DILONGESHA DIA 41
Ntshinyi tshidi Bible wamba bua dimanyangana dia balume ne bakaji?
Bantu ba bungi kabatu basue kuakula bua dimanyangana dia balume ne bakaji to. Kadi Bible yeye utu wakula bua bualu ebu patoke ne bukalanga buonso. Malu adiye wamba adi atuambuluisha. Abi bidi biumvuika, bualu Yehowa muena Bible ke Mufuki wetu. Mmumanye tshidi mua kutamba kutuambuluisha. Udi utuleja mudi bienzedi bietu mua kumulengelela, ne tshiatuambuluisha bua kushala ne muoyo kashidi ne disanka.
1. Yehowa utu umona dimanyangana dia mulume ne mukaji mushindu kayi?
Dimanyangana dia mulume ne mukajende ndipa dia kudi Yehowa. Mmudipeshe mulume ne mukaji badi baselangane bua bikale ne disanka. Dipa edi didi dibambuluisha bua kulela bana, kabidi ne bua kulejangana dinanga ne disanka dionso dia mudibu basuangane. Ke bualu kayi Dîyi dia Nzambi didi diamba ne: “Sanka ne mukaji wa ku bunsongalume buebe.” (Nsumuinu 5:18, 19) Yehowa mmusue bua mulume ne mukajende bashale balamatangane bua kabafiki ku dienda masandi to.—Balayi Ebelu 13:4.
2. Kuenda masandi ntshinyi?
Bible udi utuambila ne: “Bena masandi . . . kabakupiana Bukalenge bua Nzambi to.” (1 Kolinto 6:9, 10) Bua kumvuija tshidi kuenda masandi, bafundi ba Bible bakangata muaku porneia pavuabu bamufunda mu tshiena Greke. Muaku au udi umvuija 1) dimanyangana mibidi a dia bantu badi kabayi baselangane, 2) dimanyangana dia balume ne balume anyi bakaji ne bakaji, ne 3) dilala ne nyama. Patudi ‘tudikanda ku masandi,’ tudi tudienzela tuetu nkayetu bimpe ne tulengelela Yehowa.—1 Tesalonike 4:3.
BUELA MU BUONDOKE
Ela meji a tshiudi mua kuenza bua kuepuka dienda masandi, umone kabidi masanka awapeta paudi udilama mukezuke mu bikadilu.
3. Nyema dienda dia masandi
Jozefe uvua muena lulamatu wakadienzeja bua kushala anu mukezuke mu bikadilu biende. Balayi Genese 39:1-12, pashishe nuandamune nkonko eyi:
-
Tshivua tshisake Jozefe bua kunyema ntshinyi?—Tangilayi mvese wa 9.
-
Buebe wewe, Jozefe uvua muenze bimpe pavuaye munyeme anyi? Bua tshinyi?
Mmunyi mudi bansonga mua kunyema masandi lelu anu bu Jozefe? Tangilayi FILME.
Yehowa mmusue bua tuikale bonso tukina dienda dia masandi. Balayi 1 Kolinto 6:18, pashishe nuandamune nkonko eyi:
-
Mmalu kayi adi mua kufikisha muntu ku dienda masandi?
-
Udi mua kunyema masandi mushindu kayi?
4. Udi mua kukandamena diteta dia kuenda masandi
Ntshinyi tshidi tshifuane kukupangishisha mua kukandamena diteta dia kuenda masandi? Tangilayi FILME, pashishe nuandamune lukonko ludi lulonda.
-
Pavua muanetu wa mu filme eu mujingulule ne: meji ende ne bienzedi biende bivua bifuane kumupangisha mua kushala balamatangana ne mukajende, uvua muenze tshinyi?
Nansha bena Kristo ba lulamatu batu pabu imue misangu baluangana bua kulama meji abu makezuke. Udi mua kuepula meji ebe bua kaashadi matuma anu ku malu a masandi mushindu kayi? Balayi Filipoyi 4:8, pashishe nuandamune nkonko eyi:
-
Mmalu a mushindu kayi atudi ne bua kuelela meji?
-
Dibala dia Bible ne didifila mu mudimu wa Yehowa bidi mua kutuambuluisha bua kukandamena diteta dia kuenda masandi mushindu kayi?
5. Mikenji ya Yehowa idi itukuba
Yehowa mmumanye tshidi mua kutamba kutuambuluisha. Udi utuleja mua kudilama bakezuke mu bikadilu ne masanka atudi tupeta patudi tudilama nanku. Balayi Nsumuinu 7:7-27 anyi tangilayi FILME, pashishe nuandamune nkonko idi ilonda.
-
Mmalu kayi avua mavuije luendu lua nsongalume au luendu lua njiwu?—Tangilayi Nsumuinu 7:8, 9.
-
Bilondeshile Nsumuinu 7:23, 26, dienda dia masandi didi ne njiwu mikole. Tuetu bashale ne bikadilu bietu bikezuke, nntatu kayi itudi mua kuepuka?
-
Mmushindu kayi udi kudilama bakezuke mu bikadilu mua kutuambuluisha bua kushala ne muoyo kashidi?
Bamue batu bela meji ne: dinanga kadiena dimueneka mu tshidi Bible wamba bua disangila dia mulume ne mulume anyi mukaji ne mukaji to. Pende Yehowa Nzambi wa dinanga mmusue bua muntu yonso ashale ne muoyo kashidi ne disanka. Ne bua kufikilaku, tudi ne bua kutumikila mikenji yende. Balayi 1 Kolinto 6:9-11, pashishe nuandamune lukonko elu:
-
Majinga adi mabi ku mêsu kua Yehowa adi anu a muntu udi umvua mua kulala ne mulume nende anyi mukaji nende anyi?
Bua kulengelela Nzambi, tuetu bonso tudi ne bua kushintuluka. Bidi ne diambuluisha anyi? Balayi Misambu 19:8, 11, pashishe nuandamune nkonko eyi:
-
Buebe wewe, mikenji ya Yehowa ya malu a bikadilu mmikumbane anyi? Bua tshinyi udi wamba nanku?
Yehowa mmuambuluishe bantu ba bungi batuadije kutumikila mikenji yende ya malu a bikadilu. Udi mua kukuambuluisha pebe kabidi
BAMUE BATU BAMBA NE: “Muntu yonso udi mua kulala ne yonso udibu banangangane nende; kakuena bualu to.”
-
Wewe udi wamba bishi?
TSHIA KUKUATA
Kumanyangana kua mulume ne mukajende ndipa dia disanka didi Yehowa mubapeshe
Diambulula
-
Kuenda masandi kudi kukonga malu kayi?
-
Tshidi mua kutuambuluisha bua kuepuka dienda dia masandi ntshinyi?
-
Kutumikila kua mikenji ya Yehowa ya malu a bikadilu kudi kutuambuluisha mushindu kayi?
BIA KUTANGILA KABIDI
Mona tshidi Nzambi ujingila ne: mulume ne mukaji badi basue kusomba pamue bikale baselangane.
Bualu budi buleja ne: padi Bible ukandika disangila dia bantu ba mubidi umue kena utusaka bua kukina badi benza nanku to.
“Mbibi bua muntu kusangila ne mulume anyi mukaji nende anyi?” (Tshiena-bualu tshia mu jw.org)
Mona mudi mikenji ya Nzambi ya malu a mishindu yonso ya dimanyangana mibidi itukuba.
“Kuangatshilangana mukana nkusangila menemene anyi?” (Tshiena-bualu tshia mu jw.org)
Bala tshiena-bualu tshia bualu bulonda tshia “Bavua bangangate ne mushinga” bua umone tshivua tshifikishe muntu uvua ulala ne balume nende ku dishintuluka bua kulengelela Nzambi.
“Bible utu ushintulula bantu” (Tshibumba tshia Nsentedi, 1/4/2011)
a Dimanyangana dibi edi didi dikonga bienzedi bia bungi, bu mudi disangila dia mubidi wa mulume ne mukaji kabayi baselangane, diangatshilangana mukana anyi kunyima, ne dilengakaja butaka bua mukuabu ne meji a kumujula masandi.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
