DILONGESHA 12
Muana wa muanabu ne Paulo uvua ne muoyo mukole
Tumonabi bualu bua nsongalume kampanda uvua mupandishe mansebende ku lufu. Mansebende wa nsongalume au ke mupostolo Paulo. Kadi katuena bamanye dîna dia nsongalume au to; tshitudi bamanye ntshia ne: wakenza bualu buvua bulomba muoyo mukole menemene! Udiku musue kumanya tshivuaye muenze atshi anyi?—
Paulo uvua mu buloko ku Yelushalema. Bavua bamukuate anu bualu uvua uyisha malu a Yezu. Bantu babi bakuabu bavua bakine Paulo; kumuelelabu tshifufu bua kumuenzela bibi. Kuambabu ne: ‘Tulombayi mfumu wa basalayi bua atume basalayi baye ne Paulo ku tshilumbuluidi. Netusokome mu njila bua padi Paulo upita, tumushipe.’
Muana wa muanabu ne Paulo wakamumanyisha tshifufu tshibi tshivuabu bamuelele, kumanyishaye kabidi ne mfumu wa basalayi
Muana wa muanabu ne Paulo kumvuaye tshifufu tshia bantu babi abu. Tshivuaye mua kuenza ntshinyi? Wakaya ku buloko, kumanyishaye Paulo. Anu pinapu, Paulo kumuambilaye bua yeye kuambila mfumu wa basalayi bualu bua mayele mabi au. Udiku umona ne: bivua bipepele bua muana wa muanabu ne Paulo kuambilaye mfumu wa basalayi bualu abu anyi?— Tòo, bualu mfumu wa basalayi au uvua muntu munene. Kadi muana wa muanabu ne Paulo uvua ne muoyo mukole, wakayikila ne mfumu wa basalayi.
Mfumu wa basalayi au wakamanya tshia kuenza bimpe menemene. Wakakunguija tshisumbu tshia basalayi batue ku 500 mijima bua kulama Paulo! Kubambilaye bua kuyabu ne Paulo ku Kaisaliya anu butuku abu. Paulo uvuaku mupande anyi?— Eyowa, bantu babi abu kabavua mua kumuenzela kabidi bibi to! Mayele abu mabi au akapangila.
Bualu ebu budi mua kukulongeshaku tshinyi?— Mbimpe wewe pebe kuikala ne muoyo mukole anu bu muana wa muanabu ne Paulo. Tudi ne bua kuikala ne muoyo mukole patudi tuambila bakuabu malu a Yehowa. Newikale pebe ne muoyo mukole, wewe kutungunuka anu ne kuamba malu a Yehowa anyi?— Wewe muenze nanku, udi mua kupandisha pebe muoyo wa muntu mukuabu.
