1, 2. Bua tshinyi tatu udi usanka padiye umona muanende umutumikila? Umvuija mudi bualu ebu buleja mutu Yehowa udiumvua.

 TATU udi utangidila pa dididishi ne umona muanende wa balume unaya ne balunda bende. Pashishe ndundu wabu udi uya mu njila. Muana udi ne dijinga dikole dia kuya kumuangata ne ke tshidi umue wa ku balunda bende umusaka bua kuenza. Kadi udi ubenga wamba ne: “Mbankandike bua kuya mu njila.” Tatu udi umvua disanka dia bungi.

² Bua tshinyi udi usanka nunku? Bualu uvua mukandike muanende bua kayi mu njila nkayende to. Padi muana utumikila mukenji au nansha padiye kayi mumanye ne: tatuende mmumutangile, tatu udi umona ne: muanende udi ulonga ditumikila didi mua kumukuba. Tatu eu udi umvua anu mutu Yehowa Tatu wetu wa mu diulu udiumvua. Nzambi mmumanye ne: bua tuetu kulama ditabuja dietu ne kupeta masanka matuku atshilualua, tudi ne bua kulonga mua kumueyemena ne kumutumikila. (Nsumuinu 3:5, 6) Bua kukumbaja bualu ebu, mmututumine mulongeshi udi mutambe balongeshi bonso.

3, 4. Mmushindu kayi uvua Yezu ‘muyile ditumikila’ ne ‘mulue ne buakane buonso’? Fila tshilejilu.

³ Bible udi wamba bualu bua Yezu budi bukemesha padiye wamba ne: ‘Nansha yeye muikale Muana, wakayila ditumikila ku malu akakengaye nawu. Pakavuijibuaye ne buakane buonso, yeye wakalua muenzeji wa lupandu lua tshiendelele kudi bonso badi bamutumikila.’ (Ebelu 5:8, 9) Muanabute wa Nzambi eu ukavua muenze bidimu bungi kabuyi kubala mu diulu. Wakamona muvua Satana ne banjelu bakuabu batombokele Nzambi, kadi yeye kakabalonda to. Mulayi mukuabu mufundisha ku nyuma wa Nzambi wakamba bua bualu buende ne: “Tshiakamutombokela.” (Yeshaya 50:5) Kadi mmushindu kayi udi mêyi a ne: “wakayila ditumikila” akumbanyina Muana eu uvua utumikila  Nzambi mu malu onso? Mmushindu kayi uvua Muana mupuangane eu mua ‘kulua ne buakane buonso’?

⁴ Tuangate tshilejilu. Musalayi udi ne kele ka mvita kenza bimpe. Nansha mutuye kayi muanji kuluangana naku mvita, kele aku nkenza bimpe kakayi ne kalema to. Kadi udi ukashintakaja ne kakuabu kenza ne tshiamu tshikole tshipite tshia kende. Kele aka koku, bakadi baluangane naku mvita. Ki mmuenzaku bimpe padiye mushintakaje kele kende anyi? Bia muomumue, ditumikila divua nadi Yezu kumpala kua kuluaye pa buloba kadivua ne kalema to. Kadi matuku akenzaye pa buloba akashintulula ditumikila diende bikole, bualu mateta akapetaye akaditeta mu mushindu uvuabi kabiyi mua kumuenzekela mu diulu to.

5. Ntshinyi tshivua tshivuije ditumikila dia Yezu ne mushinga? Netukonkonone tshinyi mu nshapita eu?

⁵ Ditumikila divua ne mushinga wa bungi mu mudimu uvua Nzambi mutumine Yezu pa buloba. Bu mudi Yezu ‘Adama wa ku nshikidilu,’ wakenza tshivua muledi wetu wa kumpala mupangile bua kuenza. Yeye wakatumikila Yehowa Nzambi mu malu onso nansha mu mateta. (1 Kolinto 15:45) Kadi ditumikila dia Yezu kadivua dia tshidingishilu to. Uvua utumikila ne lungenyi luende luonso, muoyo wende wonso ne anyima wende yonso. Uvua utumikila kabidi ne disanka dionso. Buende yeye, kuenza disua dia Tatuende kuvua ne mushinga wa bungi kupita kudia. (Yone 4:34) Ntshinyi tshiatuambuluisha bua kuidikija ditumikila dia Yezu? Tuanji tumone malu avua amusaka bua kutumikila Nzambi. Tuetu bidikije malu au, nebituambuluishe bua kutantamena mateta ne kuenza disua dia Nzambi. Pashishe netumone masanka atudi tupeta patudi tutumikila Nzambi anu bu Kristo.

6, 7. Tela amue malu avua asaka Yezu bua kutumikila.

⁶ Ditumikila dia Yezu divua difumina ku tshivua mu muoyo wende. Anu mutuvua balonge mu nshapita muisatu, Kristo uvua muena bupuekele mu mutshima. Lutambishi lutu lusaka bantu bua kubenga kutumikila Yehowa, kadi didipuekesha didi ditusaka bua kumutumikila ne muoyo mujima.  (Ekesode 5:1, 2; 1 Petelo 5:5, 6) Ditumikila dia Yezu divua kabidi difumina ku malu avuaye munange ne avuaye mukine.

⁷ Yezu uvua munange Tatuende wa mu diulu Yehowa kumpala kua bionso. Netuakule bua dinanga edi mu bule ne mu butshiama mu nshapita wa 13. Dinanga edi divua disaka Yezu bua kutshina Nzambi. Bu muvuaye munange Yehowa bikole ne umunemeka bikole, kavua musue kumunyingalaja to. Ditshina diende edi ke divua kabidi disaka Nzambi bua kuteleja masambila ende. (Ebelu 5:7) Ditshina dia Yehowa didi kabidi umue wa ku ngikadilu minene idi nayi Yezu mu Bukalenge buende bua Masiya.​—Yeshaya 11:3.

8, 9. Anu mukavuabu bamanyishe, ntshinyi tshivua Yezu umvua bua malu makane ne bua malu mabi? Mmushindu kayi wakalejaye patoke muvuaye udiumvua?

⁸ Kunanga Yehowa kudi kabidi kumvuija kukina malu adiye mukine. Tshilejilu, tangila tshivua mulayi udi utangila Mukalenge  Masiya eu wamba: ‘Udi unanga malu makane ne udi ne malu mabi lukuna. Bua bualu ebu Nzambi, Nzambi webe mene, wakukuela manyi a disanka pa mutu pebe ne diela dia manyi ditamba diakelaye bakuebe.’ (Musambu 45:7) ‘Bakuende’ aba bavua bakalenge bakuabu ba mu ndelanganyi ya Mukalenge Davidi. Yezu udi usanka bikole kubapita bonso bua diedibua diende dia manyi. Bua tshinyi? Bualu difutu diende ndipite diabu kule ne kule ne bukalenge buende budi bupetesha bantu masanka kaayi kubala. Nzambi mmumufute bualu dinanga diende dia buakane ne dikina dia malu mabi diakamusaka bua kumutumikila mu malu onso.

⁹ Mmushindu kayi wakaleja Yezu ne: mmunange buakane ne mmukine malu mabi? Tshilejilu, ntshinyi tshiakenzaye pavua bayidi bende batumikile dîyi divuaye mubatumine bua kuyisha ne bapete masanka? Yezu wakasanka bikole. (Luka 10:1, 17, 21) Kadi wakadiumvua bishi pakabenga bena mu Yelushalema kutumikila Nzambi njila ne njila, babenga bionso bivuaye wenza bua kubambuluisha? Wakadila bua buntomboji buabu. (Luka 19:41, 42) Yezu uvua usanka bikole bua malu mimpe ne unyingalala bikole bua malu mabi.

10. Ntshinyi tshitudi ne bua kuikala tumvua bua malu mimpe ne malu mabi? Ntshinyi tshidi mua kutuambuluisha bua kuenza nanku?

¹⁰ Kuela meji pa mushindu uvua Yezu udiumvua kudi kutuambuluisha bua kukonkonona malu adi atusaka bua kutumikila Yehowa. Nansha mutudi bena mapanga, tudi mua kufika ku dinanga malu mimpe ne muoyo mujima ne kukina malu mabi bikole. Tudi ne bua kulomba Yehowa bua atuambuluishe bua tuikale ne meji a buena ende ne a buena a Muanende. (Musambu 51:10) Tudi kabidi ne bua kuepuka malu adi mua kunyanga meji etu. Tudi ne bua kusungula mishindu mimpe ya kujikija lutetuku ne kusungula balunda bimpe. (Nsumuinu 13:20; Filipoi 4:8) Tuetu bikale ne meji a buena a Kristo, ditumikila dietu kadiakuikala dia pa mutu pa mutu to. Netuenze malu mimpe bualu tudi basue kuenza. Netubenge kuenza malu mabi bualu tudi baakine, ki mbualu tudi tutshina bua batutandule to.

11, 12. (a) Ntshinyi tshiakenzekela Yezu ku ntuadijilu kua mudimu wende? (b) Nditeta kayi dia kumpala divua Satana muele Yezu? Wakamuteta bishi?

¹¹ Satana wakateta Yezu anu ku ntuadijilu kua mudimu wende bualu uvua mukine malu mabi. Yeye mumane kutambula, wakenza matuku 40 mu tshipela kayi udia munya ne butuku. Ku ndekelu kua matuku au, Satana wakalua bua kumuteta. Tumonayi muvua Diabolo ne budimu bubi.​—Matayo 4:1-11.

¹² Bua kutuadija, Satana wakamuambila ne: ‘Biwikala Muana wa Nzambi, amba mabue aa andamuke mitanda ya bidia.’ (Matayo 4:3) Yezu uvua mumvue bishi pavuaye muenze matuku a bungi kayi udia? Bible udi wamba patoke ne: ‘Wakadi ne nzala.’ (Matayo 4:2) Nunku Diabolo wakabuelela pa dijinga ditu nadi bantu dia kudia, kakuyi mpata wakindila too ne pavua nzala mitekeshe Yezu bikole. Tangila kabidi muvua Satana mumuyobole wamba ne: ‘Biwikala Muana wa Nzambi.’ Satana uvua mumanye bimpe ne: Yezu uvua ‘Muanabute wa bifukibua bionso.’ (Kolosai 1:15) Kadi Yezu kakitaba bua Satana amupangishe bua kutumikila Nzambi to. Yezu uvua mumanye ne: Nzambi kavua musue bua enze mudimu ne bukole buvuaye mumupeshe bua kudisankisha to. Wakabenga bua kuenza nanku bua kuleja muvuaye weyemena Yehowa bua amukuatshishe ne amulombole.​—Matayo 4:4.

13-15. (a) Nditeta kayi divua Satana muele Yezu bua musangu muibidi ne muisatu? Ntshinyi tshiakenza Yezu? (b) Ntshinyi tshidi tshileja ne: Yezu uvua anu mudimukile Satana misangu yonso?

¹³ Mu diteta diende dibidi, Satana wakaya ne Yezu pa musonga wa ntempelo. Wakakonyangaja Dîyi dia Nzambi ne budimu buonso bua kusaka Yezu ku dienza bualu bua madileji, umuambila bua kutumpika ku musonga bua banjelu bamulame. Bu tshisumbu tshia bantu bavua ku ntempelo mua kumona tshishima tshia mushindu eu, nnganyi wa kudibu uvua kayi mua kuitaba ne: Yezu uvua Masiya uvuabu balaye? Bu bantu mua kuitaba muvuaye Masiya anu bua didileja dia mushindu eu, Yezu kavuaku mua kudiepula ku ntatu ya bungi anyi? Bivua mua kuenzeka nanku. Kadi Yezu uvua mumanye ne: Yehowa uvua musue  bua Masiya akumbaje mudimu wende ne didipuekesha dionso. Kavua ne bua kusaka bantu bua bamuitabe ku diambuluisha dia malu a kudileja nawu to. (Yeshaya 42:1, 2) Musangu eu kabidi, Yezu kakitaba bua kubenga kutumikila Yehowa to. Kavua ukeba bua bantu bamutumbishe to.

¹⁴ Kadi netuambe tshinyi bua diteta dia kupeta bukokeshi? Mu diteta diende disatu, Satana wakambila Yezu bua kumukukuila musangu umue patupu bua amupeshe makalenge onso a pa buloba. Yezu wakelaku meji bikole pa tshivua Satana usua kumupesha anyi? Wakandamuna ne: “Satana, umuka.” Kuambaye kabidi ne: ‘Bualu bua bakufunda dîyi ne: Kukuila Mukalenge Nzambi webe, umuenzele yeye nkayende mudimu.’ (Matayo 4:10) Kakuvua tshintu tshivua mua kusaka Yezu bua kutendelela nzambi mukuabu to. Kakuvua tshintu anyi bukokeshi bua pa buloba apa buvua mua kumusaka bua kubenga kutumikila Nzambi to.

¹⁵ Satana wakashikidila apu anyi? Tòo, wakaya bu muvua Yezu mumutumine dîyi. Kadi Luka udi wamba mu mukanda wende ne: Diabolo ‘wakamushiya too ne ku tshikondo tshikuabu’ tshimpe. (Luka 4:13) Nunku, Satana uvua ukeba mishindu mikuabu ya kuteta Yezu too ne ku ndekelu. Bible udi utuambila ne: Yezu uvua ‘muteyibue mu malu onso.’ (Ebelu 4:15) Nunku Yezu uvua anu mudimuke misangu yonso. Ke tshitudi petu ne bua kuenza.

16. Mmushindu kayi udi Satana uteta basadidi ba Nzambi lelu? Tudi ne bua kuenza tshinyi bua kubenga kupona mu mateyi ende?

¹⁶ Satana utshidi uteta basadidi ba Nzambi. Bia dibungama, utu utukuata bipepele bua mapanga etu. Satana utu utamba kubuelela pa ngikadilu bu mudi didisua, lutambishi ne dijinga dia kuikala ku mutu kua bakuabu. Tuetu banange biuma bikole, udi nansha mua kutusaka ku dikala ne ngikadilu yonso itudi batele eyi. Ke bualu kayi, mbimpe tuikale tudikonkonona ku musangu ne ku mukuabu. Tudi ne bua kuela meji pa mêyi adi mu 1 Yone 2:15-17. Patudi tuenza nunku, tudi mua kudiebeja bikala majinga a ku mubidi a bena pa buloba, dijinga dia kupeta biuma bia bungi ne dia kukemesha bantu bakuabu mmakepeshe dinanga ditudi banange Tatu wetu wa mu diulu mu  mushindu kampanda anyi kansanga. Katupu muoyo ne: malu a pa buloba akadi pa kujimina pamue ne Satana mukokeshi wabu. Katuponyi mu mateyi adiye utuela bua kutufikisha ku dienza malu mabi. Tulonde tshilejilu tshia Mfumuetu, bualu “Yeye kakenza bualu bubi.”​—1 Petelo 2:22.

17. Ntshinyi tshivua Yezu umvua pavuaye utumikila Tatuende? Kadi ntshinyi tshidi bantu bakuabu mua kuamba?

¹⁷ Kutumikila kakuena kumvuija anu kubenga kuenza malu mabi to, bualu Kristo uvua udienzeja bua kutumikila Tatuende mu malu onso. Wakamba ne: “Matuku onso ntu ngenza malu adi amusankisha.” (Yone 8:29) Kutumikila kuakapetesha Yezu disanka dia bungi. Kadi bantu bakuabu badi mua kuamba ne: kutumikila kakuvua bualu bukole bua Yezu to. Badi mua kuikala bela meji ne: Yeye uvua ne bua kutumikila anu Yehowa udi mupuangane, kadi tuetu misangu ya bungi tudi ne bua kutumikila bantu bena mapanga badi batukokesha. Kadi tshia kumanya ntshia se: Yezu wakatumikila bantu bapange bupuangane bavua ne bukokeshi.

18. Ntshilejilu kayi tshia ditumikila tshivua Yezu mushiye patshivuaye muana?

¹⁸ Pavua Yezu wenda ukola, uvua ku bukokeshi bua baledi bende Yosefe ne Mariya bavua bena mapanga. Uvua mua kuikala umona bilema bia baledi bende kupita bana ba bungi. Uvuaku mubatombokele, mubenge kuditeka pa muaba uvua Nzambi mumupeshe wa kuikala muana mu dîku ne kuambila baledi bende mushindu wa kulama dîku anyi? Luka 2:51 udi wamba bua Yezu pavuaye ne bidimu 12 ne: ‘Wakadi utumikila mêyi abu.’ Mmushile bansonga bena Kristo badi badienzeja bua kutumikila baledi babu ne kubanemeka tshilejilu tshimpe menemene.​—Efeso 6:1, 2.

19, 20. (a) Ndutatu kayi lua pa bualu luvua Yezu mupete mu tshilumbu tshia ditumikila bantu bena mapanga? (b) Bua tshinyi bena Kristo balelela badi ne bua kutumikila bantu badi babalombola lelu?

¹⁹ Mu tshilumbu tshia ditumikila bantu bena mapanga, Yezu wakapeta ntatu mikole itu bena Kristo balelela ba lelu kabayi banji kupeta to. Tuele meji ku tshikondo tshia pa buatshi tshivuaye  ne muoyo pa buloba. Yehowa uvua muitabe tshitendelelu tshia bena Yuda ne ntempelo watshi uvua mu Yelushalema ne bakuidi munkatshi mua bidimu bia bungi. Kadi mpindieu, ukavua pa kutshibenga ne kupingaja tshisumbu tshia bena Kristo pa muaba watshi. (Matayo 23:33-38) Bamfumu ba tshitendelelu bavua kabidi balongesha malu a dishima avua afumina ku nkindi ya bena Greke. Ku ntempelo kuvua mbuejilu ne dikosa dia mishiku, ke bualu kayi Yezu wakabikila ntempelo ne: “Muaba wa banyengi.” (Mâko 11:17) Kadi uvuaku ubenga kuya ku ntempelo ne mu nsunagoga anyi? Tòo. Yehowa utshivua ukuata nabi mudimu. Yezu wakatungunuka ne kuya ku bibilu bivua bienzeka ku ntempelo ne mu nsunangoga too ne pakashintulula Nzambi malu.​—Luka 4:16; Yone 5:1.

²⁰ Bikala Yezu uvua utumikila mu nsombelu yonso ayi, bena Kristo balelela badi ne bua kutungunuka ne kutumikila lelu bualu tudi mu tshikondo tshishilangane bikole tshikavuabu bamanyishe ne: Nzambi neapingaje ntendelelu mukezuke. Nzambi udi utujadikila ne: kakuitaba nansha kakese bua Satana anyange tshisamba tshiende tshidiye mukezule. (Yeshaya 2:1, 2; 54:17) Bushuwa, mu tshisumbu tshia bena Kristo mutu malu mabi ne bilema. Kadi tudiku mua kuimanyina pa bilema bia bantu bakuabu bua kubenga kutumikila Yehowa, pamuapa tubenga kubuela mu bisangilu peshi tutuadija kujana bakulu anyi? Katuenji  nunku nansha kakese! Pamutu pa nanku, tueleshangane diboko ne bantu badi balombola tshisumbu. Tuikale tubuela mu bisangilu bionso, mu mpuilu ne mpungilu ne tutumikile mibelu ya mu Bible idibu batupeshamu.​—Ebelu 10:24, 25; 13:17.

21. Ntshinyi tshivua Yezu wenza pavua bantu bamusaka bua kubenga kutumikila Nzambi? Mmutushile tshilejilu kayi?

²¹ Yezu kavua witaba bua muntu, nansha mulunda uvua ne meji avua amueneka bu mimpe amupangishe bua kutumikila Yehowa to. Tshilejilu, mupostolo Petelo wakateta bua kuitabijija Mfumuende ne: kabivua ne mushinga bua kukenga ne kufua to. Yezu wakabenga ne muoyo umue mubelu mubi uvua Petelo mumupeshe ne meji mimpe wa ne: adiumvuile luse. (Matayo 16:21-23) Lelu, bayidi ba Yezu batu misangu ya bungi ne balela badi babajingila diakalenga, kadi badi mua kubasaka bua kubenga kutumikila mêyi ne mikandu ya Nzambi. Anu bu bayidi ba kumpala ba Yezu, tudi tuamba ne dishindika dionso ne: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:29.

22. Yezu wakafila diandamuna ku lukonko kayi? Mushindu kayi?

²² Pakavua Yezu pa kufua, ditumikila diende diakatetshibua bibi bitambe. Dituku dia kanyinganyinga adi, ‘wakayila tshivua ditumikila’ diumvuija menemene. Wakenza disua dia Tatuende, ki ndiende to. (Luka 22:42) Wakaleja muoyo wende mutoke mu mushindu mupuangane. (1 Timote 3:16) Wakafila diandamuna ku lukonko lua ne: Muntu mupuangane udiku mua kushala mulamate Yehowa nansha mu mateta anyi? Adama ne Eva kabakashala balamate Yehowa to. Kadi pakalua Yezu, nsombelu wende ne lufu luende biakajikija dielakana dionso divua mua kuikalaku. Yeye udi tshifukibua tshitambe bunene tshia Yehowa wakafila diandamuna dia dikema. Wakatumikila Nzambi nansha muvua ditumikila adi dimufikishe ku dikenga dikole ne ku lufu.

23-25. (a) Mmushindu kayi udi ditumikila dipetangana ne muoyo mutoke? Fila tshilejilu. (b) Netuakule bua tshinyi mu nshapita udi ulonda?

²³ Tudi tuleja mutudi ne muoyo mutoke anyi mutudi balamate  Yehowa ne muoyo wetu mujima patudi tumutumikila. Bu muvua Yezu mutumikile, wakalama muoyo wende mutoke ne kuambuluisha bantu bonso. (Lomo 5:19) Yehowa wakamubenesha bikole. Tuetu tutumikila Mfumuetu Kristo, Yehowa neatubeneshe petu. Kutumikila Kristo kudi kutufikisha ku ‘lupandu lua tshiendelele.’​—Ebelu 5:9.

²⁴ Pashishe, muoyo mutoke udi pawu dibenesha. Nsumuinu 10:9 udi wamba ne: “Udi wenda ne mutshima mutoke kena ne ditshina.” Tuetu mua kufuanyikija muoyo mutoke ne nzubu munene muibaka ne madioto mimpe, tudi mua kufuanyikija tshienzedi tshionso tshia ditumikila ne didioto. Didioto dimue didi mua kumueneka bu didi kadiyi ne mushinga, kadi dionso didi ne muaba wadi ne mushinga wadi. Patudi tulamakaja madioto au, tudi tuibaka tshintu tshia mushinga mukole. Bia muomumue, patudi tusangisha bienzedi bia ditumikila, tshimue ku tshimue, dituku ku dituku ne tshidimu ku tshidimu, tudi tupeta muoyo mutoke.

²⁵ Kutumikila munkatshi mua matuku a bungi kudi kutuvuluija ngikadilu mukuabu kabidi, dinanukila anyi ditantamena ntatu. Netuakule bua tshilejilu tshidi Yezu mutushile bua ngikadilu eu mu nshapita udi ulonda.