Kadi, bua tshinyi Satana ne bademon badi benza mudimu mukole nenku bua kushima bantu? Bualu badi bakeba kutubueja mu buntomboji buabo. Badi bakeba bua tuetu kubatendelela. Badi bakeba bua tuetu kuitaba mashimi abo ne kuenza malu adi Yehowa kayi musue. Ku mine malu aa kudi bilele bivule bidi bitangila bantu bafue.

Lufu lua munangibue wetu mbualu budi mua kutubungamija bikole, ne kudila ki mbualu bubi nansha. Kunyima kua lufu lua mulunda wende Lazare, Yezu “wakapatula binsonji.”​—Yone 11:35.

Kudi bilele bivule pa bidi bitangila lufu, ne mbishilangane bikole pa buloba bujima. Bivule bia kudibi ki mbibengangane ne mêyi-maludiki a mu Bible to. Kadi, bimue bia kudibi mbishindamene pa mmuenenu wa dikalaku ne muoyo dia bafue ne dikala diabo ne bukole bua kumona badi ne muoyo. Ditshisha pambelu, madilu, ne bilele bishilangane bia dijikangana, bionso ebi bidi ne miji yabi anu mu ditshina dia kubenga kusankisha nyuma anyi spiritu ya bakishi. Kadi bu mudi bafue “kabayi bamanye bualu nansha,” aba badi benza bintu bia mushindu’eu badi bakankamija dishima edi dia Satana.​—Muambi 9:5.

 Bilele bikuabo ne misekelelu bidi bifumina ku ditabuja dia se: bafue badi bakengela diambuluisha dia ba-muoyo ne badi mua kubenzela bibi pikalabo kabayi ne disanka. Mu imue miaba, mafesto ne milambu bidi bienjibua munkatshi mua matuku 40 pamue apa munkatshi mua tshidimu tshijima kunyima kua lufu lua muntu. Bionso ebi bidi bienjibua ne meji a kuambuluisha mufue bua ‘kusambuka’ ne kufika ku bakishi. Tshikuabo tshintu tshidibo benza nkuelela bakishi biakudia ne maluvu.

Bintu ebi kabiena bimpe to. Bualu bidi bikankamija dishima dia Satana pa bidi bitangila bafue. Yehowa udi mua kuanyisha bua tuetu kuenza tshintu nansha tshimue tshishindamene pa malongesha a bademon anyi? Nansha kakese!​—2 Kolinto 6:14-18.

Basadidi ba Nzambi mulelela kabatu babuelakana mu bilele bia mushindu’eu bidi bikankamija mashimi a Satana. Pamutu pa nanku, badi baditatshisha bua kuambuluisha ba-muoyo ne kubakolesha ku muoyo. Mbamanye se: padi muntu ufua, anu Yehowa ke udi mua kumuambuluisha.​—Yobo 14:14, 15.

Bamue bantu badi ne malanda ne bademon buludiludi anyi ku diambuluisha dia muena lubuku. Etshi nkutendelela nyuma mibi. Maja a bena bilùmbù, buloji, majimbu, lubuku, ne diebeja mianda ku bakishi mmishindu mishilangane ya kutendelela baspiritu.

Bible udi ukandika bikole malu aa, pa kuamba ne: “Muntu kikadi munkatshi muenu udi . . . mutempi wa mbuku, nansha muena majimbu, nansha mumanyishi wa mianda itshivuavua, nansha muena buloji, nansha mukuatshianganyi ku tshianda anyi muntu udi utantshila muena lubuku lua muzangu nansha muebeji wa mianda ku bafue. Bualu, muntu yonso udi wenza malu aa udi tshintu tshia kukinyibua kudi Yehowa.”​—Dutelonome 18:10-12.

Bua tshinyi Yehowa udi utukandika bikole bilele ebi?

 Bua diakalenga dietu, Yehowa udi utudimuija ku malanda a mishindu yonso ne baspiritu. Mmunange bantu ne udi uditatshisha bua bualu buabo, ne mmumanye ne: aba badi babuelakana ne bademon badi ne bua kukenga.

Nilda, uvua umue wa ku bantu ba mushindu’eu. Uvua muena mbuku ku ditunga dia Brezile. Bademon bakamubueja mu nsombelu wa dikenga. Udi ulonda ne: “Baspiritu . . . bavua bankuate, bantumina mêyi misangu yonso. Pamue apa lungenyi luanyi luvua lutabale pamue apa luvua lulale, ne bakambueja mu lupitadi bua disama dia mpalu. Bademon bakankengesha bikole, mijilu yanyi ya mu buongo yakateketa. Mvua nnua manga bua kutuyisha mioyo ne kutuadija kunua maluvu ne makanya kakuyi diikisha. Biakenzeka nenku munkatshi mua bidimu bivule.”

Pashishe, ne diambuluisha dia Yehowa ne Bantemu bende pa buloba, Nilda wakakopoka mu bupika bua bademon ne udi mpindieu ne nsombelu mulenga, ne wa nsongo. Udi wamba ne: “Ndi nkankamija muntu yonso bua kuepuka, nansha bua katupa kakese, dibuelakana ne spiritu [mibi].”