantu. Tangilayi FILME bua kumona milayi ya buprofete ndambu ivua Yezu mukumbaje pavuaye pa buloba.
Balayi milayi ya buprofete ya mu Bible eyi, pashishe nuandamune nkonko idi ilonda.
Balayi Mika 5:2 bua kumona muaba uvua Masiya ne bua kuledibua. b
-
Diledibua dia Yezu diakakumbaja mulayi wa buprofete eu anyi?—Matayi 2:1.
Balayi Misambu 34:20 ne Zekâya 12:10 bua kumona malu avua atangila lufu lua Masiya akavua Bible mumanyishe.
-
Mêyi a buprofete aa akakumbana anyi?—Yone 19:33-37.
-
Udi wela meji ne: Yezu uvua mua kuenzeja mêyi a buprofete aa bua kukumbanawu anyi?
-
Bualu ebu budi bukujadikila tshinyi bua Yezu?
6. Kulonga malu a Yezu kudi kutuambuluisha
Bible udi uleja mushinga udi nawu kumanya Yezu ne mudimu udiye nawu. Balayi Yone 14:6 ne 17:3, pashishe nuandamune lukonko elu:
-
Bua tshinyi kumanya Yezu kudi ne mushinga?
Yezu mmutukanguile njila bua tulue balunda ba Nzambi. Mmutulongeshe bulelela budi butangila Yehowa, nunku ku butuangaji buende, tudi mua kupeta muoyo wa tshiendelele
BAMUE BATU BAMBA NE: “Bantemu ba Yehowa kabatu bitabuja Yezu to.”
-
Udi mua kubambila tshinyi?
TSHIA KUKUATA
Yezu nnyuma udi ne bukole bua bungi. Yeye ke Masiya ne Muana wa Nzambi.
Diambulula
-
Bua tshinyi badi babikila Yezu ne: “muanabute wa bifukibua bionso”?
-
Yezu uvua wenza tshinyi kumpala kua kuluaye pa buloba?
-
Ntshinyi tshidi tshileja ne: Yezu ke Masiya?
BIA KUTANGILA KABIDI
Longa malu makuabu adi atujadikila ne: Yezu ke Masiya.
Mona bikala Bible ulongesha ne: Nzambi mmulele muana mushindu wa muomumue ne utu bantu balela bana.
“Badi babikila Yezu ne: mMuana wa Nzambi bua tshinyi?” (Tshiena-bualu tshia mu jw.org)
Mona bua tshinyi dilongesha dia Busatu bunsantu ki ndia mu Bible to.
Bala malu a muvua mamu mukuabu mushintulule nsombelu wende pavuaye mukebulule bua kumanya tshidi Bible wamba bua Yezu.
a Mu dilongesha dia 26 ne dia 27 netumone bua tshinyi bantu badi dijinga ne kupandishibua ne mudi Yezu utupandisha.
b Tangila Dimanyisha dia ku ndekelu 2 bua kumona dîyi dia buprofete divua dileje dîba menemene divua Yezu ne bua kumueneka pa buloba.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
