DILONGESHA DIA 22
Udi mua kuamba lumu luimpe mushindu kayi?
Paudi wenda ulonga malu a mu Bible, udi mua kumvua ne: ‘Mbimpe muntu yonso aamanye!’ Mmuomu, ke tshidi tshikengela. Tshidibi, buôwa budi mua kukupangisha mua kuambila bakuabu malu audi ulonga. Tumone muudi mua kubutshimuna ne kutuadija kuamba lumu luimpe lua mu Bible ne disanka.
1. Mmushindu kayi uudi mua kuambila bantu baudi mumanye malu audi ulonga?
Bayidi ba Yezu bakamba ne: “Katuena mua kulekela kuakula bua malu atudi bamone ne bumvue to.” (Bienzedi 4:20) Bavua banange bulelela bikole, ke bualu kayi bavua basue kubumanyisha bantu bonso. Kuena musue pebe kuenza nanku anyi? Biobi nanku, keba mpunga iudi mua kumanyisha ba mu dîku dienu ne balunda bebe malu audi ulonga ne kanemu konso.—Balayi Kolosayi 4:6.
Malu audi mua kutuadija kuenza
-
Paudi wakula ne ba mu dîku dienu, babueja mu malu a mu Bible pa kubambila ne: “Lumingu elu ndi mulonge bualu buimpe be!”
-
Badilaku mulunda webe udi usama anyi udi ne malu mamutonde mvese udi mua kumukolesha.
-
Padi bena mudimu nebe bakuebeja mudi malu ebe, bambila bualu buudi mupete mu bisangilu anyi mu dilonga diebe dia Bible.
-
Leja balunda bebe site wetu wa jw.org.
-
Lomba bakuabu bua bikalapu padibu bakulongesha Bible. Udi mene mua kubaleja mua kulomba mu jw.org bua muntu ikale ubalongesha Bible.
2. Bua tshinyi kuyisha ne tshisumbu ntshipatshila tshimpe tshia kudifundila?
Bayidi ba Yezu kabavua bayisha anu bantu bavuabu bamanye to. Yezu ‘wakabatuma ku babidi ku babidi kumpala kuende mu bimenga bionso’ bua kuyisha. (Luka 10:1) Mudimu wa diyisha mulongolola bimpe nanku wakafikisha bantu ba bungi ku diumvua lumu luimpe. Kuyisha kua bayidi tshiapamue nanku kuakabapetesha kabidi disanka dia bungi. (Luka 10:17) Kuenaku pebe mua kudifundila tshipatshila tshia kuyisha pamue ne bena mu tshisumbu anyi?
BUELA MU BUONDOKE
Mona muudi mua kutshimuna buôwa ne kupeta disanka didi difumina ku dimanyisha dia lumu luimpe.
3. Yehowa neakuambuluishe
Bamue badi basue kuamba lumu luimpe badi mua kumvua buôwa bua mêsu a bantu anyi bua tshidibu mua kubamba.
-
Udi umvua buôwa bua kuambila bakuabu malu audi ulonga anyi? Bua tshinyi?
Tangilayi FILME, pashishe nuandamune lukonko ludi lulonda.
-
Mmunyi muvua Bantemu batshivua bansonga aba batshimune buôwa?
Balayi Yeshaya 41:10, pashishe nuandamune lukonko elu:
-
Paudi umvua buôwa bua kuyisha, disambila didi mua kukuambuluisha mushindu kayi?
Udi mumanye anyi?
Bantemu ba Yehowa ba bungi bavua bela meji kumpala ne: kabavua mua kuamba lumu luimpe to. Tshilejilu, Sergey kavua udimona ne mushinga to, ne uvua ne bundu bua kuakula ne bantu. Kadi pakalongaye Bible, wakamba ne: “Nansha mumvua ne buôwa, ngakatuadija kuambila bakuabu malu amvua ndonga. Kuambila bakuabu malu a mu Bible kuakampesha muoyo mukole, kukoleshaku kabidi ditabuja dia malu mapiamapia aa mu muoyo wanyi.”
4. Ikala ne kanemu
Paudi wamba lumu luimpe, kutabaledi anu biudi wamba to, tabalela kabidi muudi ubiamba. Balayi 2 Timote 2:24 ne 1 Petelo 3:15, pashishe nuandamune nkonko eyi:
-
Mmunyi muudi mua kutumikila mvese eyi paudi wambila bakuabu malu a mu Bible?
-
Balunda anyi balela bebe bakuabu badi mua kukuelesha mpata. Tshiudi mua kuenza dîba adi ntshinyi? Tshiudi kuyi ne bua kuenza ntshinyi?
-
Bua tshinyi mbimpe kuela muntu nkonko ne meji pamutu pa kukeba mua kumusuisha malu ku bukole?
5. Kuamba lumu luimpe kudi kuenza disanka
Yehowa uvua mupeshe Yezu mudimu wa kuamba lumu luimpe. Mmunyi muvua Yezu uwumona? Balayi Yone 4:34, pashishe nuandamune nkonko eyi:
-
Kudia biakudia bimpe kudi kutuenza disanka ne kutulama ne muoyo. Bua tshinyi Yezu uvua mufuanyikije kuenza disua dia Nzambi, bu mudi dia kuamba lumu luimpe, ne kudia kua biakudia?
-
Buebe wewe, mmasanka kayi atudi mua kupeta patudi tuamba lumu luimpe?
Mibelu
-
Paudi mu bisangilu bia munkatshi mua lumingu, tabalela mishindu ya muwikala mua kutuadija kuyukila ne bantu.
-
Difundisha bua kulua mulongi mu tshisangilu tshia munkatshi mua lumingu. Midimu ya mu tshisangilu atshi idi mua kukuambuluisha bua wikale mudilongolole bua kuambila bakuabu malu audi ulonga.
-
Angata malu a mu bitupa bia “Bamue badi bamba ne” anyi “Muntu yeye mukuebeje ne” bia malongesha a mu mukanda eu udibidije nawu bua kumanya mua kuandamuna nkonko itu bantu bela ne mua kuyisha bena kapangisha.
MUNTU YEYE MUKUEBEJE NE: “Bishi wewe matuku aa?”
-
Mmunyi muudi mua kubuelela muaba au bua kumuambila malu audi mupete mu dilonga diebe dia Bible?
TSHIA KUKUATA
Kuambila bakuabu lumu luimpe kudi kutupetesha disanka, ne kutuadija nabu muyuki kudi pamuapa kupepele.
Diambulula
-
Tudi ne bua kuambila bakuabu lumu luimpe bua tshinyi?
-
Mmunyi muudi mua kubambilalu ne kanemu?
-
Mmunyi muudi mua kutshimuna buôwa buudi nabu bua kumanyisha lumu luimpe?
BIA KUTANGILA KABIDI
Mona mishindu mipepele inayi iudi mua kuambila bantu lumu luimpe ku diambuluisha dia karte ka site wa jw.org.
Mona bikadilu binayi bidi mua kukuambuluisha bua kuamba lumu luimpe.
“Ukadi mudiakaje bua kulua mulobi wa bantu anyi?” (Tshibumba tshia Nsentedi, 9/2020)
Mona filme wa tshilejilu tshia mu Bible tshidi mua kutupetesha dikima dia kuamba lumu luimpe nansha tuetu bana.
Mona muudi mua kuambila bena mu dîku dienu badi kabayi banji kumanya Yehowa malu a mu Bible.
“Lengayi mioyo ya balela badi kabayi Bantemu” (Tshibumba tshia Nsentedi, 15/3/2014)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
