Yezu wakamba ne: bena Kristo badi ne bua kubatijibua. (Balayi Matayi 28:19, 20.) Kadi batismo ntshinyi? Tshia kuenza bua kubatijibua ntshinyi?

1. Batismo ntshinyi?

Muaku “kubatiza” mmufumine ku muaku wa mu tshiena-Greke udi umvuija “kutua” anyi “kuina” mu mâyi. Pavua Yezu mubatijibue, bakamuina yonso mujima mu musulu wa Yadene, pashishe ‘kujukaye mu mâyi.’ (Mâko 1:9, 10, Bible [Matayi-Buakabuluibua]) Bia muomumue, padi bena Kristo balelela bangata batismo, badi babina pabu anyi babatua bonso bajima mu mâyi.

2. Batismo udi uleja tshinyi?

Udi ubatijibua udi uleja ne: mmudilambule kudi Yehowa Nzambi. Kadi mmunyi mudi muntu mua kudilambula kudi Nzambi? Udi udilambula padiye usambila pa nkayende kumpala kua kubatijibua, wambila Yehowa ne: mmusue kumuenzela mudimu bua kashidi. Udi umulaya bua kumutendelela anu yeye ne kuenza disua dia Nzambi kumpala kua malu ende onso. Udi usungula bua ‘kudibenga ne kutungunuka ne kulonda’ tshilejilu tshia Yezu ne malongesha ende. (Matayi 16:24) Padiye udilambula ne ubatijibua, udi upeta mushindu wa kudia bulunda bukole ne Yehowa ne batendeledi bende kabidi.

3. Mmunyi muudi mua kuya too ne ku batismo?

Bua wewe kubatijibua, mbimpe wanji ulonge malu a Yehowa ne upete ditabuja dikole kudiye. (Balayi Ebelu 11:6.) Paudi wenda uvudija dimanya ne ukolesha ditabuja diebe, udi wenda unanga Yehowa bikole. Dîba adi, neupete dijinga dia kuambila bakuabu malu ende ne dia kutumikila mikenji yende. (2 Timote 4:2; 1 Yone 5:3) Pakadi muntu ne nsombelu “udi muakanangane ne Yehowa bua kumusankisha mu malu onso,” udi mua kujinga bua kudilambula kudiye ne kubatijibua.​—Kolosayi 1:9, 10. a

 BUELA MU BUONDOKE

4. Tshidi batismo wa Yezu utulongesha

Balayi Matayi 3:13-17, numone malu makuabu adi batismo wa Yezu utulongesha. Pashishe nuandamune nkonko eyi:

• Yezu utshivua muana wa pambidi pavuaye muangate batismo anyi?

• Bavua bamubatize mushindu kayi? Bavua bamumiamine mâyi mu mutu patupu anyi?

Pakangata Yezu batismo ke pakatuadijaye mudimu wa pa buawu uvua Nzambi mumupeshe bua kuenza pa buloba. Balayi Luka 3:21-23 ne Yone 6:38, pashishe nuandamune lukonko elu:

• Panyima pa batismo wa Yezu, wakateka mudimu kayi kumpala mu nsombelu wende?

5. Batismo ki ntshipatshila tshipite bukole to

Lungenyi lua kudilambula ne kubatijibua ndufuane kukuenza buôwa. Kadi paudi wenda ulonga neufike ku didimona mukumbane bua kukumbaja tshipatshila tshia mushinga etshi. Wewe musue kumona bantu bakadi babatijibue, tangilayi FILME eu.

Balayi Yone 17:3 ne Yakobo 1:5, pashishe nuandamune lukonko elu:

• Tshidi mua kuambuluisha muntu bua kudilongololaye bua kubatijibua ntshinyi?

1. Tudi tudilambula kudi Yehowa patudi tumuambila ne: tudi basue kumuenzela mudimu bua kashidi

2. Patudi tubatijibua, tudi tuleja badi batutangile ne: tukadi badilambule kudi Yehowa

 6. Padi muntu ubatijibua, udi ubuela mu dîku dia Yehowa

Padi muntu ubatijibua, udi ubuela mu dîku dietu dia buloba bujima didi mu buobumue. Nansha mutudi ba miaba ne bikadilu bishilangane, tudi bonso ne malongesha amue ne tutumikila mikenji imue ya malu a bikadilu. Balayi Misambu 25:14 ne 1 Petelo 2:17, pashishe nuandamune lukonko elu:

• Batismo wa muntu udi ne diambuluisha kayi mu bulunda buende ne Yehowa ne bantendeledi bende?

 TSHIA KUKUATA

Yezu wakamba ne: bena Kristo badi ne bua kubatijibua. Bua muntu kubatijibua, udi ne bua kuanji kukolesha ditabuja diende kudi Yehowa, kutumikila mikenji yende, ne kudilambula kudiye.

Diambulula

• Batismo ntshinyi? Udi ne mushinga kayi?

• Didilambula ne batismo bidi ne dipetangana kayi?

• Mmalu kayi adi afikisha muntu ku didilambula ne ku batismo?