DILONGESHA DIA 12
Ntshinyi tshiakuambuluisha bua kutungunuka ne kulonga Bible?
Kulonga Bible kudi anu bu kuenza luendu luimpe! Nansha luendu luimpe, lutu lulomba anu kudienzeja ne disuminyina. Misangu mikuabu, udi mufuane kudiebeja ni udi mua kukokesha bua kutungunuka ne kulonga Bible. Bua tshinyi mbimpe wewe kudienzeja bua kutungunuka ne kumulonga? Ntshinyi tshidi mua kukuambuluisha bua kusuminyina nansha mu ntatu?
1. Kulonga Bible kudi ne mushinga bua tshinyi?
“Dîyi dia Nzambi didi ne muoyo, ne bukole.” (Ebelu 4:12) Bible udi ne mushinga bualu udi ukusokoluela meji a Nzambi ne mudiye umvua bua bualu buebe. Udi ukuambuluisha bua kupeta dimanya, ne meji malelela ne ditekemena kabidi. Tshia mushinga nangananga ntshia ne: Bible udi ukuambuluisha bua kulua mulunda wa Yehowa. Paudi ulonga Bible, udi umuitabila bua bukole budiye nabu bulengeje nsombelu webe.
2. Bua tshinyi mbimpe kumvua mushinga udi nawu bulelela bua mu Bible?
Bulelela bua mu Bible budi anu bu biuma bia mushinga mukole. Ke bualu kayi Bible udi utukankamija ne: “Sumba bulelela, kubupanyi nansha.” (Nsumuinu 23:23) Patudi tuvuluka mushinga udi nawu bulelela bua mu Bible, tudi tudienzeja bikole bua kutungunuka ne kumulonga, nansha mu ntatu.—Balayi Nsumuinu 2:4, 5.
3. Mmunyi mudi Yehowa mua kukuambuluisha bua kutungunuka ne kulonga Bible?
Mudi Yehowa muikale Mulunda webe ne Mufuki webe wa bukole buonso, mmusue kukuambuluisha bua ulonge malu ende. Udi mua kukupesha “dijinga ne bukole bua kuenza malu.” (Balayi Filipoyi 2:13.) Nanku, kuoku misangu iudi kuyi anu umvua muoyo wa kulonga Bible anyi kutumikila biudi ulongamu, Nzambi udi mua kukuambuluisha. Wewe kuyi udiumvua ne bukole bukumbane bua kutantamena ntatu anyi buluishi, yeye udi mua kukupeshabu. Ikala umulomba mu masambila misangu yonso bua akuambuluishe bua kusuminyina ne kulonga Bible.—1 Tesalonike 5:17.
BUELA MU BUONDOKE
Mona tshia kuenza bua kutungunuka ne kulonga Bible nansha wewe ne bia bungi bia kuenza anyi padi bakuabu bakuluisha. Pashishe, neumone kabidi mudi Yehowa mua kukuambuluisha bua kusuminyina.
4. Teka dilonga diebe dia Bible kumpala
Misangu mikuabu, tudi mua kudimona ne bia kuenza bipite, tukadi tuela meji ne: katuena ne dîba dia kulonga Bible to. Ntshinyi tshidi mua kutuambuluisha? Balayi Filipoyi 1:10, pashishe nuandamune nkonko eyi:
-
Buebe wewe, mmalu kayi audi umona ne “mushinga wa bungi” mu nsombelu?
-
Mmunyi muudi mua kufika ku diteka dilonga diebe dia Bible pa muaba wa kumpala?
-
Wewe muele lusenga mu mbeketshi mpindieu ujinga kusakidilamu mabue, kaakupeta muaba to
-
Wewe mudianjile kuelamu mabue kumpala, muaba wa kusakidila lusenga lua bungi newikalaku. Bia muomumue, wewe mudianjile kuteka “malu adi ne mushinga wa bungi” kumpala mu nsombelu webe, udi mua kuenza onso, kupeta ne dîba dia kuenza malu makuabu
Kulonga Bible kudi kutukumbajila dijinga ditudi nadi mu nyuma, mmumue ne: dijinga dia kumanya Nzambi ne kumutendelela. Balayi Matayi 5:3, pashishe nuandamune lukonko elu:
-
Patudi tuteka dilonga dia Bible pa muaba wa kumpala, bidi bituambuluisha ku tshinyi?
5. Suminyina nansha padibu bakuluisha
Imue misangu, bakuabu badi mua kujinga kukutekesha bua ulekele kulonga Bible. Mona tshiakenza Francesco. Tangilayi FILME, pashishe nuandamune nkonko idi ilonda eyi:
-
Mu filme eu, ntshinyi tshivua balunda ba Francesco ne bena kuabu benze pakabambilaye malu avuaye ulonga?
-
Mmunyi muvuaye mufutshibue bua disuminyina diende?
Balayi 2 Timote 2:24, 25, pashishe nuandamune nkonko eyi:
-
Ntshinyi tshitu balunda bebe ne bena kuenu bamba bua kulonga kuebe kua Bible?
-
Bilondeshile mvese eyi, ntshinyi tshiudi ne bua kuenza padi muntu unyingalala bua muudi ulonga Bible? Bua tshinyi?
6. Eyemena Yehowa bua akuambuluishe
Patudi tuenda tusemena kudi Yehowa, dijinga dietu dia kumusankisha didi padi dienda dikola. Tshidibi, bidi mua kuanji kutukolela bua kushintulula malu kampanda mu nsombelu wetu bua kuakananganaye ne mikenji ya Yehowa. Wewe umvua pebe nanku, kuteketshi to. Yehowa neakuambuluishe. Tangilayi FILME, pashishe nuandamune nkonko idi ilonda eyi:
-
Mu filme eu, mmalu kayi avua Jim mushintulule bua kulengelela Yehowa?
-
Tshilejilu tshiende tshidi tshikuambilaku tshinyi?
Balayi Ebelu 11:6, pashishe nuandamune nkonko eyi:
-
Ntshinyi tshienzela Yehowa badi “bamukeba ne muoyo mujima” anyi baditatshisha bua kumumanya ne kumulengelela?
-
Mvese eu udi uleja ne: Yehowa utu umvua mushindu kayi padiye ukumona udienzeja bua kulonga Bible?
MUNTU YEYE MUKUEBEJE NE: “Bua tshinyi udi ulonga Bible?”
-
Neumuambile tshinyi?
TSHIA KUKUATA
Nansha mutu kulonga kua Bible kakuyi anu kupepele, kudi mua kukuambuluisha bua kushala ne muoyo kashidi. Shala wewe mueyemene anu Yehowa; yeye neakufute.
Diambulula
-
Bua tshinyi udi wangata bulelela bua mu Bible ne mushinga wa bungi?
-
Mmushindu kayi uudi ‘mua kumanya malu adi ne mushinga wa bungi?’
-
Bua tshinyi mbimpe wikale ulomba Yehowa bua akuambuluishe bua kutungunuka ne kulonga Bible?
BIA KUTANGILA KABIDI
Mona mayele anayi avua mambuluishe bantu ba bungi bua kuenza malu ne dîba diabu ne meji.
“Muudi mua kuenza malu bimpe ne dîba diebe” (Tabulukayi! 2/2014)
Mona muvua Yehowa muambuluishe mamu kampanda muena bayende uvua kayi umvua bua tshinyi uvua udienzeja bua kulengelela Nzambi.
Mona muvua disuminyina dia mukaji kampanda diambuluishe bayende.
Imue misangu, batu babanda Bantemu ba Yehowa ne: batu bapandulula mêku a bantu. Kadi mmuomu anyi?
“Bantemu ba Yehowa batu bapandulula mêku anyi batu baakolesha?” (Tshiena-bualu tshia mu jw.org)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
