Bua kuidikija Yezu, ikala . . .
MUENA LUSE
Bu muvua Yezu mupuangane, kavua mupete ntatu ne tunyinganyinga bia bungi bu bantu bakuabu to. Kadi wakaleja muvuaye uditeka bikole pa muaba bantu. Uvua mudiakaje bikole bua kuambuluisha bantu, mmumue ne: kuenza malu kupita too ne muvuaye mua kuenza. Eyowa, luse luakamusaka bua kuambuluisha bantu bakuabu. Elangana meji bikole bua bilejilu bidi mu Nshapita wa 32, 37, 57, 99.
WA KUKUATSHILA MALU
Bantu ba bidimu bionso, tuambe ne: bakulumpe ne bana bavua badiumvue ne: bavua mua kusemena pabuipi ne Yezu bualu kavua ufila tshimuenekelu tshia ne: uvua ne malu a bungi a kuenza ne udiangata ne mushinga wa bungi to. Bu muvua bantu bamona ne: Yezu uvua uditatshisha bikole bua bualu buabu, bavua badiumvua bimpe pavuabu ku luseke luende. Bua kumanya bualu ebu, bala Nshapita wa 25, 27, 95.
USAMBILA BIKOLE
Yezu uvua ne tshibidilu tshia kusambila Tatuende ne muoyo mujima, pa nkayende ne pavuaye ne batendeledi balelela. Wakasambila misangu ya bungi, ki nganu mu bikondo bia biakudia to. Wakasambila bua kuela Tatuende tuasakidila, bua kumutumbisha, ne bua kukeba buludiki buende kumpala kua kuangata mapangadika manene. Konkonona bilejilu bidi mu Nshapita wa 24, 34, 91, 122, 123.
MUNTU UDI KAYI NE BUDINANGI
Imue misangu Yezu uvua udipangisha amue malu bu mudi kuikisha ne kupitshisha kapepe. Kavua ne lungenyi lua ne: anu meme kumpala to. Mu bualu ebu kabidi, wakafila tshilejilu tshitudi mua kulonda bimpe menemene. Longa bua kumanya mudi tshilejilu etshi mua kukuambuluisha mu Nshapita wa 19, 41, 52.
UFUILANGANA LUSE
Yezu wakenza malu a bungi kupita kulongesha bua kufuilangana luse, mmumue ne: wakaleja mua kufuilangana luse mu nsombelu wende ne bayidi ne bantu bakuabu kabidi. Elangana meji mu bilejilu bidi mu Nshapita wa 26, 40, 64, 85, 131.
MUENA TSHISUMI
Bakavua badianjile kumanyisha ne: bena Yuda ba bungi bavua ne bua kubenga kuitaba Masiya, kabidi ne: baluishi bende bavua ne bua kumushipa. Nunku Yezu uvua mua kulobelela bukole buende mu malu avuaye wenzela bantu. Kadi wakatungunuja ntendelelu mulelela ne tshisumi tshionso. Wakafila tshilejilu tshia tshisumi kudi bayidi bende bonso badi batuilangana ne ntatu anyi buluishi. Bala Nshapita wa 16, 72, 103.
MUENA BUDIPUEKESHI
Yezu uvua mupite bantu bapange bupuangane kule ne kule mu mishindu ya bungi, bu mudi bua dimanya ne meji. Kakuyi mpata bupuangane buende buakamupesha bukole bua mubidi ne bua mu lungeyi bivua bantu bavua bamunyunguluke kabayi nabi. Kadi wakambuluisha bakuabu ne budipuekeshi buonso. Neupete malongesha bua bualu ebu mu Nshapita wa 10, 62, 66, 94, 116.
MUENA LUTULU
Yezu wakatungunuka ne kuleja bapostolo bende ne bakuabu lutulu pavuabu bapangila mua kuidikija tshilejilu tshiende anyi mua kutumikila bivuaye wamba. Yezu uvua wambulula ne lutulu luonso malongesha avuabu nawu dijinga bua bamone mua kusemena pabuipi ne Yehowa. Elangana meji bikole bua bilejilu bia muvua Yezu ne lutulu mu Nshapita wa 74, 98, 118, 135.