Fuanyikija ne: mamu udi munange muanende udi umulongolola bua aye mu kalasa. Udi umuowesha mâyi ne umuvuadika bilamba bimpe bia mankenda. Abi bidi biambuluisha muana bua ikale ne makanda a mubidi ne bileja bakuabu ne: baledi bende mbamulame bimpe. Bia muomumue, Yehowa Tatuetu wa dinanga mmusue bua tuikale ne bukezuke bua mubidi ne mu bikadilu. Patudi tudilama bakezuke ne mankenda, bidi bimutumbishisha ne bituambuluisha tuetu bine.

1. Mmunyi mutudi mua kuikala ne mubidi mukezuke?

Yehowa udi utuambila ne: “Nudi ne bua kuikala ba tshijila.” (1 Petelo 1:16) Kuikala ba tshijila kudi kupetangana ne kuikala ne bukezuke bua mubidi ne mu bikadilu. Bukezuke bua mubidi budi butulomba kuowa mâyi pa tshibidilu ne kulama bilamba bietu, mpangu yetu, ne tudiendelandela tuetu ne mankenda. Mbimpe tuetu kudifila kabidi bua kulama Nzubu wetu wa Bukalenge ne mankenda. Patudi tulama mubidi wetu mukezuke, tudi tutumbishisha Yehowa.​—2 Kolinto 6:3, 4.

2. Mbimpe tuepuke bikadilu kayi bua kushala bakezuke?

Bible udi utukankamija bikole ne: “Tudilengeje ku dinyanguka dionso dia mubidi ne dia nyuma.” (2 Kolinto 7:1) Mmumue ne: tudi ne bua kuepuka tshintu tshionso tshidi mua kunyanga mubidi wetu anyi lungenyi luetu. Meji etu adi ne bua kulengelela Yehowa, nanku mbimpe tuenze muetu muonso bua kumbusha meji a bukoya munda muetu. (Misambu 104:34) Mbimpe tuikale kabidi ne ngakuilu wa bukalanga.​—Balayi Kolosayi 3:8.

Ntshinyi tshikuabu tshidi mua kutuvuija bakoya mu mubidi anyi mu bikadilu? Kudi bintu bidi mua kunyanga mubidi wetu. Ke patudi tuepuka bintu bu mudi makanya onso, diamba ne bionso bidi bidifuane, nansha bunuavi bua tumuma tudi tunyunguluja lungenyi. Patudi tuepuka bintu ebi, tudi tushala ne makanda a mubidi ne tuleja mutudi tunemeka dipa dia muoyo. Tudi kabidi tudienzeja bua kuikala bakezuke mu bikadilu pa kuluisha bikadilu bia bukoya bia didilengakaja ku butaka bua majinga a masandi ne bia kutangila malu a bantu butaka. (Misambu 119:37; Efeso 5:5) Bidi mua kuikala bikole bua kutshimuna bikadilu ebi, kadi Yehowa udi mua kutuambuluisha bua kubilekela.​—Balayi Yeshaya 41:13.

 BUELA MU BUONDOKE

3. Mankenda a mubidi adi atumbishisha Yehowa

Tudi tumanya mudi Yehowa umona mankenda patudi tubala mikenji ivuaye muelele Isalele wa kale. Balayi Ekesode 19:10 ne 30:17-19, pashishe nuandamune nkonko eyi:

• Mvese eyi idi itulongesha tshinyi bua mushindu udi Yehowa umona mankenda a mubidi?

• Mbibidilu kayi bimpe biakuambuluisha bua kuikala ne mankenda a mubidi?

Mankenda a mubidi atu alombaku dîba ne akengela kudienzeja. Kadi tudi anu mua kuikala nawu nansha tuetu ba penyi, nansha babanji anyi bapele. Tangilayi FILME, pashishe nuandamune lukonko ludi lulonda.

• Mmunyi mudi kulama bintu bietu bilonga bimpe ne mankenda kupesha mudimu wetu wa buambi bujitu?

4. Tshimuna bilele bibi

Biwikala unua makanya, diamba anyi tumuma tudi tukunyunguluja lungenyi, udi pamuapa mumanye mudibi bikole bua kubilekela. Kadi ntshinyi tshidi mua kukuambuluisha? Mona malu mabi adi tshilele atshi tshikuenzela. Balayi Matayi 22:37-39, pashishe nuandamune lukonko elu: Mmunyi mudi kunua kua mfuanka nansha diamba anyi tumuma tudi tunyunguluja lungenyi mua . . .

• kunyanga bulunda bua muntu ne Yehowa?

• kukengesha dîku dia muntu ne bonso badiye nabu?

Difundila tshia kuenza bua kutshimuna. a Tangilayi FILME.

Balayi Filipoyi 4:13, pashishe nuandamune lukonko elu:

• Mmunyi mudi tshibidilu tshimpe tshia kusambila, kudilongela Bible, ne kubuela mu bisangilu mua kupetesha muntu bukole bua kutshimuna tshilele kampanda tshibi?

 5. Luisha meji ne bienzedi bia bukoya

Balayi Kolosayi 3:5, pashishe nuandamune nkonko eyi:

• Bua tshinyi tudi tuamba ne: ditangila malu a bantu butaka, dituminangana mesaji a malu a masandi, ne didilengakaja ku butaka bua majinga a masandi mbikadilu bia bukoya ku mêsu kua Yehowa?

• Buebe wewe, mbikumbane bua mudi Yehowa utulomba bua kuikala bakezuke mu bikadilu anyi? Bua tshinyi?

Mona muudi mua kuluisha ngenyi ya malu a bukoya. Tangilayi FILME.

Yezu wakafila tshilejilu bua kuleja ne: tudi ne bua kudisuikilamu bua kuenza tshidi tshikengedibua bua tudilame bakezuke mu bikadilu. Balayi Matayi 5:29, 30, pashishe nuandamune lukonko elu:

• Yezu kavua wamba bua tuetu kuenzela mubidi wetu bibi to, kadi uvua uleja ne: tudi ne bua kudienzeja. Ntshinyi tshidi muntu mua kuenza ne muoyo umue bua kuepuka ngenyi mibole? b

Biwikala udienzeja bua kumbusha ngenyi ya bukoya mu mutu muebe, Yehowa udi wanyisha kudienzeja kuebe. Balayi Misambu 103:13, 14, pashishe nuandamune lukonko elu:

• Biwikala uluangana ne tshikadilu tshia bukoya, mmunyi mudi mvese eu ukukankamija bua kusuminyina ne diluangana?

 TSHIA KUKUATA

Tudi tusankisha Yehowa patudi tudilama bakezuke mu mubidi, mu lungenyi, ne mu bikadilu.

Diambulula

• Bua tshinyi kuikala bakezuke kudi ne mushinga wa bungi?

• Udi mua kulama mankenda a mubidi mushindu kayi?

• Mmunyi muudi mua kudilama mukezuke mu meji ne mu bikadilu?