DILONGESHA DIA 46
Bua tshinyi mbimpe kudilambula ne kubatijibua?
Kudilambula kudi Yehowa nkumulaya mu disambila ne: neumutendelele anu yeye ne neuteke disua diende kumpala kua bionso mu malu ebe onso. (Misambu 40:8) Pashishe, ke wewe kubatijibua. Paudi ubatijibua, udi uleja bakuabu ne: ukavua mudilambule kudi Nzambi. Dipangadika dia kudilambula kudi Yehowa mbualu budi ne mushinga mupite wa malu etu makuabu onso. Kadi tshidi mua kukuangatshisha dipangadika diashintulula nsombelu webe mujima nanku ntshinyi?
1. Tshidi tshitusaka bua kudilambula kudi Yehowa ntshinyi?
Dinanga ke didi ditusaka bua kudilambula kudi Yehowa. (1 Yone 4:10, 19) Bible udi utuambila ne: ‘Nanga Yehowa Nzambi webe ne muoyo webe wonso ne anyima webe yonso ne lungenyi luebe luonso ne bukole buebe buonso.’ (Mâko 12:30) Tudi tuleja mutudi banange Nzambi ku malu atudi tuamba ne atudi tuenza. Anu mutu dinangangana dia bushuwa disaka mulume ne mukaji bua kuselanganabu, dinanga ditudi banange Yehowa didi ditusaka petu bua kudilambula kudiye ne kubatijibua.
2. Yehowa udi upesha Bantemu bende bakadi babatijibue mabenesha kayi?
Paudi ubatijibua, udi ubuela mu dîku dia bantu ba Yehowa badi ne disanka. Dîba adi, neudimuene mu malu a bungi mudi Yehowa mukunange, ne neutambe kusemena kabidi pabuipi nende menemene kupita munudi nende lelu. (Balayi Malaki 3:16-18.) Pa kumbusha muikala Yehowa mulue Tatu webe, newikale kabidi ne dîku dia mu nyuma didi ne bana benu ba balume ne ba bakaji pa buloba bujima badi banange Nzambi, bakunange pebe. (Balayi Mâko 10:29, 30.) Bushuwa, kudi malu audi ne bua kuanji kuenza kumpala kua wewe kubatijibua. Udi ne bua kulonga mua kumanya malu a Yehowa, kumunanga, ne kuitabuja Muanende. Ndekelu wa bionso, nebikengele bua wewe kudilambula kudi Yehowa. Wewe mukumbaje malu aa ne mubatijibue, newikale mu njila wakufikisha ku dishala ne muoyo kashidi. Dîyi dia Nzambi didi diamba ne: “Dibatiza . . . didi dinupandisha penu mpindieu.”—1 Petelo 3:21.
BUELA MU BUONDOKE
Mona bua tshinyi mbia mushinga bua wewe kudilambula kudi Yehowa ne kubatijibua.
3. Tuetu bonso tudi ne bua kudisunguila utudi ne bua kuenzela mudimu
Mu Isalele wa kale, bamue bavua bela meji ne: bavua mua kutendelela Yehowa popamue ne Bâla uvua nzambi wa dishima. Kadi Yehowa wakabatumina muprofete wende Eliya bua kubumbusha ngelelu wa meji mubi au. Balayi 1 Bakalenge 18:21, pashishe nuandamune lukonko elu:
-
Mbualu kayi buvua bena Isalele ne bua kuangatshila dipangadika kayi?
Anu bu bena Isalele, tudi petu ne bua kusungula utudi ne bua kuenzela mudimu. Balayi Luka 16:13, pashishe nuandamune nkonko eyi:
-
Bua tshinyi katuena mua kutendelela Yehowa popamue ne muntu anyi tshintu tshikuabu?
-
Nku tshinyi kutudi mua kuleja Yehowa ne: tudi basungule bua kumutendelela anu yeye?
4. Elangana meji a dinanga didi Yehowa mukunange
Yehowa mmutupeshe bintu bilenga bia bungi. Tshitudi petu mua kumupesha ntshinyi? Tangilayi FILME.
Mmu malu kayi mudi Yehowa mulejaku ne: mmukunange? Balayi Misambu 104:14, 15 ne 1 Yone 4:9, 10, pashishe nuandamune nkonko eyi:
-
Mmapa kayi a kudi Yehowa autu nangananga musue wewe?
-
Ntshinyi tshiutu umvuaku bua Yehowa paudi uvuluka mapa au?
Padi muntu utupesha tshintu tshitudi banange bikole, tutu bausue kumuleja dianyisha. Balayi Dutelonome 16:17, pashishe nuandamune lukonko elu:
-
Paudi wela meji a malu onso adi Yehowa mukuenzele, udi umvua muoyo wa kumupesha tshinyi?
5. Kudilambula kudi Yehowa kudi ne mabenesha mavule
Bantu ba bungi batu bela meji ne: tshidi mua kubapetesha disanka nkutumba, kuikala ne makuta ne mudimu munene. Kadi mmuomu anyi? Tangilayi FILME, pashishe nuandamune nkonko idi ilonda.
-
Nansha muvua muanetu wa mu filme eu munange kunaya ndundu, wakalekela mudimu wende wa dimunaya bua tshinyi?
-
Wakangata dipangadika dia kudilambula kudi Yehowa pamutu pa kudilambula kudi dinaya dia ndundu. Buebe wewe, dipangadika diende adi divua dimpe anyi? Bua tshinyi?
Kumpala kua mupostolo Paulo kuluaye muena Kristo, ukavua muditue mu mudimu wa bantu banene. Bavua bamulongeshe mikenji ya buena Yuda kudi mulongeshi muende lumu. Kadi wakalekela bionso abi bua kuluaye muena Kristo. Paulo uvua muluaku kudijinga bua bivuaye mulekele abi anyi? Balayi Filipoyi 3:8, pashishe nuandamune nkonko eyi:
-
Bua tshinyi Paulo wakamba ne: bionso bivuaye wenza kumpala kua kuluaye muena Kristo bivua bu mushiki wa “bintu bia butshiafu” anyi bia kuimansha?
-
Tshiakapetaye ntshinyi pa muaba wabi?
-
Buebe wewe, kuenzela Yehowa mudimu ne kuenza malu ebe makuabu, tshidi mua kukuvudijila disanka ntshinyi?
Pakalua Paulo muena Kristo, wakapeta bipite ne pa bivuaye mulekele
BAMUE BATU BAMBA NE: “Kuena muanji kufika dîba dia kudifila kudi Nzambi to!”
-
Kadi wewe udi umona ne: mbia meji bua wewe kudilambula kudi Yehowa bua tshinyi?
TSHIA KUKUATA
Dinanga didi ditusaka bua kudilambula kudi Yehowa ne kubatijibua.
Diambulula
-
Yehowa mmuakanyine kumunanga ne kumutendelela ne muoyo wetu wonso bua tshinyi?
-
Mmushindu kayi udi Yehowa ufuta Bantemu bende bakadi babatijibue?
-
Udi musue kudilambula kudi Yehowa anyi?
BIA KUTANGILA KABIDI
Mona tshiakafikisha muimbi wa misambu ne munayi wa ndundu ya makoyi ku didilambula kudi Yehowa.
Bansonga badi badiebeja: Ntshinyi tshingenza ne muoyo wanyi?—Divuluka malu a kale (6:54)
Tangila malu makuabu adi asaka bantu bua kudilambula kudi Nzambi.
“Tshiudi ne bua kudilambuila kudi Yehowa” (Tshibumba tshia Nsentedi, 15/1/2010)
Tangila umone disanka didi nadi bantu ba mu filme wa musambu eu padibu badilambula kudi Yehowa.
Bala tshitupa tshia “Munkatshi mua bidimu, mvua anu ndiebeja ne: ‘Bua tshinyi tudi ne muoyo?’” umone tshivua tshisake mamu mukuabu bua kutangilulula malu avuaye uteka kumpala mu nsombelu.
“Bible utu ushintulula bantu” (Tshibumba tshia Nsentedi, 1/11/2012)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
