Spiritu ituku! Mu miaba idi kayiyi imueneka ne mesu, mudi nyuma mimpe ne mibi. Mbantu bavua ne muoyo pa buloba e kufuilapu anyi?

Tòo, ki mba pa buloba to. Padi muntu ufua, kena ubuela mu muaba wa nyuma, bu mudi bantu ba bungi babiamba. Mmunyi mutudi bamanye ne: bidi nanku? Mbua padi Bible wamba nanku. Bible mmukanda udi ne bulelela budi bufuma kudi Nzambi umuepele mulelela, udi ne dîna dia Yehowa. Yehowa wakafuka bantu; mmumanye tshidi tshipitakana padibo bafua.​—Musambu wa 83:18; 2 Timote 3:16.

Bible udi wamba ne: Nzambi wakenza Adama, muntu wa kumpala, “ne dimfuenkenya dia buloba.” (Genese 2:7) wakamuteka mu Mparadizu, mu budimi bua Edena. Bu Adama mutumikile mukenji wa Yehowa, kavua mua kuikala mufue to; uvua mua kuikala ne muoyo too ne lelu’eu pa buloba. Kadi, pakashipa Adama mukenji wa Nzambi ku bukole, Nzambi wakamuambila ne: “Neupingane mu buloba, bualu wakangatshibuaku. Bualu wewe udi lupuishi ne neupingane ku lupuishi.”​—Genese 3:19.

Ebi bidi bisua kumvuija tshinyi? Tuanji kumona: Adama uvua penyi kumpala kua Nzambi kumufukaye ne lupuishi? Kavuaku nansha muaba umue to. Kavua nyuma uvua kayi muanji kuledibua mu diulu to. Kavuaku to. Nenku, pavua Yehowa muambe ne: Adama uvua ne bua “kupingana ku lupuishi,” uvua usua kuamba ne: Adama uvua ne bua kufua. Kavua musambuke bua  kubuela mu muaba wa baspiritu to. Ku lufu luende, Adama katshivua kabidi ne muoyo to, kakikalaku kabidi nansha. Lufu, ndipanga kuikala ne muoyo.

Kadi, netuambe tshinyi bua aba bakadi bafue? Ne bobo pabo, kabatshienaku anyi? Bible udi wandamuna ne:

• “Bionso [bantu ne nyama] biyaya ku muaba umue. Bionso mbifume ku lupuishi, nebiandamuke lupuishi.”​—Muambi 3:20.

• “Bafue kabena bamanye bualu nansha bumue.”​—Muambi 9:5.

• “Dinanga diabo ne lukinu luabo ne mukau wabo biakajimina kale.”​—Muambi 9:6.

• “Kakuena mudimu, kakuena kulongolola kua malu kakuena dimanya anyi meji mu Sheol [lukita], muaba ûdi uya.”​—Muambi 9:10.

• “[Muntu] udi upingana ku dimfuenkenya diende; mu dine dituku adi, malu akadiye upangadija adi ajimina.”​—Musambu wa 146:4.

 Mvese eyi mmikukolele bua wewe kuyanyisha anyi? Pikalabi nanku, ela meji pa bualu budi bulonda ebu: Mu mêku mavule, mulume udi upeta mfranga bua kudiisha bena diende. Padiye ufua, dîku diende didi dishala mu dikenga. Imue misangu mukaj’ende ne bana bende badi mua kupanga mfranga mikumbane bua kusumba bia kudia. Imue misangu, baluishi ba mulume badi mua kubenzela bibi. Mpindieu, anji kudiebeja ne: ‘Pikala muntu eu ne muoyo mu muaba wa baspiritu, bua tshinyi kena utungunuka ne kupesha bena dîku diende bidibo bakengela? Bua tshinyi kena ulama dîku diende ku bantu babi?’ Mbua padi mvese eyi miambilemu. Muntu kêna kabidi ne muoyo to, kêna mua kuenza tshintu to.​—Musambu wa 115:17.

Ebi bidi bisua kumvuija ne: bafue kabena mua kuikala kabidi ne muoyo tshiendelele anyi? Tòo, kabiena bisua kumvuija nanku to. Netuakule bua dibiishibua ku lufu pashishe. Kadi, bidi bisua kumvuija ne: bafue mbapange bushuwa biwudi wenza. Kabena mua kukumona, kukuteleja, anyi kuakula nebe. Kuena ukengela kubatshina nansha. Kabena mua kukuambuluisha to, ne kabena nansha mua kukuenzela bibi.​—Muambi 9:4; Yeshayi 26:14.