Bible udi wamba ne: Satana udi “upambuisha buloba bujima budi bantu basombe.” (Buakabuluibua 12:9) Satana ne bademon bende kabena basua bua tuetu kuitaba Bible, Dîyi dia Nzambi. Badi bakeba kuitabijija bantu ne: bafue badi ne muoyo muaba kampanda wa mu nyuma. Tuanji kumona mudibo benza.

Bitendelelu bivule bidi bilongesha ne: muntu yonso udi ne anyima udi ubuela muaba wa spiritu kunyima kua lufu lua mubidi. Badi bamba ne: mubidi utu ufua kadi anyima katu ufua. Kabidi, badi bashindika ne: anyima kêna mua kufua.

Kadi, Dîyi dia Nzambi kadiena dilongesha nanku to. Bible udi uleja ne: anyima mmuntu muine, ki ntshintu tshidi munda mua muntu. Tshilejilu, mu difuka dia Adama, Bible udi wamba ne: “Ke Yehowa Nzambi kuenzaye muntu ne dimfuenkenya dia buloba e kuela mu diulu diende mupuya wa muoyo, ke muntu kuluaye anyima wa muoyo.” (Genese 2:7) Nenku, Adama kakapeshibua anyima; uvua anyima.

 Nyama itu payi ibikidibua ne: anyima.​—Genese 1:20, 21, 24, 30.

Bu mudi muaku wa mu Bible “anyima” ne diumvuija dia muntu muine, kabiena mua kutukemesha pa kumvua ne: anyima idi mua kufua ne itu ifua. Mifundu idi yamba ne:

• “Anyima udi wenza mpekatu​—yeye mene neafue.”​—Yehezekele 18:4.

• “Ke Samsona kutuadija kuamba ne: ‘Anyima wanyi afue ne bena Filisti.’”​—Balumbuluishi 16:30.

• “Dituku dia nsabatu mbiakane kuenza tshintu tshimpe anyi kuenza tshintu tshibi, bua kupandisha anyi kushipa anyima?”​—Mâko 3:4.

Mikuabo mvese idi ileja ne: anyima idi mua kubutudibua (Genese 17:14), kukoshibua mutu ne muele (Yoshua 10:37), kufua ne tshipuidiji (Yobo 7:15), ne kufua mu mâyi (Yona 2:5). Nenku, anyima utu ufua.

Wewe mubale Bible ku ntuadijilu too ne ku ndekelu, kuena mua kusangana muaba nansha umue bamba bua “anyima udi kayi ufua.” Anyima wa muntu ki nspiritu to. Dilongesha dia dibenga kufua dia anyima ki ndia mu Bible nansha. Yehowa udi ukina mashimi wonso a malu a Nzambi.​—Nsumuinu 6:16-19; 1 Timote 4:1, 2.

Mukuabo mushindu udi Satana upambula nawo bantu ngwa ku diambuluisha dia bena mikendi. Bena mikendi mbantu badi mua kupeta malu buludiludi kudi baspiritu. Bantu ba bungi nansha bena mikendi bine batu bela meji ne: mikenji eyi itu ifuma kudi nyuma anyi spiritu ya bafue. Kadi, anu mutukadi bamone mu Bible, kabiena mua kuikala nanku to.​—Muambi 9:5, 6, 10.

Nanku, malu aa adi afumina kudi banganyi? Nkudi bademon bobo bine! Bademon badi mua kutangila muntu patshidiye ne muoyo; mbamanye muvua muntu eu wakula, tshimuenekelu tshiende, biakenzaye, bivuaye mumanye. Nenku, mbipepele bua bobo kuidikija bantu bafue.​—1 Samuele 28:3-19.

Mukuabo mushindu udi nawo Satana wa kudinga bantu pa bidi bitangila bafue nku diambuluisha dia malu a dishima. Malu aa adi apambula bantu ku bulelela bua mu Bible.​—2 Timote 4:4.

Mu Afrika, mudi mianu mivule pa bidi bitangila bantu bavuabo bamone ne muoyo eku pabo bamane kufua. Bakabamuena nangananga kule ne muaba uvua muntu musombele. Kadi, anji kudiebeja: ‘Bidi mua kuanyishibua bua muntu kuikalaye ne bukole bua kupatuka ku bafue, e kupingana ku muaba mule ne bena dîku diabo ne balunda bende anyi?’

Kabidi, kabiena mua kuikala bulelela bua se: eu uvuabo bamone uvua mukuabo muntu mufuanangane ne mufue anyi? Tshilejilu, bena nkristo babidi bavua mu mudimu wa buambi mu ditunga kampanda e kumonabo muntu mukulakaje wenda ubalonda munkatshi mua mêba mavule. Pakamuebejabo, muntu eu wakabambila ne: uvua wela meji ne: umue wa ku ba-ministre aba uvua muanabo wakafua kukadi bidimu bikese. Bushuwa, bivua ntupakanyi, kadi kakanyisha bua se: uvua mutupakane to. Anji kuelayi meji tshivua mukulakaje eu muye kuambila balunda bende ne bana babo!

Kabiyi mpata, udi mua kuikala mumane kumvua bakula bua bantu bavua bamone, bumvue, ne balota malu a kukema. Malu mapite bantu mutu a mushindu’eu atu atshingisha aba batu baapeta. Marein, muena ku Afrika wa kudi dîba dibuelela, wakumvua misangu ne misangu dîyi dia kakuende-mukaji mufue dimubikila butuku. Buowa bumukuata, Marein, wakela dîyi ne kubiisha bena nzubu wende buonso. Mbimueneke se: wakapia disama dia mpala.

Mpindieu, pikala bafue ne muoyo menemene, mbia meji bua kutshingishabo bananga babo anyi? Kabiena nanku to. Bademon ke badi bafila mikenji eyi mikuata buowa.

Kadi, netuambe tshinyi bua mikenji idi bu idi ne diambuluisha ne ikolesha ku muoyo? Tshilejilu, Gbassay, muena Sierra Leone, uvua usama. Wakalota, tatuende mufue umumuenekela. Wakamuambila bua kuya ku mutshi kampanda, kuangata dibeji diawo, kudisambakaja ne mâyi, ne kunua. Kavua ne bua kuakula ne muntu kumpala kua kuenza bualu ebu. Wakalonda mêyi aa, ke kumvuaye bimpe.

Mukuabo mukaji wakamba ne: bayende wakamumuenekela butuku kampanda kunyima kua lufu luende. Wakamba ne: uvua muimpe ne muvuale bilamba bilengele.

 Mikenji ya mushindu’eu ne bikena-kumona bidi bu bidi bimpe ne bikale ne diambuluisha. Bidi bifuma kudi Nzambi anyi? Tòo. Yehowa udi “Nzambi wa bulelela.” (Musambu wa 31:5) Kena mua kuanyisha bua kutudinga ne kutushima. Anu bademon ke batu benza nanku.

Kadi, kakutu bademon bimpe anyi? Tòo. Nansha padibo benza bu badi batuambuluisha mikuabo misangu, buonso buabo badi anu babi. Pakakula Diabolo ne Eva, wakadileja bu mulunda. (Genese 3:1) Kadi, tshiakamuenzekela ntshinyi pakamutelejaye ne kuenza tshiakambaye? Wakafua.

Nudi bamanye se: pa tshibidilu muntu mubi utu ne ngikadilu wa bulunda kudi bantu badiye ukeba kudinga ne kushima. “Mpala mutoke, mutshima mufike,” ke mêyi a kasumuinu ka bena Afrika. Ne Dîyi dia Nzambi didi diamba ne: “Satana yeye muine utu anu udikudimuna bu muanjelo wa butoke.”​—2 Kolinto 11:14.

Nzambi katu kabidi wakula ne bantu ku diambuluisha dia bilota, bikena-kumona, anyi mêyi mafume ku muaba wa baspiritu to. Udi ubalombola ne ubalongesha ku diambuluisha dia Bible, mukanda udi mua kupetesha muntu “bionso bidi bikengedibua bua mudimu wonso mulenga.”​—2 Timote 3:17.

Nenku, padi Yehowa utudimuija bua mateyi a Diabolo mbua padiye mutunange. Mmumanye ne: bademon mbaluishi ba njiwu.