1-3. (a) Yezu udi wenza tshinyi padi mpofo ibidi imulomba diambuluisha? (b) Padi Bible wamba ne: ‘Luse luakakuata Yezu,’ bidi biumvuija tshinyi? (Bala malu adi kuinshi kua dibeji.)

 MPOFO ibidi mmisombe kumpenga kua njila pabuipi ne Yeleko. Itu ilua muaba eu matuku onso bua kulomba ka pa luse bualu mmuaba utu bantu ba bungi bapitshila. Kadi lelu, kudi bualu bukadi pa kuenzeka buashintulula nsombelu wabu bikole.

² Bantu babidi aba badi bumvua mutoyi. Bu mudibu kabayi bamona, umue wa kudibu udi webeja tshidi tshienzeka ne badi bamuandamuna ne: ‘Yezu wa ku Nazaleta udi upita.’ Yezu udi uya ku Yelushalema bua musangu wende wa ndekelu. Kadi kena nkayende to; bisumbu bia bantu bidi bimulonda. Padi mpofo yumvua ne: Yezu ke udi upita, idi ituadija kuela mbila yamba ne: ‘Mukalenge, muana wa Davidi, utufue luse.’ Bantu badi bafika munda ne bayambila bua kupuwa, kadi idi itungunuka anu ne kuela mbila.

³ Yezu udi umvua mbila yabu nansha mudiku mutoyi wa bungi. Neenze tshinyi? Udi ne malu a bungi mu muoyo wende ne mu lungenyi luende. Nkumushadile anu lumingu lumue kumpala kua kufuaye. Mmumanye ne: makenga makole ne lufu mbimuindile mu Yelushalema. Kadi kena ujika matshi ku mbila yabu to. Udi wimana ne utuma dîyi bua balue nabu. Bantu abu badi bamusengelela ne: ‘Mukalenge, mêsu etu atabale.’ ‘Luse ludi lukuata Yezu,’ udi ulenga mêsu abu ne badi batuadija  kumona. * Diakamue badi bamulonda.​—Luka 18:35-43; Matayo 20:29-34.

4. Mmushindu kayi uvua Yezu mukumbaje mulayi uvua wamba ne: ‘Neafuile udi mutekete luse’?

⁴ Yezu kavua mumvuile bantu luse anu musangu umue au to. Uvua uditeka pa muaba wa bakuabu misangu ya bungi ne mu nsombelu mishilangane. Bible ukavua mumanyishe ne: ‘Neafuile udi mutekete luse.’ (Musambu 72:13) Anu mudi mêyi aa aleja, Yezu uvua umvua bibi pavuaye umona bantu bakenga ne uvua ubambuluisha. Luse luvua lumusaka bua kuyisha. Tumone mudi mukanda wa Matayo, Mâko, Luka ne Yone yakula bua muvua Yezu uleja luse mu mêyi ne mu bienzedi biende ne tumone mutudi petu mua kuikala ne luse bu luende.

5, 6. Mbilejilu kayi bidi bileja ne: Yezu uvua uditeka pa muaba wa bakuabu?

⁵ Yezu uvua mumanye kuditeka pa muaba wa bakuabu. Uvua umona ntatu ya bantu ne ivua imutonda bikole. Nansha muvua makenga onso atu akuata bantu kaayi mamukuate, bivua bimusama ku muoyo pavuaye ubamona bakenga. (Ebelu 4:15) Pavuaye muondope mukaji uvua ne disama dia mashi kaayi akoseka munkatshi mua bidimu 12, wakamba muvuadi ‘disama dibi ditambe.’ Bualu ebu budi buleja muvuaye mumanye ne: disama adi divua ditatshishe mukaji au bikole. (Mâko 5:25-34, NW) Pavuaye mumone Mariya ne bantu bakuabu badila bua lufu lua Lazalo, biakamulenga ku muoyo bikole ne kumulubakaja. Nansha muvuaye mumanye ne: ukavua pa kubisha Lazalo, wakanyingalala bikole ne binsonji kutengabela mu mêsu.​—Yone 11:33, 35.

 ⁶ Dituku dikuabu, muena nsudi wakalua kudi Yezu umusengelela ne: ‘Biwasua kuenza nunku, udi mumanye mua kundengeja.’ Yezu wakenza tshinyi nansha muvuaye muntu mupuangane uvua kayi muanji kusama? Wakaditeka pa muaba wa muena nsudi au. “Luse luakamukuata.” (Mâko 1:40-42) Ke kuenzaye bualu bua dikema. Uvua mumanye ne: bilondeshile Mikenji ya Mose, bena nsudi kabavua bakezuke ne kabavua mua kusemena pabuipi ne bantu bakuabu to. (Lewitiki 13:45, 46) Yezu uvua mua kuondopa muntu au kayi umulenga to. (Matayo 8:5-13) Kadi wakolola tshianza, kulenga muena nsudi ne kumuambila ne: ‘Ndi musue, wikale mulengejibue.’ Diakamue, nsudi yakajimina. Yezu wakaleja muvuaye muditeke pa muaba wa muntu au.

7. Ntshinyi tshidi mua kutuambuluisha bua kumanya mua kuditeka pa muaba wa bakuabu? Mmushindu kayi utudi mua kuleja bualu ebu?

⁷ Tuetu bena Kristo tudi ne bua kuikala tuditeka pa muaba wa bakuabu anu bu Yezu. Bible udi utulomba bua tuikale ‘tusambangana.’ * (1 Petelo 3:8) Kabitu bitekete bua kumvua mudi bantu badi ne masama a munanunanu badiumvua to, nangananga tuetu katuyi banji kuasama. Kadi katupu muoyo ne: katuena ne bua kupitshila mu ntatu ya buena ya bakuabu bua tuetu kumanya mua kuditeka pa muaba wabu to. Yezu uvua uditeka pa muaba wa bantu bavua basama nansha muvuaye kayi musame dituku nansha dimue. Nunku, ntshinyi tshitudi mua kuenza bua kuditeka pa muaba wa bakuabu? Tuikale tuteleja padi bantu badi bakenga batukuatshila malu abu, ne tutete kumvua mudibu badiumvua. Tudi mua kudiebeja ne: ‘Bu meme ne lutatu elu, mvua mua kudiumvua bishi?’ (1 Kolinto 12:26) Tuetu tuditatshisha bua kumvua mudi bakuabu badiumvua, netumanye mua ‘kukolesha badi ne mitshima yamba kupanga.’ (1 Tesalonike 5:14) Imue misangu, tudi mua kuleja mutudi tumvua mudi bakuabu badiumvua ki nganu patudi tuamba mêyi adi  abakolesha ku muoyo, kadi ne binsonji kabidi. Lomo 12:15 udi wamba ne: “Nudile ne badi badila.”

8, 9. Mmalu kayi avua Yezu muenze bua kuleja muvuaye utua bantu mushinga?

⁸ Yezu uvua umvuila bantu ne wenza malu avua aleja muvuaye ubatua mushinga. Tshilejilu, bakalua dituku dikuabu ne muena mapapa uvua kabidi ne lutatu lukole lua kuakula. Bidi bimueneka ne: Yezu wakajingulula muvua muntu au udiumvua bibi munkatshi mua bantu, ke kuenzaye bualu buvuaye kayi ne tshibidilu tshia kuenza pavuaye ondopa bantu. ‘Yezu wakaya nende pa nkayende, bantu bakuabu bakashala.’ Pakafikabu muaba uvua bantu kabayi babatangila, wakamuondopa.​—Mâko 7:31-35.

⁹ Yezu wakenza bualu bua muomumue pakamutuadilabu mpofo mukuabu ne kumulombabu bua amuondope. ‘Wakakuata mufofo ku tshianza tshiende, wakalopoka nende mu musoko.’ Pashishe kumuondopaye ku kakese ku kakese, pamuapa bua mêsu ende ne lungenyi luende bibidilangane ne nsese ya dîba ne bintu bikuabu. (Mâko 8:22-26) Yezu wakaleja muvuaye unemeka bantu.

10. Ntshinyi tshitudi mua kuenza bua kuleja mutudi tutua bakuabu mushinga?

¹⁰ Kuikala bayidi ba Yezu kudi kutulomba bua kuenzela bantu malu bilondeshile mudibu badiumvua. Nunku tudi ne bua kukanda ludimi luetu bualu tudi bamanye ne: mêyi mabi adi mua kutapa bakuabu ku muoyo. (Nsumuinu 12:18; 18:21) Bena Kristo badi bamanye kuditeka pa muaba wa bakuabu kabena mua kuambangana mêyi mashile adi apuekeshangana milongo anyi mêyi a nsenda to. (Efeso 4:31) Nuenu bakulu, mmushindu kayi unudi mua kuangata mudi  bakuabu badiumvua ne mushinga? Panudi nubela muntu, nuikale ne mêyi mimpe bua adiumvue ne: nudi numutua mushinga. (Galatia 6:1) Nuenu baledi, mmushindu kayi unudi mua kuleja ne: nudi nutua bana benu mushinga? Panudi nubapesha dinyoka, nuenze muenu muonso bua kubenga kubafuisha bundu.​—Kolosai 3:21.

11, 12. Mmiyuki kayi ya mu Bible idi ileja ne: Yezu kavua windila bua bamulombe bua kuambuluisha bantu?

¹¹ Yezu kavua windila bua bamulombe bua kushishaye kuambuluisha bantu to. Luse nngikadilu utu usaka bantu bua kuenza malu kampanda bua kuambuluisha bakuabu. Nunku kabiena bitukemesha bua muvua luse lusaka Yezu bua kukeba mushindu wa kuambuluisha bantu. Tshilejilu, pavua tshisumbu tshinene tshia bantu tshishale nende matuku asatu majima kabayi badie, muntu nansha umue kavua mumuambile ne: bantu abu bavua ne nzala anyi mumuambile bua kuenza bualu kampanda to. Bible udi wamba ne: ‘Yezu wakabikila bayidi bende, wakabambila ne: Ndi ne bantu aba luse, bualu bua bobu bakusomba nanyi matuku asatu, kabena ne tshiakudia; tshiena musue kubatuma ne nzala, kabayi kupanga mu njila.’ Ke kuangataye dipangadika dia kuenza tshishima bua kubadisha.​—Matayo 15:32-38.

¹² Tuangate tshilejilu tshikuabu. Dituku dikuabu mu tshidimu tshia 31, Yezu wakapetangana ne bualu bukuabu budi buenza luse pabuipi ne musoko wa Naina. Bantu bavua bapatuka mu musoko batangile pamuapa ku nkita ivua ku mikuna ivua pabuipi apu bua kuya kujika ‘muana umuepele mulela wa mukaji wa mu lufuila.’ Udiku mua kutshinka kanyinganyinga kavua naku mamu au anyi? Ukavua pa kujika muanende umuepele ne kavua ne mulume uvua mua kumukuatshisha mu lutatu luende alu to. Nansha muvua bantu abu tshisumbu tshinene, Yezu ‘wakatangila’ ne kumonaye anu mukaji wa mu lufuila uvua mufuishe muana. Bualu buakamonaye buakamulenga bikole bualu Bible  udi wamba ne: “Wakamufua luse.” Muntu kakamulomba bua kuenza bualu to, kadi luse luakamusaka bua kukeba tshia kuenza. Nunku ‘wakalua pabuipi, wakalenga tshituadilu tshia tshitalu tshianza’ ne kubisha muana uvua mufue. Ntshinyi tshiakenzeka pashishe? Yezu kakambila nsongalume au bua abuele mu tshisumbu tshia bantu bavua benda bamulonda to, kadi ‘wakamufila kudi mamuende.’ Wakabasangisha kabidi mu dîku bua mukaji wa mu lufuila au apete muntu wa kumuambuluisha.​—Luka 7:11-15.

13. Mmushindu kayi utudi mua kuidikija Yezu patudi tukeba mua kuambuluisha bantu badi mu ntatu?

¹³ Mmushindu kayi utudi mua kuidikija Yezu? Bushuwa, katuena mua kudisha bantu mu tshishima anyi kubisha bantu ku lufu to. Kadi tudi mua kuidikija Yezu patudi tukeba mishindu ya kuambuluisha bakuabu. Muena Kristo netu udi mua kuikala mujimije mudimu wende anyi muikale ne lutatu lukole lua makuta. (1 Yone 3:17) Nzubu wa muanetu wa bakaji udi mukamba udi mua kuikala munyanguke bikengela kumulongolola. (Yakobo 1:27) Kudi mua kuikala dîku dia bana betu badi bafuishe badi dijinga ne dikankamija anyi diambuluisha kampanda. (1 Tesalonike 5:11) Patudi tumona bana betu badi bushuwa mu ntatu, katuindidi bua batulombe bua tushishe kubambuluisha to. (Nsumuinu 3:27) Luse ludi ne bua kutusaka bua kukeba tshia kuenza bua kubambuluisha bilondeshile bitudi bakokeshe. Katupu muoyo ne: patudi tuenzela muntu bualu buimpe nansha bobu bukese anyi tumukankamija ne mêyi makese adi afumina mu muoyo wetu, tudi tuleja mutudi tuditeka pa muaba wende.​—Kolosai 3:12.

14. Bua tshinyi Yezu uvua muteke kuamba kua lumu luimpe pa muaba wa kumpala?

¹⁴ Anu bu mutuvua balonge mu tshitupa 2, Yezu mmutushile tshilejilu tshimpe tshia kuyisha lumu luimpe. Wakamba ne: ‘Bundi nabu mbua kuamba lumu luimpe lua bukalenge  bua Nzambi; buakantuminabu mbualu ebu.’ (Luka 4:43) Bua tshinyi uvua muteke mudimu eu pa muaba wa kumpala? Tshia kumpala, bualu uvua munange Nzambi. Kadi Yezu uvua uyisha kabidi bualu uvua ne luse lua bungi ne uvua musue kuambuluisha bantu bua bamanye Nzambi. Ku malu onso akenzaye bua kuleja muvuaye ne luse, kakuena budi bupite kuambuluisha bantu bua bamanye Nzambi to. Tukonkononayi bilejilu bibidi bidi bileja muvua Yezu umona bantu bavuaye uyisha. Bualu ebu nebutuambuluishe bua kudikonkonona ne kumona tshidi tshitusaka bua kuyisha.

15, 16. Londa malu abidi adi aleja muvua Yezu umona bantu bavuaye uyisha.

¹⁵ Mu 31 Yezu mumane kuyisha ne muoyo mujima munkatshi mua bidimu bibidi, wakaya wenda uyisha ‘mu bimenga bionso ne mu misoko mikese’ ya mu Galela. Malu akamonaye akamulenga bikole. Mupostolo Matayo udi wamba ne: ‘Pakatangilaye bisumbu bia bantu, wakadi nabu luse, bualu bua bobu bakadi batata, bakadi bamuangalake bu mikoko idi kayiyi ne mulami.’ (Matayo 9:35, 36) Yezu wakaditeka pa muaba wa bantu abu. Uvua mumanye bimpe muvuabu dijinga ne kumvua lumu luimpe. Uvua mumanye  kabidi muvuabu babalengulula kudi bamfumu ba tshitendelelu bavua ne bujitu bua kubalombola. Bu muvua Yezu uditeka pa muaba wabu, wakenza muende muonso bua kubambila lumu luimpe. Lumu luimpe lua Bukalenge bua Nzambi ke tshintu tshia mushinga tshivuabu natshi dijinga.

¹⁶ Bualu bua muomumue buakenzeka ngondo ya bungi pashishe pabuipi ne tshibilu tshia Kupita ku Yehowa tshia mu 32. Dituku adi, Yezu ne bapostolo bende bakabanda mu buatu ne kusabuka mbuu wa Galela benda bakeba muaba wa kuikishila. Kadi tshisumbu tshia bantu tshiakaya lubilu lua makasa ku muelelu wa mâyi ne kubafikila kumpala. Yezu wakenza tshinyi? Bible udi wamba ne: ‘Pakumukaye mu buatu, wakatangila tshisumbu tshinene tshia bantu, wakadi nabu luse, bualu bua bobu bakadi bu mikoko yakadi kayiyi ne mulami; yeye wakabanga kubayisha malu a bungi.’ (Mâko 6:31-34) Musangu au kabidi, Yezu ‘wakabumvuila luse’ bualu kabavua bamanye Nzambi to. Bavua ne dijinga dikole dia kumvua lumu luimpe ne bavua baditatshisha bikole bua kuya kudiye ne kulumvua bualu bavua anu bu ‘mikoko ivua kayiyi ne mulami.’ Yezu wakabayisha bualu uvua mubumvuile luse ki mbualu uvua muenzejibue bua kubayisha to.

17, 18. (a) Ntshinyi tshidi tshitusaka bua kuyisha? (b) Tudi ne bua kuenza tshinyi bua tuetu kumvuila bantu luse?

¹⁷ Ntshinyi tshitu tshitusaka tuetu bayidi ba Yezu bua kuyisha? Anu mutuvua bamone mu nshapita wa 9, tudi ne mudimu wa kuyisha ne kuvuija bantu bayidi. (Matayo 28:19, 20; 1 Kolinto 9:16) Tshidibi katuena ne bua kuyisha anu bualu mbatuelele mukenji wa kuyisha to. Tudi tuyisha lumu luimpe lua Bukalenge nangananga bualu tudi banange Yehowa. Tudi tuyisha kabidi bualu tudi tumvuila bantu badi kabayi bena Kristo netu luse. (Mâko 12:28-31) Ntshinyi tshitudi mua kuenza bua tuetu kuikala tumvuila bantu luse?

¹⁸ Tudi ne bua kumona ne: bantu badi ‘batata, bamuangalake bu mikoko idi kayiyi ne mulami’ anu muvua Yezu ubamona.  Tshinkabi ne: udi upeta muana wa mukoko uvua mujimine. Bu mudiwu kauyi ne mulami udi mua kuudisha ne kuya nawu muaba udi mâyi, muana wa mukoko au udi ne nzala ne nyota ya bungi. Kuakuumvuilaku luse anyi? Kuakuenzaku muebe muonso bua kuukebela biakudia ne mâyi anyi? Bantu ba bungi badi kabayi banji kumvua lumu luimpe badi anu bu muana wa mukoko eu. Bu mudi bamfumu ba bitendelelu biabu babalengulula, badi ne dijinga dikole dia kumanya Nzambi ne ki mbamanye tshidi tshibindile kumpala eku to. Tudi ne bintu bidibu nabi dijinga, mbuena kuamba ne: biakudia ne mâyi bia mu Dîyi dia Nzambi bidi bikolesha. (Yeshaya 55:1, 2) Patudi tuela meji bua lutatu ludi nalu bantu bakuabu, muoyo udi utusaka bua kubambuluisha. Tuetu babanange bikole anu bu Yezu, netuenze muetu muonso bua kubambila lumu luimpe lua Bukalenge bua Nzambi.

19. Ntshinyi tshitudi mua kuenza bua kusaka mulongi wa Bible ukadi mukumbane bua kutuadija kuyisha?

¹⁹ Mmushindu kayi utudi mua kuambuluisha bantu bua kulondabu tshilejilu tshia Yezu? Tekabi ne: udi musue kuambuluisha mulongi wa Bible ukadi mukumbane bua kutuadija kuyisha. Peshi udi musue kuambuluisha muanetu udi katshiyi uyisha bua kutuadijilula kuyisha kabidi. Ntshinyi tshiudi mua kuenza? Udi ne bua kulenga mioyo yabu. Vuluka ne: Yezu wakanji ‘kumvuila bantu luse’ pashishe kubalongeshaye. (Mâko 6:34) Nunku tuetu babambuluishe bua kumvuila bantu bakuabu luse, mioyo yabu idi mua kubasaka bua kuidikija Yezu ne kuyisha lumu luimpe. Tudi mua kubebeja ne:  “Mmushindu kayi uvua ditaba lumu luimpe dilengeje nsombelu webe? Kuenaku umona ne: bantu bakuabu badi pabu dijinga ne kumvua lumu luimpe anyi? Udi mua kuenza tshinyi bua kubambuluisha?” Bushuwa, tudi tuyisha nangananga bualu tudi banange Yehowa ne basue kumuenzela mudimu.

20. (a) Kuikala muyidi wa Yezu kudi kumvuija tshinyi? (b) Netuakule bua tshinyi mu nshapita udi ulonda?

²⁰ Kuikala muyidi wa Yezu kakuena kumvuija anu kuambila bantu malongesha ende ne kuenza malu bu muvuaye wenza to. Tudi kabidi ne bua kuikala ne ‘meji’ a buena ende. (Filipoi 2:5) Nunku, tuikalayi ne dianyisha dia bungi bua mudi Bible utuleja patoke meji avua asaka Yezu bua kuamba mêyi kampanda anyi kuenza malu kansanga. Patudi tuibidilangana ne ‘meji a Kristo,’ netumanye mua kumvuila bakuabu, kuditeka pa muaba wabu ne kubenzela malu anu muvua Yezu wenzela bantu bonso malu. (1 Kolinto 2:16) Mu nshapita udi ulonda netuakule bua mishindu mishilangane ivua Yezu muleje muvuaye munange bayidi bende.